08/10/2026
⚖️ سپریم کورٹ کا سرکاری ملازم کی ترقی کے حق میں اہم فیصلہ
سپریم کورٹ آف پاکستان نے ایک اہم فیصلے میں سرکاری ملازم کی ترقی واپس لینے کے محکمانہ اقدام کو کالعدم قرار دیتے ہوئے اسے ترقی کے تمام مالی و دیگر سابقہ فوائد کا حقدار قرار دے دیا۔
سپریم کورٹ میں یہ معاملہ ایک ایسے ملازم سے متعلق تھا جو بطور ایلیمنٹری سکول ٹیچر، فزیکل ایجوکیشن محکمہ تعلیم میں خدمات انجام دے رہا تھا اور اسے اسسٹنٹ ایجوکیشن آفیسر، فزیکل ایجوکیشن، گریڈ 16 کے عہدے پر ترقی دی گئی تھی۔
بعد ازاں محکمہ تعلیم نے اس کی ترقی کا حکم واپس لے لیا، جس کے خلاف ملازم نے قانونی چارہ جوئی کی۔
سپریم کورٹ نے قرار دیا کہ پنجاب سکول ایجوکیشن ڈیپارٹمنٹ سروس رولز 2014ء کے تحت ایلیمنٹری سکول ٹیچر، فزیکل ایجوکیشن سے اسسٹنٹ ایجوکیشن آفیسر، فزیکل ایجوکیشن کے عہدے پر ترقی کا راستہ موجود ہے۔
عدالت نے واضح کیا کہ قواعد میں موجود ایک وضاحتی نوٹ کو بنیاد بنا کر ملازم کی ترقی کے واضح حق کو ختم نہیں کیا جا سکتا۔ محکمہ کی جانب سے اس نوٹ کی تشریح کرتے ہوئے ترقی روکنے کا اقدام درست نہیں تھا۔
سپریم کورٹ نے ایک نہایت اہم اصول بیان کرتے ہوئے قرار دیا کہ:
انتظامی سہولت قانون کا متبادل نہیں بن سکتی اور قواعد میں موجود ابہام کو کسی ملازم کے جائز حق سے محروم کرنے کی بنیاد نہیں بنایا جا سکتا۔
عدالت نے مزید قرار دیا کہ حکومت ایک بڑے سرکاری آجر کی حیثیت سے مثالی آجر کا کردار ادا کرنے کی پابند ہے۔ ملازم کی تنخواہ، سینیارٹی، ترقی اور ریٹائرمنٹ سے متعلق معاملات محض انتظامی نوعیت کے معاملات نہیں بلکہ اس کی پوری ملازمت، مستقبل اور عزت و وقار سے متعلق اہم معاملات ہیں۔
سپریم کورٹ نے یہ بھی قرار دیا کہ جب سروس رولز میں کوئی ابہام پیدا ہو تو اس کا بوجھ ملازم پر نہیں ڈالا جا سکتا۔ ریاست کی ذمہ داری ہے کہ وہ اپنے قواعد و ضوابط کو واضح، مربوط اور قابلِ عمل بنائے۔
سپریم کورٹ کا حتمی حکم
سپریم کورٹ نے پنجاب سروس ٹربیونل کا فیصلہ کالعدم قرار دے دیا اور محکمہ کی جانب سے 24 مئی 2023ء کو ملازم کی ترقی واپس لینے کا حکم بھی ختم کر دیا۔
عدالت نے قرار دیا کہ ملازم اپنی ترقی واپس لیے جانے کی تاریخ سے تمام سابقہ مالی و دیگر جائز فوائد حاصل کرنے کا حقدار ہے۔
یہ فیصلہ سرکاری ملازمین کے لیے ایک اہم اصول واضح کرتا ہے کہ محکمہ اپنے قواعد کی غلط تشریح، انتظامی سہولت یا اپنے پیدا کردہ ابہام کو بنیاد بنا کر کسی ملازم کو اس کے جائز ترقی کے حق سے محروم نہیں کر سکتا۔
Allah Nawaz Khosa Adv
(Service & Constitutional Matters)
Lahore Head Office
33/A Queens Road, Behind Queens Centre, Mozang, Lahore.
📞 WhatsApp: 0333-6073636
Islamabad Office:
Khadim Hussain Khosa Adv Supreme Court
Office No. 31, Third Floor, Al Hameed Mall, G-11 Markaz, Islamabad.
📞 Contact: 0334-6759818
