20/09/2026
سمندری سول اسپتال میں 16 مشینوں پر مشتمل ڈائیلسز وارڈ کا افتتاح
سمندری: ڈپٹی کمشنر فیصل آباد محمد نعمان صدیق اور اسسٹنٹ کمشنر سمندری قمر محمود منج نے کرمانوالی حویلی کا دورہ کیا، جہاں چیئرمین ڈسٹرکٹ کوآرڈینیشن کمیٹی فیصل آباد و ممبر قومی اسمبلی چوہدری شہباز بابر، ممبر صوبائی اسمبلی راؤ کاشف رحیم خاں، سابق چیئرمین مارکیٹ کمیٹی سمندری چوہدری اسلم، جناب حق نواز اور مسز طاہرہ حق نواز، چیئرمین راہِ انسانیت فاؤنڈیشن سے ملاقات کی۔
بعد ازاں معزز مہمانوں نے سول اسپتال سمندری میں 16 ڈائیلسز مشینوں پر مشتمل ڈائیلسز وارڈ کا افتتاح کیا۔ وارڈ کے لیے 8 ڈائیلسز مشینیں چوہدری شہباز بابر ممبر قومی اسمبلی کی جانب سے جبکہ 8 مشینیں راہِ انسانیت فاؤنڈیشن کی جانب سے عطیہ کی گئی ہیں۔
اس موقع پر بتایا گیا کہ ڈائیلسز وارڈ کو چند روز میں آپریشنل کر دیا جائے گا، جس سے سمندری اور گردونواح کے مریضوں کو ڈائیلسز کی سہولت مقامی سطح پر میسر آئے گی اور انہیں علاج کے لیے دیگر شہروں کا سفر نہیں کرنا پڑے گا۔
بعد ازاں ڈپٹی کمشنر فیصل آباد محمد نعمان صدیق، اسسٹنٹ کمشنر سمندری قمر محمود منج چوہدری شہباز بابر ممبر قومی اسمبلی راؤ کاشف رحیم ممبر صوبائی اسمبلی چوہدری اسلم سابق چیئرمین مارکیٹ کمیٹی سمندری نے نور محمد پارک سمندری کا بھی دورہ کیا۔ پارک کو ترجیحی بنیادوں پر بہتر، خوبصورت اور عوام کے لیے مزید سہولت بخش بنانے کے حوالے سے متعلقہ حکام کو تجاویز دی گئیں اور اس پر جلد کام شروع کرنے پر زور دیا گیا۔
