07/10/2026
صوابی: ڈپٹی کمشنر صوابی ڈاکٹر طارق اللہ نے تحصیل کمپلیکس ٹوپی میں خواتین کے لیے قائم کی گئی خصوصی انتظار گاہ کا باقاعدہ افتتاح کیا۔
اس موقع پر اسسٹنٹ کمشنر ہیڈکوارٹر صوابی جناب عدنان ممتاز خٹک، اسسٹنٹ کمشنر ٹوپی ڈاکٹر یمین ثناء صاحبہ اور دیگر متعلقہ افسران بھی موجود تھے۔
ڈپٹی کمشنر ڈاکٹر طارق اللہ نے انتظار گاہ کا معائنہ کرتے ہوئے وہاں فراہم کی گئی سہولیات کا جائزہ لیا۔ انہوں نے کہا کہ سرکاری امور کی انجام دہی کے لیے آنے والی خواتین کو باوقار، محفوظ اور بہتر ماحول فراہم کرنا ضلعی انتظامیہ کی ترجیحات میں شامل ہے۔
انہوں نے مزید کہا کہ خواتین کے لیے الگ انتظار گاہ کا قیام عوام کو بہتر سہولیات کی فراہمی اور سرکاری اداروں میں عوام دوست ماحول کے فروغ کی جانب ایک اہم قدم ہے۔ ضلعی انتظامیہ کی جانب سے عوامی سہولیات میں بہتری کے لیے ایسے اقدامات کا سلسلہ جاری رکھا جائے گا۔
