Mohammed Abdallatef

بدء التنفيذ الفعلي لأول معاملة صادر إلكترونياً عبر منصة «بلدنا» في السودان ✨
اليوم تم تنفيذ أول عقد صادر بالكامل بدون ورق عبر منصة «بلدنا»، مع ربط مباشر بين:
بنك السودان المركزي
وزارة التجارة والصناعة
الجمارك
المواصفات والمقاييس
الموانئ والمعابر والجهات الصحية والبيطرية
الضرائب وديوان الزكاة
كل الخطوات تمت إلكترونياً في نظام واحد… إرسال، استلام، اعتماد وتبادل بيانات بين كل الجهات الحكومية.
ولو استمر الربط بنفس النهج دا ممكن يختصر زمن وإجراءات كانت بتاخد أيام وأسابيع.
الحضور شمل ممثل وزير التحول الرقمي والاتصالات وممثلي بنك السودان ووزارة التجارة.
ودي بداية لتحويل جزء من الصادر في السودان لمنظومة رقمية بدل التعاملات الورقية التقليدية.
بصراحة… الخطوة دي لو استمرت واتطورت: ✔️ بتسهل حياة الشركات والموردين
✔️ بتقلل التعطيل في الموانئ والمعابر
✔️ بترفع الشفافية
✔️ وبتفتح باب أكبر للفرص
نحن محتاجين للنقلة دي عشان نواكب العالم…
ولو الرقمنة مشت بالطريقة الصح، السودان فعلاً بلد الفرص.

دا كلو حمادة والجاي حمادة تاني..🎉🔥

#السودان #الصادر

أقرب محادثات
وأكتر رسائل
وأطول انتظار
كلها كانت في بحث عن تدريب في مجال الاستيراد والتصدير
بس لحدي الآن
ولا واحدة فتحت الباب
أراسل
أسأل
أتابع
وأرجع أبدأ من جديد
مرات تحس إنك قريب
وقريب شديد
لكن الحاجة ما بتكمل
والغريب
إنك تعمل كل دا
في بلد زي السودان
بلد الصادر
بلد الفرص البتتقال في الكلام
لكن الواقع مرات
ما بيمشي بنفس السرعة
مع دا كلّو
ما وقفت
وما ح أوقف
التحديات دي
ما غيّرت قناعتي
ولا كسرت عزيمتي
يمكن أخّرتني
لكن ما رجّعتني ورا

📌 أول أمس حصل تطوّر مهم جداً في قطاع الاستيراد والتصدير في السودان…
رئيس الوزراء د. كامل إدريس قام بزيارة مفاجئة للميناء الجنوبي في بورتسودان، وخلال الزيارة وجّه بتدشين الربط الشبكي بين هيئة المواصفات والمقاييس وهيئة الجمارك بخصوص شهادة الجودة.

الخطوة دي — لو اتنفذت بالشكل الصحيح — حتغيّر طبيعة الإجراءات الجمركية في السودان:
✔️ تسريع استخراج شهادات الوارد والصادر
✔️ تقليل الوقت الضائع بين المواصفات والجمارك
✔️ تقليل التلاعب والازدواجية
✔️ زيادة الشفافية وثقة المستثمرين
✔️ تحسين جودة الخدمة للمواطن

والرئيس قالها بالحرف:
"لا تهاون في الإجراءات الجمركية المرتبطة بخدمة المواطنين."

وده اتسق تماماً مع توجه الحكومة الحالية نحو الحوكمة، الشفافية، ورفع كفاءة الخدمات — وخصوصاً في المنافذ الحيوية زي الميناء الجنوبي.

---

💬 السؤال هسه…
التكنولوجيا بقت عنصر أساسي في تسريع حركة التجارة، وضبط الإجراءات، ورفع مستوى الكفاءة…

وإنتو — الناس الشغّالة في الاستيراد، التصدير، التخليص، النقل، أو التجارة عموماً — التقنية أفادتكم بشنو؟

⬇️ قولوا لينا تحت:
• شنو أكتر أداة تقنية ساعدتك في شغلك؟
• Google Sheets؟
• WhatsApp Business؟
• الذكاء الاصطناعي؟ مواقع التجارة الالكترونية؟
• تطبيقات إدارة الشحنات؟
• برمجيات الفواتير؟
• ولا أدوات التحليل والتسعير؟

خلونا نشارك تجاربنا… يمكن كلامك يساعد زول تاني ويختصر عليهو شهور من التعب.

👇 اكتب في التعليقات:
"أكتر تقنية ساعدتني في شغلي هي..."

---

✨ ولو شايف البوست مهم…
ادعم الصفحة بلايك + شير + Follow
الجاي أحسن من الفات…
والفات حمادة والجاي حمادة مربوط شبكياً 😂🔥

#الجمارك
#سونا

📌 تصحيح مهم ولازم الناس تعرفو 👇

في بداية سنة 2024م تم إدخال معامل جديدة في السودان، وتمت مخاطبة هيئة الغذاء والدواء السعودية رسميًا مع تقديم جميع الفحوصات المطلوبة المتعلقة بصادر اللحوم…
لكن حتى الآن ما وصل رد رسمي على الخطاب من الجانب السعودي.

✨ نقطة مهمة جداً:
الحديث المتداول عن عدم مطابقة المسالخ للشروط غير صحيح… المسالخ كانت شغالة صادر بصورة طبيعية لحد شهر 9 / 2023م.

📍الإيقاف ما كان بسبب شروط أو جودة…
الإيقاف تم بعد إعلان وزير الصحة السوداني عن انتشار الكوليرا… وبناءً عليه السعودية أوقفت استيراد اللحوم من السودان.

🔧 بعدها حصل دمار كبير للمعامل في الخرطوم من ملي***ات الدعم الىىىريع، ودا أخّر السودان من تجديد الفحوصات المطلوبة للصادر…
لكن رغم الظروف… تمت إعادة تجهيز معامل جديدة قبل نهاية 2023م (شهر 12 بالضبط)، وبعدها تم تجديد المخاطبة لهيئة الغذاء والدواء السعودية في يناير 2024م مع دعم رسمي من مستثمرين سعوديين يمتلكون مسالخ داخل السودان…

وبرغم كل دا…
📍ما في أي استجابة لحد الآن.

والحقيقة الواضحة اليوم:
✔ السودان استوفى كل المطلوبات الفنية
✔ الفحص جاهز
✔ المسالخ مطابقة
✔ الصادر ممكن يرجع في أي لحظة بمجرد الرد

بشكر باشمهندس هيثم المجذوب على المعلومات القيمة👆 وح اخت رابط صفحتو في اول تعليق👇💜
---

🔹 خلال الفعاليات الاقتصادية الأخيرة في السعودية، كان في تحرك واضح لوفد حكومة ولاية القضارف داخل المعرض السعودي الأخير لتعريف المستثمرين بحجم الإنتاج والفرص الحقيقية في الثروة الحيوانية والمحاصيل…
والتركيز كان على فتح الأبواب وإعادة مسار الصادر رسمياً بصورة مؤسسية واضحة.

---

🟡 الآن الدور على الناس:
📍 انشروا المعلومة الصح
📍 اعملوا لايك وشير للبوسـت
📍 خلو الصوت يصل

واكتبوا تحت 👇🔥:
الموضوعات الممكن نشاركها معاكم 🎉

الفات حمادة… والجاي حمادة تاني 🔥

---

#السودان #القضارف #السعودية #اقتصاد #استثمار

القضارف ما قاعدة تهظر هسع…
ولاية كاملة ماشّة بخطة واضحة: الزراعة ما بس إنتاج… الزراعة اقتصاد وصادر وتواجد محلي وعالمي.

ومشاركتها الأخيرة في معرض جدة الدولي للزراعة والمنتجات الغذائية ما كانت زيارة ساي… كانت رسالة:

> “نحن موجودين… ومحاصيلنا جاهزة للعالم.” 🌍🔥

الجناح البيمثّل القضارف هناك كان مليان منتجات وأرقام وفرص استثمار…
من السمسم والفول وحب البطيخ وحب العيش لحد مشاريع كبيرة في الزراعة والثروة الحيوانية.
والوفد المشارك من الوزارة والمالية ومسلخ القضارف الحديث شغّال على هدف واضح:
فتح أسواق، توقيع عقود، وجذب مستثمرين.

والجميل إنو الشغل البتم هناك…
أنا شايفو هنا بعيني في الحقول والأسواق في الفاو 👀🌾

لما تحوم وسط الحواشات وتشوف السمسم لسه متكتِّل في الضقل…
أو تشوف الفول متكدّس في السوق…
أو تشوف البامية والسارا وحب البطيخ جاهزين للنقل…
بتفهم حاجة مهمة جداً:

> القضارف ما ماشّة للعالم من كلام… ماشّة من أرض تنتج، وسوق يتحرك، وناس تتعب.

الحُوامة في سوق الفاو، الريحة بتاعت الخيش الجديد، أصوات الكارو والبكاسي، حركة التجار…
كلها حلقات في سلسلة طويلة بتنتهي هناك في جدة، دبي، الصين، تركيا… والمستقبل أكبر.

القصة ما كانت زيارة سوق ساي…
القصة إنو السوق هنا بداية الطريق للعالم.

والزمن دا بالذات، البلد دي محتاجة زول يشوف الصورة الكبيرة:
من حبّة سمسم في الأرض… لحد حاوية ماشّة على ميناء.

القضارف الليلة في المعارض الدولية…
وبكرا في عقود أكبر…
والخطوة الجاية؟
اكتشاف، تنظيم، تطوير… والباقي دا الزمن يورينا.

الفات حمادة والجاي حمادة تاني ، اعمل لي حمادة دا لايك و شير عشان تعرف كل جديد💜

#القضارف #الفاو
#الصادر
#السعودية
#السمسم #الفول
#استثمار
#تجارة

السمسم… سيد الموسم، وود البلد البمشي رحلة طوييييلة قبل يصل يد الزبون أو الميناء.
ولو في محصول عندو قصص وذكريات وحكايات في الفاو والقضارف… فهو السمسم 🌾🔥.

القصة بتبدأ من هناك…
من أول ما المزارع يرمي الحبّة في الواطة.
التراب بكون لسه سخن بعد المطر، والسماء مفتوحة… والناس تقول:
“الله يطرح البركة.”
والسمسم من أوّل يوم بتعامل معاك كأنو ولدك—عايز متابعة، وقيود، ونظرة كل صباح.

بعد أسابيع…
تبدأ الخُضرة تطلع، والناس تمرق كل يوم تشيك على الحشرات، على المطر، على السقاية، وعلى وضع الأرض.
واللهفة بتبدأ تزيد… لأنو السمسم دا لو وقف صاح، واقف معاك للآخر.

يجي زمن الحصاد…
المنطقة كلها تقوم على صرخة واحدة:
“يا جماعة… السمسم قام!”
وتبدأ عملية القطع…
الناس تجمع في الضقل، تشيل الحزم وتربطها في شكل اهرام يسموها "كونليق"، وترصّها في الشمس عشان تنشف.
والريحة؟
ريحة ما بتتنسي… ريحة موسم كااااامل.

بعد داك يجي الحتّ—
يلمّوا الحزم، ويضربوها بالعَكاكيز…
وكل ما تسمع صوت الحبوب وهي بتقع… تعرف إنو الشغل ماشي صاح 🔥.

يتعبّى السمسم في الخيش…
ويبدأ المشوار للسوق.
هناك يبدأ الشغل الحقيقي—
ناس الميزان طبعا بعد ادخال "الطرناطة" في بورصة القضارف ، التفتيش واي تاجر شايل "الفتاشة"، الفرز، الكلام عن الجودة، النسبة، اللون، النظافة…
وكل تاجر عندو عين خاصة بتعرف السمسم النضيف من أول نظرة 👀.

بعد البيع…
يمشي للغربال، ويتنضّف مرتين تلاتة، وبعدها يتفرّق:
– سمسم موجه للمستهلك المحلي…
ودا ممكن يستخدمو في حلويات السمسم، الطحنية والطحينة ،زيت السمسم والأمباز وغيرو من المنتجات..
– وسمسم ماشّي على بوابة التصدير… من القضارف لبورتسودان…
السمسم الأبيض الأكثر شهرة والمعروف بسمسم القضارف تطلع ليهو شهادات المنشأ شهادات الجودة ومنو يطلع ورق الصادر للدولة المعنية
بعدو السمسم الأحمر اللي هو نفس المحصول باختلاف الأجواء والري والعوامل المؤثرة بنتج لينا السمسم الاحمر...

والجنطات تتقفل والشاحنات تتحرك 🚛💨.

وفي الميناء…
السمسم يكون واقف آخر وقفة ليهو في السودان ومودع على ظهر الباخرة البسموها في مصطلحات التجارة الدولية بالفوب أو ال FOB.
من هنا يسافر للعالم🌍—
ده يدخل مصنع زيت، وده يدخل مصانع حلويات، وده يدخل في منتجات غذائية كبيرة وغيرو من القيم المضافة.

والقصة كلها من بدايتها لنهايتها بتقول:
“السمسم ما بس محصول… السمسم حكاية وطن ومصدر رزق وعمود اقتصاد كامل.”

المرات الجاية ح نغوص في شغل الصادر وشغل القيم المضافة عشان منتجاتنا م تتصدر كخام ، الدول المستفيدة من انتاجنا وح نطلع على مجموعة من المنتجات البنصدرها ح نتكلم بالارقام والمعلومات ح تجي من بطن السوق م كلام ساااااي 💜

#السمسم

#القضارف #الفاو
#الصادر

الفاو يا جماعة ما منطقة ساي… دي سلة محاصيل ماشّة بالحيل ووقفتها في موسم الحصاد ما بتتخطى 🔥🌾.
والزمن دا بالتحديد… الناس في الحواشات بين القطع والدق واللمّ، والمزارعين شغّالين ليل نهار زووووول فاضي لي زوول مافي.
وفي الزمن دا بالذات، الموسم واقف في قمّتو—فترة الحصاد… والواطة بتتكلم بلسان المحاصيل ذاتها.

أهم المحاصيل البتتزرع في الفاو وبتكون جاهزة في الفترة دي:

🌾 السمسم
سيد الموسم… ريحة الخيش المليان سمسم جديد بتخليك تعرف إنو الواطة هنا كريمة شديد وبتوريك إنو الإنتاج هنا مختلف، والتربة بتدي بلا حساب. .

🌱 الفول السوداني
محصول مهم للسوق البضاعة البتمشي المحلي والصادر، وجودتو في الفاو معروفة من زمن ،خصوصاً في المناطق السهلة..

🌾 حب البطيخ
محصول استراتيجي في الفاو… إنتاجو ممتاز وبيدخل السوق بكميات محترمة.من المنتجات الواقف عليها السوق بقوة.

🌾 العيش
واحد من المحاصيل الأساسية في مناطق كثيرة حول الفاو، ما بين المطري والمروي دا زمن ظهورو وإنتاجو .

🥬 البامية العادية
إنتاجها كبير، وبتدخل السوق بجودة كويسة ومطلوبة لكل الاستخدامات.

🥬 بامية السارا
مميزة بشكلها وطولها، وعليها طلب عالي بتجي من الصعيد اقرب سوق ليها أب رخم… الناس بتعرفها من أول نظرة.

👨‍🌾 أها… هسع الناس في الحواشات بين القطف والدق والنقل، والبيوت مليانة حركة… جلابيات تتغبّر، جرادل تتشقلب، وأصوات الكارو والبكاسي ماشة جاية🚚🐴...
الجو دا كلّو بيقول:
“دا موسم الحصاد… ودا زمن الشغل الحقيقي.”

ولو إنت من الناس البتشتغل في التجارة أو مهتم بالصادر… الزمن دا هو اللحظة الذهبية للمتابعة، للحوّامة، ولقراءة السوق... دا الزمن البتتفتح فيهو الأبواب.

الصورة في خزان أب رخم من أكبر الأسواق في مشروع الرهد بالفاو في ولاية القضارف ، اللي أسسو القائد العظيم نميري💂‍♀️، ممكن المرات الجاية نتكلم عن المشروع عن المحاصيل بتفصيل اكتر ونوريكم حركة الصادر وتغذية بورصة القضارف.

ادعمونا باللايك والشير ونوعدكم بما هو كل جديد🫣💜

#الفاو
#القضارف


#الصادر
#سمسم #بامية #عيش #تسالي

الزول اللي بمشي يحوم في الأسواق بعرف إنو التجارة ما بس بيع وشراء… دي رحلة كاااااااملة.
الطلعة من البيت، الهوا البضرب في وشك، والمشي بين القش ولقيط العنكوليب والشوالات… بتتمنّى اللحظة دي ما تنتهي 😄🔥.

الحُوامَة في السوق ليها نكهتها الخاصة—تعب؟ أيوة. مشاوير؟ كتيرة.
لكن مع التعب دا بتحس بمتعة غريبة…
تمشي من دكان لدكان، تفاصل، تسمع أخبار الموسم، تسمع نكات خاصة بالبيئة العايشين فيها تسمع الامثال واتضربت في منو ... وتلقاهم بقولوا ليك:
“الليلة السوق صاحي… أمش شوف المحل الفوق دا.”
وتمش… وتشوف… ويمكن تشتري ويمكن لا.
لكن الأكيد إنك بتتعلم حاجة كل يوم 👀🌾.

تكابس المزارعين وتشاغلهم اهاااا عمنا الليلة فردة راعي ولا قميص عامر😂 يقول ليك الموسم دا الخير رااااقد ويوزع لي عمالو في الحليمة ويحكي نعمة ربنا الليلة جدعتي جارة في ١٥ شوال الحمد لله 💜🙏

ومع الحركة والحوّامة…
ما تنسى تستمتع بـ البلد وتقاليدها ❤️
الضحكة العفوية من تاجر كبير في السن ويقول ليك والله ي ولدي السوق والسمسم دا بالذات داير صبر ايوب ومال قارون وعمر نوح😂💜 ، القعدة تحت شجرة مع ناس السوق، كباية الجبنة مع ست الشاي العندها جدعة ونص مزروعة في أمانة الله☕🔥، مع خالتو نجوى تشرب أُم جنقر وموية العيش و عصير الدخن 🤤.

والأجمل؟
تجي راجع للاهل في القرية تدق عصيدة الدخن و الكسرة الرهيفة بالدخن وملاح التقلية بالسمك واييييييييك هلم جرّا من المتعة وطيبة اهلنا 💜 أكلات بتخليك تحس إنك جزء من المكان، وما زول غريب.

وحاجة مهمة…
السوق ليهو زمنو، والتجار عندهم طريقتهم، واحترامك ليهم وتعاملك بالصدق وتتعامل بي طيبة اصلك بيقرّبك ليهم وبيخلي التعامل أسهل وأطيب 🙏✨.
بتلقى نفس الزول البتعاملو معاه أول مرة، المرة الجاية بيقول ليك:
“أها يا زول… ورّينا هسع داير شنو؟”

الحُوامة دي… لو ما جربتها، فات عليك نص متعة التجارة.
ولو جرّبتها… مستحيل تبطلها ❤️🔥.

#تجارة

#القضارف #الفاو
#الصادر

الزول البمشي السوق لأول مرة بيفتكر الموضوع بسيط… لكن أول ما تنزل هناك بتعرف إنو السوق عالم براهو.
من أول خطوة بتتعلم إنو حتى الملابس البتلبسها بتعمل فرق—التجار بيفهموك من وقفتك، من جلابيتك، من طريقة مشيتك… نظراتهم بتقول ليك:
“الزول دا جاي فاهم…ولا زول جربندي ساي، جاي يشتري وشايل كيس أبّكر بتاعو ولا جاي يتفرّج ويكشف السوق ويتخارج؟” 👀🔥

المواصلات؟ ما في حاجة اسمها وسيلة واحدة.
مرة تلقاك راكب الكارو 🫏، مرة في صندوق البوكسي ولا الدفار🚚 ، ومرة مع ناس ماشين بالبهائم وكلكم في طريق واحد… ولا ياهو تكون مروق وراكب الجكـــــGXRـــس بتاعك 😂
والطريق ذاتو ما مضمون—غبار، وحُفر، وزلط مقطوع… لكن في النهاية بتصل، لأنو السوق ما بتفوّت.

وأجمل – وأصعب – حاجة…
إنك تمشي وتجي وسط الشوالات، تشيل، تخت، تفاصل، وتشم ريحة محصول لسة طالع من التراب 🌾🔥.
وعادي جداً… في سفرة واحدة تبوّظ جلابية أو جلابيتين 😂😅
لكن لما ترجع شايل معلومة، أو عامِل صفقة، أو كاسِب تجربة… بتنسى الخراب وتمشي بكرة تاني.

السوق ما بس مكان…
السوق مدرسة، وعرق، ومواقف، وضحكة مع تاجر، وفنجان جبنة في نص الهوا،ولا تطرف ليك بي أم جنقر في السوق😂، والطريق الطويل البعلمك أكتر مما بيعلمك أي زول.

#تجارة
#السوق
#القضارف #الفاو
#الصادر

في ناس بتفتكر التجارة بس أرقام وفواتير…
لكن في الحقيقة؟!
المتعة الحقيقية في الحوّامة من سوق لسوق 😄🔥
تصحى بدري قبل الدغش، تشيل دفترك، وتبدأ الرحلة… الجمعة الطنيطبة، السبت روينة، الأحد ٣٦، الثلاثاء أب رخم، الخميس سوق ١٠.
تمش السوق دا تلقى سعر… تمشي التاني تلقى جودة… وترجع للتالت عشان تتأكد 😅🚚🌾.

تخُم كاشك من بدري 💰😂 ترصهم في كيس أبّكر وتبقى مارق..

أحلى لحظة؟
لمّا تلقى بضاعة نظيفة ومناسبة… وتقول للتاجر: “خلِّيها لينا” قبل تمش تحاسبوا في محلو جنيه يدقش جنيه، وتمشي تكابس على كارو الحمار تنقل شوالاتك🐴🛒.
تركب فوق الكارو، والهوا يضرب في وشك، والشوالات حولك… وتحس إنو دي اللحظة البتخليك تبتسم وتقول:
“دي التجارة… دا الميدان… ودا الشغل البنعرفو” ❤️🔥.

ومع الزمن…
إنت بتعرف التجار،
والتجار بعرفوك…
ومجرّد ما تدخل السوق تلقى التحية جاية من بعيد:
“أها اااا زول! الليلة م داير سمسم ولا فول؟ كدي تعال شيل الويكة دي” 😄🌾.

دي متعة الشغل الحقيقي…
متعة الحركة، والتفاوض، والصفقات اللي بتتعمل بالنظرة قبل الكلام.
والحوّامة دي—الناس البتجربها مرة، ما بتنساها ❤️🔥.

#الفاو #الصادر

قبل أيام نزلت أب رخم – الفاو 🚚🌾…

والزيارة دي فتحت لي باب فَهْم جديد لحركة المحاصيل في ولاية القضارف عامة. الفاو ذاتها ما بس سوق واحد—هي شبكة أسواق موزّعة على أيام الأسبوع، وكل يوم عندو سوقو ونبضو وطريقتو 👇👇

الجمعة: الطنيطبة
السبت: روينة
الأحد: ٣٦
الاثنين: أوف (مافي سوق)
الثلاثاء: أب رخم
الأربعاء: سوق ٣
الخميس: سوق ١٠ (سوق عشرة)

ومن بين كل الأسواق دي… في سوقين واقفات زي الأعمدة:
أب رخم و سوق عشرة 🔥🔥
ديل أكبر، أوسع، وحركتهم أقوى—شاحنات داخلة طالعة 🚛💨، أسعار بتتغيّر، ومعلومات لو عرفتها بترفعك خطوة لقدام في مجال الصادر.

في أب رخم لفّيت زيّ زي التجّار 😎، سألت عن الجودة، شُفت الفرق بين المطري والمروي، ودخلت في تفاصيل ما بتلقاها لا في كورس ولا فيديو—دي خبرة تراب وريحة سمسم لسة مفتوح من الخيش 😄🌾🔥.

السوق هنا بعلّمك كيف تقرأ الموسم… متين تبيع؟ متين تشتري؟ شنو الماشي؟ وشنو الواقف؟ 👀📈
ولو ناوي تدخل مجال التصدير بعقلية واعية… لازم تشوف الحاجات دي من الميدان.

ودا بس البداية… جولات ميدانية تانية جاية بحاول أنقل ليكم الواقع من قلب الحركة 🎥🌍🔥.

#القضارف #الفاو #الصادر

يجمع معرض فوود آفريكا 2025 دولًا من مختلف أنحاء العالم لعرض أحدث الابتكارات والمنتجات والتقنيات التي تُشكّل مستقبل صناعة الأغذية والمشروبات

🗓️ من ٩ إلى ١٢ ديسمبر ٢٠٢٥ في مركز مصر للمعارض الدولية, القاهرة

🕙 من الساعة ١٠:٠٠ صباحًا حتى ٦:٠٠ مساءً