01/10/2026
OGEYSIIS IYO FARIIN MUHIIM AH
XOOJINTA TAYADA WAXBARASHADA ARDAYDA SHAHAADIGA AH
Guddoonka Waxbarashada Degmada Baraawe wuxuu ogeysiinayaa dhammaan ardayda fasallada 12aad iyo 8aad, waalidiinta, maamulayaasha iyo macallimiinta in la xoojinayo tayada waxbarashada iyo diyaar-garowga imtixaannada shahaadiga ah.
ARDAYDA FASALLADA 12AAD IYO 8AAD
1. Ardaygii ku baasi waaya imtixaanka billaha ah oo lagu qiimeyn doono heerkiisa waxbarasho, waxaa dib loogu celin doonaa Fasalka Form3 ama Fasalka 7aad, si uu u helo fursad uu ku xoojiyo aqoontiisa.
2. Ardayga aan ka qeybgalin imtixaannada billaha ah iyo kuwa teeramka isaga oo aan haysan sabab rasmi ah oo la aqbali karo, waxaa dib loogu celin doona Form3 ama Fasalka 7aad
3. Ardayga si joogto ah usoo xaadiri waaya fasalka, laguma dari doono liiska ardayda shahaadiga ah
4. Ardaydu waa inay si joogto ah uga qeybqaataan casharrada, imtixaannada, shaqo-guriyada iyo muraajacooyinka (Revision).
WAALIDIINTA
Waalidiinta waxaa laga codsanayaa inay si dhow uga qeybqaataan waxbarashada carruurtooda:
1. Inay ka warhayaan xaadiritaanka ardayga
2. Inay si joogto ah uga warhayaan xaaladda waxbarasho, anshax iyo horumarka ilmahooda.
3. Inay si joogto ah u booqdaan dugsiyada, kana wareystaan maamulka iyo macallimiinta xaaladda waxbarasho ee carruurtooda.
MAAMULAYAASHA IYO MACALLIMIINTA
Guddoonka Waxbarashadu wuxuu ku boorrinayaa maamulayaasha iyo macallimiinta:
1. Inay laba jibaaraan dadaalkooda iyo masuuliyadda ay ka saaran tahay tayada waxbarashada.
2. Inay si joogto ah ula socdaan xaadiritaanka, fahamka iyo heerka waxbarasho ee arday kasta.
3. Inay Xafiiska Guddoonka Waxbarashada kala kaashadaan culeys kasta ama caqabad kasta oo soo wajahda dugsiga.
4. Inay si buuxda ugu hoggaansamaan shuruucda, siyaasadaha iyo habraacyada Wasaaradda Waxbarashada.
6. Inay si gaar ah ula socdaan ardayda heerkooda waxbarasho hooseeya, ayna u sameeyaan taageero iyo qorshe waxbarasho oo gaar ah.
7. Inay waalidiinta si joogto ah ula wadaagaan warbixinta xaadiritaanka iyo horumarka waxbarasho ee ardayda.
