Maxkamadda Sare JSL

𝐌𝐚𝐝𝐚𝐱𝐰𝐞𝐲𝐧𝐚𝐡𝐚 𝐉𝐚𝐦𝐡𝐮𝐮𝐫𝐢𝐲𝐚𝐝𝐝𝐚 𝐒𝐨𝐦𝐚𝐥𝐢𝐥𝐚𝐧𝐝 𝐨𝐨 𝐊𝐮𝐥𝐚𝐧 𝐗𝐨𝐠-𝐰𝐚𝐫𝐫𝐚𝐧 𝐚𝐡 𝐥𝐚 𝐲𝐞𝐞𝐬𝐡𝐚𝐲 𝐒𝐡𝐢𝐫-𝐠𝐮𝐝𝐝𝐨𝐨𝐧𝐤𝐚 𝐥𝐚𝐛𝐚𝐝𝐚 𝐆𝐨𝐥𝐞 𝐢𝐲𝐨 𝐆𝐮𝐝𝐝𝐨𝐨𝐦𝐢𝐲𝐚𝐡𝐚 𝐌𝐚𝐱𝐤𝐚𝐦𝐚𝐝𝐝𝐚 𝐒𝐚𝐫𝐞.

Madaxweynaha Jamhuuriyadda Somaliland, Mudane Cabdiraxmaan Maxamed Cabdilaahi (Cirro) ayaa maanta kulan Xog-warran Qaran ah la yeeshay Shir-guddoonka Labada Gole Qaran ee Guurtida mudane Saleebaan Maxamuud Aadan iyo Wakiillada, Guddoomiye Ku xigeenka koowaad mudane Siciid Mire Faarax (Giire) iyo Guddoomiye Ku xigeenka labaad mudane Cali Xaamud Jibriil iyo Guddoomiyaha Maxkamadda Sare mudane Aadam Xaaji Cali Axmed.

Kulanka oo ahaa wada-tashi Qaran, ayaa Madaxweyne Cabdiraxmaan Cirro waxa uu si guud uga xog warramay sida ay Xukuumaddu u wado qorshayaasha nabadda, amniga, horumarinta bulshada, dedaallada ictiraafka iyo kuwa diblumaasiyadeed, kuwaasi oo dhammaantood u socda si wacan.

Madaxweynuhu waxa kale oo uu ka warbixiyey Safarradii Shaqo ee uu ku tagay Dalalka Imaaraadka Carabta iyo Itoobiya, isaga oo ka hadlay nuxurka, ujeeddada iyo guulaha diblomaasiyadeed ee ay safaradiisu xambaarsanaayeen, isaga oo tilmaamay in labadan safar ay ahaayeen kuwo kor u qaaday xidhiidhka Somaliland la leedahay dalalkaas, isla markaana xoojinaya iskaashiga dhinacyada dhaqaalaha, maalgashiga, amniga, iyo siyaasadda gobolka.

Madaxweynuhu waxa uu Madaxda sare ee Laamaha Dawladda ku bogaadiyey doorka muhiimka ah ee ay ku leeyihiin ilaalinta sharciga, dimoqraadiyadda iyo habsami u socodka Hay’adaha uu Qaranka JSL ku dhisan yahay.

Iyaguna dhankooda, Shir-guddoonka labada Gole Qaran, Guddoomiyaha Maxkamadda Sare ayaa Madaxweynaha ku bogaadiyay hannaanka la-tashiga, xog-warranka joogtada ah iyo daah-furnaanta dawladnimo ee uu hormuudka ka yahay, iyaga oo tilmaamay in wadashaqaynta noocan ahi ay kor u qaadayso kalsoonida ka dhaxaysa Hay’adaha Qaranka iyo mideynta go’aan-qaadashada qaran.

Ugu dambayntii, Madaxweynaha Jamhuuriyadda Somaliland waxa uu xusay in Somaliland ay ku tallaabsatay horumar iyo xasillooni siyaasadeed oo ay saldhig u yihiin Nabad, Dimuqraadiyad, Dawladnimo hufan iyo iskaashiga ka dhexeeya Hay’adaha Qaranka.

Wa bilaahi tawfiiq.

Sawirada Qaybta labaad ee Furitaanka Maktabadda iyo Hoolka Maxkamadda Sare JSL.