De Martino Public Hospital

𝗖𝗶𝗶𝗱 𝗠𝘂𝗯𝗮𝗮𝗿𝗮𝗸! 🌙

Maamulka iyo dhammaan shaqaalaha De Martino Public Hospital waxay shacabka Soomaaliyeed ugu hambalyeynayaan munaasabadda barakeysan ee Ciidul Adxaa. Waxaan idiin rajeyneynaa ciid farxad, caafimaad, nabad iyo barwaaqo leh. Alle ha inaga aqbalo acmaasha wanaagsan, hana idinka yeelo kuwii ku ciida bashbash iyo reynreyn.

Agaasimaha Guud ee De Martino Public Hospital, Dr. Abdirahim Omar Amin, ayaa xarunta xuquuqda bukaanka ee dhowaan lagu soo kordhiyay isbitaalka ku soo dhoweeyay wafdi ka socday WHO.

Wafdiga ayaa kormeer ku sameeyay adeegyada cusub ee loogu talagalay ilaalinta iyo daryeelka xuquuqda bukaannada, iyagoo bogaadiyay horumarka iyo dadaallada lagu xoojinayo tayada adeegyada caafimaad ee isbitaalka

De Martino Public Hospital wuxuu sii wadaa horumarinta adeegyada caafimaadka iyo ilaalinta xuquuqda bukaanka si loo xaqiijiyo daryeel caafimaad oo tayo leh.

Maalinta Kalkaalisooyinka Adduunka awgeed, waxaan qadarin iyo mahadnaq u direynaa dhammaan kalkaalisooyinka si hagar la’aan ah ugu adeegaya bulshada.

Daryeelkiinna, samirkiinna, iyo naf-hurnimadiinnu waa tiirka adeegga caafimaadka.

Hambalyo dhammaan nurses-ka geesiyaasha ah ee habeen iyo maalin u taagan badbaadinta nolosha.

Bandhigga Buugga Caafimaadka Carruurta iyo Dhallaanka ayaa maanta si rasmi ah loogu qabtay Jowhara Hotel, waxaana soo bandhigay Prof. Cumar Mohamud Abiikar oo ah Madaxa Qeybta Carruurta. Buuggan ayaa diiradda saaraya horumarinta adeegyada caafimaadka carruurta iyo dhallaanka, isagoo xoojinaya muhiimadda daryeel caafimaad oo tayo leh iyo kor u qaadista wacyiga bulshada.

Munaasabadda waxaa qeyb ka ahaa Agaasimaha Guud Isbitaalka Abdirahim Omar Amin, Agaasime ku xigeenka, dhakhaatiirta, iyo shaqaalaha isbitaalka, kuwaas oo si weyn u bogaadiyay dadaallada lagu horumarinayo adeegyada caafimaadka.

Ugu dambeyn, bandhigga waxaa si rasmi ah u soo xiray Agaasimaha Guud ee Isbitaalka, isagoo ka hadlay muhiimadda uu buuggan u leeyahay kor u qaadista aqoonta caafimaadka carruurta iyo dhallaanka, isla markaana tilmaamay in uu door weyn ka qaadan doono hagidda adeegyada caafimaad iyo wacyigelinta bulshada.

Munaasabad ballaaran oo xarig jarka iyo daahfurka adeegyo caafimaad oo casri ah ayaa maanta si heer sare ah uga qabsoontay De Martino Public Hospital, taas oo muujineysa horumar muuqda oo laga sameeyay adeegyada caafimaadka ee isbitaalka.

Munaasabaddan ayaa lagu daahfuray adeegyo muhiim ah oo ay bulshada baahi weyn u qabeen, kuwaas oo ay ka mid yihiin CT Scan casri ah oo lagu sameynayo baaritaanno sax ah, Blood Bank la casriyeeyay oo ka qeyb qaadanaya badbaadinta nolosha bukaannada, iyo sidoo kale dib-u-habeyn iyo tayeyn lagu sameeyay qeybta sheybaarka si loo hubiyo adeegyo baaritaan oo degdeg ah oo la isku halayn karo.

Xarig jarka munaasabaddan qiimaha leh waxaa si rasmi ah u sameeyay Wasiirka Wasaaradda Caafimaadka, Dr. Ali Haji Adan, iyadoo ay goob joog ka ahaayeen Agaasimaha Isbitaalka Dr. Abdirahim Omar Amiin, ku xigeenkiisa, madaxda qeybaha kala duwan iyo shaqaalaha isbitaalka.

Agaasimaha Isbitaalka, Dr. Abdirahim Omar Amiin, ayaa si rasmi ah u daahfuray qeybahan cusub, isagoo si qoto dheer uga hadlay horumarka ballaaran ee isbitaalka, qorshayaasha mustaqbalka, iyo sida adeegyadan cusub ay u xoojinayaan awoodda isbitaalka ee bixinta daryeel caafimaad oo tayo leh, degdeg ah, isla markaana la jaanqaadaya baahiyaha bulshada.

Wuxuu sidoo kale xusay in casriyeenta lagu sameeyay qeybaha CT Scan, Blood Bank iyo sheybaarka ay sare u qaadi doonto kalsoonida bulshada iyo tayada adeegyada caafimaad ee la siiyo bukaannada, isla markaana yareyn doonto baahida loo qabo in bukaannadu u safraan dibadda.

Ugu dambeyn, munaasabadda waxaa soo xiray Wasiirka Wasaaradda Caafimaadka, Dr. Ali Haji Adan, oo si weyn u bogaadiyay maamulka iyo shaqaalaha De Martino Public Hospital dadaalka joogtada ah ee ay ku horumarinayaan adeegyada caafimaad. Wasiirku wuxuu carrabka ku adkeeyay in dowladda ay ka go’an tahay xoojinta kaabeyaasha caafimaadka dalka, isla markaana ay sii wadi doonto taageerada ay siiso isbitaallada si loo hubiyo in bulshada Soomaaliyeed ay helaan adeeg caafimaad oo casri ah, tayo leh, lana gaarsiiyo qof walba.

Munaasabaddan ayaa ku soo gabagabowday jawi farxad leh iyo rajo cusub oo ku aaddan horumarinta adeegyada caafimaadka ee dalka, gaar ahaan De Martino Public Hospital oo door muuqda ka qaadanaya daryeelka bulshada.

Maanta waa World Midwife Day

Waxaan u mahadcelineynaa dhammaan umulisooyinka naftooda u huray badbaadinta hooyooyinka iyo dhallaanka. Doorkiinnu waa mid qiimo badan oo aan la ilaawi karin.

“Ummuliso ma aha shaqo oo kaliya, waa wicitaan iyo naxariis.”