27/04/2026
Soomaaliya waxay taagan tahay marxalad taariikhi ah.
U-gudbidda nidaamka doorasho ee “qof iyo cod” ma aha oo kaliya isbeddel doorasho—waa imtixaan lagu cabbirayo in kalsoonida shacabka dib loo dhisi karo iyo in kale.
Laakiin su’aasha dhabta ah waa tan:
Doorashadani ma ka tarjumaysaa rabitaanka shacabka, mise waa nidaam la maamulayo natiijadiisa?
Walaacyada jira lama dafiri karo ~waa xaqiiqooyin muuqda oo haddii aan si degdeg ah wax looga qaban, dhaawici kara hannaanka iyo kalsoonida shacabka.
Hadda, geeddi-socodka waxaa loo raray ilaa 5-ta May. Laakiin dib-u-dhigiddu kaligeed ma aha xal—waa fursad keliya oo ku xiran haddi wax la saxaayo!
Sidaas darteed, ka hor 5-ta May, waxaa lama huraan ah:
· Guddi doorasho oo si dhab ah u madax-bannaan
· Habraacyo daah-furan oo si buuxda loo hubin karo
· Kormeer madax-bannaan oo gudaha iyo caalami ah
· Xisaabtan sharci ah oo cad oo ka dhan ah cid kasta oo faragelisa nidaamka
Haddii qodobadan aan si muuqata loo xaqiijin ka hor 5-ta May, dib-u-dhigistu waxay isu beddeli doontaa fursad luntay—kalsooniduna si toos ah ayey u dhaawacmi doontaa.
“Qof iyo cod” ma aha hal-ku-dheg siyaasadeed—waa nidaam ay tahay inuu noqdo mid shacabka si dhab ah u aaminsan yahay.
Kalsoonidu lama sheego—waa la dhisaa, waana la xaqiijiyaa.
Su’aasha ugu dambeysa waa tan:
Ma dhiseynaa nidaam shacabka leeyahay, mise mid la maamulo natiijadiisa?
# Doorasho qof iyo Cod ah!
# Yaa Rabii wadankaan noo hagaaji!
