Somali Computer Incident Response Team

Sawirrada Maalinta Labaad ee Madasha 3aad ee Amniga Saaybarka Qaranka.

Mudane Axmed Cali Salaad, Maareeye Ku-xigeenka Hay’adda Isgaarsiinta Qaranka (HIQ), ayaa si rasmi ah u soo xiray Madasha 3aad ee Amniga Saaybarka Qaranka, isaga uga mahadceliyay dhammaan ka-qaybgalayaasha, khudbad-jeediyeyaashii iyo aqoonyahannadii soo bandhigay warqadaha cilmiyeed, iyo Jaamacadda Muqdisho doorkeeda ku aaddan wada-qabsashada iyo hirgelinta madasha.

Mudane Xildhibaan Aweys Maxamed Cumar, Ergayga Gaarka ah ee Madaxweynaha ee Ka Hortagga iyo La-dagaallanka Fikradaha Xagjirka ah ee Rabshadaha Wata (PCVE), ayaa khudbad ka jeediyey xiritaanka Madasha Saddexaad ee Amniga Saaybarka Qaranka, isaga oo adkeeyay muhiimadda iskaashiga iyo xoojinta amniga dhijitaalka ee dalka.

Dr. Ibraahim Maxamed Mursal, Guddoomiyaha Jaamacadda Muqdisho, ayaa khudbad kooban ka jeediyey xiritaanka Madasha Saddexaad ee Amniga Saaybarka Qaranka, isaga oo mahadcelin u jeediyey ka-qaybgalayaasha isla markaana bogaadiyey waxqabadkii labadii maalmood ee madasha.

Maalinta labaad ee Madasha Saddexaad ee Amniga Saaybarka Qaranka ayaa lagu qabtay layli fadhi-ku-shaqayn (Tabletop Exercise) oo ku salaysnaa xaalad tusaale ah (scenario) oo loogu magac baxay “Weerarka Lama Filaan ah” (The Unplanned Attack).

Layligan ayaa diiradda saarayay sida hay’aduhu uga jawaabi karaan hanjabaad amni saaybar oo lama filaan ah, gaar ahaan marka aan si cad loo ogayn nooca weerarka la qorsheynayo.

Ka-qaybgalayaasha ayaa loo qaybiyay afar (4) kooxood, kuwaas oo si wadajir ah uga dooday khataraha suuragalka ah, tallaabooyinka mudnaanta leh ee difaaca, iyo hababka lagu xoojin karo diyaargarowga iyo qorshaha ka-falcelinta dhacdooyinka amniga saaybarka.

, # Cyber , ,

Orhan Osmani, Madaxa Qaybta Amniga Saaybarka ee Midowga Isgaarsiinta Caalamiga ah (ITU), ayaa qaab fogaan-arag uga hadlay maalinta labaad ee Madasha Saddexaad ee Amniga Saaybarka Qaranka, isaga oo la wadaagay ka-qaybgalayaasha talooyin muhiim ah oo ku saabsan xoojinta amniga saaybarka ee heer qaran.

Zakariye Gurey, Agaasimaha ICT-da iyo Amniga Saaybarka ee Xafiiska Madaxweynaha, oo ka mid ahaa marti-sharafta ka hadashay maalinta labaad ee Madasha Saddexaad ee Amniga Saaybarka Qaranka, ayaa diiradda saaray mowduuc cinwaankiisu ahaa:
“Tixgelinta Amniga Saaybarka si la mid ah Amniga Qaranka: Maareynta Khatarta iyo Adkaysiga Kaabeyaasha Dhijitaalka ee Adeegyada Dadweynaha.”

Madasha Amniga Saaybarka Qaranka ayaa maalinta labaad lagu qabtay fadhi-dood cinwaankiisu yahay “Abuuridda Feker iyo Dhaqan Qaran oo ku saabsan horumarinta Amniga Dhijitaalka ah.”

Fadhi-doodkan waxaa looga hadli doonaa kor u qaadidda wacyiga, mas’uuliyadda wadajirka ah, iyo sameynta hiigsi mideysan si loo horumariyo kaabayaasha amniga dhijitaalka ee Soomaaliya.

Fadhi-doodka waxaa ka qeybgalay:
1. Dr Maxamed Aadam Isaaq, Barre ka tirsan Jaamacadda Ummadda Soomaaliyeed
2. Cabdiraxmaan Maxamed Diiriye, Gudoomiyaha shirkadda SOMTAC
3. Dr Yaxye Abuukar Axmed, Agaasimaha Machad ka Garaadka Macmalka ee Jaamacadda SIMAD
4. Maxamed Cadceed Cali, Agaasimaha Midowga Ururada Bulshada Rayidka (SONSA)
5. Cabdqani Maxamed Wehliye, Agaasimaha Diiwangelinta Madaniga, Wasaaradda Arimaha Gudaha, Federaalka, Dib u Heshiisiinta, DFS
6. Eng. Cabdiraxmaan Cali Xaaji Hormuudka, Kulliyadda Cilmiga Kombiyuutarka iyo Teknoolojiyadda Macluumaadka ee Jaamacadda Hormuud

Fadhi-doodkan waxaa hoggaminayay Eng Cabdisataar Carabow Ibraahim, oo bare sare ka ah Kuliyadda Cilmiga Kombuutarka, Jaamacadda Muqdisho

Eng. Cabdulle Xasan Maxamuud, oo ah Bare Sare iyo Cilmi-baare ku xeel dheer Teknoolojiyadda iyo Amniga Saaybarka, ayaa maanlinta labaad ee Madasha Saddexaad ee Amniga Saaybarka Qaranka ka soo jeediyey warqad cilmiyeed cinwaankeedu yahay:

“Algorithm-ka Hagaajinta Xisaabta Isku-dhafan ee Ogaanshaha Cilladaha Shabakadaha Isgaarsiinta.”

Mudane Maxamed Cali Cumar, Guddoomiye Ku-xigeenka Xiriirka iyo Horumarinta ee Jaamacadda Muqdisho, ayaa soo dhaweeyay ka-qaybgalayaasha Maalinta Labaad ee Madasha 3aad ee Amniga Saaybarka Qaranka.