21/10/2026
Guddoomiyaha Degmada Xudur, Mudane Mohamed Macallin Ahmed, ayaa shir guddoomiyey kulan muhiim ah oo ay ka soo qaybgaleen hay’adaha samafalka ee ka howlgala degmada Xudur, kaas oo diiradda lagu saaray wax-ka-qabashada daadadka iyo fatahaadaha ka dhashay roobabka El Niño.
Shirka ayaa looga hadlay saameynta ay fatahaaduhu ku yeesheen bulshada, baahiyaha dadka ay dhibaatadu saameysay iyo sidii loo heli lahaa xal waara oo wax looga qabanayo dhibaatada ka dhalatay daadadka.
Intii uu shirku socday, waxaa la isla qaatay in la sameeyo qorshe wax ku ool ah oo lagu maareynayo biyaha fatahaadaha, laguna helo goobo ku habboon oo biyaha lagu hago ama lagu dejiyo, si loo yareeyo khasaaraha ay daadadku u geysanayaan bulshada, guryaha iyo kaabayaasha dhaqaalaha degmada.
Guddoomiyaha Degmada Xudur ayaa carrabka ku adkeeyey muhiimadda ay leedahay iskaashiga maamulka degmada iyo hay’adaha samafalka, si xal degdeg ah loogu helo caqabadaha ka dhashay fatahaadaha, loona ilaaliyo nolosha iyo hantida shacabka.
Ugu dambeyn, shirka ayaa muujiyey sida ay uga go’an tahay maamulka degmada Xudur iyo hay’adaha samafalku inay iska kaashadaan wax-ka-qabashada
fatahaadaha El Niño, yareynta khataraha daadadka iyo u gurmashada bulshada ay dhibaatadu saameysay.
Xudur — Iskaashi, Gurmad iyo Wax-ka-qabasho.
