Маҷлиси намояндагони Маҷлиси Олии Ҷумҳурии Тоҷикистон

Изҳори ҳамдардӣ ва супоришҳои Сарвари давлат дар робита ба оқибатҳои офати табиӣ дар шаҳри Кӯлоб
02.05.2026
https://president.tj/event/news/55470

Шаби гузашта дар як қатор шаҳру ноҳияҳои кишвар, махсусан, дар шаҳри Кӯлоб боришоти зиёди борон ва омадани сел рух дод, ки дар натиҷаи он дар шаҳри Кӯлоб 3 кас ба ҳалокат расида, 3 тани дигар дар беморхона бистарӣ карда шуданд.

Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба оилаҳои шахсони фавтида изҳори ҳамдардӣ карда, ба Сарвазири мамлакат, Раиси вилояти Хатлон ва Комиссияи давлатӣ оид ба ҳолатҳои фавқулода дастур доданд, ки фавран ба ҷойи ҳодиса ҳозир шуда, барои расонидани кумак ба оилаҳои зарардида ва ҳарчи зудтар бартараф кардани оқибатҳои офати табиӣ ҳамаи тадбирҳои заруриро амалӣ намоянд.

РУШДИ АГРОТУРИЗМ ДАР ТОҶИКИСТОН МАНФИАТОВАР АСТ

Дар замони имрӯз туризм яке аз соҳаҳои даромадноки иқтисодиёт ба ҳисоб рафта, ҳамзамон ба ҷалби одамон ба кор ва баланд бардоштани сатҳи зиндагии онҳо мусоидат мекунад. Кишварҳое, ки ин соҳаро рушд додаанд имрӯз пешрафтҳои зиёдеро соҳиб шуданд. Таҷрибаи ҷаҳонӣ нишон медиҳад, ки тамоми соҳаҳои иқтисодиёт аз рушди соҳаи сайёҳӣ метавонанд бурд ва рушд намоянд.

Аз ин хотир, тамоми кишварҳо барои рушди соҳаи сайёҳӣ ба тавсеаи ҳамкориҳо ва табодули таҷриба ниёз доранд. Ба ин мақсад дар давлатҳои гуногуни олам нишасту ҳамоишҳо баргузор мешаванд. Ба наздикӣ ман ба намояндагӣ аз Маҷлиси намояндагони Маҷлиси Олии Ҷумҳурии Тоҷикистон дар ҷаласаи Форуми байналмилалии сайёҳии Travel Hub «Ҳамкорӣ»-и Ассамблеяи байнипарлумонии Иттиҳоди Давлатҳои Мустақил иштирок кардам. Ин ҳамоиши бонуфуз аз 6 то 10 апрели соли ҷорӣ дар шаҳри Мински Ҷумҳурии Белорус баргузор гардид. Зимни суханронӣ, ман Тоҷикистони имрӯзаро, ки ба шарофати соҳибистиқлолӣ рушду тараққӣ мекунад, муаррифӣ кардам.

Дар Ҷумҳурии Тоҷикистон барои рушди сайёҳӣ имконоту захираҳои зиёде мавҷуд аст. Давлат ва Ҳукумати мамлакат дар ин бобат тадбирҳои зарурӣ меандешад. Дар ин бобат Кумитаи рушди сайёҳии назди Ҳукумати Ҷумҳурии Тоҷикистон фаъолияти густардаро ба роҳ мондааст. Кумита ҷиҳати иҷрои дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, ки аз Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон аз 28 декабри соли 2024 бармеоянд, якҷо бо Донишгоҳи байналмилалии сайёҳӣ ва соҳибкории Тоҷикистон лоиҳаи қарори Ҳукумати Ҷумҳурии Тоҷикистон “Дар бораи Барномаи рушди сайёҳии дохилии Ҷумҳурии Тоҷикистон барои солҳои 2026-2030”-ро омода намудааст ва санади мазкур дар баррасии вазорату идораҳои дахлдор қарор дорад.

Тибқи маълумотномаи Кумита соли 2025 дар саросари ҷумҳурӣ 363 адад субъекти хизматрасонии сайёҳӣ ба қайд гирифта шуд, ки нисбат ба ҳамин давраи як соли пеш 20 адад зиёд мебошад. Аз шумораи умумии бақайдгирифташуда 223 адад меҳмонхона, 56 адад мотел ва хостел, 59 адад осоишгоҳ, 4 адад лагерҳои солимгардонӣ, 6 адад маркази муолиҷавӣ, 10 адад хонаи истироҳатӣ, 1 адад пансионат ва 4 адад базаи сайёҳӣ мебошанд.

Лозим ба ёдоварист, ки ҷиҳати мукаммал намудани маълумотҳои омории соҳаи сайёҳӣ ва таҳия намудани методологияи ягона барои ҳисобкунии нишондиҳандаҳои мақсадноки “Стратегияи рушди сайёҳӣ дар Ҷумҳурии Тоҷикистон барои давраи то соли 2030”, дар назди Кумита гурӯҳи кории байниидоравӣ аз ҳисоби вазорату идораҳои дахлдор таъсис дода шудааст.

Бо мақсади тақвияти ҳамкориҳои мутақобила, рушди соҳаи сайёҳӣ, ҷалби сайёҳони хориҷӣ ва табодули таҷриба, дар соли 2025, бо сохторҳои гуногуни кишварҳои хориҷӣ, аз ҷумла Ҷумҳурии Исломии Эрон, Ҷумҳурии Қирғизистон, Муғулистон ва бисёр дигар кишварҳои дунё шартномаҳо ба имзо расиданд.

Аз санаи 31 марти соли 2020 дар назди Кумитаи рушди сайёҳии назди Ҳукумати Ҷумҳурии Тоҷикистон лоиҳаи “Рушди сайёҳӣ” фаъолият мекунад, ки бо маблағгузории Бонки Осиёии Рушд ва саҳми Ҳукумати Ҷумҳурии Тоҷикистон амалӣ мегардад. Маблағи умумии лоиҳа 11 млн. доллари ИМА, 10 млн доллари ИМА маблағи грантии Бонки Осиёии Рушд ва 1 млн. доллари ИМА саҳми Ҳукумати Ҷумҳурии Тоҷикистон мебошад. Маврид ба тазаккур аст, ки муҳлати амалишавии лоиҳа бо пешниҳоди Ҳукумати Ҷумҳурии Тоҷикистон ва дастгирии Бонки Осиёии Рушд то 30 июни соли 2027 тамдид гардида, дар ин давра аз миёни лоиҳаҳои сармоягузорӣ 2 лоиҳаи афзалиятнок интихоб гардида, барои интихоби ширкати ботаҷрибаи муҳандисӣ тендер эълон гардида, ба давраи омодасозии тарҳи муфассали муҳандисии ду лоиҳаи афзалиятнок оғоз бахшида мешавад.

Тибқи маълумоти Агентии омори назди Президенти Ҷумҳурии Тоҷикистон дар соли 2025 (январ–декабр) шумораи умумии шаҳрвандони хориҷие, ки бо назардошти тамоми намудҳои мақсадҳои сафар (хизматӣ, истироҳатӣ ва ғайра) ба Ҷумҳурии Тоҷикистон ташриф овардаанд, 2104,7 ҳазор нафарро ташкил дод. Аз шумораи умумии мазкур 1784,4 ҳазор нафар ҳамчун сайёҳ арзёбӣ гардиданд. Аз ин теъдод 1634,5 ҳазор нафар ба давлатҳои ИДМ ва 149,9 ҳазор нафар ба давлатҳои хориҷи дур рост меоянд.

Дар кишварҳои гуногуни ҷаҳон бахшҳои гуногуни сайёҳиро ривоҷ додаанд. Агротуризм аз ҷумлаи бахшҳои самараноки сайёҳӣ мебошад, ки дар ҷумҳуриҳои собиқ Иттиҳоди Шӯравӣ ривоҷ ёфтааст.

Дар Тоҷикистон ҷиҳати рушди агротуризм тадбирҳои зиёд андешида мешавад. Дар ин раванд, боғу токзорҳои зиёде, ки дар минтақаҳои гуногуни ҷумҳурӣ бунёд ёфтаанд, мавриди истифода қарор мегирад. Зимни пухтан ва ҷамъоварии ҳосили меваю ангур барои сайёҳони хориҷӣ ва дохилӣ саёҳатҳо ташкил карда мешавад. Аз ҷумла сайёҳони хориҷиро дидани боғоту токзори серҳосилу меваю ангури рангорангу шаҳдбор дар шаҳру ноҳияҳои Исфара, Ҳисор, Турсунзода, Данғара, Норак, ки натиҷаи заҳмату кордонии деҳқонони меҳнатқарин аст, ба ваҷд оварда, онҳо бо таассуроти зиёд ба кишварҳояшон бармегарданд. Дар мавсими ҷамъоварии “тиллои сафед” гурӯҳҳои сайёҳӣ аз майдонҳои пахта дидан мекунанд.

Дар Ҷумҳурии Тоҷикистон, бинобар сабаби он, ки 70 фоизи аҳолӣ дар деҳот зиндагӣ мекунанд, ривоҷи агротуризм метавонад ба баланд бардоштани дараҷаи зиндагии аҳолӣ ва рушди иқтисодиёти маҳал мусоидат намояд. Дар ин бобат зикр кардан бамаврид аст, ки Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон солҳои 2019 -2021-ро солҳои рушди деҳот, сайёҳӣ ва ҳунарҳои мардумӣ эълон карда буданд.

Дар Ҷумҳурии Тоҷикистон соҳаи туризмро Конститутсия, санадҳои зиёди меъёрии ҳуқуқӣ, аз ҷумла қонунҳои Ҷумҳурии Тоҷикистон “Дар бораи сайёҳӣ”, “Дар бораи сайёҳии дохилӣ”, Барномаи рушди туризм дар Ҷумҳурии Тоҷикистон барои солҳои 2018 - 2020, Консепсияи рушди туризм дар Ҷумҳурии Тоҷикистон барои солҳои 2009 - 2019 ба танзим медарорад.

Имрӯзҳо тадбиқи Стратегияи рушди сайёҳӣ дар Тоҷикистон бомуваффақият идома дорад, ки бо амалӣ гардидани он, то соли 2030 минтақаҳои гуногуни кишвар, махсусан ноҳияҳои кӯҳӣ ва дурдаст обод мегарданд.

Рушди агротуризм дар маҷмӯъ ба афзоиши истеҳсоли маҳсулоти аз нигоҳи экологӣ тоза ва ободу зебо гардидани маҳаллаҳои аҳолинишин мусоидат мекунад. Ба ин мақсад ба саёҳони дохилӣ ва хориҷӣ мардуми деҳот маҳсулоти тару тозаи дастранҷи худ, хурокҳои миллию серғизо, маҳсули дастони пурҳунари хешро пешкаш менамояд. Барои сайёҳони махсусан хориҷӣ иштирок дар маҳфи чорабиниҳои миллӣ, сайр дар ҳавои тоза, дидани манзараҳои нотакрори Тоҷикистони биҳиштосо хеле ҷолибу мондагор хоҳад буд.

Дар ин робита таъкид кардан бамаврид аст, ки бо ривоҷ додони агротуризм ва саёҳии деҳот бисёр масъалаҳои иҷтимоию иқтисодӣ ҳаллу фасл мегарданд. Аз ҷумла, шаҳрвандони зиёде дар маҳалҳо метавонанд соҳиби кор ва шуғли доимӣ гарданд, дар деҳот ҳамзамон роҳҳои тахту ҳамвор ва мумфарш, иншооти гуногуни хизматрасонӣ, марказҳои савдо, меҳмонхонаҳо, марказҳои фарҳангию саломатӣ бунёд ёбанд. Бад – ин васила ҳамзамон рафту омади сайёҳон афзоиш ёфта, хориҷиён ба кишварҳояшон бозгашта миллату давлати моро муаррифӣ мекунанд.

Таҳлилҳо нишон медиҳанд, ки дар натиҷаи тадбирҳои андешидашуда соҳаи сайёҳӣ мунтазам рушд ёфта, сафи сайёҳони хориҷӣ ба кишвар афзоиш меёбад.

Бароямон хушоянд ва боиси ифтихор аст, ки Тоҷикистон дар руйихати 10 мамлакати ҷолиб барои сайёҳон, масири нақлиётии Душанбе-Кӯлоб-Помир ба руйихати беҳтарин даҳ роҳҳои кӯҳӣ ворид гардидааст ва пойтахти Ҷумҳурии Тоҷикистон - шаҳри Душанбе дар қатори даҳ шаҳри амн барои сайругашти шабона эътироф гардидааст.

Холбойзода Неъматулло,
узви Кумитаи Маҷлиси намояндагони Маҷлиси Олии Ҷумҳурии Тоҷикистон оид ба масъалаҳои аграрӣ, захираҳои об ва замин.

Гиёзода Азиз Президенти Сенати штати Ютаи Америка ҷаноби Стюарт Адамсро ба ҳузур пазируфт

Имрӯз муовини Раиси Маҷлиси намояндагон Гиёзода Азиз Президенти Сенати штати Ютаи Америка ҷаноби Стюарт Адамсро ба ҳузур пазируфт.

Гуфта шуд, ки муносибатҳои дипломатӣ байни Ҷумҳурии Тоҷикистон ва Штатҳои Муттаҳидаи Америка 14 феврали соли 1992 барқарор гардида, пайваста рушд меёбанд. То имрӯз 35 санади ҳамкорӣ байни кишварҳои мо дар соҳаҳои гуногун ба имзо расидаанд, ки метавонанд барои рушди муносибатҳои дуҷониба мусоидат намоянд.

Ҳамкориҳои мутақобилан судманди байнипарламентии Тоҷикистон ва Штатҳои Муттаҳидаи Америка дар чорчӯби қолаби С5+1, инчунин Гурӯҳи дӯстӣ ва ҳамкории байнипарламентӣ бо Палатаи намояндагони Штатҳои Муттаҳидаи Америка муҳим арзёбӣ гардид.

Робитаҳои Тоҷикистон бо Америка яке аз авлавиятҳои сиёсати хориҷӣ ба шумор рафта, ҳамкориҳои мо дар соҳаҳои гуногун, аз ҷумла сиёсӣ, амниятӣ, иқтисодӣ, энергетика, маориф, тандурустӣ, кишоварзӣ, башардӯстона ва дигар мавзуоти мавриди назар пеш бурда мешаванд.

Мо аз таваҷҷуҳи Конгресс ва роҳбарияти олии Америка ба робитаҳои мутақобилан судманд бо Тоҷикистон, аз ҷумла Маҷлиси намояндагон, ки тайи солҳои охир афзудааст изҳори қаноатмандӣ менамоем.

Мо бар он назарем, ки мақоми олии қонунгузор тавассути қабули қонунҳо, тасдиқи шартномаҳои байналмилалӣ метавонад дар таҳкими ҳамкориҳо ва ташаккули асосҳои ҳуқуқии муносибатҳои дуҷониба саҳмгузор бошад, -изҳор намуд Азиз Гиёзода.

Созишномаҳо ба тасвиб расиданд

Имрӯз таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода ҷаласаи навбатии иҷлосияи дуюми Маҷлиси намояндагони Маҷлиси Олии Ҷумҳурии Тоҷикистон даъвати ҳафтум баргузор гардид.

Дар иҷлосия лоиҳаи Созишномаи лизинги пешакӣ байни Ҷумҳурии Тоҷикистон ва Бонки Исломии Рушд вобаста ба лоиҳаи «Рушди сайёҳии ҳушманд ва таҳсилот дар соҳаи соҳибкорӣ», Созишномаи қарзӣ байни Ҷумҳурии Тоҷикистон ва Бонки Исломии Рушд оид ба маблағгузории иловагии лоиҳаи «Интиқоли неруи барқ ва тиҷорат дар Осиёи Марказӣ ва Осиёи Ҷанубӣ (CASA-1000), Тоҷикистон», Созишномаи иҷораи пешакӣ байни Ҷумҳурии Тоҷикистон ва Бонки Исломии Рушд оид ба маблағгузории иловагии лоиҳаи «Интиқоли неруи барқ ва тиҷорат дар Осиёи Марказӣ ва Осиёи Ҷанубӣ (CASA-1000), Тоҷикистон», Созишномаи иловагӣ ба Созишномаи сармоягузорӣ байни Ҳукумати Ҷумҳурии Тоҷикистон, Ҷамъияти дорои масъулияти маҳдуди «Авесто Гурӯҳ» ва Ҷамъияти дорои масъулияти маҳдуди «Artel Engineereng and Management»-и Ҷумҳурии Ӯзбекистон оид ба сохтмон ва истифодабарии корхонаи истеҳсоли техникаи маишии «Артел Авесто Электроникс» дар шаҳри Душанбе аз 12 декабри соли 2019 ва лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи маърифати экологии аҳолӣ» мавриди баррасӣ қарор гирифта, қарорҳои дахлдор қабул карда шуд.

Масъалаҳои рӯзномаро ба вакилони Маҷлиси намояндагон вазири молияи Ҷумҳурии Тоҷикистон Қаҳҳорзода Файзиддин, раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Раҳимзода Султон, муовини раиси Кумита оид ба энергетика, саноат, сохтмон ва коммуникатсия Саидзода Фирдавс, узви Кумита оид ба иқтисод ва молия Наботзода Сиёвуш, узви Кумита оид ба энергетика, саноат, сохтмон ва коммуникатсия Ҳасанзода Насрулло, узви Кумита оид ба иқтисод ва молия Ҳакимзода Ҳомидҷон ва узви Кумита оид ба масъалаҳои аграрӣ, захираҳои об ва замин Қиёмзода Зарафо шарҳу тавзеҳ намуданд.

Мулоқот бо Фиристодаи Махсуси Президенти ИМА дар Осиёи Ҷанубӣ ва Марказӣ Серҷио Гор
28.04.2026
https://president.tj/event/news/55452
28 апрел Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон Фиристодаи Махсуси Президенти Иёлоти Муттаҳидаи Амрико дар Осиёи Ҷанубӣ ва Марказӣ Серҷио Горро ба ҳузур пазируфтанд.
Дар ҷараёни суҳбат доираи васеи масъалаҳои вобаста ба ҳолати кунунӣ ва дурнамои ҳамкории ду ҷониб, аз ҷумла дар соҳаҳои иқтисоду тиҷорат, сармоягузорӣ ва амният мавриди баррасии ҷонибҳо қарор гирифт.
Дар ин зимн ба раванди татбиқи мувофиқаҳои дар қолаби “Осиёи Марказӣ–Иёлоти Муттаҳидаи Амрико (C5+1)” бадастомада таваҷҷуҳи алоҳида зоҳир карда шуд.
Пешвои миллат ҳамзамон алоқамандии Тоҷикистонро ба рушду тавсеаи робитаҳо бо Иёлоти Муттаҳидаи Амрико дар ин ва дигар самтҳои барои тарафҳо судманд таъкид намуданд.
Зикр гардид, ки Иёлоти Муттаҳидаи Амрико имрӯз дар қатори панҷгонаи шарикони сармоягузори Тоҷикистон қарор дорад.
Президенти Ҷумҳурии Тоҷикистон дар роҳи рушду тавсеаи ҳамкорӣ аҳамияти истифодаи имкониятҳо дар доираи Созишномаи чаҳорчӯбавӣ оид ба савдо ва сармоягузориро (ТИФА) таъкид намуданд. Бо ишора ба зарфиятҳои мавҷудаи Тоҷикистон дар соҳаҳои гидроэнергетика, истихроҷ ва коркарди маъданҳо, саноати сабук, хӯрокворӣ, кимиё, дорусозӣ таҳкими ҳамкории амалии минбаъда дар ин соҳаҳо ба манфиати ду ҷониб дониста шуд.
Рушди зеҳни сунъӣ, инфрасохтори рақами ва рақамикунонии иқтисод, таъсиси корхонаҳои коркарди маҳсулоти кишоварзӣ барои содирот ва ҷалби сармоя дар ин заминаҳо, аз ҷумлаи бахшҳои ояндадори ҳамкории ду кишвар арзёбӣ гардид.
Ҷонибҳо дар робита ба идомаи ҳамоҳангиҳои талошҳои мақомоти дахлдор оид ба татбиқи ин ва дигар ҳадафҳои мавриди манфиатҳои муштарак ба мувофиқа расиданд.
#ЭмомалӣРаҳмон #ЭмомалиРахмон #Тоҷикистон #Таджикистан #Президент #Тоҷикон #Таджики #ИМА #США

Аз Шурои Маҷлиси намояндагон

Имрӯз таҳти раёсати Раиси Маҷлиси намояндагони Маҷлиси Олии Ҷумҳурии Тоҷикистон Файзалӣ Идизода ҷаласаи навбатии Шурои Маҷлиси намояндагони Маҷлиси Олии Ҷумҳурии Тоҷикистон даъвати ҳафтум баргузор гардид.
Дар ҷаласаи шуро лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи маърифати экологии аҳолӣ», Оид ба баргардондани лоиҳаи Қонуни Ҷумҳурии Тоҷикистон «Дар бораи ифлоскунандаҳои устувори органикӣ», лоиҳаи Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи фаъолияти китобдорӣ», лоиҳаи Қонуни Ҷумҳурии Тоҷикистон «Дар бораи ворид намудани тағйирот ба Кодекси меҳнати Ҷумҳурии Тоҷикистон», Созишномаи лизинги пешакӣ байни Ҷумҳурии Тоҷикистон ва Бонки Исломии Рушд вобаста ба лоиҳаи «Рушди сайёҳии ҳушманд ва таҳсилот дар соҳаи соҳибкорӣ», Созишномаи қарзӣ байни Ҷумҳурии Тоҷикистон ва Бонки Исломии Рушд оид ба маблағгузории иловагии лоиҳаи «Интиқоли неруи барқ ва тиҷорат дар Осиёи Марказӣ ва Осиёи Ҷанубӣ (CASA-1000), Тоҷикистон», Созишномаи иҷораи пешакӣ байни Ҷумҳурии Тоҷикистон ва Бонки Исломии Рушд оид ба маблағгузории иловагии лоиҳаи «Интиқоли неруи барқ ва тиҷорат дар Осиёи Марказӣ ва Осиёи Ҷанубӣ (CASA-1000), Тоҷикистон», Созишномаи иловагӣ ба Созишномаи сармоягузорӣ байни Ҳукумати Ҷумҳурии Тоҷикистон, Ҷамъияти дорои масъулияти маҳдуди «Авесто Гурӯҳ» ва Ҷамъияти дорои масъулияти маҳдуди «Artel Engineereng and Management»-и Ҷумҳурии Ӯзбекистон оид ба сохтмон ва истифодабарии корхонаи истеҳсоли техникаи маишии «Артел Авесто Электроникс» дар шаҳри Душанбе аз 12 декабри соли 2019, Дар бораи таъсис додани гурӯҳи корӣ ҷиҳати такмили лоиҳаи Қонуни Ҷумҳурии Тоҷикистон «Оид ба ворид намудани тағйир ба Кодекси манзили Ҷумҳурии Тоҷикистон», Дар бораи таъсиси гурӯҳи корӣ оид ба «Соли байналмилалии маърифати ҳуқуқӣ, 2027», Дар бораи сафари Шоҳиён Ш. ба шаҳри Ереван, Дар бораи даъват кардани ҷаласаи навбатии иҷлосияи дуюми Маҷлиси намояндагони Маҷлиси Олии Ҷумҳурии Тоҷикистон даъвати ҳафтум ва Оид ба лоиҳаи Қарори Маҷлиси намояндагони Маҷлиси Олии Ҷумҳурии Тоҷикистон «Дар бораи рӯзномаи ҷаласаи навбатии иҷлосияи дуюми Маҷлиси намояндагони Маҷлиси Олии Ҷумҳурии Тоҷикистон даъвати ҳафтум» пешниҳод ва баррасӣ гардида, қарорҳои дахлдор қабул карда шуд.

Идоракунии интернет, рақамикунонӣ ва технологияҳои муосири инноватсионӣ баррасӣ шуданд
Имрӯз дар доираи Форуми Осиёи Марказӣ оид ба идоракунии интернет (CAIGF-2026), дар мавзуи "Самтҳои стратегӣ барои рушди рақамӣ дар Осиёи Марказӣ: Мушкилот ва роҳҳои ҳалли қонунгузорӣ", вохӯрии вакилони Маҷлиси намояндагони Маҷлиси Олии Ҷумҳурии Тоҷикистон таҳти роҳбарии раиси Кумитаи Маҷлиси намояндагон оид ба қонунгузорӣ ва ҳуқуқи инсон Шоҳмурод Рустам бо ҳайати вакилони Парлумонҳои кишварҳои Осиёи миёна ва Арманистон - иштирокчиёни ҷаласаи парлумонии Форуми мазкур баргузор гардид.
Дар доираи вохурӣ масъалаҳои ҳамкориҳои судманд ва таҷрибаомузӣ дар раванди таҳия ва қабули қонунҳо ва санадҳои ҳуқуқӣ дар самти рақамикунонӣ ва технологияҳои муосири инноватсионӣ баррасӣ гардиданд.
Иштирокчиён дар мавзуҳои иқтисоди рақамӣ, рақамикунонии фаъолияти Парлумонӣ ва таҷрибаомӯзӣ дар раванди таҳияи Кодекси рақамӣ суҳбат намуданд.

Мулоқоти Муовини Раиси Маҷлиси намояндагон бо ҳайати сенаторони Гурӯҳи дӯстии Сенати Фаронса “Фаронса - Осиёи Марказӣ”

Муовини Раиси Маҷлиси намояндагони Маҷлиси Олии Ҷумҳурии Тоҷикистон Мавсума Муинӣ ҳайати сенаторони Гурӯҳи дӯстии Сенати Ҷумҳурии Фаронса оид ба ҳамкорӣ бо кишварҳои Осиёи Марказиро таҳти роҳбарии ҷаноби Эрве Море ба ҳузур пазируфт.
Дар мулоқот инчунин вакилони Гурӯҳи дӯстии байнипарлумонии Тоҷикистону Фаронса ва Сафири Ҷумҳурии Фаронса дар Ҷумҳурии Тоҷикистон хонум Элза Пинёл иштирок намуданд.
Зимни мулоқот ҷонибҳо ҳолат ва дурнамои равобити гуногунҷанбаи Тоҷикистону Фаронсаро баррасӣ намуда, аз сатҳ ва муҳтавои кунунии ҳамкориҳо, ки бар пояи арзишҳои муштараки тамаддунӣ, робитаҳои таърихӣ ва эҳтироми мутақобил асос ёфтаанд, изҳори қаноатмандӣ карданд.
Таъкид гардид, ки ба шарофати иродаи сиёсӣ ва талошҳои пайвастаи роҳбарони ду давлат - Президенти Ҷумҳурии Тоҷикистон Эмомалӣ Раҳмон ва Президенти Ҷумҳурии Фаронса Эммануэл Макрон муносибатҳои дуҷониба дар солҳои охир марҳилаи сифатан навро касб намудаанд. Ҷонибҳо мулоқоту музокироти сатҳи олӣ ва мувофиқаҳои дар доираи сафарҳои расмӣ дар солҳои 2021 ва 2025 бадастомадаро омили муҳими тавсеаи ҳамкориҳо дар самтҳои афзалиятнок арзёбӣ намуданд.
Ҳамзамон, мулоқоти роҳбарони ду давлат дар ҳошияи иҷлоси 80-уми Маҷмаи Умумии Созмони Милали Муттаҳид дар шаҳри Ню-Йорк ҳамчун қадами муҳим дар таҳкими муносибатҳои сиёсӣ ва байнипарлумонӣ арзёбӣ гардид.
Ҷонибҳо рушди ҳамкориҳои байнипарлумониро яке аз абзорҳои калидии таҳкими эътимод ва густариши муколамаи сиёсӣ дониста, ба фаъолияти гурӯҳҳои дӯстии байнипарлумонӣ аҳамияти махсус доданд. Дар ин замина, зарурати ҷоннок намудани фаъолияти Гурӯҳи дӯстии “Фаронса – Осиёи Марказӣ” ва густариши робитаҳои мустақими байни вакилон таъкид гардид.
Дар ҷараёни мулоқот масъалаҳои густариши ҳамкорӣ дар самтҳои табодули таҷрибаи қонунгузорӣ, рушди устувор, ҳифзи муҳити зист, рақамикунонӣ ва таҳкими институтҳои демократӣ мавриди баррасӣ қарор гирифтанд. Ҷонибҳо инчунин омодагии худро барои ҳамоҳангсозии мавқеъҳо дар доираи созмонҳои байналмилалии байнипарлумонӣ, аз ҷумла Иттиҳоди байнипарлумонӣ ва Ассамблеяи парлумонии САҲА, иброз намуданд.
Дар ҷараёни мулоқот масъалаи афзоиши ҳаҷми мубодилаи тиҷоратӣ миёни ду кишвар низ мавриди баррасии амиқ қарор гирифт. Қайд гардид, ки Ҷумҳурии Тоҷикистон дар доираи сиёсати дарҳои кушод барои ҷалби сармояи хориҷӣ заминаҳои мусоиди ҳуқуқӣ ва иқтисодиро фароҳам овардааст.
Дар ин замина, ҷонибҳо ба тавсеаи ҳамкориҳои иқтисодӣ дар соҳаҳои афзалиятнок, аз ҷумла саноат, энергетика, рушди инфрасохтор, металлургия ва тандурустӣ таваҷҷуҳи хоса зоҳир намуданд.
Бахши фарҳангӣ ва гуманитарӣ низ ҳамчун самти муҳими ҳамкориҳо арзёбӣ гардид. Таъкид шуд, ки баргузории Намоишгоҳи “Тоҷикистон — кишвари дарёҳои тиллоӣ” дар Осорхонаи миллии санъати осиёии “Гиме” дар шаҳри Париж бо иштироки роҳбарони ду давлат намунаи равшани ҳамгироии фарҳангӣ ва таҳкими эътимоди мутақобил мебошад.
Дар идомаи мулоқот ҷонибҳо масъалаҳои густариши ҳамкориҳо дар соҳаи илму маорифро низ баррасӣ намуданд.
Ҳамчунин, бо дарназардошти вазъи мураккаби ҷаҳонӣ, зарурати таҳкими ҳамкориҳо дар соҳаи амният таъкид гардида, Тоҷикистон мавқеи худро дар самти ҳалли мусолиматомези низоъҳо тавассути роҳҳои дипломатӣ ва гуфтушунидҳо бори дигар иброз намуд.
Ҳамзамон, ҷонибҳо омодагии худро барои идомаи муколамаи созанда ва баргузории мулоқоти навбатӣ дар шаҳри Париж дар доираи сафари ҳайати парлумонии Тоҷикистон иброз намуданд.
Пас аз мулоқот меҳмонон аз бинои Парламенти Тоҷикистон дидан намуда, таассуроти баланд бардоштанд.

Дастаи Тоҷикистон дар мусобиқаи кушоди Ҷоми Ассамблеяи байнипарламентии давлатҳои иштирокчии ИДМ оид ба шоҳмот, ки 22-23 апрел дар шаҳри Алмаатои Ҷумҳурии Қазоқистон баргузор гардид, сазовори ҷойи якум гардид.

Дастаи Тоҷикистон дар рафти мусобиқа ҳунари воло ва иродаи қавиро нишон дода, миёни дастаҳои иштирокчӣ мақоми аввалро ишғол намуд.

Ба ҳайати даста шомил буданд:

* Назарзода Зафар — роҳбари ҳайат
* Ватанов Хуршед
* Қурбонов Саидаҳрор
* Маҳмудзода Мирзо
* Атохуҷа Зикрулло
* Одинаева Саодат
* Масхабова Амина
* Масхабова Шукрона

Ҳамчунин, варзишгарони тоҷик дар бахшҳои инфиродӣ низ натиҷаҳои назаррас ба даст оварданд.

Дар категорияи натиҷаи беҳтарин миёни занон:

* Ҷойи 1-ум — Масхабова Шукрона
* Ҷойи 2-юм — Масхабова Амина
* Ҷойи 3-юм — Одинаева Саодат

Дар категорияи натиҷаи беҳтарин миёни собиқадорон (50+):

* Ҷойи 2-юм — Қурбонов Саидаҳрор

Дар категорияи натиҷаи беҳтарин миёни кормандони сохторҳои давлатӣ:

* Ҷойи 3-юм — Маҳмудзода Мирзо

Ин пирӯзӣ бори дигар нишон медиҳад, ки шоҳмоти тоҷик дар арсаи байналмилалӣ мавқеи устувор дорад ва варзишгарони кишвар қодиранд дар мусобиқаҳои сатҳи баланд натиҷаҳои арзанда нишон диҳанд. 🇹🇯

Камолзода Илҳом дар ҷаласаи Комиссияи доимии Ассамблеяи байнипарламентии давлатҳои иштирокдори ИДМ оид ба сохтори давлатӣ ва худидоракунии маҳаллӣ иштирок намуд

Даъвати Ассамблеяи байнипарламентии давлатҳои иштирокдори Иттиҳоди Давлатҳои Мустақилро пазируфта, дар ҷаласаи Комиссияи доимии Ассамблеяи байнипарламентии давлатҳои иштирокдори ИДМ оид ба омӯзиши таҷрибаи сохтори давлатӣ ва худидоракунии маҳаллӣ, ки дар шаҳри Алмаатои Ҷумҳурии Қазоқистон баргузор гардид, Камолзода Илҳом - Раиси Кумитаи Маҷлиси намояндагони Маҷлиси Олии Ҷумҳурии Тоҷикистон оид ба сохтори давлатӣ ва худидоракунии маҳаллӣ иштирок ва суханронӣ намуд.

Дар ҷаласа масъалаҳои муҳимми такмили қонунгузорӣ, таҳкими асосҳои институтсионалӣ ва рушди самараноки мақомоти худидоракунии маҳаллӣ мавриди баррасӣ қарор гирифтанд.

Ҳамчунин, оид ба густариши ҳамкориҳои байнипарлумонӣ, табодули таҷриба ва таҳияи санадҳои намунавии ҳуқуқӣ мубодилаи афкор анҷом дода шуд.

Таъкид гардид, ки ҳамоҳангсозии қонунгузорӣ ва татбиқи таҷрибаҳои пешқадам метавонад ба баланд бардоштани самаранокии идоракунӣ ва рушди устувори кишварҳои узв мусоидат намояд.