Кумитаи иҷроияи Ҳизби Халқии Демократии Тоҷикистон дар вилояти Суғд

Таҷлили Иди кӯдакон дар шаҳри Хуҷанд

Субҳи имрӯз, яъне 1-уми июн дар Боғи истироҳатии «Наврӯзгоҳ» -и шаҳри Хуҷанд Иди кӯдакон дар сатҳи баланд ва пуршукуҳ таҷлил гардид.
Раиси вилояти Суғд Раҷаб Аҳмадзода, Раиси шаҳри Хуҷанд Фирдавс Шарифзода ва Раиси Кумитаи иҷроияи Ҳизби Халқи Демократии Тоҷикистон дар вилояти Суғд Ҷаҳонгир Салимзода бо ҳайати ҳамроҳонашон ба майдони идгоҳ ворид гардида, шодишарики кӯдакон шуданд.
Дар даромадгоҳи боғ тарбиятгирандагони Кӯдакистони Президентӣ дар шаҳри Хуҷанд бо маҳорати хосса ва малакаю истеъдод суруду таронаҳо хонда, саҳначаҳои ҷолиби ватандӯстона нишон доданд.
Аҳли тарбиятгирандакони муассисаҳои томактабии шаҳри Хуҷанд бо барномаи фарҳангӣ, мааърифатӣ ва варзишӣ табъи меҳмононро болида намуданд.
Аз тарафи Раиси вилоят Раҷаб Аҳмадзода ба кӯдакон тӯҳфаҳо тақдим карда шуд.
Ғолибони озмуни Академияи хурди илмҳо ва аъзои он ба Роҳбари вилоят Раҷаб Аҳмадзода ҷиҳати дастгириву ғамхориаш миннатдорӣ баён намуданд.
Раҷаб Аҳмадзода ба масъулин дастур дод, ки ба узви ҳақиқӣ ва вобастаи Академияи хурди илмҳои Ҷумҳурии Тоҷикистон таваҷҷуҳи бештар зоҳир гардида, эшон дар замони таътил ба истироҳатгоҳҳо ҷалб карда шаванд.
Ғолибони олимпиадаҳои фаннӣ, хонандагони эҷодкор аз дастовардҳои хеш ба Раиси вилояти Суғд маълумот дода, шеъру таронаҳои эҷодкардаашонро дар васфи Ватан, Тоҷикистон, Пешвои миллат ва ғайраҳо ироа намуданд.
«Шаҳраки саломатӣ», ки маҳсули дастранҷи ҷомеаи табибони вилоят буд, аз усулу равишҳои нави табобату муолиҷаи наврасону кӯдакон ба Раиси вилояти Суғд Раҷаб Аҳмадзода ва ҳайати ҳамроҳонаш иттилоъ доданд. Варзишгарони наврасу ҷавони вилоят маҳорати хешро дар гӯштингирӣ, дзюдо, теннис, шоҳмот, шашка, карате ва ғайра нишон дода, ваъда намуданд, ки ҳамеша Парчамбардори меҳнати азизи хеш мегарданд.
Гӯшаи зиндааи табиат, ки аз тарафи муҳассилини макотиби шаҳру навоҳии вилоят омода карда шуда буд, ба чорабинӣ ҳусни дигар зам намуд.
Раиси вилояти Суғд Раҷаб Аҳмадзода чорабинии тантанавиро бахшида ба Рӯзи байналмилалии ҳифзи кӯдакон ифтитоҳ намуда, эшонро бо Рӯзи идашон табрик намуд.
Роҳбари вилоят зимни суханронии худ аз ҷумла афзуд, ки «Ба шарофати сиёсати оқилона ва хирадмандонаи Асосгузори сулҳу ваҳдати миллӣ -Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳифзу ҳимояи оила, кўдак ва волидайн дар меҳвари давлатдории навини тоҷикон қарор дорад.
Боиси таъкид аст, ки ҳифзи ҳуқуқҳои кӯдакон, солимӣ ва хушбахтии онҳо ҳамеша дар мадди назари давлату Ҳукумат қарор дошта, ҷиҳати дар руҳияи меҳру муҳаббат ба Ватан ва ҳамчун насли солиму созанда тарбия ёфтани кӯдакон пайваста тадбирҳои зарурӣ андешида мешавад. Ба ибораи дигар, Ҳукумати Ҷумҳурии Тоҷикистон вобаста ба ҳифзи ҳуқуқу манфиатҳои кӯдакон, солимӣ, инкишофи зеҳнӣ ва ояндаи онҳо пайваста ғамхорӣ менамояд.
Дар ин бора, Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон чунин таъкид намудаанд: “Кӯдакон сарвати муҳимтарин, ояндаи неки имрӯзу фардои миллат мебошанд ва ғамхорӣ нисбати онҳо вазифаи ҳар як шахс, ҷомеа ва давлат аст. Барои рушди ҳаматарафаи кӯдак ва инкишофи ҷисмониву зеҳнии вай фазои орому озод, муҳити пурмуҳаббат ва эҳсоси ғамхорӣ нисбат ба ӯ лозим аст. Ояндаи ҷомеа дар дасти кӯдакони имрўз аст, ки фардо ба воя расида, ҷомеаро идора мекунанд”.
Рӯзи байналмилалии ҳифзи кӯдакон имсол дар соли таърихии 35-солагии Истиқлоли давлатии Ҷумҳурии Тоҷикистон таҷлил мегардад. Вобаста ба ин, кӯдакону наврасон бояд ҳамчун насли хушбахти даврони истиқлол барои азхуд кардани илмҳои замонавӣ, технологияҳои муосир кӯшиш намуда, бо хониши хубу аъло ва рафтори намунавӣ ворисони сазовори ин Ватани маҳбуб будани худро исбот намоянд.
Барномаи ҷолиби фарҳангӣ бо иштироки кӯдакон табъи ҳозиринро болида намуд.
Бояд қайд намуд, ки дар тантанаҳои идонаи боғи истироҳатии «Наврӯзгоҳ» беш аз 30 ҳазор нафар кӯдакону наврасон бо шукргузорӣ аз амну осоиштагӣ иштирок ва бо фараҳмандӣ Иди хешро таҷлил намуданд.

ТАҶЛИЛИ БОШУКӮҲИ 10-СОЛАГИИ МАРКАЗИ ТАЪЛИМИИ «АКАДЕМИЯИ МУРОДӢ» ДАР КОХИ РӮДАКӢ
Рӯзи гузашта дар Кохи Рӯдакӣ бахшида ба 10-солагии таъсисёбии Маркази таълимии «Академияи Муродӣ» ва маросими IX-уми ҷоизасупорӣ чорабинии тантанавӣ бо иштироки доираи васеи аҳли илму маориф, омӯзгорон, хатмкунандагон, ҷавонон ва меҳмонони расмӣ баргузор гардид.
Дар чорабинӣ Раиси Кумитаи иҷроияи Ҳизби Халқии Демократии Тоҷикистон дар вилояти Суғд Ҷаҳонгир Салимзода иштирок намуда, зимни суханронии худ нақши муассири «Академияи Муродӣ»-ро дар тарбияи насли донишманду соҳибмаърифат ва рушди ҷаҳонбинии ҷавонон баланд арзёбӣ намуд.
Зикр гардид, ки Маркази таълимии «Академияи Муродӣ» аз соли 2016 инҷониб фаъолият намуда, дар самти омӯзиши забонҳо, рушди маҳорати суханварӣ, баланд бардоштани сатҳи маърифат ва тарбияи ҷавонони ватандӯсту худшинос саҳми арзанда мегузорад. Имрӯз муассиса таҳти роҳбарии доктори илмҳои филологӣ, профессор Низомиддин Муродӣ фаъолияти пурсамар дошта, ба яке аз марказҳои бонуфузи маърифатӣ табдил ёфтааст.
Ҷаҳонгир Салимзода аз номи Кумитаи иҷроияи ҲХДТ дар вилояти Суғд роҳбарият, ҳайати омӯзгорон, кормандон ва тамоми алоқамандони марказро ба муносибати ин санаи фархунда табрик намуда, ба фаъолияти минбаъдаи онҳо комёбиҳои нав ба нав орзу кард.
Дар идомаи чорабинӣ як қатор омӯзгорон, кормандони фаъол ва шарикони муассиса барои саҳми арзанда дар рушди соҳаи маориф ва тарбияи ҷавонон бо Сипосномаҳо ва туҳфаҳои хотиравии Кумитаи иҷроияи ҲХДТ дар вилояти Суғд қадрдонӣ гардиданд.
Барномаи фарҳангии рангин бо иштироки ҳунармандон ва шогирдони марказ ба чорабинӣ шукуҳу шаҳомати хос бахшида, фазои идонаро боз ҳам гарму хотирмон намуд.
Таҷлили 10-солагии «Академияи Муродӣ» бори дигар нишон дод, ки ин марказ дар рушди илму маърифат, баланд бардоштани сатҳи дониш ва тарбияи ҷавонони соҳибмаърифату ватандӯст нақши муҳим ва муассир дорад.

БОЗИИ ПУРШИДДАТ ДАР МУСОБИҚАИ ВИЛОЯТӢ ОИД БА ФУТБОЛИ ХУРД БАРОИ ДАРЁФТИ ҶОМИ РАИСИ ВИЛОЯТИ СУҒД
Санаи 31 майи соли 2026 дар доираи мусобиқаи вилоятӣ оид ба футболи хурд барои дарёфти Ҷоми Раиси вилояти Суғд бозии ҷолибу рақобатнок миёни дастаҳои Кумитаи иҷроияи Ҳизби Халқии Демократии Тоҷикистон дар вилояти Суғд ва Муассисаи давлатии «Донишкадаи байналмилалии Хуҷанд»-и ДБССТ баргузор гардид.
Вохӯрӣ дар фазои рақобати солим ва пуршиддат ҷараён гирифта, ҳар ду даста барои ба даст овардани ғалаба талоши зиёд намуданд. Бозингарон маҳорати хуби варзишӣ, омодагии ҷисмонӣ ва рӯҳияи баланди даставиро нишон дода, ба мухлисон бозии хотирмон тақдим карданд.
Дар натиҷаи рақобати шадид дастаи Кумитаи иҷроияи Ҳизби Халқии Демократии Тоҷикистон дар вилояти Суғд бо ҳисоби 4:2 пирӯз гардид. Футболбозони даста бо иҷрои босамари нақшаҳои тактикӣ, ҳамоҳангии хуби даставӣ ва истифодаи самараноки имкониятҳои голзанӣ тавонистанд натиҷаи дилхоҳро ба даст оранд.
Қобили зикр аст, ки мусобиқаи мазкур бахшида ба Рӯзи ҷаҳонии футбол ва 35-солагии Истиқлоли давлатии Ҷумҳурии Тоҷикистон баргузор гардида, барои таҳкими дӯстиву ҳамдигарфаҳмӣ, рушди варзиш, ҷалби ҷавонон ба тарзи ҳаёти солим ва баланд бардоштани ҳисси ватандӯстиву ифтихори миллӣ мусоидат менамояд.

БАРГУЗОРИИ ҲАМОИШИ БОШУКӮҲИ ҲИЗБӢ ТАҲТИ УНВОНИ «ТУ БАР ТАЪРИХ ПИРӮЗ ОМАДӢ» ДАР ШАҲРИ БӮСТОН
Дар толори Қасри Фарҳанги шаҳри Бӯстон ҳамоиши бошукӯҳи ҳизбӣ таҳти унвони «Ту бар таърих пирӯз омадӣ» бо мақсади гиромидошти хотираи Қаҳрамонони Тоҷикистон — Нусратулло Махсум, Шириншо Шоҳтемур ва Нисор Муҳаммад, ҷиҳати тарғиби арзишҳои миллӣ, таҳкими ҳисси ватандӯстӣ ва баланд бардоштани худшиносии сиёсиву маънавии ҷомеа баргузор гардид.
Дар ин ҳамоиш муовини раиси Кумитаи иҷроияи Ҳизби Халқии Демократии Тоҷикистон дар вилояти Суғд Фирдавс Салимов, Раиси шаҳри Бӯстон Фирӯза Нуруллозода, раиси Кумитаи иҷроияи ҲХДТ дар шаҳри Бӯстон Манзура Юнусӣ, прокурори шаҳри Бӯстон Ҳоҷизода Толибҷон, Раиси суди шаҳри Бӯстон Боҳир Зоирзода, сардори шуъбаи дар шаҳри Бӯстон будаи Раёсати Кумитаи давлатии амнияти миллии Ҷумҳурии Тоҷикистон дар вилояти Суғд Наврӯз Қодиров, ректори Донишкадаи кӯҳию металлургии Тоҷикистон Маҳмадалӣ Бахтиёр Набӣ, аъзо ва ҷонибдорони Ҳизби Халқии Демократии Тоҷикистон, инчунин сарбозони қисмҳои ҳарбӣ иштирок намуданд.
Нахуст раиси Кумитаи иҷроияи Ҳизби Халқии Демократии Тоҷикистон дар шаҳри Бӯстон Манзура Юнусӣ ҳамоишро ифтитоҳ намуда, ҳозиринро ба ҳамоиши бошукӯҳи ҳизбӣ хайрамақдам гуфт.
Мавсуф дар оғози баромад аҳамияти баргузории ин чорабиниро махсус таъкид намуда, онро нишонаи арҷгузорӣ ба таърихи давлатдорӣ ва эҳтиром ба хотираи фарзандони барӯманди миллат арзёбӣ кард.
Номбурда изҳор дошт, ки Қаҳрамонони Тоҷикистон — Нусратулло Махсум, Шириншо Шоҳтемур ва Нисор Муҳаммад аз чеҳраҳои барҷастаи таърих буда, дар марҳилаҳои ҳассоси ташаккули давлатдории миллӣ бо ҷасорату фидокорӣ ва садоқати баланд ба Ватан хизматҳои мондагор анҷом додаанд. Ба гуфтаи ӯ, кору пайкори ин абармардон дар таҳкими пояҳои давлатдорӣ ва бедор намудани ҳисси худшиносии миллӣ нақши бузург дорад.
Таъкид гардид, ки корнамоиҳои Асосгузори сулҳу ваҳдати миллӣ — Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон дар гиромидошти ин фарзандони фарзонаи миллат ҷойгоҳи хоса доранд. Зикр шуд, ки бо ташаббус ва иқдомҳои бевоситаи Пешвои миллат адолати таърихӣ эҳё гардида, хотираи неки шахсиятҳои барҷастаи таърихии миллат дубора зинда ва гиромӣ дошта шуд.
Ин раванд дар таҳкими худшиносии миллӣ, эҳтиром ба таърихи давлатдорӣ ва бедор намудани ҳисси ифтихори миллӣ дар ҷомеа, махсусан миёни ҷавонон, нақши назаррас дошта, барои устувории ваҳдати миллӣ ва пойдории арзишҳои давлатӣ мусоидат менамояд.
Сипас Раиси шаҳри Бӯстон Фирӯза Нуруллозода суханронӣ намуда, таъкид кард, ки Қаҳрамонони Тоҷикистон — Нусратулло Махсум, Шириншо Шоҳтемур ва Нисор Муҳаммад аз зумраи шахсиятҳои барҷастаи таърихи миллат ба шумор рафта, дар марҳилаҳои ҳассоси ташаккули давлатдории миллӣ бо ҷасорат, садоқат ва масъулияти баланди шаҳрвандӣ саҳми мондагор гузоштаанд.
Мавсуф иброз дошт, ки ин фарзандони фарзонаи миллат дар роҳи бунёди пояҳои давлатдории тоҷикон, таҳкими низоми идоракунии давлатӣ ва ҳифзи манфиатҳои халқу Ватан корҳои бузургу таърихиро анҷом додаанд. Ба гуфтаи ӯ, хизматҳои онҳо на танҳо дар саҳифаҳои таърих сабт гардидаанд, балки имрӯз низ ҳамчун мактаби бузурги ватандӯстӣ ва худшиносии миллӣ барои наслҳои оянда хизмат мекунанд.
Ҳамзамон таъкид гардид, ки гиромидошти хотираи чунин шахсиятҳои таърихӣ барои бедор намудани ҳисси ифтихори миллӣ, таҳкими ваҳдати ҷомеа ва тарбияи насли наврас дар рӯҳияи садоқат ба давлату миллат аҳамияти хоса дорад. Раиси шаҳр афзуд, ки ҳар як шаҳрванд бояд аз кору пайкори ин абармардон сабақ гирифта, дар роҳи рушди устувори Тоҷикистони соҳибистиқлол саҳмгузор бошад.
Муовини раиси Кумитаи иҷроияи Ҳизби Халқии Демократии Тоҷикистон дар вилояти Суғд Фирдавс Салимов зимни суханронӣ дар чорабинии бахшида ба гиромидошти хотираи Қаҳрамонони Тоҷикистон — Нусратулло Махсум, Шириншо Шоҳтемур ва Нисор Муҳаммад иброз дошт, ки ин шахсиятҳои бузурги таърихӣ дар марҳилаҳои басо ҳассоси ташаккули давлатдории навини тоҷикон нақши тақдирсоз гузоштаанд.
Ба таъкиди ӯ, хизматҳои ин фарзандони содиқи миллат дар роҳи бунёди пояҳои давлатдорӣ, таҳкими худшиносии миллӣ ва ҳифзи манфиатҳои мардум бо ҷасорату матонати фавқулода анҷом дода шуда, то имрӯз аҳамияти бузурги таърихию тарбиявӣ доранд.
Раиси суди шаҳри Бӯстон Боҳир Зоирзода дар баромади худ нақши Қаҳрамонони Тоҷикистон — Нусратулло Махсум, Шириншо Шоҳтемур ва Нисор Муҳаммадро дар таҳкими давлатдорӣ ва рушди ҷомеа таъкид намуда, онҳоро аз поягузорони давлатдории миллӣ номид. Номбурда гуфт, ки фаъолияти ин шахсиятҳои таърихӣ имрӯз низ ҳамчун намунаи ватандӯстӣ ва худшиносии миллӣ аҳамияти муҳим дорад.
Прокурори шаҳри Бӯстон Ҳоҷизода Толибҷон низ иброз дошт, ки ин фарзандони фарзонаи миллат дар бунёди пояҳои давлатдории миллӣ ва ҳифзи манфиатҳои халқ саҳми мондагор гузоштаанд.
Ба гуфтаи ӯ, гиромидошти хотираи онҳо барои тарбияи насли наврас дар рӯҳияи эҳтиром ба таърих ва таҳкими худшиносии миллӣ аҳамияти хоса дорад.
Сипас, Сардори шуъбаи дар шаҳри Бӯстон будаи Раёсати Кумитаи давлатии амнияти миллии Ҷумҳурии Тоҷикистон дар вилояти Суғд Наврӯз Қодиров бо маърӯзаи пурмуҳтаво баромад намуда, ҷанбаҳои асосии таърихӣ ва сиёсии нақши Қаҳрамонони Тоҷикистон — Нусратулло Махсум, Шириншо Шоҳтемур ва Нисор Муҳаммадро бо овардани далелҳои таърихӣ таҳлил намуд.
Номбурда инчунин аҳамияти омӯзиш ва гиромидошти мероси таърихии онҳоро дар тарбияи насли наврас ва таҳкими худшиносии миллӣ муҳим арзёбӣ намуд.
Тавре иброз шуд, маҳз дар даврони соҳибистиқлолӣ (аз соли 1991 то имрӯз) ба шахсиятҳое, ки дар солҳои гуногуни таърихӣ барои давлатдорӣ ва ҳифзи манфиатҳои миллӣ хизмат кардаанд, баҳои воқеии таърихӣ дода шуд.
Ба таъкиди ӯ, Нусратулло Махсум (1881–1938) аз чеҳраҳои барҷастаи ибтидои ташаккули давлатдории тоҷикон ба шумор меравад. Ӯ дар солҳои 1924–1929, дар давраи таъсиси Ҷумҳурии Мухтори Шӯравии Сотсиалистии Тоҷикистон ва баъдан Ҷумҳурии Шӯравии Сотсиалистии Тоҷикистон, барои муайянсозии мақоми сиёсӣ ва ҳифзи манфиатҳои тоҷикон саҳми назаррас гузоштааст.
Корнамоиҳои ӯ боис гардиданд, ки тоҷикон ҳамчун миллати дорои давлат дар харитаи сиёсӣ ҷойгоҳи муайян пайдо намоянд.
Ҳамчунин Шириншо Шоҳтемур (1899–1937) ҳамчун яке аз бунёдгузорони низоми давлатӣ дар солҳои 1920–1930 фаъолияти сиёсӣ бурда, дар таҳкими сохтори идоракунии давлатии навини тоҷикон нақши муҳим бозидааст. Ӯ дар шароити бисёр душвори сиёсӣ барои ҳимояи ҳуқуқи миллӣ ва густариши худшиносии тоҷикон мубориза бурдааст. Мутаассифона, соли 1937 ӯ ҳамчун қурбонии репрессияҳои сиёсӣ ба қатл расонида шуд, вале номи ӯ дар таърихи давлатдорӣ абадӣ боқӣ монд.
Нисор Муҳаммад (1890–1940) низ аз шахсиятҳои маъруфи соҳаи маориф ва фарҳанг ба ҳисоб рафта, дар солҳои 1920–1930 барои рушди саводнокӣ, ташкили мактабҳои нав ва боло бурдани сатҳи маърифати ҷомеа саҳми арзанда гузоштааст. Ӯ аз ҷумлаи равшанфикроне буд, ки ба рушди фарҳанги миллӣ ва бедории фикрии ҷомеа такони ҷиддӣ бахшид.
Зикр шуд, ки дар даврони истиқлол бо иқдомҳои Пешвои муаззами миллат, аз ҷумла дар солҳои 2000–2020, номи ин шахсиятҳо дубора эҳё гардида, ба онҳо баҳои воқеии таърихӣ дода шуд.
Ҳамзамон, мавсуф зикр кард, ки бузургии Асосгузори сулҳу ваҳдати миллӣ — Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон дар он аст, ки шахсан ба Фурудгоҳ ташриф оварда, бо ташкили як корвони мошинҳо бо рамзи эҳтиром мушти хоки ин абармардони таърихро бо иззату икром пазируфта, онро ба оромгоҳи абадӣ бурданд. Ба гуфтаи ӯ, ин лаҳзаи таърихӣ ва пурэҳсос аз он гуна рӯйдодҳост, ки тасаввур ва ифодаи пурраи эҳсоси он қариб номумкин мебошад, зеро он рамзи олии эҳтиром ба гузашта, адолати таърихӣ ва арҷгузорӣ ба хизматҳои фарзандони фарзонаи миллат маҳсуб меёбад.
Ректори Донишкадаи кӯҳию металлургии Тоҷикистон Маҳмадалӣ Бахтиёр Набӣ низ баромад намуда, аҳамияти баргузории ҳамоиши мазкурро дар таҳкими худшиносии миллӣ ва арҷгузорӣ ба таърихи давлатдорӣ махсус таъкид кард. Мавсуф иброз дошт, ки гиромидошти хотираи Қаҳрамонони Тоҷикистон — Нусратулло Махсум, Шириншо Шоҳтемур ва Нисор Муҳаммад барои насли имрӯза мактаби бузурги ватандӯстӣ ва садоқат ба Ватан мебошад.
Дар анҷоми ҳамоиш як зумра аъзоёни фаъоли ҳизб аз ташкилотҳои ибтидоии ҳизбӣ бо Сипосномаи Кумитаи иҷроияи ҲХДТ дар вилояти Суғд ва шаҳри Бӯстон ва туҳфаҳои хотиравӣ сарфароз гардонида шуданд.

РАҶАБ АҲМАДЗОДА АЗ РАФТИ СОХТМОНИ БИНОИ НАВИ КУМИТАИ ИҶРОИЯИ ҲИЗБИ ХАЛҚИИ ДЕМОКРАТИИ ТОҶИКИСТОН ДАР ВИЛОЯТИ СУҒД ВА ШАҲРИ ХУҶАНД БОЗДИД КАРД

Раиси вилояти Суғд Раҷаб Аҳмадзода аз раванди корҳои сохтмонӣ дар бинои нави маъмурии Кумитаи иҷроияи Ҳизби Халқии Демократии Тоҷикистон дар вилояти Суғд ва шаҳри Хуҷанд боздид намуда, бо ҷараёни корҳои сохтмонӣ аз наздик шинос гардид.
Зимни боздид ба роҳбари вилоят иттилоъ дода шуд, ки корҳои сохтмонӣ тибқи нақша идома дошта, барои бо сифати баланд ва мутобиқ ба талаботи замони муосир бунёд намудани иншоот тамоми имкониятҳо сафарбар карда шудаанд. Қайд гардид, ки дар корҳои сохтмонӣ аз масолеҳи босифати ватанӣ истифода бурда шуда, мутахассисону сохтмончиён барои дар муҳлати муайяншуда ба анҷом расонидани сохтмон талош доранд.
Раиси вилоят ба сифати корҳои сохтмонӣ, истифодаи масолеҳи ҷавобгӯ ба стандартҳои муосир ва риояи талаботи меъмории шаҳрсозӣ таваҷҷуҳи махсус зоҳир намуда, ба масъулин ҷиҳати таъмини сифати баланд ва вусъат бахшидани корҳои сохтмонӣ дастуру супоришҳои мушаххас дод.
Дар суҳбат бо масъулин ва сохтмончиён Раҷаб Аҳмадзода таъкид намуд, ки бинои нави ҳизб бояд то ҷашни 35-солагии Истиқлоли давлатии Ҷумҳурии Тоҷикистон бо сатҳи баланд, сифати олӣ ва намуди зебову замонавӣ бунёд гардад. Зикр шуд, ки иншооти мазкур ҳамчун яке аз муҳимтарин иншооти ҷашнӣ бояд муаррифгари пешрафт, созандагӣ ва ободонии кишвар бошад.
Ҳамчунин роҳбари вилоят иброз дошт, ки дар бино тамоми шароити мусоид барои фаъолияти кормандон, баргузор намудани чорабиниҳо ва қабули шаҳрвандон муҳайё карда шавад. Ба гуфтаи ӯ, тарҳу намои иншоот бояд ҷавобгӯ ба стандартҳои ҷаҳонии сохтмон буда, симои муосири шаҳри Хуҷандро боз ҳам зеботар намояд.
Раиси вилояти Суғд ҳамзамон ба раиси Кумитаи иҷроияи Ҳизби Халқии Демократии Тоҷикистон дар вилояти Суғд Салимзода Ҷаҳонгир Салим дастур дод, ки назорати ҷараёни корҳои сохтмонӣ пурзӯр гардида, барои дар сатҳи баланд ва бо сифати намунавӣ ба анҷом расидани иншоот тадбирҳои иловагӣ амалӣ карда шаванд.
Маврид ба зикр аст, ки бинои нави Кумитаи иҷроияи ҲХДТ дар вилояти Суғд ва шаҳри Хуҷанд аз ҷумлаи иншооти муҳими ҷашнӣ ба ҳисоб рафта, ифтитоҳи он дар арафаи таҷлили 35-солагии Истиқлоли давлатии Ҷумҳурии Тоҷикистон ба нақша гирифта шудааст.
Дар фарҷоми боздид бахшида ба Иди саиди Қурбон барои сохтмончиён ва кормандони соҳа дастурхони идона ороста шуд. Зимни суҳбати самимӣ роҳбарият ба меҳнати софдилонаи сохтмончиён баҳои баланд дода, онҳоро ба муносибати фарорасии Иди Қурбон табрик намуданд. Таъкид гардид, ки заҳмати содиқонаи сохтмончиён дар ободиву пешрафти вилоят саҳми арзанда дорад.
Ҳамчунин ба масъулин ва сохтмончиён дастур дода шуд, ки суръати корҳои сохтмониро боз ҳам вусъат бахшида, пеш аз ҳама ба сифати сохтмон аҳамияти ҷиддӣ диҳанд, то иншоот дар муҳлати муайяншуда бо беҳтарин шароит мавриди истифода қарор гирад.

28 МАЙ — РӮЗИ ҚӮШУНҲОИ САРҲАДӢ

Ҳамасола санаи 28 май дар Ҷумҳурии Тоҷикистон ҳамчун Рӯзи Қӯшунҳои сарҳадӣ бо шукуҳу шаҳомати хоса таҷлил мегардад. Ин рӯз рамзи эҳтиром ва қадршиносӣ нисбат ба афсарону сарбозоне мебошад, ки шабонарӯзӣ баҳри ҳифзи марзу буми Ватан хизмати содиқона менамоянд.
Қӯшунҳои сарҳадӣ яке аз сохторҳои муҳими давлат ба ҳисоб рафта, таъмини амният, оромӣ ва суботи кишвар аз фаъолияти содиқонаи онҳо вобастагии калон дорад. Сарбозону афсарони ин ниҳод бо ҳисси баланди ватандӯстӣ ва масъулият дар ҳама шароити душвор марзи давлатиро ҳифз намуда, барои зиндагии осоиштаи мардум саҳми арзанда мегузоранд.
Бо шарофати сиёсати хирадмандонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон имрӯз Қӯшунҳои сарҳадии мамлакат ба як сохтори муназзаму нерӯманд табдил ёфта, шароити хизмат ва сатҳи омодагии ҳарбии хизматчиён сол аз сол беҳтар гардида истодааст.
Дар ин рӯзи фархунда ба ҳамаи хизматчиёни Қӯшунҳои сарҳадӣ тансиҳатӣ, иродаи қавӣ, руҳияи баланд ва дар иҷрои вазифаи муқаддаси ҳифзи марзу буми Тоҷикистони азиз барору комёбиҳо таманно менамоем.
Ҳифзи марз — ҳифзи Ватан аст!

Кумитаи иҷроияи Ҳизби Халқи Демократии Тоҷикистон дар вилояти Суғд

Аёдати ниёзмандону собиқадорони меҳнат дар арафаи иди саиди Қурбон

Дар арафаи иди саиди Қурбон бо дастуру ҳидоятҳои инсондӯстонаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон Эмомалӣ Раҳмон таваҷҷуҳ ба қишри ниёзманди ҷомеа, собиқадорони меҳнат ва шахсони рӯзгордида бештар гардида, иқдомҳои хайрхоҳона дар тамоми гӯшаву канори кишвар роҳандозӣ мешаванд.
Пешвои миллат дар баромадҳои худ пайваста таъкид менамоянд, ки ғамхорӣ нисбат ба ятимону маъюбон, ниёзмандон ва собиқадорони меҳнат яке аз арзишҳои муҳими ҷомеаи башардӯст буда, эҳтироми калонсолон ва қадршиносии хизматҳои онҳо қарзи инсонии ҳар як шахс ба ҳисоб меравад.
Дар ҳамин замина, дар арафаи иди саиди Қурбон Раиси Кумитаи иҷроияи Ҳизби Халқи Демократии Тоҷикистон дар вилояти Суғд Ҷаҳонгир Салимзода ва Раиси Кумитаи иҷроияи Ҳизби Халқи Демократии Тоҷикистон дар шаҳри Хуҷанд Ҷаббори Мунзифа ба аёдати як қатор шахсони ниёзманд, собиқадорони меҳнат ва нафарони эҳтиёҷманд рафта, онҳоро бо фарорасии иди саиди Қурбон табрик намуданд.
Зимни мулоқоту суҳбатҳо таъкид гардид, ки сиёсати иҷтимоии давлату Ҳукумат, махсусан ташаббусҳои инсонпарваронаи Пешвои миллат, ба беҳтар намудани шароити зиндагии мардум, дастгирии табақаҳои осебпазир ва баланд бардоштани мақому манзалати собиқадорони меҳнат равона гардидааст.
Раиси Кумитаи иҷроияи ҲХДТ дар вилояти Суғд Ҷаҳонгир Салимзода зимни суҳбат бо собиқадорону ниёзмандон иброз дошт, ки аёдати шахсони рӯзгордида ва дастгирии ниёзмандон яке аз суннатҳои неки миллӣ ба ҳисоб рафта, Ҳизби Халқи Демократии Тоҷикистон ин амалҳои хайрхоҳонаро пайваста идома медиҳад. Қайд карда шуд, ки собиқадорони меҳнат бо заҳмати содиқонаи худ дар рушди ҷомеа саҳми арзишманд гузоштаанд ва имрӯз хизматҳои онҳо ҳамеша қадршиносӣ мегардад. Ҳамзамон таъкид гардид, ки дар фазои сулҳу субот ва ваҳдати миллӣ ҳар як иқдоми хайрхоҳона боиси таҳкими меҳру муҳаббат ва ҳамдигарфаҳмӣ миёни ҷомеа мегардад.
Дар ҷараёни аёдат ба оилаҳо ва шахсони ниёзманд кумакҳои моддӣ ва туҳфаҳои идона тақдим гардида, сокинон барои чунин таваҷҷуҳу ғамхорӣ ба роҳбарияти давлату Ҳукумат ва масъулини ҳизбӣ изҳори сипосу миннатдорӣ намуданд.
Бояд гуфт, ки чунин иқдомҳои хайриявӣ дар арафаи ҷашну идҳо ба ҳукми анъана даромада, бозгӯи сиёсати инсондӯстона ва иҷтимоии роҳбарияти олии мамлакат маҳсуб меёбанд.