29/11/2022
MTC Partisipa Reuniaun Konsellu Ministru Iha Munisípiu Atauro.
Atauro, 23 Novembru 2022; Ministru Transportes no Komunikasoins José Agustinho da Silva,hamutuk ho membru Governu sira-seluk partisipa iha reuniaun Konsellu Ministru ne'ébe maka lidera husi Eselénsia Primeiru-Ministru (PM) Jenerál Taur Matan Ruak, iha edifísiu administrasaun sentrál iha munisípiu Atauro.
Iha reuniaun Konsellu Ministru ne'e aprova ona projetu Proposta Lei, ne’ebé aprezenta husi Ministru Defeza (MD), Sr. Filomeno Paixão de Jesus, kona-ba Lei Programasaun Militár nian.
Projetu Proposta Lei ida-ne’e, ho objetu atu enkuadra orsamentu despeza públika relasiona ho ekípamentu no armamentu, ho impaktu diretu atu edifika kapasidade militár ne’ebé presiza hodi sustenta Sistema Forsa Nasionál no atu kumpre misaun sira ne’ebé atribui ba F-FDTL.
...
Aprova mós projetu Dekretu-Lei, ne’ebé aprezenta husi Ministru Turizmu, Komérsiu no Indústria, Sr. José Lucas do Carmo da Silva, kona-ba Rejime jerál regra orijen nian.
Objetivu husi diploma ida-ne’e atu fornese ba ordenamentu jurídiku nasionál rejime jerál regra orijen nian ne’ebé, tuir lejizlasaun aduaneira ne’ebé eziste, define prinsípiu jerál regra orijen nian, estabelese prosedimentu jerál ida hodi fó-sai sertifikadu orijen no kria organizmu nesesáriu sira ba armonizasaun internasionál Regra Orijen nian, ne’ebé estabelese baze sira ba selebrasaun tuir no/ka tratadu internasionál sira kona-ba regra orijen ne’ebé serve interese dezenvolvimentu ekonómiku Timor-Leste nian.
...
Konsellu Ministrus mós aprova ona projetu Dekretu-Lei, ne’ebé aprezenta husi Ministru Prezidénsia Konsellu Ministrus, Sr. Fidelis Manuel Leite Magalhães, kona-ba provimentu no remunerasaun ba titulár sira órgaun pesoa koletiva sira ne’ebé integra iha Administrasaun indireta Estadu nian.
Diplóma ne’e define eskalaun remunerasaun haat, tuir despeza média orsamentu iha tinan lima ikus husi kada ema koletiva públika no tinan tinan, to’o loron 31 fulan-janeiru, Konsellu Ministrus, ho Rezolusaun Governu nian, determina, ba tinan refere, eskalaun pesoa koletiva públika sira ne’ebé abranje iha diploma ida-ne’e.
1. Remunerasaun ba titulár sira husi órgaun pesoa koletiva nian sira ho despeza média ne’ebé hanesan ka aas-liu husi dolar amerikanu millaun 10 maka valór ne’ebé korrespondente ba 90% husi remunerasaun Primeiru-Ministru nian;
2. Remunerasaun ba titulár sira husi órgaun pesoa koletiva nian sira ho despeza média ne’ebé hanesan ka aas-liu husi dolar amerikanu millaun 5 maka valór ne’ebé korrespondente ba 80% husi remunerasaun Primeiru-Ministru nian;
3. Remunerasaun ba titulár sira husi órgaun pesoa koletiva nian sira ho despeza média ne’ebé hanesan ka aas-liu husi dolar amerikanu millaun 1 maka valór ne’ebé korrespondente ba 70% husi remunerasaun Primeiru-Ministru nian; no
4. Remunerasaun ba titulár sira husi órgaun pesoa koletiva nian sira ho despeza média ne’ebé hanesan ka aas-liu husi dolar amerikanu millaun 1 maka valór ne’ebé korrespondente ba 60% husi remunerasaun Primeiru-Ministru nian;
Hare ba nível responsabilidade, grau kompleksidade no ejijénsia husi tarefa sira ne’ebé liga ba kargu ne’e, valór hirak ne’ebé baibain prátika ona iha merkadu husi setór atividade ne’ebé hanesan, ba kompeténsia téknika no ba kurríkulu akadémiku no profisionál husi ema ne’ebé hetan nomeasaun, bele, ba órgaun sira diresaun empreza públika nian, estabelese remunerasaun ho valór aas-liu husi valór ne’ebé temi ona, maibé labele ultrapasa valór remunerasaun ne’ebé legalmente prevee ba Prezidente Repúblika.
Regra sira ne’ebé define ona iha diploma ida-ne’e sei aplika de’it ba titulár husi órgaun sira ne’ebé hetan nomeasaun hafoin Diplóma ne’e tama iha vigór, inklui mós ba kazu sira iha ne’ebé nomeasaun ninia efeitu maka renovasaun ka rekondusaun iha mandatu ka kargu ne’ebé antes ne’e ezerse ona.
...
Ministru Prezidénsia mós aprezenta ba Konsellu Ministru, Dekretu-Lei atu kria Institutu Públiku Millennium Challenge Account-Timor-Leste no aprovasaun Estatutu ne’e rasik hetan mós aprovasaun.
Institutu Públiku ida-ne'e, ne’ebé tutela husi Primeiru-Ministru, sei funsiona hanesan instrumentu implementasaun finansiamentu nian ne'ebé sei hetan doasaun husi ajénsia governamentál amerikana Millennium Challenge Corporation (MCC), tuir akordu kompaktu ne’ebé asina ona iha loron 19 fulan-jullu liubá, no sai hanesan responsavel ba jestaun finansiamentu no ba koordenasaun implementasaun nian ne’ebé atu promove liuhusi entidade nasionál sira. Implementasaun projetu sira ne'e sei sai hanesan responsabilidade Governu nian, liuhusi entidade nasionál sira, tuir ida-idak nia kompeténsia.
...
Tuir mai aprezentasaun rua, ne’ebé hala’o husi Ministru Administrasaun Estatal, Sr. Miguel Pereira de Carvalho, kona-ba opsaun polítika ne’ebé sai hanesan baze:
● Ba inisiativa alterasaun Lei nu.11/2009, loron 7 fulan-outubru, Divizaun Administrativa Territóriu.
Ho intervensaun lejizlativa ida ne’e hakarak fahe Postu Administrativu Maubara iha Postu Administrativu rua (Maubara no Loes) no fahe Postu Administrativu Baukau ba Postu Administrativu tolu (Kelikai, Kelikai antigu no Matebian).
● Ba inisiativa ho alterasaun Lei nú.6/2006, loron 28 fulan-dezembru, ne’ebé aprova Lei Eleitorál ba Parlamentu Nasionál.
Projetu ida-ne’e ho objetivu atu inkorpora iha Lei Eleitorál ba Parlamentu Nasionál alterasaun nesesária sira hodi rezolve difikuldade ne’ebé sidadaun timoroan sira iha rai-li’ur enfrenta atu ezerse sira-nia direitu votu, liuliu ba se mak sei iha resenseamentu iha territóriu nasionál, no mós tanba difikuldade atu asesu ba sentru votasaun sira.
18/12/2022
18/12/2022
13/12/2022
02/12/2022
02/12/2022
01/12/2022
30/11/2022
29/11/2022
29/11/2022
29/11/2022
18/11/2022
15/11/2022