Vise PM no Ministru Koordenador Ekonomia no Ministru Turizmu no Ambiente

𝐊𝐀𝐌𝐁𝐎𝐉𝐀 𝐒𝐄𝐈 𝐀𝐏𝐎𝐈𝐀 𝐓𝐈𝐌𝐎𝐑-𝐋𝐄𝐒𝐓𝐄 𝐈𝐇𝐀 Á𝐑𝐄𝐀 𝐃𝐈𝐉𝐈𝐓𝐀𝐋𝐈𝐙𝐀𝐒𝐀𝐔𝐍 𝐊𝐀𝐌𝐁𝐎𝐉𝐀 𝐒𝐄𝐈 𝐀𝐏𝐎𝐈𝐀 𝐓𝐈𝐌𝐎𝐑-𝐋𝐄𝐒𝐓𝐄 𝐈𝐇𝐀 Á𝐑𝐄𝐀 𝐃𝐈𝐉𝐈𝐓𝐀𝐋𝐈𝐙𝐀𝐒𝐀𝐔𝐍

𝐕𝐢𝐬𝐞-𝐏𝐌 𝐬𝐢𝐦𝐮 𝐝𝐞𝐥𝐞𝐠𝐚𝐬𝐚𝐮𝐧 𝐊𝐚𝐦𝐛𝐨𝐣𝐚 𝐥𝐢𝐝𝐞𝐫𝐚𝐝𝐮 𝐡𝐨𝐬𝐢 𝐌𝐢𝐧𝐢𝐬𝐭𝐫𝐮 𝐏𝐨𝐬𝐭𝐮 𝐧𝐨 𝐓𝐞𝐥𝐞𝐤𝐨𝐦𝐮𝐧𝐢𝐤𝐚𝐬𝐚𝐮𝐧

𝟏 𝐉𝐮ñ𝐮 𝟐𝟎𝟐𝟔
=========
Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, simu delegasaun ida husi Reinu Kamboja iha enkontru kortezia ne'ebé hala’o iha Gabinete Vise-PM, Farol, Díli, Segunda, 1 Juñu 2026.

Delegasaun Kamboja ne’e kompostu husi Dr. Chea Vandeth, Ministru Postu no Telekomunikasaun; Haksokheng, Sekretáriu Estadu Ministériu Postu no Telekomunikasaun; Chea Sereyvath, Sekretáriu Jerál DGC; Sam Sethserey, Diretór Jerál MPTC; no CHUN Sovannarith, Embaixadór Estraordináriu no Plenipotensiáriu Reinu Kamboja nian ba Timor-Leste.

Iha enkontru ne’e, Vise-Primeiru-Ministru akompañadu husi Ministru Transporte no Komunikasaun, Miguel Manetelu, Prezidente Autoridade Aeroportu no Aviasaun Timor-Leste (AATL), no sira seluk tan

Durante reuniaun, diskute oportunidade sira atu hametin relasaun amizade no kooperasaun entre Timor-Leste no Kamboja, liuliu iha área ekonomia, transporte, ligasaun aérea, turizmu, komérsiu no investimentu. Delegasaun Kamboja mós fahe esperiénsia kona-bá dezenvolvimentu setór estratéjiku sira ne'ebé kontribui ba kreximentu ekonómiku.

Vise-PM, Dato’ Seri Francisco Kalbuadi Lay hateten katak vizita delegasaun Kamboja nian ne’e importante tebes atu reforsa relasaun bilaterál entre nasaun rua ne’ebé iha ona amizade ne’ebé metin.

“Ministru Komunikasaun Kamboja nian mai vizita Timor-Leste atu haree no hametin kooperasaun, liu-liu iha área dijitál. Ha’u kongratula ba Ministériu Transporte no Komunikasaun tanba konsege ona pasu ida ba oin liu-liu iha área dijitál. Ida-ne’e hatudu katak Timor-Leste la’o ba oin iha área transformasaun dijitál. Ne’ebé agora hotu-hotu kaer kareta ka motor karik imi iha ona driver licence ida ho sistema dijitál nune’e mós rejistu ba kareta,” dehan Vise-Primeiru-Ministru.

Nia mós subliña katak relasaun entre Timor-Leste no Kamboja sai espesiál tanba ligasaun amizade ne’ebé di’ak entre líder sira husi nasaun rua.

“Timor-Leste no Kamboja iha relasaun ne’ebé di’ak tebtebes. Eis Primeiru-Ministru, Hun Sen mak belun di’ak ba Prezidente Repúblika Maun José Ramos-Horta no Primeiru-Ministru Maun Bo’ot Kay Rala Xanana Gusmão. Tanba ne’e, Kamboja kontinua fó apoiu ba Timor-Leste, liu-liu iha área téknika no kapasitasaun,” hateten nia.

Vise-Primeiru-Ministru akresenta katak kooperasaun entre nasaun rua sei kontinua bao in ba setor importante seluk, inklui edukasaun no dijitalizasaun.

“Neste momentu ida-ne’e, kooperasaun la’ós de’it iha área dijitalizasaun. delegasaun sei hasoru mós Ministra Edukasaun atu haree área saida de’it mak Kamboja bele ajuda Timor-Leste, liu-liu iha dezenvolvimentu teknolojia no dijitalizasaun iha setor edukasaun. Iha futuru, ha’u fiar katak kooperasaun entre nasaun rua sei sai di’ak liu tan,” dehan tan Vise-PM

𝐕𝐢𝐬𝐞-𝐏𝐌 𝐥𝐢𝐝𝐞𝐫𝐚 𝐫𝐞𝐮𝐧𝐢𝐚𝐮𝐧 𝐡𝐨 𝐊𝐨𝐦𝐢𝐬𝐚𝐮𝐧 𝐎𝐫𝐠𝐚𝐧𝐢𝐳𝐚𝐝𝐨𝐫𝐚 𝐛𝐚 𝐄𝐯𝐞𝐧𝐭𝐮 𝐌𝐚𝐫𝐚𝐭𝐨𝐧𝐚 𝐍𝐚𝐬𝐢𝐨𝐧á𝐥, 𝐒𝐢𝐦𝐞𝐢𝐫𝐚 𝐋𝐚𝐮𝐫𝐞𝐚𝐝𝐮 𝐍𝐨𝐛𝐞𝐥 𝐧𝐨 𝐍𝐚𝐭𝐚𝐥 𝐡𝐨 𝐏𝐨𝐯𝐮

𝟏 𝐉𝐮ñ𝐮 𝟐𝟎𝟎𝟐𝟔
==========
Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, nu'udar Prezidente Komisaun Organizadora, lidera reuniaun kontinuasaun ho Xefe Kaza Sivíl Prezidénsia Repúblika membru sira husi Komisaun Organizadora hodi diskute preparasaun ba eventu importante sira ne'ebé sei realiza iha rai-laran durante tinan 2026, iha Palásiu Prezidensiál, Bairru-Pité, Díli, Segunda, 1 Juñu 2026.

Iha diskusaun sira fó atensaun ba progresu preparasaun no koordenasaun interinstitusionál ba eventu sira hanesan Maratona Nasionál, Simeira Laureadu Nobel sira no Natal ho Povu. Durante reuniaun, komisaun avalia preparasaun lojístika, programa atividade sira, mekanizmu koordenasaun entre instituisaun relevante no medida sira atu asegura katak eventu hotu bele hala’o ho susesu, organizadu no partisipa hosi sosiedade tomak.

𝐎𝐫𝐬𝐚𝐦𝐞𝐧𝐭𝐮 𝐛𝐚 𝐌𝐓𝐀 $𝟗,𝟕𝟔𝟔,𝟖𝟑 𝐚𝐩𝐫𝐨𝐯𝐚𝐝𝐮 𝐢𝐡𝐚 𝐞𝐬𝐩𝐞𝐬𝐢𝐚𝐥𝐢𝐝𝐚𝐝𝐞

𝟏 𝐉𝐮ñ𝐮 𝟐𝟎𝟐𝟔
=========
Parlamentu Nasionál halo diskusaun no votasaun ba Proposta Lei No.31/VI (3a) iha Segunda, 01 Juñu 2026, aprova ona Orsamentu Retifikativu 2026 ba Ministériu Turizmu no Ambiente (MTA) ho totál $9,766,83 ho votu a favór 42, kontra 0, abstensaun 23.

Orsamentu ba MTA ne’e fahe ba kategoria saláriu no vensimentu mantein ho $4,048,514, bens no servisu $4, 610, 967, transferénsia públika mantein $200,000 no kapitál menór mantein $586,026, ho totál orsamentu $9, 766, 83.

Prezidente Parlamentu Nasionál, Maria Fernanda Lay, deklara ho aprovasaun ne’e mak orsamentu ba MTA pasa. Debate espesialidade ne’e lidera hosi Prezidente Parlamentu Nasionál, Maria Fernanda Lay no partisipa hosi Primeiru-Ministru, Kay Rala Xanana Gusmão, membru Governu sira inklui entidade relevante seluk.

Durente debate ne’e, Ministru Turizmu no Ambiente, Dato’ Seri Francisco Kalbuadi Lay, rasik mak halo aprezentasaun no esplika detallada kona-bá alokasaun orsamentu bazeia bá programa sira ne’ebé iha ona.

𝐕𝐢𝐬𝐞-𝐏𝐌 𝐚𝐬𝐢𝐧𝐚 𝐚𝐤𝐨𝐫𝐝𝐮 𝐟𝐢𝐧𝐚𝐧𝐬𝐢𝐚𝐦𝐞𝐧𝐭𝐮 𝐛𝐚 𝐩𝐫𝐨𝐣𝐞𝐭𝐮 𝐂𝐑𝐄𝐒𝐂𝐄 𝐧𝐨 𝐞-𝐉𝐔𝐒 𝐓𝐋 𝐡𝐨 𝐚𝐩𝐨𝐢𝐮 𝐔𝐧𝐢𝐚𝐮𝐧 𝐄𝐮𝐫𝐨𝐩𝐞𝐢𝐚

𝟐𝟗 𝐌𝐚𝐢𝐮 𝟐𝟎𝟐𝟔
==========
Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, iha Sesta, 29 Maiu 2026, partisipa iha serimónia asinatura akordu finansiamentu ba projetu estratéjiku rua, mak Projetu Kriasaun no Dezenvolvimentu Negósiu Ekonomia Sustentável no Sirkulár (CRESCE-sigla inglés) no Projetu Governasaun Eletrónika ba Judisiáriu iha Timor-Leste (e-JUS TL-sigla inglés), iha Salaun Nobre Ministériu Negósiu Estranjeiru no Kooperasaun, Praia dos Coqueiros, Díli.

Akordu ne'ebé asina husi Embaixadór Uniaun Europeia, Thorsten Bargfrede ho governante Timor-Leste ne'e, Uniaun Europeia (UE) apoia euro millaun sia ba Governu Timor-Leste ba iha projetu 'e-Governance for the Judicial System in Timor-Leste (e-JUS TL) no Creation and Development of Sustainable Businesses and the Circular Economy' (CRESCE), ne'ebé moderniza infraestrutura legál nasaun nian, no atu impulsiona ninia kreximentu ekonómiku sustentável.

Husi euro millaun sia ne'e, millaun tolu apoia ba Creation and Development of Sustainable Businesses and the Circular Economy (CRESCE) no asina direitamente husi Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato' Seri Francisco Kalbuadi Lay no millaun neen apoia ba 'e-Governance for the Judicial System in Timor-Leste' (e-JUS TL) no asina husi Ministru Justisa, Sérgio de Jesus Fernandes da Costa Hornai.

Liuhosi diskursu, Vise-PM hateten katak asinatura akordu sira-ne’e reprezenta etapa importante ida ba dezenvolvimentu sustentável, governasaun di’ak no modernizasaun instituisaun públika sira iha Timor-Leste. Vise-PM mos subliña katak parseria entre Governu Timor-Leste no Uniaun Europeia reflete kompromisu hamutuk atu promove kreximentu ekonómiku inkluzivu, transparénsia no sustentabilidade ambientál.

“Ho sentidu onra ne’ebé kle’an no responsabilidade solene mak ohin ha’u hamriik iha ita-boot sira-nia oin hodi marka marku signifikativu ida iha viajen dezenvolvimentu Timor-Leste nian asinatura formál ba akordu finansiamentu ba projetu transformativu rua: Kriasaun no Dezenvolvimentu Negósiu Ekonomia Sustentável no Sirkulár (CRESCE), no Governasaun Eletrónika ba Judisiáriu Leste iha Timor-Leste (e-JUS TL).

Serimónia ida-ne'e simboliza liu duké konkluzaun negosiasaun sira ka alokasaun rekursu finanseiru sira. Ida-ne'e reprezenta parseria ida ne'ebé kontinua no vizaun ne'ebé fahe entre Governu Timor-Leste no ita-nia parseiru dezenvolvimentu sira ne'ebé valorizadu liuliu entre sira, Uniaun Europeia ne'ebé apoia ita-nia kompromisu mútuo ba realizasaun dezenvolvimentu sustentável, inkluzivu, no transparente.

Primeiru no importante liu, molok ita hahú, nu’udar Governu Timor-Leste ha’u agradese tebes ba UE no ita-nia parseiru dezenvolvimentu sira hotu ne’ebé hala’o knaar importante tebes hodi tulun ita atu halo ida-ne’e ho sira-nia apoiu kontínuu, ho sira-nia talentu, no sira-nia intensaun atu serbisu hodi alkansa ida-ne’e. Ita-boot nia solidariedade maka nesesáriu ba dalan komplikadu ne'ebé ita sei la'o nu'udar nasaun foun ida hodi asegura kreximentu ekonómiku, justisa sosiál no ambiente. Parseria CRESCE maka saida maka ami fiar ba dezenvolvimentu ekonómiku ba ami nia nasaun nia futuru futuru ida ho sustentabilidade iha nia sentru.

Inisiativa atu fasilita negósiu ekonomia sirkulár la'ós de'it konsistente ho prátika di'ak sira iha mundu tomak, maibé mós iha sentru prioridade sosio-ekonómiku no ambientál sira Timor-Leste nian. Iha tranzisaun ba nia modelu sirkulár foun sira, ami hakarak muda ami nia ekonomia hosi modelu lineár tuan 'foti-halo-soe' ba sistema rejenerativu ida ho rekursu hotu-hotu ne'ebé uza ho efeitu tomak enkuantu minimiza kuantidade lixu no mantein valór ekonómiku iha ekonomia ba tempu ne'ebé posivel.

Tanba saida maka ida-ne'e urjente tebes ba Timor-Leste? Nu'udar kustodiu sira ba ekosistema úniku sira, ekosistema sira-ne'e sei presiza eziste ba jerasaun sira tuirmai. Husi CRESCE ita sei harii ekonomia foun ida ho énfaze ba negósiu no oportunidade foun no sustentável ba feto no joven emprezária sira atu sira bele kontribui ba ida-ne’e iha negósiu lokál sira, atu nune’e ita-nia komunidade sira bele serbisu ho produtivu iha ekonomia, ho asesu no oportunidade investimentu ne’ebé hanesan. Ida-ne'e mós aumenta ita-nia rezisténsia ba dezafiu ambientál sira, hanesan mudansa klimátika, ne'ebé sei kona ita-nia rain maka'as liután. Liuhusi apoiu atividade ekonómika sustentável atu hadi’a seguransa ai-han, halakon ki’ak, no transforma moris.

Sentrál hanesan, maski nune'e, maka projetu e-JUS TL sistema judisiál ne'ebé maka sai hanesan âncora ba governasaun di'ak, estadu direitu no justisa sosiál. Judisiáriu ida ne'ebé independente, efetivu, no nakloke maka nesesáriu ba governasaun demokrátiku no estabilidade ekonómika. Sistema eletróniku sira hodi moderniza governasaun judisiál; tuir padraun, hadi’a abilidade judisiáriu nian atu presta justisa, tuir tempu, asesivel no responsabiliza ba sidadaun hotu-hotu. Projetu ne'e sei fasilita jestaun kazu dijitál entre sira seluk no rasionaliza administrasaun tribunál nian ne'ebé lori ba aumentu asesu ba informasaun legál no hamenus atrazu sira; hasa'e transparénsia. Tanba saida maka ida-ne'e importante? Tanba justisa ne’ebé atraza la’ós de’it prejudika konfiansa públiku nian maibé mós sobu ita-nia instituisaun sira.

Projetu ida ne’e sei reforsa Estadu de Direitu ne’ebé sai hanesan baze ba demokrasia ne’ebé importante liu-liu tanba tenke sai hanesan instrumentu kontra korupsaun no mós instrumentu ida ne’ebé efetivu ba governasaun la’ós de’it prosesu sira iha rai laran maibé iha prosesu hotu-hotu iha ekonomia no dezenvolvimentu nasaun ida nian.

Kolektivamente, inisiativa sira-ne'e konstitui vizaun unifikada ida ne'ebé haree ba prosperidade ekonómika, governasaun di'ak no protesaun ambientál hanesan pilár sira ne'ebé reforsa malu.

Uniaun Europeia no ita-nia parseiru sira hamriik sorin-sorin ho Timor-Leste parseria ida ne’ebé harii iha respeitu, valór sira ne’ebé fahe, no objetivu komún sira. Parseria ida-ne'e maka sei transforma ita-nia aspirasaun sira ba realidade. Ita-nia governu iha kompromisu atu asegura projetu sira-ne’e implementa ho transparénsia, ho responsabilidade, no inkluzivu, ho partisipasaun ativu hosi parte interesada hotu-hotu, inklui sosiedade sivíl no komunidade lokál sira. Bainhira ita formaliza akordu sira-ne'e ohin, ha'u fiar katak sira sei aselera ita-nia progresu ba Objetivu sira Dezenvolvimentu Sustentável nian no liután.

Dala ida tan, ha'u agradese ho laran tomak ba Uniaun Europeia no ami nia parseiru dezenvolvimentu sira hotu ba ita-boot nia kompromisu ne'ebé metin. Hamutuk, ita sei kontinua harii Timor-Leste ida ne’ebé reziliente, prósperu, no justu,”deklara Vise-PM.

Partisipa iha asina akordu ne’e reprezentante sira husi Uniaun Europeia , parseiru dezenvolvimentu onradu sira no membru Governu balu.

𝐕𝐢𝐬𝐞-𝐏𝐌 𝐬𝐢𝐦𝐮 𝐯𝐢𝐳𝐢𝐭𝐚 𝐝𝐞𝐬𝐩𝐞𝐝𝐢𝐝𝐚 𝐡𝐮𝐬𝐢 𝐄𝐧𝐤𝐚𝐫𝐫𝐞𝐠𝐚𝐝𝐮 𝐛𝐚 𝐀𝐬𝐮𝐧𝐭𝐮 𝐬𝐢𝐫𝐚 𝐁𝐫𝐮𝐧𝐞𝐢 𝐃𝐚𝐫𝐮𝐬𝐬𝐚𝐥𝐚𝐦

𝟐𝟗 𝐌𝐚𝐢𝐮 𝟐𝟎𝟐𝟔
===========
Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, simu vizita despedida husi Enkarregadu ba Asuntu sira Brunei Darussalam nian ba Timor-Leste, Sr. Mohammad Dino Ayup, iha Gabinete Vise-PM, Farol, Díli, Sesta, 29 Maiu 2026.

Iha enkontru ne’e, Vise-Primeiru-Ministru hato’o apresiasaun no agradesimentu ba kontribuisaun no dedikasaun ne’ebé Sr. Mohammad Dino Ayup fó durante ninia misaun diplomátika iha Timor-Leste, liuliu iha esforsu atu hametin relasaun amizade no kooperasaun entre Timor-Leste no Brunei Darussalam.

𝐏𝐍 𝐚𝐩𝐫𝐨𝐯𝐚 𝐎𝐫𝐬𝐚𝐦𝐞𝐧𝐭𝐮 𝐑𝐞𝐭𝐢𝐟𝐢𝐤𝐚𝐭𝐢𝐯𝐮 𝐢𝐡𝐚 𝐣𝐞𝐧𝐞𝐫𝐚𝐥𝐢𝐝𝐚𝐝𝐞 𝐡𝐨𝐝𝐢 𝐡𝐚𝐦𝐞𝐭𝐢𝐧 𝐞𝐬𝐭𝐚𝐛𝐢𝐥𝐢𝐝𝐚𝐝𝐞 𝐞𝐤𝐨𝐧ó𝐦𝐢𝐤𝐚

𝟐𝟖 𝐌𝐚𝐢𝐮 𝟐𝟎𝟐𝟔
===========
Parlamentu Nasionál (PN) aprova proposta alterasaun dahuluk ba Orsamentu Estadu 2026 (Orsamentu Retifikativu 2026) iha jeneralidade ho votu a favor 42, kontra zero no abstensaun 23. Proposta ne’e ho objetivu hakarak responde ba impaktu situasaun internasionál atuál, inklui instabilidade jeopolítika no flutuasaun merkadu enerjétiku, liuhosi medida sira atu hametin seguransa enerjétika, estabiliza folin kombustível no garante kontinuidade servisu esensiál sira.

Iha diskusaun Orsamentu Retifikativu ne’e hetan partisipasaun husi Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, no mós membru Governu sira.

Primeiru-Ministru, Kay Rala Xanana Gusmão, iha nia intervensaun hatete katak objetivu orsamentu la’ós de’it kona-ba númeru no dadus finanseiru, maibé atu garante dezenvolvimentu nasaun nian no hadi’a moris povu nian. Governu mós reafirma nafatin nia kompromisu ba transformasaun nasionál, integrasaun rejionál no dezenvolvimentu inkluzivu.

Entre medida prinsipál sira mak kriasaun rezerva estratéjiku kombustível nasionál ho valór US$174,3 millaun atu asegura nesesidade kombustível ba produsaun eletrisidade durante fulan hitu resin, no programa subsídiu kombustível ho valór US$42 millaun atu hamenus impaktu aumentu folin internasionál ba família no negósiu sira.

Proposta ne’e inklui mós reforsu seguransa alimentár, rekrutamentu kadete PNTL, despeza Prezidénsia Pro Tempore CPLP no reforsu Rezerva Kontinjénsia Estadu. Ho alterasaun ne’e, Orsamentu Estadu 2026 aumenta hosi US$2,291 biliaun ba US$2,392 biliaun, ne’ebé la’ós mai hosi aumentu transferénsia Fundu Petrolíferu, maibé hosi reajustamentu fonte finansiamentu no utilizasaun saldu disponível sira.

Tuir aprovasaun iha jeneralidade, proposta lei ne’e sei tama ba diskusaun espesialidade entre 29 Maiu to’o 2 Juñu 2026 antes hala’o votasaun finál global iha Parlamentu Nasionál ba alterasaun dahuluk ba Lei Nú. 8/2025, loron 27 fulan-novembru kona-bá Orsamentu Jeral Estadu 2026.

𝐕𝐢𝐬𝐞-𝐏𝐌 𝐞𝐧𝐤𝐨𝐧𝐭𝐫𝐮 𝐡𝐨 𝐄𝐦𝐛𝐚𝐢𝐱𝐚𝐝𝐨𝐫𝐚 𝐀𝐮𝐬𝐭𝐫á𝐥𝐢𝐚 𝐢𝐡𝐚 𝐓𝐢𝐦𝐨𝐫-𝐋𝐞𝐬𝐭𝐞

𝟐𝟖 𝐌𝐚𝐢𝐮 𝟐𝟎𝟐𝟔
==========
Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, hala’o enkontru ho Embaixadora Austrália iha Timor-Leste, Caitlin Wilson, hodi kontinua hametin relasaun amizade no kooperasaun entre Timor-Leste ho Austrália iha Gabinete Vise-PM, Farol, Díli, Kinta, 28 Maiu 2026.

𝐕𝐢𝐬𝐞-𝐏𝐌 𝐬𝐢𝐦𝐮 𝐆𝐫𝐮𝐩𝐮 𝐓𝐫𝐚𝐛𝐚𝐥𝐥𝐮 𝐄𝐤𝐨𝐧𝐨𝐦𝐢𝐚 𝐀𝐳𝐮𝐥

𝟐𝟖 𝐌𝐚𝐢𝐮 𝟐𝟎𝟐𝟔
==========
Vise-Primeiru-Ministru, Ministru Koordenadór ba Asuntu Ekonómiku no Ministru Turizmu no Ambiente, Dato’ Seri Francisco Kalbuadi Lay, iha Kinta, 28 Maiu 2026, simu no halo enkontru kortezia ho Grupu Traballu Ekonomia Azul ne’ebé lidera husi Ir. Vasco Becker iha Gabinete Vise-PM, Farol, Díli.

Enkontru ne’e haree kona-bá dezenvolvimentu konseitu no oportunidade sira iha área Ekonomia Azul, liuliu utilizasaun sustentável ba rekursu tasi nian hodi promove kreximentu ekonómiku, kriasaun empregu, no sustentabilidade ambientál iha Timor-Leste.

𝐕𝐢𝐬𝐞-𝐏𝐌 𝐞𝐧𝐤𝐨𝐧𝐭𝐫𝐮 𝐤𝐨𝐫𝐭𝐞𝐳𝐢𝐚 𝐡𝐨 𝐃𝐢𝐫𝐞𝐭ó𝐫 𝐊𝐨𝐦𝐢𝐬𝐚𝐮𝐧 𝐄𝐮𝐫𝐨𝐩𝐞𝐢𝐚 𝐛𝐚 𝐌é𝐝𝐢𝐮 𝐎𝐫𝐢𝐞𝐧𝐭𝐞, Á𝐳𝐢𝐚 𝐧𝐨 𝐏𝐚𝐬í𝐟𝐢𝐤𝐮

𝟐𝟖 𝐌𝐚𝐢𝐮 𝟐𝟎𝟐𝟔
==========
Vise-Primeiru-Ministru, Ministru Koordenadór ba Asuntu Ekonómiku (MKAE) no Ministru Turizmu no Ambiente (MTA), Dato’ Seri Francisco Kalbuadi Lay, hala’o enkontru kortezia ho Sr. Peteris Ustubs, Diretór ba Médiu Oriente, Ázia no Pasífiku hosi Komisaun Europeia.

Enkontru ne’ebé hala’o iha Gabinete Vise-PM, Farol, Díli, Kinta 28 Maiu 2026 ne’e atu hametin relasaun entre Governu Timor-Leste no Komisaun Europeia, iha área dezenvolvimentu ekonómiku, turizmu, ambiente, no oportunidade parseria estratéjika sira iha rejiaun Ázia-Pasífiku.