Promosaun Edukasaun Saúde, Ministériu Saúde, Timor-Leste

🎄 MENSAJEN NATAL 🎄

Diresaun Nasionál Edukasaun no Promosaun Saúde (DNEPS) hato’o votos Natal di’ak ba Diresaun hotu-hotu iha Ministériu Saúde no parseiru dezenvolvimentu sira hotu.

Iha spiritu Natal ne’e, DNEPS agradese ba serbisu hamutuk, solidariedade no kompromisu ne’ebé ita hotu fó ona hodi hadia edukasaun no promosaun saúde ba povu Timor-Leste.

Natal mak tempu ida hodi fahe esperansa, dame no domin. Hein katak iha tinan foun mai ita bele kontinua hametin parceria no servisu hamutuk hodi atinji moris saudável no di’ak-estar ba komunidade sira hotu.

✨ Natal Di’ak no Tinan Foun Foun ho Saúde, Dame no Prosperidade ba ita hotu! ✨

DNEPS Hala’o Sorumutu Konsultasaun Estratéjia Nasionál Promosaun Saúde no Planu Kustu 2026–2030 iha Atabae

Atabae, 22 -23 de Dezembru 2025 — Diresaun Nasionál Edukasaun no Promosaun Saúde (DNEPS) hala’o Sorumutu Konsultasaun kona-ba Estratéjia Nasionál Promosaun Saúde no Planu Kustu ba periodu 2026–2030. Atividade ida-ne’e hala’o iha Atabae durante loron rua, hahu husi loron 22 to’o 23 de Dezembru 2025.

Sorumutu konsultasaun ne’e partisipa husi Diretor Nasionál, Diretor Munisípal, ofisiál programa sira husi munisípiu sira hotu, no mos parseiru dezenvolvimentu sira ne’ebé durante ne’e kontinua fó suporta ba implementasaun programa promosaun saúde iha Timor-Leste.

Atividade ida-ne’e iha objetivu atu diskute, reviza no harmoniza planeamentu estratéjiku promosaun saúde iha nivel nasional no munisípal, hodi asegura alinyamentu ho prioridade dezenvolvimentu nasional no resposta ba nesesidade komunidade.

Objetivu espesífiku husi sorumutu konsultasaun ne’e mak atu:
1. Reviza no afina Estratéjia Nasionál Promosaun Saúde tuir prioridade nasional;
2. Elabora no valida Planu Kustu Promosaun Saúde ba periodu 2026–2030;
3. Reforça koordenasaun no integrasaun programa promosaun saúde entre nivel nasional no munisípal.
4. Asegura implementasaun programa promosaun saúde ne’ebé efisiénte, sustenável no responde ba nesesidade komunidade.

Diresaun Nasionál Edukasaun no Promosaun Saúde espera katak rezultadu husi sorumutu konsultasaun ida-ne’e sei sai hanesan guia estratéjiku ba planeamentu no implementasaun programa promosaun saúde iha tinan sira tuir mai, hodi kontribui ba hadia kualidade moris no bem-estar povu Timor-Leste nian.

Manufahi, 05 de Dezembro de 2025
Diretor Nasional Edukasaun, Promosaun no Saúde (DNEPS) partisipa iha seremónia entrega Sala Saudável no Dapur Eskolar ba EBC Fatuku, iha Same Vila, no EBC Cosamar. Atividade ida-ne’e hetan suporta husi WHO, WFP no KOICA, hodi fó kontribuisaun ba Ministériu da Saúde (MS) no Ministériu da Edukasaun (ME) atu hadia servisu kuidadu básica no merenda eskolar iha Munisípiu Manufahi.

Programa Sala Saudável mak parte hosi esforsu governu atu hatuur servisu saúde báziku iha área eskolár, hodi garante katak estudante sira hetan kuidadu adekuadu no prevene falta eskola por motívu saúde. Programa ida-ne’e implementa hamutuk hosi MS no ME, ho apoio téniku no parceriu husi OMS, WFP no KOICA.

VISAUN JERAL.
Sala Saudável sai modelu servisu saúde eskolár ne’ebé lidera hosi enfemeiru, atu assegura estudante sira hetan asesu fácil ba kuidadu saúde. Modelu ida-ne’e servisu atu hamenu’s lacuna kona-ba asesu kuidadu ba labarik sira ho idade eskolár, no fó ambiente seguru, saudável no favorável ba aprendizajen.

SERVISU PRINSIPAL SALA SAUDÁVEL

Deteksaun sedu ba problema saúde estudante sira

Konsellu saúde mental no bem-estar

Edukasaun saúde no prevensaun moras

Servisu sosializasaun ba eskola filial sira

Resposta emergénsia, inklui halo referál ba fasilidade saúde bainhira presiza.

Inisiativa ida-ne’e esperansa atu aumenta nivel proteksaun saúde ba estudante sira, fó motivasaun ba presensa regular iha aula, no kontribui ba futuru gerasaun saudavel iha Manufahi.

Ermera, 26 de Novembro de 2025 — Visi-Ministru Fortalesimentu Institusional Saúde (VMFIS), Sr. José dos Reis Magno, Lic. SP. MM, lidera serimónia ofisiál ba lançamentu kampanha nasional prevensaun moras raiva, ne’ebé hala’o ba estudante no komunidade iha Munisípiu Ermera. Inisiativa ida ne’e mak parte husi esforsu Governu atu haforsa sistema saúde, aumenta konhesimentu públiku no konsiensia kona-ba importánsia proteje animal no ema husi risco moras raiva.

Iha diskursu ofisiál, Visi-Ministru hatudu klaramente punto stratégiku tolu ne’ebé mak tenke fó prioridade iha prevensaun raiva. Primeiru, nia sublinha nesesidade halo vacinasaun regular ba animal sira, liu-liu asu, tanba animal sira ne’e mak fonte transmissaun. Segundo, nia akonselha komunidade atu halo prevensaun imediatu ba ema ne’e be hetan kanek husi asu tata, hanesan fase ho bee no sabaun no ba fasilidade saúde atu simu tratamentu profisionál. Terseiru, nia husu mos papél importante autoridade lokál sira atu responde ho lalais no fó atensaun bainhira mosu kazu ka surtu raiva iha komunidade.

Iha fatin hanesan, Visi-Ministru mos hatudu insentivu husi Ministériu Saúde nian liu hosi dadus konkreta, inklui fo vaksina diretamente ba pasiente ne’ebé hetan tata husi asu komfirma pozítivu moras raiva, hanesan izemplo lideransa no resposta imediatu ba situasaun emergénsia.

Kampanha ida ne’e hetan apoio tekniku no institusionál husi PHD no WHO, ne’ebé kontinua sai parte importante iha esforsu nasional atu prevene no responde ba moras raiva.

Ermera, 25 de Novembro de 2025 — Ekipa konjunta husi Servisu Saúde Munisípal Ermera hamutuk ho Ekipa Veterináriu, Setor Edukasaun no Direção Nasional Edukasaun, Promosaun Saúde (DNEPS) realiza atividade edukativu kona-ba prevensaun moras raiva ba estudante sira iha Eskola ESGP Hipolino Mau-Cruma Poetete no Eskola EBC Francisco José Trindade Suco Mertuto, Postu Ermera Villa.

Atividade ne’e iha objetivu atu aumenta konsiensia no hatutan informasaun loos kona-ba medidu proteksaun no prevensaun moras raiva, hanesan parte importante iha seguransa saúde komunidade. Durante sosialisasaun, ekipa saúde fó esplikasaun kona-ba risku moras raiva no pasu-prosedimentu importante wainhira pessoa hetan asu tata.

Adisionálmente, ekipa saúde halo promosaun diretu ba komunidade lokál, inklui demostrasaun pratiku ba estudante sira kona-ba maneira responde no prevene situasaun risku wainhira akontese kazu asu tata.

Atividade ida ne’e hala’o ho suporta husi Governu Austrália no Organização Mundial Saúde (WHO), hanesan parte husi esforsu kontinua atu promove saúde pública no prevene moras raiva iha Munisípiu Ermera.

Ermera, 25 de Novembro de 2025 — Ekipa konjunta husi Servisu Saúde Munisípal Ermera hamutuk ho Ekipa Veterináriu, Setor Edukasaun no Direção Nasional Edukasaun, Promosaun Saúde (DNEPS) realiza atividade edukativu kona-ba prevensaun moras raiva ba estudante sira iha Eskola EBF 202 Nunutali no Eskola EBC Dona Ana Lemos Gleno, Postu Ermera Villa.

Atividade ne’e iha objetivu atu aumenta konsiensia no hatutan informasaun loos kona-ba medidu proteksaun no prevensaun moras raiva, hanesan parte importante iha seguransa saúde komunidade. Durante sosialisasaun, ekipa saúde fó esplikasaun kona-ba risku moras raiva no pasu-prosedimentu importante wainhira pessoa hetan asu tata.

Adisionálmente, ekipa saúde halo promosaun diretu ba komunidade lokál, inklui demostrasaun pratiku ba estudante sira kona-ba maneira responde no prevene situasaun risku wainhira akontese kazu asu tata.

Atividade ida ne’e hala’o ho suporta husi Governu Austrália no Organização Mundial Saúde (WHO), hanesan parte husi esforsu kontinua atu promove saúde pública no prevene moras raiva iha Munisípiu Ermera.