Ministro da Justiça, Dr.Sérgio Hornai - IX Governo Constitucional

𝗠𝗜𝗡𝗜𝗦𝗧𝗥𝗨 𝗝𝗨𝗦𝗧𝗜𝗦𝗔 𝗟𝗜𝗗𝗘𝗥𝗔 𝗥𝗘𝗨𝗡𝗜𝗔𝗨𝗡 𝗞𝗢𝗡𝗦𝗘𝗟𝗟𝗨 𝗝𝗘𝗥Á𝗟 𝗦𝗙𝗝𝗝

𝗗Í𝗟𝗜, 𝗠𝗝 — 𝗧𝗲𝗿𝘀𝗮-𝗳𝗲𝗶𝗿𝗮, 𝟭𝟲 𝗝𝘂ñ𝘂 𝟮𝟬𝟮𝟲, Sua-Eselénsia Ministru Justisa, Dr. Sérgio de Jesus Fernandes da Costa Hornai, lidera Reuniaun Konsellu Jerál Sentru Formasaun Juridiku no Judisial (SFJJ), ne’ebé realiza iha Sala Sorumutuk Ministru Justisa, Edifísiu Ministériu Justisa, Kolmera, Díli.

Objetivu hosi Reuniaun Konsellu Jerál ne’e, atu analiza no avalia progresu ba programa estratéjiku sira ne’ebé Sentru Formasaun Juridiku no Judisial (CFJJ) dezenvolve, liuliu iha área formasaun profisionál ba magistradu judisiál no Ministériu Públiku, defensór públiku, ofisiál justisa no rekursu umanu sira seluk iha setór justisa.

Ministru Justisa fó oportunidade ba membru Konsellu Jerál sira atu halo troka informasaun, diskute desafiu sira ne’ebé hasoru durante implementasaun programa, no identifika medidas apropriadas hodi hasa’e efikásia no kualidade formasaun jurídika no judisiál iha Timor-Leste.

Iha reuniaun konsellu Jeral ne’e, partisipa hosi Prezidente Tribunál Rekursu Dr. Afonso Carmona, Prokuradór Jerál Repúblika, Dr. Nelson de Carvalho, Defensór Públiku Jerál Dr. Cancio Xavier, Diretór SFJJ Dr. Francisco X. Soares, no Prezidente do Conselho Gestão, Disciplina Advocasia, atuál Diretór Jerál Polítika Justisa, Dr. Nelinho Vital.

≠ 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 ≠

𝗠𝗜𝗡𝗜𝗦𝗧𝗥𝗨 𝗝𝗨𝗦𝗧𝗜𝗦𝗔 𝗛𝗔𝗦𝗢𝗥𝗨 𝗠𝗔𝗟𝗨 𝗛𝗢 𝗞𝗥𝗜𝗦𝗧𝗬 𝗦𝗪𝗢𝗥𝗗 𝗚𝗨𝗦𝗠Ã𝗢

𝗗Í𝗟𝗜, 𝗠𝗝 — 𝗧𝗲𝗿𝘀𝗮-𝗳𝗲𝗶𝗿𝗮, 𝟭𝟲 𝗝𝘂𝗻̃𝘂 𝟮𝟬𝟮𝟲, Sua-Eselénsia Ministru Justisa, Dr. Sérgio de Jesus Fernandes da Costa Hornai hasoru malu ho Embaixadora Boa-Vontade ba Edukasaun, Fundadóra Fundasaun Alola no FOCUPERS, Sra. Kristy Sword Gusmão, iha Sala Gabinete Ministru Justisa, edifísiu Ministériu Justisa, Kolmera, Díli.

Objetivu hosi hasoru malu ne’e, atu diskute kona-bá medida sira hodi prevene ka eradika violasaun seksuál, inklui abuzu sira seluk ne’ebé ligadu ba Lei Violénsia Doméstika. No hametin kolaborasaun entre Ministériu Justisa no NGO sira hodi sosializa ba protesaun direitus umanus, igualdade jéneru, kombate violénsia hasoru feto no labarik iha territóriu Timor-Leste.

Ministru Justisa komprometidu katak, servisu hamutuk ho parseiru sira hosi sosiedade sivil no Organizasaun Naun Govermental sira, hodi fortalese sistema justisa ida ne’ebé inkluzivu, asesível, transparente no responde di’ak liu ba nesesidade povu nian.

Ministériu Justisa kontinua fó apoiu no reforsa kooperasaun ho organizasaun sira ne’e, hodi hametin implementasaun politika públika no enquadramentu jurídiku sira ne’ebé promove protesaun ba feto, labarik no grupu vulnerável sira, atu bele kria ambiente ida ne’ebé seguru, justu no livre hosi forma violénsia hotu-hotu.

≠ 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 ≠

𝗠𝗜𝗡𝗜𝗦𝗧𝗥𝗨 𝗝𝗨𝗦𝗧𝗜𝗦𝗔 𝗥𝗘Ú𝗡𝗘 𝗛𝗢 𝗚𝗢𝗩𝗘𝗥𝗡𝗔𝗗Ó𝗥 𝗕𝗔𝗡𝗖𝗢 𝗖𝗘𝗡𝗧𝗥𝗔𝗟

𝗗Í𝗟𝗜, 𝗠𝗝 — 𝗦𝗲𝗴𝘂𝗻𝗱𝗮-𝗳𝗲𝗶𝗿𝗮, 𝟭𝟱 𝗝𝘂𝗻̃𝘂 𝟮𝟬𝟮𝟲, Sua-Eselénsia Ministru Justisa, Dr. Sérgio de Jesus Fernandes da Costa Hornai, realiza enkontru ho Governadór Banco Central de Timor-Leste (BCTL), Helder Lopes, iha edifísiu Banco Central, Díli.

Objetivu hosi enkontru ne’e, atu ko’alia kona-bá progressu desokupasaun rai, domíniu privadu estadu iha areia Banco Central kotuk hodi utiliza ba futuru instalasaun edifício Banco Central ninian.

Durante diskusaun ne’e, parte rua halo troka hanoin kona-bá etapa no mekanizmu administrativu no jurídiku sira ne’ebé presiza atu implementa hodi garante prosesu hotu-hotu la’o tuir dispozisaun legal no prosedimentu vigora.

Ministru Justisa informa, ba Governadór Banco Central de Timor-Leste kona-bá medida no esforsu sira ne’ebé Ministériu Justisa atu hadi’a no aselera servisu administrasaun rai no propriedade. Ministériu Justisa konsidera ho seriedade sujestaun no rekomendasaun sira ne’ebé anteriormente Governadór Banco Central fó ba Direção Nasionál Terras no Propriedades, liuhosi semináriu nasionál kona-bá asuntu rai ne’ebé realiza iha Setembru 2024.

Ministru Justisa simu no konsidera rekomendasaun sira atu aselera atribuisaun Títulu Na’in ba Rai, hodi garante seguransa jurídika ba propriedade no fortalese merkadu imobiliáriu ne’ebé seguru no transparente. To’o agora, Terras e Propriedades emite ona liu hosi 500 Certidão do Direito de Propriedade no kontinua halo atribuisaun diariamente. Ministériu Justisa mós komprometidu atu moderniza no digitaliza sistema jestaun rai ho apoiu hosi parseiru internasionál sira.

≠ 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝘀𝗶𝘁𝗿𝘂 𝗝𝘂𝘀𝘁𝗶𝘀𝗮 ≠

𝗚𝗢𝗩𝗘𝗥𝗡𝗨 𝗔𝗦𝗦𝗘𝗚𝗨𝗥𝗔 𝗞𝗢𝗡𝗧𝗜𝗡𝗨𝗜𝗗𝗔𝗗𝗘 𝗣𝗥𝗢𝗝𝗘𝗧𝗨 𝗔𝗟𝗔𝗥𝗚𝗔𝗠𝗘𝗡𝗧𝗨 𝗔𝗘𝗥𝗢𝗣𝗢𝗥𝗧𝗨 𝗜𝗡𝗧𝗘𝗥𝗡𝗔𝗦𝗜𝗢𝗡𝗔𝗟 𝗣𝗥𝗘𝗭𝗜𝗗𝗘𝗡𝗧𝗘 𝗡𝗜𝗖𝗢𝗟𝗔𝗨 𝗟𝗢𝗕𝗔𝗧𝗢

𝗗Í𝗟𝗜, 𝗠𝗝 — 𝗦𝗲𝗴𝘂𝗻𝗱𝗮-𝗳𝗲𝗶𝗿𝗮, 𝟭𝟱 𝗝𝘂ñ𝘂 𝟮𝟬𝟮𝟲, Governu, liuhosi Ministru Justisa, Dr. Sérgio de Jesus Fernandes da Costa Hornai, hamutuk ho Ministru Transportes no Komunikasaun, Miguel Marques Gonçalves Manetelu, no Sekretáriu Estadu ba Asuntus Toponímia no Organizasaun Urbana, Germano Santa Brites Dias, reafirma kompromisu hodi asegura kontinuidade efetiva ba projetu alargamentu Aeroportu Internasional Prezidente Nicolau Lobato, Komoro, Díli.

Objetivu hosi enkontru komisaun konjunta ne’e, atu harmoniza no atualiza entendimentu entre instituisaun relevante sira kona-ba etapa no mekanizmu implementasaun projetu. No mós sai oportunidade atu fahe informasaun, avalia progresu servisu ne’ebé hala’o ona, no define medidas koordenasaun ne’ebé nesesáriu hodi garante kontinuidade no aselera prosesu implementasaun projetu alargamentu Aeroportu internasionál referida.

Ministru Justisa, Dr. Sérgio Hornai, ne’ebé lidera reuniaun komisaun konjunta iha sala reuniaun Ministériu Justisa, Kolmera, Díli. Fó kontinuidade ba projetu estratéjiku nasional sira tenke sai prioridade ba instituisaun Estadu hotu-hotu. Projetu alargamentu no modernizasaun Aeroportu Internasional Prezidente Nicolau Lobato, atu responde ba nesesidade dezenvolvimentu nasaun nian no aumenta kapasidade operasional setor aviasaun sivíl Timor-Leste.

Projetu alargamentu Aeroportu ne’e konsideradu nu’udar prioridade Estadu nian, tanba Aeroportu Internasional Prezidente Nicolau Lobato mak porta prinsipal entrada no saída ba pasajeiru no movimentasaun merkadoria entre Timor-Leste ho nasaun sira seluk. Nune’e, Governu konsidera katak projetu ne’e presiza responsabilidade no kooperasaun husi instituisaun relevante sira hotu atu garante kapasidade, seguransa no padraun operasional ne’ebé adekuadu ba nesesidade atual no futuru.

Iha enkontru-ne’e, partisipa mós Dirijente sira hosi Ministériu Transportes no Telekomunikasaun, Prezidente Autoridade Nasionál Aviasaun no Aeroportus Timor-Leste (ANATL), Diretór-Jeral Polítika Justisa, Diretór Nasional no Dirijente sira hosi Direção-Nasional Terras no Propriedades, no entidade relevante sira seluk ne’ebé iha responsabilidade direta ba prosesu koordenasaun Aeroportu Internasional Prezidente Nicolau Lobato ninian.

Reuniaun interministerial-ne’e, atu asegura harmonia entre aspetu tékniku, jurídiku no administrativu, nune’e bele garante kontinuidade servisu no susesu implementasaun projetu alargamentu Aeroportu Internasional Prezidente Nicolau Lobato ba benefísiu dezenvolvimentu nasional no povu Timor-Leste tomak.

≠ 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 ≠

𝗟𝗘𝗡𝗦𝗔 𝗙𝗢𝗧𝗢𝗚𝗥Á𝗙𝗜𝗔

𝗗Í𝗟𝗜, 𝗠𝗝 — 𝗦𝗲𝗴𝘂𝗻𝗱𝗮-𝗳𝗲𝗶𝗿𝗮, 𝟭𝟱 𝗝𝘂ñ𝘂 𝟮𝟬𝟮𝟲, Ministru Justisa, Dr. Sérgio de Jesus Fernandes da Costa Hornai, realiza enkontru ho Ministru Defeza, Donaciano do Rosário Gomes, Ministru Transportes no Komunikasaun, Miguel Marques Gonçalves Manetelu, no Sekretáriu Estadu ba Asuntus Toponímia no Organizasaun Urbana, Germano Santa Brites Dias, iha sala Gabinete Ministru Justisa, edifísiu Ministériu Justisa, Kolmera, Dili.

Objetivu hosi enkontru ne’e mak atu reforsa no hametin kooperasaun institusionál liu-liu ba iha área sira ne’ebé relasiona ho administrasaun rai no propriedade, regularizasaun jurídika patrimóniu Estadu, no garantia seguransa jurídika ba bens no infraestruturas estratéjikas Estadu nian.

Iha enkontru ne’e, Ministru Justisa, Dr. Sérgio Hornai, akompaña hosi Diretór Jeral Política Justisa, Diretór Jeral Servisu Rejistu no Notariadu, Diretor Jeral Terras no Propriedades, Diretor Nasional no mós Xefe Departamentu sira hosi Ministériu Justisa.

≠ 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 ≠

𝐃Í𝐋𝐈, 𝐌𝐉 — 𝐒𝐞𝐠𝐮𝐧𝐝𝐚-𝐟𝐞𝐢𝐫𝐚, 𝟏𝟓 𝐉𝐮ñ𝐮 𝟐𝟎𝟐𝟔, Ministru Justisa, Dr. Sérgio de Jesus Fernandes da Costa Hornai, kaer-liman no husik Sua-Eselénsia Primeiru-Ministru (PM), Kay Rala Xanana Gusmão, iha Aeroportu Internasional Prezidente Nicolau Lobato, Komoro, Díli, molok desloka ba Federasaun Rusia hodi partisipa iha Summit ASEAN–Rusia 2026.

Xefe Governu Repúblika Demokrátika Timor-Leste ho nia komitiva desloka bá Russia hodi partisipa eventu Summit ASEAN–Rusia 2026, ne’ebé sei realiza iha Kazan, durante loron tolu, hahú hosi 17 to’o 19 Juñu 2026.

Governu Timor-Leste kontinua hametin relasaun diplomátika no kooperasaun internasionál ho parseiru estratéjiku sira. Maibé mós loke oportunidade foun ba kooperasaun ekonómika, investimentu, transferénsia teknolojia no dezenvolvimentu sustentável.

𝗠𝗜𝗡𝗜𝗦𝗧𝗥𝗨 𝗝𝗨𝗦𝗧𝗜𝗦𝗔 𝗣𝗔𝗥𝗧𝗜𝗦𝗜𝗣𝗔 𝗦𝗘𝗥𝗜𝗠Ó𝗡𝗜𝗔 𝗜𝗡𝗔𝗚𝗨𝗥𝗔𝗦𝗔𝗨𝗡 𝗦𝗘𝗗𝗘 𝗙𝗢𝗨𝗡 𝗢𝗝𝗘𝗧𝗜𝗟

𝗗Í𝗟𝗜, 𝗠𝗝 — 𝗦𝗲𝘀𝘁𝗮-𝗳𝗲𝗶𝗿𝗮 𝟭𝟮 𝗝𝘂𝗻̃𝘂 𝟮𝟬𝟮𝟲, Sua-Eselénsia Ministru Justisa, Dr. Sérgio de Jesus Fernandes da Costa Hornai partisipa serimónia inagurasaun sede foun Organizasaun Juventude no Estudante Timor-Leste (OJETIL), iha Bidau Lecidere, Díli.

Governu liuhosi Sua-Eselénsia Primeiru-Ministru, Kay Rala Xanana Gusmão, hamutuk ho Ministru Obras Públikas, Samuel Marçal, inaugura oficialmente sede foun OJETIL. Sai nu’udar parte husi esforsu kontinuu Governu nian atu valoriza no hametin kontribuisaun juventude sira ba dezenvolvimentu nasaun.

Iha serimónia ne’e, Primeiru-Ministru entrega mós xave edifísiu foun ba Sekretáriu-Jerál OJETIL, José Manuel Fernandes “Nakfilak”, hanesan símbolu apoiu, rekuiñesimentu no konfiansa Governu ba papel estratéjiku juventude sira iha prosesu konstrusaun Estadu no dezenvolvimentu nasional.

Objetivu hosi sede-ne’e, atu preserva no valoriza memóría istórika kona-ba partisipasaun juventude Timoroan sira iha luta libertasaun nasional, liu-liu sira ne’ebé durante períodu okupasaun hala’o papel relevante iha frente klandestina, hodi fó apoiu ba movimentu rezisténsia no luta povo Timor-Leste nian ba ukun-rasik-an.

Iha serimónia ne’e, partisipa hosi membru Governu Konstitusionál sira, Ministru Defeza, Pedro Klamar Fuik, Eiz Primeiru-Ministru, Dr. Rui Maria de Araújo, deputadu sira hosi Parlamentu Nasionál, veteranu no antigu kombatente sira, inklui Alin Laek, no reprezentante organizasaun klandestina sira seluk.

Inisiativa ida ne’e, reflete kompromisu Governu atu kontinua investe iha juventude hanesan forsa importante ida ba dezenvolvimentu sustentável, estabilidade no progresu Timor-Leste ba futuru ida ne’ebé naroman no prosperu.

≠ 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 ≠

𝗠𝗜𝗡𝗜𝗦𝗧𝗥𝗨 𝗝𝗨𝗦𝗧𝗜𝗦𝗔 𝗛𝗢𝗟𝗔 𝗣𝗔𝗥𝗧𝗘 𝗜𝗛𝗔 𝗗𝗜𝗦𝗞𝗨𝗦𝗔𝗨𝗡 𝗝𝗢𝗥𝗡𝗔𝗗𝗔 𝗢𝗥𝗦𝗔𝗠𝗘𝗡𝗧Á𝗟 𝟮𝟬𝟮𝟳 𝗛𝗢𝗗𝗜 𝗛𝗔𝗠𝗘𝗧𝗜𝗡 𝗥𝗘𝗭𝗜𝗟𝗜É𝗡𝗦𝗜𝗔 𝗡𝗢 𝗗𝗜𝗩𝗘𝗥𝗦𝗜𝗙𝗜𝗞𝗔 𝗘𝗞𝗢𝗡𝗢𝗠𝗜𝗔 𝗕𝗔 𝗙𝗨𝗧𝗨𝗥𝗨 𝗦𝗨𝗦𝗧𝗘𝗡𝗧Á𝗩𝗘𝗟

𝗗Í𝗟𝗜, 𝗠𝗝 — 𝗦𝗲𝘀𝘁𝗮-𝗳𝗲𝗶𝗿𝗮, 𝟭𝟮 𝗝𝘂ñ𝘂 𝟮𝟬𝟮𝟲, Sua-Eselénsia Ministru Justisa, Dr. Sérgio de Jesus Fernandes da Costa, kontinua hola parte iha reuniaun Jornada Orsamentál 2027, ne’ebé realiza iha Sala Auditóriu Kay Rala Xanana Gusmão, Ministériu Finansas, Díli.

Jornada Orsamentál ba Tinan Fiskál 2027 ne’e prezide hosi Sua-Eselénsia Primeiru-Ministru, Kay Rala Xanana Gusmão, no sai nu’udar pontu partida ofisiál ba prosesu planeamentu no definisaun tetu fiskál ba Orsamentu Jeral Estadu (OJE) 2027. Lema ofisiál ba Jornada Orsamentál 2027 mak “Hametin Reziliénsia liuhosi Transformasaun no Diversifikasaun Ekonomia, Asegura Futuru Ida Sustentável.”

Objetivu hosi reuniaun ne’e, atu fó oportunidade ba membru sira husi IX Governu Konstitusionál, koadru tékniku relevante no autoridade munisipál sira atu halo análize konjunta kona-ba situasaun makroekonómika nasaun nian, no mós define prioridade no limitasaun ba despeza públika sira ba tinan fiskál tuir mai.

Durante sesaun ne’e, partisipante sira diskute estratéjia no medida sira ne’ebé importante atu hametin reziliénsia ekonomia nasional, promove transformasaun estruturál no diversifikasaun ekonomia, hodi garante dezenvolvimentu ida sustentável no inkluzivu ba povu Timor-Leste.

Semináriu Jornada Orsamentál ne’e partisipa hosi membru Governu sira, membru Komisaun C Parlamentu Nasionál, Ajénsia Autónoma sira, administrasaun munisipál sira, tékniku husi ministériu no instituisaun sira, Diretór-Jerál Administrasaun Finansas, Diretór Nasionál Finansas, reprezentante hosi RAEOA-ZEESM, organizasaun sosiedade sivil sira no responsável Sekretariadu Munisipál sira.

# 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 #

𝗠𝗜𝗡𝗜𝗦𝗧𝗥𝗨 𝗝𝗨𝗦𝗧𝗜𝗦𝗔 𝗢𝗙𝗜𝗦𝗜𝗔𝗟𝗜𝗭𝗔 𝗞𝗢𝗡𝗧𝗥𝗔𝗧𝗨 𝗗𝗜𝗥𝗘𝗜𝗧𝗨 𝗦𝗨𝗣𝗘𝗥𝗙Í𝗦𝗜𝗘 𝗛𝗢 𝗞𝗢𝗠𝗣𝗔Ñ𝗜𝗔 𝗚𝗠𝗡-𝗛𝗢𝗟𝗗𝗜𝗡𝗚, 𝗟𝗗𝗔

𝗗Í𝗟𝗜, 𝗠𝗝 — 𝗞𝗶𝗻𝘁𝗮-𝗳𝗲𝗶𝗿𝗮 𝟭𝟭 𝗝𝘂ñ𝘂 𝟮𝟬𝟮𝟲, Sua-Eselénsia Ministru Justisa, Dr. Sérgio de Jesus Fernandes da Costa Hornai, ofisialmente asina no formaliza Kontratu Direitu Superfísie entre Estadu Timor-Leste ho Respnsavél GMN – GRUPO MÉDIA NACIONAL HOLDING, LDA, Dr. Jorge Manuel de Araújo Serrano, ne’ebé realiza iha edifísiu Ministériu Justisa, sala Ministériu Justisa, Kolmera, Díli.

Ministru Justisa argumenta, kontratu Direitu superfísie ne’e sai nu’udár pasu importante ida hosi esforsu Governu hodi promove dezenvolvimentu ekonomiku sustentavel, atrai investimentu estranjeiru no valoriza patrimóniu rai Estadu nian tuir prinsípiu legalidade, transparénsia no seguransa jurídika.

“Formalizasaun kontratu ida-ne’e hatudu Governu nia vontade atu kria ambiente investimentu ne’ebé seguru no favoravel ba dezenvolvimentu nasional, ho respeitu ba lei no regulamentu sira ne’ebé vigora iha Timor-Leste,” Ministru Justisa hateten liuhosi nia diskursu.

Ministru justisa hateten, ho onra bo’ot no sentidu responsabilidade institusionál ne'ebé kle'an tebes mak Ministériu foti liafuan iha serimónia ida-ne'e. “Ita selebra ohin buat ne'ebé istóriku tebes iha governasaun no jesaun ba patrimóniu Repúblika Demokrátika Timor-Leste nian”.

Asinatura ba eskritura públika ida-ne'e ba Konstituisaun Direitu de Superfísie entre Estadu — ne'ebé reprezenta mós husi Ministériu Justisa husi IX Governu Konstitusionál — no sosiedade GMN – Holding, la'ós de'it atu administrativu formál ida. Maibé, ida-ne'e mak reflesaun prátika husi vizaun estratéjika ba futuru, ne'ebé bazeia ba rigor, dezenvolvimentu no, fundamentalmente, ba seguransa jurídika.

Kontratu ida-ne'e asume karáter pioneiru duni, sai nu'udar kazu primeiru ba konversaun husi kontratu arrendamentu ba fali direitu de superfísie, bazeia ba Dekretu-Lei n.º 36/2025, loron 15 fulan-Outubru (Rejime Jurídiku ba Jesaun no Utilizasaun bens Imóveis Domíniu Estadu nian).

Ministru Justisa hato'o agradesimentu ba ekipa husi Diresaun-Jerál Terras e Propriedades (DGTP) ba rigor iha instrusaun ba prosesu ida-ne'e, ba Diresaun-Jerál Servisu Rejistu no Notariadu, no mós ba GMN-Holding.

Iha fatin hanesan, Responsável GMN – Grupo Média Nacional Holding, Lda., Dr. Jorge Manuel de Araújo Serrano, mós hato’o nia sentimentu orgullu no apresiasaun aas ba servisu tékniku ne’ebé assume knaar relasiona ho direitu superfisie hatudu duni profesionalizmu, dedikasaun no koordenasaun forte.

Kontratu Direitu Superfísie ida-ne’e, konsidera nu’udar marka importante ba hametin seguransa jurídika no promove konfiansa ba investidor sira, entre setor públiku no privadu hanesan ezemplu konkretu ida kona-ba oinsá governasaun di’ak no baze legal sólidu bele kria ambiente favorável ba investimentu sira.

Dr. Jorge Manuel de Araújo Serrano hateten, seguransa jurídika ne’ebé assegura hosi Estadu sei sai elementu esensial ida atu atrai investimentu nasional no internasionál, promove atividade ekonomika, no kontribui ba kriasaun empregu no oportunidade foun ba povu.

Iha serimónia ne’e, hola-parte hosi dirigente sira Ministériu Justisa nian, hanesan Diretór-Jerál, Diretór Nasionál no Xefe Departamentu sira, hamutuk ho asesor nasional, internasional sira inklui funsionáriu no konvidadu sira.

≠ 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 ≠

𝗞𝗢𝗡𝗞𝗟𝗨𝗜 𝗢𝗡𝗔 𝗣𝗥𝗢𝗣𝗢𝗦𝗧𝗔 𝗣𝗥𝗢𝗣𝗢𝗦𝗧𝗔 𝗟𝗘𝗜 𝗡.º 𝟮𝟰/𝗩𝗜/𝟯.ª 𝗞𝗢𝗡𝗔-𝗕Á 𝗥𝗘𝗚Í𝗠𝗘 𝗝𝗨𝗥Í𝗗𝗜𝗞𝗨 𝗣𝗥Á𝗧𝗜𝗞𝗔 𝗔𝗥𝗧𝗘𝗦 𝗠𝗔𝗥𝗦𝗜𝗔𝗜𝗦 𝗜𝗛𝗔 𝗙𝗔𝗭𝗘 𝗘𝗦𝗣𝗘𝗦𝗜𝗔𝗟𝗜𝗗𝗔𝗗𝗘

𝗟𝗜𝗞𝗜𝗦Á, 𝗠𝗝 — 𝗞𝗶𝗻𝘁𝗮-𝗳𝗲𝗶𝗿𝗮 𝟭𝟭 𝗝𝘂ñ𝘂 𝟮𝟬𝟮𝟲, Governu, liuhosi Sua-Eselénsia Ministru Justisa, Dr. Sérgio de Jesus Fernandes da Costa Hornai, Ministru Interiór, Francisco da Costa Guterres, no Ministru Juventude, Desportu, Arte no Kultura, Nelyo Isaac Sarmento, hamutuk ho Deputadu sira husi Parlamentu Nasionál, konklui ona diskusaun ba Proposta Lei N.º 24/VI/3.ª kona-ba Regime Jurídiku Prátika Artes Marsiais, iha faze espesialidade, ne’ebé realiza iha Salaun Tokodede, Munisípiu Likisá.

Objetivu husi diskusaun ne’e, atu halo análize kle’an no detalladu ba dispozisaun sira iha proposta lei refere, hodi asegura katak enkuadramentu jurídiku ne’ebé sei estabelese bele responde ho efetividade ba nesesidade regulasaun setór artes marsiais iha Timor-Leste.

Iha diskusaun ne’e, Sua-Eselénsia Ministru Justisa, Dr. Sérgio Hornai, apresenta no defende proposta lei ne’ebé Governu submete ba Parlamentu Nasionál. Durante prosesu diskusaun espesialidade, Ministru Justisa hetan apoiu hosi Diretór-Jerál no ekipa téknika husi Direção-Geral Política da Justiça, inklui mós Diretór Nasionál Asesoria no Lejizlasaun, ne’ebé fó asesoria téknika no jurídika.

Nune’e, Assessor sira no ekipa tékniku sira halo análize no ajustamentu ba dispozisaun sira iha Proposta Lei-ne’e, asegura nia konsisténsia jurídika, koerénsia redasional no konformidade ba prinsipiu sira ne’ebé vigora iha ordenamentu jurídiku nasionál.

Depois de konklui prosesu tékniku ne’e, proposta lei referida sei prepara ba etapa tuir mai, no sei submete ba Sekretariadu Parlamentu Nasionál hodi agenda ba diskusaun no final global, tuir prosedimentu legislativu ne’ebé estabelese iha lei.

Iha oportunidade ne’e, Prezide hosi Prezidente Komisaun G Parlamentu Nasionál, hakarak rona diretamente membru Governu responsavel sira kona-ba mekanizmu no medidas ne’ebé sei implementa hodi regulariza prátika artes marsiais no ninia funsionamentu, tuir prinsípiu legalidade, transparénsia no responsabilidade institusionál.

# 𝗠í𝗱𝗶𝗮 𝗚𝗮𝗯𝗶𝗻𝗲𝘁𝗲 𝗠𝗶𝗻𝗶𝘀𝘁𝗿𝘂 𝗝𝘂𝘀𝘁𝗶𝘀𝗮 #