Ofisi ya Mbunge Jimbo la Bunda Mjini

BUNDA MJINI – MARA

Wanafunzi wa Madrasa katika Masjid Nuru iliyopo Mtaa wa Migungani, Kata ya Bunda Stoo, Wilaya ya Bunda, wamemsomea dua Mbunge wa Jimbo la Bunda Mjini, Mhe.Ester Amos Bulaya, kufuatia msaada wake wa kutoa vitabu vya dini ikiwemo Qur'an na Juzuu kwa ajili ya kuwasaidia wanafunzi hao katika masomo yao ya dini.

Dua hiyo ilisomwa mara baada ya kukabidhi vitabu hivyo katika msikiti huo, ambapo wanafunzi pamoja na walimu wao walimshukuru kwa moyo wa kujitolea na mchango wake katika kuendeleza elimu ya dini kwa watoto na vijana.

Katibu wa Mbunge aliwashukuru viongozi wa dini, walimu wa madrasa na wanafunzi kwa dua hiyo, akisisitiza umuhimu wa elimu ya dini katika kujenga maadili mema, amani na mshikamano ndani ya jamii.

Tukio hilo limepokelewa kwa furaha na waumini pamoja na wananchi wa Msikiti huo, huku likionyesha umuhimu wa ushirikiano kati ya viongozi na jamii katika kuendeleza ustawi wa wananchi.

Imetolewa na:
Ofisi ya Mbunge
Jimbo la Bunda Mjini.

ESTER BULAYA AWAAGA VIJANA WA UMITASHUMTA WANAOENDA TARIME KUIWAKILISHA BUNDA MJINI

Ofisi ya Mbunge wa Jimbo la Bunda Mjini, Ester Bulaya, kupitia Katibu wa Mbunge, M***a Hussen, kwa kushirikiana na viongozi wa CCM, leo wamewatembelea na kuwaaga vijana wa UMITASHUMTA walioteuliwa kwenda kuiwakilisha Halmashauri ya Mji wa Bunda katika mashindano ya kimkoa yanayofanyika Halmashauri ya Tarime.

Akizungumza na vijana hao kabla ya safari yao, Katibu wa Mbunge, M***a Hussen, aliwataka kwenda kuitendea haki Halmashauri ya Mji wa Bunda pamoja na Jimbo la Bunda Mjini kwa kuonyesha nidhamu, kujituma na ushindani wa hali ya juu katika mashindano hayo.

Aidha, aliwahimiza kuwa mabalozi wazuri wa Bunda kwa kudumisha umoja, mshikamano na uzalendo wakati wote wa mashindano.

M***a Hussen pia alikumbusha kuwa Mbunge wa Jimbo la Bunda Mjini, Ester Bulaya, hivi karibuni alitoa vifaa vya michezo kwa makundi yote ya vijana wanaoshiriki mashindano hayo ikiwa ni sehemu ya kuhamasisha michezo na kuendelea kukuza vipaji vya vijana ndani ya halmashauri hiyo.

Kwa upande wao, viongozi walioambatana na ujumbe huo waliwatakia vijana hao safari njema pamoja na mafanikio mema katika mashindano hayo ya kimkoa yanayofanyika Tarime.

Tarehe: 26 Mei, 2026

BUNGE LA KUMI NA TATU (13)
Mkutano wa Tatu – Kikao cha Thelathini na Saba (37)

Mbunge wa Jimbo la Bunda Mjini, Mhe. Ester Amos Bulaya, ameuliza maswali bungeni akitaka kufahamu:-

1. Serikali ina mpango gani wa kutatua changamoto ya ucheleweshwaji wa upatikanaji wa chakula katika miradi ya ufugaji wa samaki kwa njia ya vizimba, hali inayosababisha wafugaji kupata hasara kubwa pamoja na kuhatarisha ukuaji na uhai wa samaki?

2. Ni lini Serikali itawapatia vijana walioomba boti za kisasa kwa ajili ya shughuli za uvuvi, hususan vijana wa Jimbo la Bunda Mjini, ili waweze kufanya uvuvi wa kisasa na kujiongezea kipato?

Imetolewa na:
Ofisi ya Mbunge
Jimbo la Bunda Mjini

Tarehe: 26 Mei, 2026

BUNGE LA KUMI NA TATU (13)
Mkutano wa Tatu – Kikao cha Thelathini na Saba (37)

Mbunge wa Jimbo la Bunda Mjini, Mhe. Ester Amos Bulaya, ameuliza swali bungeni akitaka kufahamu ni lini Serikali itapeleka fedha kwa ajili ya ukamilishaji wa ujenzi wa Hospitali ya Halmashauri ya Mji wa Bunda.

Imetolewa na:
Ofisi ya Mbunge
Jimbo la Bunda Mjini

Tarehe: 25 Mei, 2026

BUNGE LA KUMI NA TATU (13)
Mkutano wa Tatu – Kikao cha Thelathini na Sita (36)

Mbunge wa Jimbo la Bunda Mjini, Mhe. Ester Amos Bulaya, ameuliza swali bungeni akitaka kufahamu chanzo cha kukatika kwa huduma ya maji katika Jimbo la Bunda Mjini kwa zaidi ya wiki tatu, hali inayosababisha kero kubwa kwa wananchi wa jimbo la Bunda Mjini.

Imetolewa na:
Ofisi ya Mbunge
Jimbo la Bunda Mjini