Mwananyamala Regional Referral Hospital

Home
Tanzania
Dar es Salaam
Mwananyamala Regional Referral Hospital

Website

Ukurasa Rasmi wa Hospitali ya Rufaa ya Mkoa Mwananyamala

29/10/2026

‎Wananchi wametakiwa kuwa na mwamko wa kuzingatia lishe bora na kupunguza matumizi ya kupindukia ya sukari, chumvi, na mafuta ili kujikinga na wimbi la magonjwa yasiyoambukiza yanayozidi kushika kasi katika jamii.
‎
‎Wito huo umetolewa na Afisa Lishe wa Hospitali ya Rufaa ya Mkoa Mwananyamala (MRRH), Glory Samweli, wakati akitoa elimu ya lishe kwa jamii katika kuadhimisha Siku ya Lishe Kitaifa.
‎
‎Afisa Lishe Glory ameeleza kuwa jamii inapaswa kufahamu viwango sahihi vya matumizi ya chumvi, sukari, na mafuta ili kuepuka hatari ya kupata magonjwa yasiyoambukiza, huku akisisitiza kuwa viwango vya matumizi hayo vinaweza kutofautiana kutoka mtu mmoja hadi mwingine kulingana na hali yake ya kiafya.
‎
‎"Kulingana na muongozo, matumizi ya chumvi kwa siku yanatakiwa kuwa kijiko kidogo kimoja cha chai, na matumizi ya mafuta ni vijiko viwili vya chakula," amesisitiza Afisa Lishe Glory, huku akitoa wito kwa jamii kupima afya zao mara kwa mara ili kujua hali zao mapema.
‎
‎Aidha, maadhimisho hayo yamelenga kutoa elimu kwa umma kuhusu umuhimu wa kula mlo kamili wenye virutubisho sahihi, Lishe kwa watu wenye magonjwa ya muda mrefu, umuhimu wa kuzingatia ulaji unaofaa kuzuia magonjwa yasiyoambukiza pamoja na matumizi sahihi ya chumvi, sukari na mafuta.

29/10/2026

Maadhimisho ya Siku ya Lishe Kitaifa. 29, Oktoba, 2026.
Kauli mbiu: "Imarisha afya: Kula kiasili, Punguza Sukari, Chumvi na Mafuta"

27/10/2026

‎Jamii imetakiwa kuwa makini na kuepuka matumizi ya maji baridi kupita kiasi, hususani maji ya barafu, wakati wa vipindi vya joto kali ili kujikinga na madhara mbalimbali ya kiafya yanayoweza kujitokeza.
‎
‎Rai hiyo imetolewa na Daktari Bingwa wa Magonjwa ya Dharura na Ajali ambaye pia ni Mkuu wa Kitengo hicho (EMD) kutoka Hospitali ya Rufaa ya Mkoa Mwananyamala (MRRH), Dkt. August Mtui, alipokuwa akizungumza na Shirika la Utangazaji Tanzania (TBC).
‎
‎Katika mahojiano hayo kuhusu athari za kuongezeka kwa joto na mbinu za kujikinga, Dkt. Mtui alibainisha kuwa unywaji wa maji ya barafu au yaliyobadilika kuwa baridi kupita kiasi wakati mwili ukiwa na joto kubwa unaweza kuathiri mfumo wa mmeng'enyo wa chakula na kusababisha changamoto mbalimbali za kiafya.
‎
‎Ameongeza kuwa wakati wa joto kali, mwili hupoteza maji mengi kupitia jasho, mkojo, haja kubwa, na hata wakati wa kupumua, ambapo hali hii inaongeza mahitaji ya maji mwilini, lakini njia sahihi na salama ya kurejesha maji hayo ni kunywa maji ya kawaida au yenye ubaridi wa wastani badala ya yale yaliyoganda au yenye barafu.
‎
‎Dkt. Mtui pia ametaja makundi yaliyo katika hatari zaidi ya kuathirika na hali ya joto kali kuwa ni pamoja na watoto wadogo, wazee, na wajawazito, ambao hutokewa na vipele k**a sehemu ya athari, huku akiwataka kuchukua tahadhari za ziada ikiwemo kukaa katika maeneo yenye mzunguko mzuri wa hewa na kuvaa mavazi mepesi.
‎
‎Hospitali ya Rufaa ya Mkoa Mwananyamala inaendelea kutoa elimu kwa umma ili kuongeza uelewa kuhusu huduma za dharura na namna ya kujikinga na madhara ya mabadiliko ya tabianchi, hususani katika kipindi hiki kinachochangiwa na ongezeko la joto katika bahari ya Pasifiki (El Niño).

20/10/2026

‎UZITO ULIOKITHIRI (OBESITY) HUONGEZA UWEZOKANO MKUBWA WA KIDONDA KUCHELEWA KUPONA -AFISA LISHE.
‎
‎Jamii imehimizwa kuzingatia ulaji unaofaa na mtindo bora wa maisha ili kuepuka matatizo ya uzito uliopitiliza na ulaji duni, ambavyo kwa kiasi kikubwa huchangia kuchelewa kupona kwa vidonda mwilini.
‎
‎Wito huo umetolewa na Afisa Lishe kutoka Kitengo cha Lishe cha Hospitali ya Rufaa ya Mkoa Mwananyamala (MRRH), Glory Samweli, ambapo ameeleza kuwa uzito uliokithiri (obesity) una uhusiano wa moja kwa moja na Mfumo wa Mzunguko wa Damu pamoja na kasi ya utengenezaji wa tishu mpya mwilini.
‎
‎Afisa Lishe amebainisha kuwa uzito mkubwa hupunguza Mzunguko wa Damu na Oksijeni katika eneo lenye kidonda, jambo linalosababisha seli za mwili zishindwe kujiunde upya kwa wakati na hivyo kuongeza hatari ya kidonda kukaa kwa muda bila kupona.
‎
‎Aidha, amesisitiza kuwa lishe bora yenye protini, vitamin na madini ya kutosha ni nguzo muhimu katika kuhakikisha mfumo wa kinga ya mwili unafanya kazi kwa ufanisi wa hali ya juu ili kuharakisha mchakato wa kupona kwa vidonda, hususan kwa wagongwa wanaofanyiwa upasuaji au walio na majeraha.
‎
‎Mtaalamu huyo ametoa wito kwa wananchi kufika katika Kitengo cha Lishe cha MRRH kupata ushauri wa kitaalamu kuhusu ulaji unaofaa na udhibiti wa uzito ili kulinda afya zao na kujikinga na changamoto mbalimbali za kiafya hususani Magonjwa yasiyo ya kuambukiza.

19/10/2026

MRRH YATAMBUA MCHANGO WA KITENGO CHA BIMA KATIKA UKUSANYAJI MAPATO.

Hospitali ya Rufaa ya Mkoa Mwananyamala (MRRH) imetambua mchango mkubwa wa Kitengo cha Bima katika kuongeza na kuimarisha ukusanyaji wa mapato ya hospitali hiyo.

Mganga Mfawidhi wa Hospitali hiyo, Dkt. Aileen Barongo, amemkabidhi cheti cha pongezi Dkt. Khadija Shebe akiyepokea kwa niaba ya Mkuu wa kitengo hicho Dkt. Mercy Maya, wakati wa kikao kilichowakutanisha watumishi kutoka vitengo mbalimbali vya Hospitali hiyo.

Hatua hii inalenga kuthamini jitihada zinazofanywa na vitengo mbalimbali katika kufanikisha utoaji huduma bora pamoja na kukuza mapato.

17/10/2026

USIKOSE KUFUATILIA MAHOJIANO MAALUMU KUHUSU: Umuhimu wa kujikinga dhidi ya ajali zinazoepukika. Leo 17 Oktoba, 2026. Saa 7:00 Mchana na Daktari Bingwa wa Mifupa, Mbaruku J. Mlinga -MRRH.

14/10/2026

Kumbukumbu ya Miaka (27) ya Kifo cha Baba wa Taifa, Hayati Mwl. Julius K. Nyerere (1922–1999).

"Tuna maadui watatu wakubwa: Umaskini, Ugonjwa na Ujinga. Ili tushinde umaskini na ujinga, lazima kwanza tuwe na watu wenye afya njema wanaoweza kufanya kazi"

13/10/2026

‎WATUMISHI MRRH WAPEWA MAFUNZO YA KIMKAKATI YA UANDAAJI MAOTEO.
‎
‎Watumishi wa Hospitali ya Rufaa ya Mkoa wa Mara (MRRH) wamepawa mafunzo ya kimkakati kuhusu uandaaji na utengenezaji wa bajeti, yenye lengo la kuongeza ufanisi, uwazi na matumizi bora ya rasilimali fedha katika utoaji wa huduma za afya.
‎
‎Mafunzo hayo yamewakutanisha wakuu wa idara na vitengo mbalimbali, yanalenga kuwajengea uwezo watumishi hao ili waweze kupanga bajeti zinazoendana na mahitaji halisi ya hospitali pamoja na vipaumbele vya Wizara ya Afya na Serikali.
‎
‎Akiwasilisha mada wakati wa mafunzo hayo, mkufunzi wa mafunzo hayo Bw. Fares Masaule amesisitiza umuhimu wa kuzingatia mbinu za kimkakati wakati wa kuandaa bajeti ili kuhakikisha kila kiasi cha fedha kinachotengwa kinaleta matokeo chanya katika kuboresha huduma kwa wananchi.
‎
‎Ameeleza kuwa bajeti bora ni ile inayozingatia vyanzo vya mapato, udhibiti wa matumizi yasiyo ya lazima, na ushirikishwaji wa wadau wa maendeleo hususani afya.

08/10/2026

‎Hospitali ya Rufaa ya Mkoa Mwananyamala (MRRH) inaendelea kuimarisha ushirikiano wa kimkakati na wadau wa maendeleo katika sekta ya afya, kufuatia ziara ya wataalamu kutoka Shirika la Maendeleo la Korea (KOICA) iliyolenga kufanya utafiti wa uundaji wa mradi mpya wa "Kuimarisha Mfumo wa Rufaa za Dharura nchini Tanzania".
‎
‎Ziara hiyo imelenga kujionea na kufahamu kwa kina mfumo uliopo sasa wa utoaji wa huduma za dharura na mfumo wa rufaa, pamoja na kubaini maeneo yanayohitaji kuimarishwa zaidi kupitia mradi huo unaotarajiwa.
‎
‎Mwenyeji wa ujumbe huo, Mganga Mfawidhi wa Hospitali ya Rufaa ya Mkoa Mwananyamala, Dkt. Aileen Barongo, amewapokea wataalamu hao wa KOICA na kuongoza ujumbe huo katika maeneo mbalimbali ya kimkakati ya utoaji huduma.
‎
‎Akiongozana na Katibu wa Afya wa MRRH, Bw. Rajabu Omari, pamoja na Mkuu wa Idara ya Huduma za Dharura na Ajali, Dkt. August Mtui, Dkt. Barongo aliongoza ujumbe huo kutembelea Jengo la Huduma za Dharura na Ajali (EMD) ili kujionea namna huduma za dharura zinavyoratibiwa, pia ujumbe huo ulitembelea eneo la uchunguzi wa awali (triage) na chumba cha huduma za ajali na majeruhi (trauma room) ili kubaini maeneo yanayohitaji maboresho.
‎
‎Pia, katika ziara hiyo, ujumbe huo ulitembelea kitengo kinachoratibu mfumo wa rufaa za dharura wa 'm-mama' ili kujionea namna unavyosaidia kuokoa maisha,. ambapo wataalamu hao walishuhudia jinsi simu za dharura zinavyopokelewa na kuratibiwa, pamoja na uratibu wa magari ya dharura (ambulances) yanavyotumwa kuwasafirisha wagonjwa kwa wakati kwenda vituo vya afya vinavyohusika.

08/10/2026

SIKU YA AFYA YA MACHO DUNIANI. 08/10/2026.

PENDA MACHO YAKO.

"Pima Afya ya Macho Yako Mapema katika Hospitali ya Rufaa ya Mkoa Mwananyamala"

Address

P. O. Box 61665
Dar Es Salaam

Website

https://mwananyamalarrh.go.tz/

Alerts

Be the first to know and let us send you an email when Mwananyamala Regional Referral Hospital posts news and promotions. Your email address will not be used for any other purpose, and you can unsubscribe at any time.