Tume ya Umwagiliaji

03/11/2026

MAFUNZO YA UMWAGILIAJI KUINUA KIPATO CHA WAKULIMA 3,400 NZEGA

📍 Nzega Mjini, Tabora

Wakulima wa skimu za Umwagiliaji za Ijanija na Uchama, zilizopo wilayani Nzega Mkoani Tabora, wameanza kuvuna matunda ya mafunzo ya usimamizi na uendeshaji wa miundombinu yanayotolewa na Tume ya Taifa ya Umwagiliaji, yakilenga kuongeza tija na kuboresha maisha yao kupitia kilimo cha misimu miwili kwa mwaka.

Uwekezaji huu unakwenda kufungua fursa kubwa katika maeneo hayo yenye jumla ya hekta 3,400 zinazofaa kwa umwagiliaji , ambapo skimu ya Ijanija (inayotumia Mto Shunu) ina hekta 1,800 (hekta 300 zikimwagiliwa sasa) na skimu ya Uchama (inayotumia Bwawa la Uchama) ina hekta 1,600 (hekta 50 zikimwagiliwa sasa). Kupitia makubaliano hayo, Tume itaboresha miundombinu huku Vyama vya Wamwagiliaji vikiwajibika kusimamia na kuitunza.

Akizungumzia mabadiliko hayo makubwa ya kiuchumi, mkulima wa skimu ya Uchama, Mhoja Kapingu, amesema mafunzo hayo yamewafungua macho na kuongeza matumaini ya mavuno mengi.

“Kutokana na mafunzo haya, tumeelewa kuwa tunaweza kuongeza mavuno kutoka magunia 10 hadi kufikia magunia 40 kwa ekari moja. Pia, tumejifunza kulima misimu miwili kwa mwaka na tutahakikisha tunatunza miundombinu hii ya umwagiliaji kwa manufaa ya familia zetu," amesema Kapingu.

Afisa Maendeleo ya Jamii wa Tume ya Taifa ya Umwagiliaji, Fredy Jonathan,ameeleza kuwa Tume imewezesha mifumo ya kisasa ya kidijitali ya malipo ya ada za huduma na utoaji wa mrejesho kupitia simu za mkononi, lengo likiwa ni kuongeza uwazi, kuzuia migogoro na kuimarisha usimamizi shirikishi wa skimu hizo.

01/11/2026

Ulinzi wa chanzo cha maji cha chemchem na ukarabati wa miundombinu katika Skimu ya Mkomela A mjini Makambako, Njombe, una umuhimu katika kuongeza tija ya kilimo cha Umwagiliaji kupitia Mradi wa TFSRP.

Hatua hii inalenga kupanua bwawa na kuhakikisha maji yanawafikia wakulima wote kwa usawa ili kuondokana na zana duni za mkono. Uendelevu wa mradi huu utategemea usimamizi shirikishi, kupanda miti rafiki wa maji, kuzuia mifugo kutharibisha miundombinu, pamoja na nidhamu ya uchangiaji wa ada za huduma ili kuinua kipato cha familia.

01/11/2026

ULINZI WA CHANZO CHA MAJI MKOMELA A KUIMARISHA UMWAGILIAJI

📍 Ilangamoto, Makambako: Njombe

Kusainiwa kwa mkataba wa makubaliano kati ya Tume ya Taifa ya Umwagiliaji na Chama cha Wamwagiliaji cha Mkomela A na Pangamasi kumeleta matumaini mapya ya kulinda chanzo cha maji cha chemchem na kuongeza tija ya uzalishaji kwa wananchi wa Kijiji cha Ilangamoto, Kata ya Lyamkena.

Makubaliano hayo yanayotekelezwa kupitia Mradi wa Mifumo Himilivu ya Chakula Nchini (TFSRP) kwa ufadhili wa Benki ya Dunia na IFAD, yanagawanya majukumu ambapo Tume itaboresha miundombinu na kupanua bwawa, huku wajibu wa uendeshaji, usimamizi na utunzaji wa chanzo hicho cha maji ukibaki kwa Chama cha Wamwagiliaji.

Akizungumzia fursa hiyo, mkulima wa skimu hiyo, Samwel Kidenya, ameeleza kuwa maboresho hayo yatawawezesha kuondokana na zana duni za kilimo na kuongeza kipato cha familia zao.

“Maboresho haya na kupanuliwa kwa bwawa letu kutatuvusha kutoka kilimo cha zamani cha kutumia zana za mkono na kutupa uhakika wa maji kwa ajili ya kuongeza uzalishaji. Sisi wakulima tuko tayari kushirikiana kulinda chemchem hii na miundombinu yote itakayowekwa," amesema Kidenya.

Afisa Kilimo wa Tume ya Taifa ya Umwagiliaji, Emmanuel Lukombeso, amesisitiza kuwa uendelevu wa mradi huo utategemea sana nidhamu ya hifadhi ya mazingira, akiwataka wakulima kupanda miti rafiki wa maji kuzunguka chemchem hiyo na kuzuia kabisa mifugo kuingia ndani ya skimu ili kulinda mifereji na vyanzo vya maji.

31/10/2026

31/10/2026

KILIMO CHA MBOGAMBOGA KUKOMBOA UCHUMI WA WAKULIMA SKIMU YA MKOMELA A

📍 Ilangamoto, Makambako : Njombe

Maboresho ya miundombinu ya Umwagiliaji yanayotarajiwa kufanyika katika Skimu ya Mkomela A, iliyopo Kijiji cha Ilangamoto, Kata ya Lyamkena, yanatarajiwa kuondoa changamoto ya maji wakati wa ukame na kufungua fursa mpya za kilimo cha mbogamboga kwa wananchi wa eneo hilo.

Hatua hiyo inayotekelezwa kupitia Mradi wa Mifumo Himilivu ya Chakula Nchini (TFSRP) kwa ufadhili wa Benki ya Dunia na Shirika la Kimataifa la Maendeleo ya Kilimo (IFAD),itawezesha skimu hiyo inayotegemea maji ya chemchem kupanua eneo linalomwagiliwa kutoka hekta 103 za sasa hadi kufikia hekta 500,

Akizungumzia mabadiliko hayo, mkulima wa skimu hiyo, Adam Kassim, ameeleza kuwa uwekezaji huo unaenda kukomesha matumizi ya miundombinu ya zamani ya asili na kuleta tija ya kutosha mashambani.

“Kwa miaka mingi tumekuwa tukitegemea mifereji ya asili ambayo haikidhi mahitaji yetu ya umwagiliaji. Mafunzo na maboresho haya yametupa uelewa mpya wa matumizi bora ya maji na umuhimu wa kuchangia ada za huduma ili miundombinu hii idumu na kuinua uchumi wa familia zetu," amesema Kassim.

Fundi Sanifu wa Umwagiliaji Wilaya ya Njombe, Janeth Peta, amebainisha kuwa Tume ya Taifa ya Umwagiliaji inaendelea kutoa mafunzo ya usimamizi na utunzaji wa miundombinu kwa wanachama wa Chama cha Wamwagiliaji cha Mkomela A na Pangamasi, k**a maandalizi ya kusaini mkataba rasmi utakaowapa wakulima hao dhamana ya kuendesha na kulinda skimu hiyo.

30/10/2026

WAKULIMA IDOFI WAJIDHATITI KULINDA UWEKEZAJI WA UMWAGILIAJI

📍 Idofi, Makambako – Njombe

Wakulima wa skimu ya Umwagiliaji Idofi, iliyopo kata za Mlowa na Makambako, halmashauri ya mji wa Makambako mkoani Njombe, wameingia makubaliano na Tume ya Taifa ya Umwagiliaji kuhusu uendeshaji, usimamizi na matunzo ya miundombinu inayojengwa, hatua inayolenga kuhakikisha uwekezaji wa Serikali unawanufaisha wakulima wa sasa na vizazi vijavyo.

Akizungumza baada ya kusainiwa kwa mkataba huo, mkulima wa skimu hiyo, Peter Mbuna, amesema mradi unatarajiwa kuwawezesha wakulima kutumia maeneo ya bonde ambayo awali hayakuwa yakilimwa kutokana na upungufu wa miundombinu.

Naye afisa Mtendaji wa Kata ya Mlowa, Happy Ngailo, amewapongeza wakulima kwa kuingia makubaliano hayo, huku akisisitiza umuhimu wa kila mnufaika kushiriki katika kulinda na kutunza miundombinu ili iweze kudumu kwa muda mrefu.

Naye Katibu wa Mbunge wa Jimbo la Makambako, Jimson G. Kibiki, akimwakilisha Mbunge wa jimbo hilo, Daniel Godfrey Chongolo ambaye ni waziri wa kilimo, amewapongeza wakulima kwa hatua hiyo, akieleza kuwa uwekezaji wa Serikali katika miundombinu ya Umwagiliaji unatarajiwa kuwawezesha kutumia ardhi yao kwa tija na kupunguza changamoto za kiuchumi.

Kwa upande wake, Afisa Kilimo wa Tume ya Taifa ya Umwagiliaji, Emmanuel Lukombeso, amesema mkataba huo unaweka wazi majukumu ya Tume na chama cha wakulima katika uendeshaji, usimamizi na matunzo ya skimu.

Makubaliano hayo yamesainiwa baada ya wakulima kupatiwa mafunzo ya uendeshaji, usimamizi na matunzo kupitia Mradi wa Mifumo Himilivu ya Chakula Nchini (TFSRP), unaofadhiliwa na Benki ya Dunia na Shirika la Kimataifa la Maendeleo ya Kilimo (IFAD).

Skimu ya Idofi ina hekta 500 zinazofaa kwa Umwagiliaji, huku Serikali ikiendelea na ujenzi wa miundombinu kwa uwekezaji wa Shilingi bilioni 35.8.

29/10/2026

Zaidi ya wakulima 980 mjini Makambako wanatarajiwa kunufaika na uwekezaji wa Shilingi bilioni 35.8 katika Skimu ya Idofi, utakaohusisha ujenzi wa bwawa, mfumo wa kunyunyizia maji na usawazishaji wa mashamba ili kupanua eneo la kilimo kutoka hekta 100 hadi 500.

Kupitia mafunzo ya Mradi Mifumo Himilivu ya Chakula nchini ina umuhimu katika kuondoa uhaba wa maji na kuongeza uzalishaji wa mbogamboga na matunda. Usimamizi shirikishi, ulinzi wa miundombinu na uchangiaji wa ada za huduma kupitia Chama cha Wamwagiliaji ndizo nguzo kuu zitakazohakikisha uwekezaji huo unakuwa endelevu na kuinua kipato cha mkulima na Taifa kwa ujumla.

29/10/2026

SHILINGI BILIONI 35.8 KUBORESHA MAISHA YA WAKULIMA 980 SKIMU YA IDOFI

📍 Idofi, Makambako: Njombe

Uwekezaji wa Shilingi bilioni 35.8 uliowekwa na Serikali kupitia Tume ya Taifa ya Umwagiliaji unatarajiwa kuboresha maisha ya zaidi ya wakulima 980 katika Mji wa Makambako, kupitia ujenzi na uboreshaji wa miundombinu ya skimu ya Umwagiliaji Idofi.

Uwekezaji huo mkubwa unaohusisha uchimbaji wa bwawa la wazi, uwekaji wa mfumo wa kunyunyizia maji (sprinklers) na usawazishaji wa mashamba utaiwezesha skimu hiyo kupanua eneo la uzalishaji kutoka chini ya hekta 100 za awali hadi kufikia hekta 500 zinazofaa kwa kilimo cha umwagiliaji.

Akizungumzia matumaini ya utekelezaji wa mradi huo, mkulima wa skimu hiyo, Daniel Kiponda, ameeleza kuwa uwekezaji huo unaenda kumaliza changamoto ya muda mrefu ya maji na kuinua uchumi wa familia zao.

Uwekezaji huu na elimu tunayopata imetupa matumaini makubwa baada ya miaka mingi ya kukabiliwa na uhaba wa maji. Sasa tunajipanga kuongeza uzalishaji wa mbogamboga na matunda kwa tija zaidi ili kuongeza kipato na kuboresha maisha ya familia zetu”, amesema Kiponda.

Mradi huo unaotekelezwa pia kupitia mafunzo ya usimamizi kutoka Mradi wa Mifumo Himilivu ya Chakula Nchini (TFSRP) kwa ufadhili wa Benki ya Dunia na IFAD, unalenga kukiwezesha Chama cha Wamwagiliaji cha Idofi kuwa tayari kusimamia, kuendesha na kutunza miundombinu hiyo pindi ujenzi utakapokamilika.