Handeni Town Council

Eid Al - Adha Mubarak

Mkuu wa Wilaya ya Handeni, Mhe. Salum Nyamwese ameungana na wananchi wa Halmashauri ya Mji Handeni katika Bonanza la Siku ya Afya lililofanyika tarehe 23 Mei 2026, likiwa na lengo la kuhamasisha jamii kufanya mazoezi na kuzingatia afya bora.

Bonanza hilo limewakutanisha viongozi, watumishi pamoja na wananchi mbalimbali walioshiriki shughuli za mazoezi na michezo kwa ajili ya kuimarisha afya na mshikamano wa kijamii. Aidha, wagonjwa waliolazwa hospitalini walipatiwa zawadi mbalimbali ikiwa ni sehemu ya kuwafariji na kuwaonesha upendo katika kipindi cha matibabu yao.

Akizungumza katika bonanza hilo, Mhe. Salum Nyamwese amesisitiza umuhimu wa wananchi kuendelea kufanya mazoezi mara kwa mara, kuzingatia ushauri wa wataalamu wa afya pamoja na kudumisha mshikamano wa kijamii kwa ajili ya maendeleo na ustawi wa jamii.

@

WANANCHI HANDENI MJI WAHAMASISHWA KUFANYA UCHUNGUZI WA SARATANI YA MATITI

Na Mwandishi Wetu

Wananchi wa Halmashauri ya Mji Handeni wamehimizwa kujitokeza kwa wingi kufanya uchunguzi wa Saratani ya Matiti ili kubaini ugonjwa huo mapema na kupata matibabu kwa wakati.

Wito huo umetolewa na Dkt. Rashid Suleiman kutoka Hospitali ya Rufaa ya Mkoa wa Tanga Bombo wakati wa zoezi la uchunguzi wa awali wa Saratani ya Matiti linaloendelea katika Hospitali ya Halmashauri ya Mji Handeni, linalofanywa ushirikiano na Shirika la Jhpiego chini ya ufadhili wa The Pfizer Foundation na linahusisha jinsia zote.

Dkt. Rashid amesema zoezi hilo lilianza rasmi Mei 13 na linatarajiwa kuhitimishwa Mei 15, 2026 na kwamba Saratani ya Matiti ni miongoni mwa magonjwa yanayoendelea kuathiri wananchi wengi, hivyo uchunguzi wa mapema ni muhimu katika kuokoa maisha.

Aidha, amesema kuwa mwaka 2025 zaidi ya wanawake 10,000 katika Mkoa wa Tanga walifanyiwa uchunguzi wa Saratani ya Matiti ambapo asilimia 2.3 walibainika kuwa na dalili za ugonjwa huo.

“Takwimu hizi zinaonesha umuhimu wa wananchi kujitokeza mapema kwa ajili ya uchunguzi na tiba,” amesema Dkt. Rashid.

Kwa upande wake, Dkt. Lawrence Victoria kutoka Hospitali ya Halmashauri ya Mji Handeni amesema wanatarajia kuhudumia wananchi wapatao 500 katika kipindi cha zoezi hilo.

Amebainisha kuwa huduma hiyo inatolewa bure kwa wananchi huku vifaa vya kisasa vikitumika kuhakikisha uchunguzi unafanyika kwa ufanisi na usahihi zaidi.

Baadhi ya wananchi waliojitokeza kupata huduma hiyo wameishukuru Serikali pamoja na wadau wa afya kwa kupeleka huduma hiyo karibu yao, wakisema hatua hiyo itasaidia kuongeza uelewa na kuwafanya wananchi wengi zaidi kujitokeza kwa uchunguzi.

Wananchi hao pia wameomba huduma ya uchunguzi wa Saratani ya Matiti iwe endelevu ili kusaidia jamii kupata huduma kwa urahisi na kwa wakati.

ya afya

TAARIFA KWA UMMA
Huduma ya Mkoba ya Uchunguzi wa Awali wa Saratani ya Matiti
Mei 13 ,2026 Zahanati ya Misima
Mei 14&15 Hospitali ya Halmashauri ya Mji Handeni
Huduma hii ni bure

HANDENI MJI YAPIGA HATUA KUDHIBITI UTAPIAMLO KWA WATOTO

*Watoto wanaolazwa wapungua kutoka 32 hadi 7 kwa robo mwaka

Na Augusta Njoji

IDADI ya watoto wanaokabiliwa na utapiamlo mkali katika Halmashauri ya Mji Handeni imepungua kwa kiasi kikubwa, kutoka watoto 32 waliokuwa wakilazwa hospitalini kwa robo mwaka 2024/25 hadi wastani wa watoto watano hadi saba kwa robo mwaka 2025/26.

Mafanikio hayo yanatajwa kuchangiwa na mikakati madhubuti ya utoaji elimu ya lishe kwa jamii inayotekelezwa na Hospitali ya Halmashauri hiyo, ikilenga kupunguza lishe duni hususan kwa watoto.

Akizungumza Mei 5, 2026 katika kikao cha tathmini ya shughuli za lishe kwa kipindi cha Januari hadi Machi 2025/26, Afisa Tarafa ya Chanika, Julieth Mushi, akimwakilisha Mkuu wa Wilaya ya Handeni, Mhe. Salum Nyamwese, amepongeza juhudi hizo na mafanikio yaliyopatikana katika utekelezaji wa mkataba wa lishe.

Amesisitiza umuhimu wa ushirikiano kati ya Idara ya Afya, Ustawi wa Jamii na Lishe pamoja na Idara ya Kilimo, Mifugo na Uvuvi katika kuhamasisha jamii kuanzisha bustani za mboga majumbani na kufuga wanyama ili kukabiliana na tatizo la utapiamlo kwa watoto.

Kwa upande wake, Mganga Mkuu wa Halmashauri hiyo, Dkt.Hudi Shehdadi, amesema mikakati inayoendelea kutekelezwa ni pamoja na kushirikiana na Idara za Elimu ya Msingi na Sekondari pamoja na kamati za lishe za kata kuhamasisha upandaji wa miti ya matunda na uanzishaji wa bustani za mboga, huku kila shule ikitakiwa kutenga angalau hekari mbili kwa ajili ya kilimo cha mahindi.

Aidha, amebainisha kuwa juhudi zimeongezwa katika kuhamasisha wajawazito kuhudhuria huduma za afya mapema ili kupata elimu ya lishe pamoja na virutubisho vya madini chuma, hatua inayolenga kupunguza idadi ya watoto wanaozaliwa na uzito pungufu.

Awali, akiwasilisha taarifa ya utekelezaji wa shughuli za lishe kwa kipindi cha Januari hadi Machi 2025/26, Kaimu Afisa Lishe wa Halmashauri hiyo, Getruda Kasabaja, amesema jumla ya wazazi na walezi 9,571 wamefikiwa na elimu ya lishe, huku watoto 17,390 wakifanyiwa tathmini ya hali ya lishe.