Cooking With Momma

របៀបធ្វើស៉្ពាហ្គីទី (SPAGHETTI)
----------
#គ្រឿងផ្សំ
- សាច់គោ ចិញ្ច្រាំអោយម៉ត់
- ប៉េងបោះ ម្ទេសប្លោក ខ្ទឹមបារាំង ហាន់ជាដុំតូចៗ
- ម្សៅស៊ុប ស្ករស
- ខ្ទឹមសចិញ្ច្រាំ
- សូមមើលដូចក្នុងរូបភាព

#វិធីធ្វើ
+ របៀបស្រុះមី Spaghetti
- ដាក់ដាំទឹកទុកអោយពុះ រួចដាក់មី Spaghetti ចូល ទុកអោយឆ្អិនឡើងទន់ រួចស្រង់ចេញមកដាក់ក្មុងទឹកត្រជាក់វិញ (ប្រសិនបើបងប្អូនគ្រាន់តែស្រង់ចេញធម្មតាមិនលាងទឹកត្រជាក់ទេ អាចនិងធ្វើអោយវាស្អិតជាប់គ្នា) បន្ទាប់មកស្រង់ចេញពីទឹកត្រជាក់មកទុកអោយស្រក់ទឹកអស់ រួចទុកមួយអន្លើ។

+ របៀបឆាសាច់
- ដាក់ខ្លាញ់ចូលក្នុងខ្ទះទុកអោយក្ដៅ រួចដាក់ខ្ទឹមសចូលបំពងអោយឈ្ងុយ ហើយដាក់សាច់គោចូល ត្រលប់ចុះឡើង រួចដាក់គ្រឿងដែលដែលបានបង្ហាញ (ដូចក្នុងរូប) អោយបានគ្រប់មុខ រួចដាក់ម្សៅស៊ុប ស្ករស និង ទឹកបន្តិច ទុកអោយពុះភ្លក់មើលអោយល្មមតាមការចូលចិត្ត។
- បន្ទាប់មកដាក់ ប៉េងបោះ ខ្ទឹមបារាំង ម្ទេសប្លោកចូល កូរអោយសព្វចូលជាតិជាមួយគ្រឿង រួចទុកអោយឆ្អិនបន្លែហើយ លើកចេញ។
- យកមី spaghetti មករៀបដាក់ចាន ហើយដួសសាច់ដែលបានឆាហើយ ស្រោចពីលើ គឺជាការស្រេច។
ប្រសិនបើប្រិយមិត្តចង់ដាក់ត្រីខកំប៉ុងចូលឆាជាមួយសាច់ថែមទៀតក៏បាន តាមការនិយមចូលចិត្តទទួលទានរបស់អ្នក៕

ឆាក្តៅអន្ទង់
---------
#គ្រឿងផ្សំ
1- អន្ទង់ ៣ខាំ
2- គ្រឿងបុក (ខ្ទឹមស១មើម ស្លឹកក្រូចសើច ១សន្លឹក ខ្ជាយ១ចំណិត រំដេង១ចំណិត គល់ស្លឹកគ្រៃ២គល់ ម្ទេស១គ្រាប់)
3- ម្សៅស៊ុប កន្លះស្លាបព្រាកាហ្វេ
4- ទឹកត្រី កន្លះស្លាបព្រាបាយ
5- ប្រេងឆា ២ស្លាបព្រាបបាយ
6- ស្ករ កន្លះស្លាបព្រាកាហ្វេ
7- ម្រះព្រៅ ទៅតាមការចូលចិត្ដ
8- សណ្ដែកដីឆ្អិន ១ស្លាបព្រាបាយ
9- ម្ទេសហ៊ឹរឱ្យច្រើនគ្រាប់ តែបើមិនចូលចិត្តដាក់មិនបាច់ដាក់ក៏បាន

#របៀបរៀបចំគ្រឿងផ្សំ
1- សូមយកអន្ទង់មកលាងជាមួយទឹកអំបិលឱ្យអស់ក្អែលខ្មៅៗឱ្យស្អាត បន្ទាប់មកត្រូវវះយកពោះចេញ ហើយកាត់ជាកង់ៗល្មម។ បន្ទាប់មកត្រូវយកទៅបំពងជាមួយនឹងខ្លាញ់ឱ្យឆ្អិនល្មម មិនត្រូវឱ្យបែកសាច់អន្ទង់នោះទេ បន្ទាប់មកត្រូវដួសទុកដោយឡែក។
2- ខ្ទឹមសចែកជាពីយកទៅចិញ្ច្រាំកុំឱ្យម៉ដ្ដពេកមួយចំហៀង និងយកទៅបុកជាមួយគ្រឿងមួយចំហៀង
3- ម្ទេសហាន់ជាចំណិតវែងៗ
4- សណ្ដែកដីយកទៅបុកកុំឱ្យម៉ដ្ឋពេក
5- ម្រះព្រៅបេះយកតែស្លឹកហើយយកទៅលាងទឹកឱ្យស្អាត
6- ស្លឹកក្រូចសើច រំដេង ខ្ជាយ គល់ស្លឹកគ្រៃលាងទឹកឱ្យស្អាតយកទៅហាន់ស្ដើងៗ ហើយបុកចូលគ្នាឱ្យម៉ដ្ដ បន្ទាប់មកដាក់ខ្ទឹមសចូលហើយបុកចូលគ្នាឱ្យម៉ដ្ដម្ដងទៀត។

#វិធីធ្វើ
1- ជាដំបូងដាំខ្ទះឱ្យក្ដៅហើយដាក់ប្រេងឆាឱ្យ ក្ដៅ បន្ទាប់មកដាក់ខ្ទឹមសដែលចិញ្ច្រាំ និងម្ទេសចូលឆាឱ្យឡើងជើងអង្ក្រងល្មម បន្ទាប់មកដាក់គ្រឿងបុកចូលឆាឱ្យឈ្ងុយ ហើយដាក់អន្ទង់ចូលរួចដាក់ម្ទេសហ៊ឹរចូល
2- បន្ទាប់មកត្រូវដាក់ស្ករស ទឹកត្រី និងម្សៅស៊ុបរួចភ្លក្សមើលទើបដាក់សណ្ដែកដីរួមទាំងម្រះព្រៅចូល រួចដួសដាក់ចានជាការស្រេច។

*** ទទួលទានបានជាមួយបាយស ឬអាចធ្វើជាគ្រឿងក្លែមក៏បាន

របៀបធ្វើ​ ទឹក​ជ្រលក់​ស៊ូគី
----------------
#គ្រឿងផ្សំ​
-​ តៅហ៊ូក្រហម​ ១៥០​ ក្រាម​
-​ ម្ទេស ៨០ ក្រាម
-​ ខ្ទឹម 100 ក្រាម
-​ ឬសវ៉ាន់ស៊ុយ​ ៥ ដេីម​
- គល់​ខ្ចឹម​ ៨​ ដេីម
-​ ស្ករ ១២០ ក្រាម
-​ ទឹកម្ទេស ១៧០ ក្រាម
-​ ទឹកខ្មេះ ១០០ ក្រាម
-​ ប្រេង​ខ្ទឹម ១៥០ ក្រាម
-​ ទឹក ១០០ ក្រាម
-​ ល្ងស ៥០​ ក្រាម
-​ ទឹកត្រី​ ១​ ស្លាបព្រាបាយ
-​ អំបិល ១/២​ ស្លាបព្រាកាហ្វេ
-​ ប្រេងល្ង 3 ស្លាបព្រាបាយ

#របៀបធ្វើ​
-​ ក្រឡុក​ម្ទេស​ ខ្ទឹម​ ឬសវ៉ាន់ស៊ុយ​ គល់​ខ្ចឹម​ តៅហ៊ូ​ ស្ករ​ ទឹក​ ប្រេង​ខ្ទឹម​ ទឹក​ខ្មះ​ ទឹក​ម្ទេស​ និង​ល្ង(ល្ងដាក់ពាក់កណ្តាល)​ជាមួយ​គ្នា​ឲ្យ​ម៉ដ្ឋ​។
-​ ដាំខ្ទះ​ ចាក់ទឹកតៅហ៊ូដែល​ក្រឡុក​រួចចូល​ ប្រេីភ្លេីងតិចៗ​រហូតដល់​ពុះ(​ឧស្សាហ៍​កូរ​ កុំឲ្យ​ជាប់​ខ្ទះ​)​ រួច​បន្ថែម​ទឹក​ត្រី​ អំបិល​ ល្ង​ និង​ប្រេង​ល្ងចូល​កូរឲ្យសព្វល្អ​ចំអិន​ប្រហែល​ ១០នាទី​ទៀត​ជាការស្រេច​៕

ទឹក​ជ្រលក់​នេះសម្រាប់​​ទទួល​ទាន​ជាមួយ​សាច់​អាំង​ ឬស៊ុប...

អ្នក​ស្រី​ សុគន្ធារី

របៀបធ្វើញាំបង្គាក្រូចថ្លុង
-----------
#គ្រឿងផ្សំ

- បង្គាស្ងោរឆ្អិន ៣០០ក្រាម យកសំបក និងក្បាលចេញ
- សាច់ក្រូចថ្លុង កន្លះចាន
- សំបកក្រូចថ្លុង ១ផ្លែ (កាត់ជាពីរឲ្យលើសពាក់កណ្តាលយកសាច់ខាងក្នុងចេញ)
- ទឹកត្រី ២ស្លាបព្រាបាយ
- ស្ករស ២ស្លាបព្រាបាយ
- ប៊ីចេង ចុងស្លាបព្រា
- ខ្ទឹមក្រហម ១ដុំ ចិតស្តើងៗ
- ខ្ទឹមស ៣កំពឹស ចិតស្តើងៗ
- សណ្តែកដីលីង ៣-៤ស្លាបព្រាបាយ
- ម្ទេសប្លោកក្រហម ១ចំហៀងផ្លែចិតចំណិត
- ស្លឹកខ្ទឹមហាន់ ១ស្លាបព្រាបាយ
- ជីអង្កាម បន្តិច

#វិធីធ្វើ

១. ដំបូងយកចានមកដាក់សាច់ក្រូចថ្លុង​ បន្ទាប់មកផ្សំគ្រឿងចូល បង្គា, ខ្ទឹមស, ខ្ទឹមក្រហម, ម្ទេស, សណ្តែកដីលីង, ស្ករស, ទឹកត្រី និងប៊ីចេង។
២. ច្របល់ចូលគ្នាទាំងអស់ឲ្យចូលរស់ជាតិ រួចហើយដាក់ជី និងស្លឹកខ្ទឹមច្របល់ចូលគ្នាបន្តិចទៀត។
៣. យកញាំដែលលាយគ្រឿងផ្សំរួចរាល់អស់ហើយដាក់ចូលទៅក្នុងសំបកក្រូចផ្លុងជាការស្រេច មើលទៅមានសោភ័ណភាពគួរឲ្យចង់ញាំ៕

របៀបឆាត្រប់
-----------
#គ្រឿងផ្សំ
១-សាច់ជ្រូក(យកសាច់សុទ្ធ)
២-ត្រប់វែង
៣-ខ្ទឹមបារាំង
៤-ប្រេងឆា ខ្ទឹមស ស្ករស ប្រេងខ្យង ម្រេច ទឹកត្រី

#របៀបធ្វើ
១-ចិញ្ច្រាំសាច់ជ្រូក
២-ដុតត្រប រួចបកសំបកចេញ រួចត្រប់១កាត់ជា​៣កំណាត់
៣-ចិញ្ច្រាំខ្ទឹមស
៤-ហាន់ខ្ទឹមបារាំង ទទឺងស្តើងៗ (ហាន់ដូចហាន់ឆាឡូកឡាក់)
៥-ចាក់ប្រេងឆា​បន្តិចចូល​ខ្ទះ រួចហើយបំពងខ្ទឹមស រួចដាក់​សាច់ជ្រូកចូល
៦-ឆា​ត្រលប់​ចុះឡើង ចាក់ទឹកត្រីអោយ​ឈ្ងុយ រួចដាក់ស្ករស ប្រេងខ្យង​​​តាម​រសជាតិ​​​ដែល​​ចូលចិត្ត ចាក់​ទឹក​ចូលបន្តិច​រួច​គ្រប​​ប្រហែល​៥នាទី​ដើម្បី​អោយ​សាច់​ជ្រូក​​ ឆ្អិនល្អ។
៧-ដាក់​ត្រប់និងខ្ទឹមបារាំងចូល​ដំណាល​គ្នា ឆាត្រលប់បន្តិច​ជា​​ការ​ស្រេច។

របៀបធ្វើ​ ឆាដេីមខាត់ណាសាច់ជ្រូកខ្វៃ
----------------------
#គ្រឿងផ្សំ
-​ សាច់ជ្រូក​ខ្វៃ ២០០ ក្រាម
-​ ដេីមខាត់ណា ២០០ ក្រាម
-​ ខ្ទឹមស ៦ កំពឹស
- ម្ទេស ៥​ ផ្លែ​
-​ ទឹកស៊ីអ៊ីវ ២​ ស្លាបព្រាបាយ
-​ ស្ករ ១​ ស្លាបព្រាបាយ
- ម្សៅស៊ុប​ ១ ស្លាបព្រាកាហ្វេ
- ប្រេង​ខ្យង​ ១​ ស្លាបព្រាបាយ
-​ ប្រេងឆា​ ៣​ ស្លាបព្រា​បាយ​

#របៀបធ្វើ​
-​ ចិតផ្នែក​ចាស់​ៗចេញ​ រួច​ហាន់​ដេីម​ខាត់ណា​វែងៗ​ល្មម​។ បុក​ខ្ទឹម​ និង​ម្ទេស​ឱ្យ​ល្អិត​។ ហាន់​សាច់​ជាដុំ​ធំ​ៗល្មម​។
-​ ដាំខ្ទះ​ដាក់​ប្រេងឆា​ ដាក់​ខ្ទឹម​ម្ទេស​ ឆា​ឱ្យ​ប្រែពណ៌បន្តិច​សឹម​ដាក់​ខាត់ណា​ ស្ករ​ ទឹក​សុីអ៊ីវ​ ប្រេង​ខ្យង​ និង​ម្សៅ​ស៊ុប​ ឆា​ឱ្យ​សព្វ​ចំអិន​ប្រហែល​ ៣-៤​នាទី។
-​ បន្ទាប់​មក​ដាក់​សាច់​ចូល​ ឆា​ឱ្យ​សព្វ​ប្រហែល​ ៣-៤នាទី​ទៀត​ភ្លក់​រសជាតិ​តាម​ចំណូល​ចិត្ត​ ជា​ការស្រេច​៕

អ្នកស្រី​ សុគន្ធារី

របៀបធ្វើ សម្លរចាប់ឆាយ

#គ្រឿងផ្សំ

- ស្ពៃបូកគោ ១គីឡូក្រាម
- ដើមខាត់ណា ១គីឡូក្រាម
- ឆៃថាវ កន្លះគីឡូក្រាម
- ពពុះសណ្តែក កន្លះគីឡូក្រាម
- ស្បែកជ្រូក ២ខាំ
- ផ្សិតក្រៀម ២ខាំ
- ជើងជ្រូក និងឆ្អឹងជ្រូក (ស្រស់ ឬខ្វៃ) ២-៤ គីឡូក្រាម
- អំបិល ២ស្លាបព្រាបាយកន្លះ
- ទឹកត្រី ២ស្លាបព្រាបាយ
- ស្ករ ៣ស្លាបព្រាបាយ
- ម្សៅស៊ុប ២ស្លាបព្រាបាយ
- ប្រេងឆា ៣ស្លាបព្រាបាយ
- ខ្ទឹមសចញ្ច្រាំ ២ស្លាបព្រាបាយ

#របៀបធ្វើ

- ស្ពៃបូកគោ ហាន់វែង និងធំៗល្មមលាងទឹកអោយទុកមួយអន្លើ។
- ដើមខាត់ណា បកសម្បកចាស់អោយអស់ ហាន់ដើមប្រឆិតៗធំល្មមទុកមួយអន្លើ ស្លឹកហាន់ធំ លាងទឹកអោយស្អាត។
- ឆៃថាវ ចិតសម្បកអោយស្អាត កាត់ជាកងវែងល្មម រួចពុះជា២ឬជា៤ចំនិត លាងទឹកអោយស្អាត។
- ពពុះសណ្តែក ស្បែកជ្រូក និងផ្សិតក្រៀម ត្រាំទឹកប្រហែល១ម៉ោង រួចលាងទឹកច្របាច់អោយស្អាត (លាងរហូតទឹកថ្លា) រួចហាន់ជាតូចៗល្មម ចំនែកផ្សិត ហាន់ជា២ចំនែក។
- ឆ្អឹង និងជើងជ្រូកលាងទឹកអោយស្អាត កាត់ជាដុំៗតូចល្មម រួចដាំទឹកអោយពុះស្រុះប្រហែល៥នាទី សឹមស្រង់ចេញលាងអោយស្អាត។
- ដាក់ប្រេងឆាពាក់កណ្តាលដាំអោយក្តៅ សឹមដាក់ខ្ទឹមពាក់កណ្តាលឆាអោយប្រែពណ៌ល្អ រួចដាក់សាច់ចូលឆាប្រហែល២ទៅ៣នាទី សឹមដាក់ ស្ករ ម្សៅស៊ុប ទឹកត្រី និងអំបិល (១មុខពាក់កណ្តាល) ឆាជាមួយសាច់អោយសព្វ ប្រហែល ១នាទី សឹមដាក់ទឹក (ទឹកធម្មតា ឬទឹកស៊ុមមាន់) ៨លីត្រ រំងោសប្រហែល ១៥នាទី។
- ដាំប្រេងឆាអោយក្តៅ ដាក់ខ្ទឹមឆាអោយប្រែពណ៌ល្អ សឹមដាក់ផ្សិតឆាអោយទន់ បន្ទាប់មកដាក់ ស្ករ ម្សៅស៊ុប ទឹកត្រី និងអំបិល កូអោយសព្វសឹមដាក់ពពុះសណ្តែក ដើមខាត់ណា ឆៃថាវ និងសាច់ខ្វៃ (បើមាន)ចូលឆាអោយសព្វប្រហែល ៥នាទី សឹមដាក់ស្បែកជ្រូក និងស្លឹកខាត់ណាចូលឆាអោយទន់ រួចយកទៅដាក់ក្នុងឆ្នាំងស៊ុបកំពង់ពុះ រំងាស់១០ ទៅ១០នាទី។
- ដាក់ស្ពៃបូកគោចូល កូអោយសព្វទុក៥នាទីជាការស្រេច៕

@អ្នកស្រី សុគន្ធារី

នំអំបុកបំពង
---------
#គ្រឿងផ្សំ

+ សំបកក្រៅ
- អំបុក សរសៃដូងកោស(យកទៅលីង)
- ម្សៅមី
- ខ្ទិះដូង(ដាក់មួយសើមម្សៅសម្រាប់ពូត)
- អំបិលបន្តិច
- ស្ករស
+ ស្នូលខាងក្នុង
- ចេកពងមាន់ទុំជោរ

#វិធីធ្វើ

- យកម្សៅលាយសរសៃដូងកោស ម្សៅមី ខ្ទិះដូង អំបិលនិងស្ករស រួចលាយចូលគ្នាអោយសព្វ ពូតហើយបង្កប់ចេកពងមាន់មួយ នៅចាំកណ្តាល បិតចេកអោយជិត
- ដាក់ខ្លាញ់ចូលក្នុងខ្ទះទុកអ ោយក្ដៅខ្លាំងសិន សឹមយកទៅបំពងអោយឡើងក្រហមស្រួ យ រួចស្រង់ចេញ ទុកអោយស្រក់ខ្លាញ់ចេញអស់ រួចជាការស្រេច ។

របៀបធ្វើប្រហិតឆឹង
-------------
#គ្រឿងផ្សំ
- ទឹកម្ទេស
- ទឹកសៀង
- ស្ករត្នោត
- ម្ទេសស្រស់
- ម្ទេសឆា
- ខ្ទឹមស

#វិធើធ្វើ
- ដាក់គ្រឿងទាំងអស់លាយចូលគ្នាក្នុងចាន រួចកូរចូលអោយសព្វគ្រឿង។
- ប្រហិតត្រូវយកទៅលាងទឹកអោយស្អាត ដាក់អំបិលបន្តិច ដើម្បីអោយស្អាតល្អ ហើយយកទៅស្រុះទឹកក្ដៅប្រហែល២នាទី ទើបស្រង់ដាក់កញ្ច្រែងទុកអោយស្ងួត។
- ចាក់ប្រេងឆា ឬខ្លាញ់ទៅក្នុងខ្ទះ ដោយដាក់ខ្ទឹមសរខ្លះដើម្បីបន្ថយក្លិនឆ្អាបដែលចេញពីប្រហិត។ បន្ទាប់មកចាក់ប្រហិតចូលកូរបន្តិច រួចសឹមចាក់គ្រឿងដែលផ្សំរួច កូរវាអោយសព្វរយៈពេល២ឬ៣នាទីជាការស្រេច។

ក្តាមឆាជាមួយពងទាប្រៃ
----------
#គ្រឿងផ្សំ

- ក្តាមលាងទឹកអោយស្អាត កាត់វាជា4
- ទឹក
- ទឹកត្រី
- ទឹកប្រេងខ្ចង
- ទឹកសីុអីុវខាប់
- ស្ករស
- ប៊ីចេង
- ខ្ទឹមសចិញ្ច្រាំ
- គ្រឿងការី
- ពងមាន់ប្រៃ ឬពងទាប្រៃយកតែផ្នែកក្រហមទៅវាយជាមួយទឹក
- ខ្ទឹមបារាំង
- ម្ទេសប្លោក
- ស្លឹកខ្ទឹម
- ជីវ៉ាន់ស៊ុយ

#របៀបធ្វើ

1. ដាក់ខ្ទះ ដាក់ប្រេងឆា ដាក់ខ្ទឹម ដាក់ក្តាមពេលខ្ទឹមសរៀងក្រហមឈ្ងុយ ( ឆាក្តាមពី៣្រឡប់)
2. ដាក់ពងទាប្រៃ ស្ករ អំបិល ប៊ីចេង ទឹកត្រី ទឹកប្រេងខ្ចង ទឹកសីូវអីុវខាប់ គ្រឿងការី រួចឆាវាចូលគ្នាជាមួយក្តាមអោយរៀងយូរបន្តិច ចាំដាក់ម្ទេសប្លោក ខ្ទឹមបារាំង ស្លឹកខ្ទឹមចូល ( ឆា2-3ត្រឡប់រួចភ្លក់មើលជាការស្រេច)
3. បន្ថែមសោភណ្ឌភាពដោយជីវ៉ាន់ស៊ុយពីលើ។

អ្នកស្រី សុគន្ធារី