Bago Region CDM Civil Servants Council

Bago Region CDM Civil Servants Council Contact information, map and directions, contact form, opening hours, services, ratings, photos, videos and announcements from Bago Region CDM Civil Servants Council, Political organisation, New York, NY.

ဒေသအခြေပြု CDM နိုင်ငံ့ဝန်ထမ်းများ ကွန်ရက်၏ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းအား ကု...
08/29/2026

ဒေသအခြေပြု CDM နိုင်ငံ့ဝန်ထမ်းများ ကွန်ရက်၏ ကုလသမဂ္ဂဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းအား ကုလသမဂ္ဂတွင် ဆက်လက်ထားရှိရေး သဘောထားထုတ်ပြန်ချက်
ရက်စွဲ။ ။ ၂၀၂၆ ခုနှစ်၊ ဩဂုတ်လ (၂၈) ရက်
၁။အကြမ်းဖက်စစ်ကောင်စီမှ နိုင်ငံတော်အာဏာကို မတရားသိမ်းပိုက်ခဲ့သည့်အချိန်မှစ၍ ကုလသမဂ္ဂ ဆိုင်ရာ မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းသည် မြန်မာပြည်သူလူထုနှင့် တစ်သားတည်းရပ်တည်ကာ နွေဦးတော်လှန်ရေးနှင့် ပြည်သူတို့၏အသံကို နိုင်ငံတကာစင်မြင့်ထက် တွင် ရဲဝံ့စွာ ထုတ်ဖော်ပြောဆိုပေးလျက်ရှိပါသည်။ သံအမတ်ကြီး ဦးကျော်မိုးထွန်းသည် “ပြည်သူ့ထံမှ အပ်နှင်းထားသောတာဝန်နှင့် ဒီမိုကရေစီစံနှုန်းများကို သစ္စာရှိစွာ စောင့်သိထိန်းသိမ်းရင်း ပြည်သူနှင့် အတူ ခိုင်မာစွာ ရပ်တည်ခဲ့သည့် တရားဝင် ကိုယ်စားလှယ်” ဖြစ်ပါသည်။
၂။ သံအမတ်ကြီး ဦးကျော်မိုးထွန်းသည် ကုလသမဂ္ဂအပါအဝင် နိုင်ငံတကာ အသိုင်းအဝိုင်းတွင် အကြမ်းဖက်စစ်အုပ်စု၏ ဥပဒေမဲ့လုပ်ရပ်များကိုဖော်ထုတ်ခြင်း၊ ပြည်သူလူထုအပေါ် နေ့စဉ်နှင့်အမျှ ကျူးလွန်နေသော လူ့အခွင့်အရေးချိုးဖောက်မှုများနှင့် စစ်ရာဇဝတ်မှုများကို တင်ပြခြင်း၊ စစ်ကောင်စီ အား နိုင်ငံတကာစာမျက်နှာတွင် တရားဝင်မှုမရရှိစေရန် ဟန့်တားခြင်းတို့၌ အရေးပါသော အခန်း ကဏ္ဍမှ ပါဝင်ဆောင်ရွက်လျက်ရှိသည်ကို ကျွန်ုပ်တို့ ဒေသအခြေပြု CDM နိုင်ငံ့ ဝန်ထမ်းများကွန်ရက်မှ အထူး လေးစားဂုဏ်ယူပါသည်။
၃။ မြန်မာပြည်သူလူထု၏ ဆန္ဒအစစ်အမှန်ကိုကိုယ်စားပြုသော တစ်ဦးတည်းသော သံတမန်ဖြစ်သည့် သံအမတ်ကြီး ဦးကျော်မိုးထွန်းအား နေရာဖယ်ရှားရန် အကြမ်းဖက်စစ်ကောင်စီ၏ ကြိုးပမ်းမှုမှန် သမျှကို ကျွန်ုပ်တို့ဒေသအခြေပြု CDM နိုင်ငံ့ဝန်ထမ်းများကွန်ရက်အနေဖြင့် ပြင်းထန်စွာ ကန့်ကွက် ရှုတ်ချပါသည်။ ကုလသမဂ္ဂအထွေထွေညီလာခံ (UNGA)၊ ကိုယ်စားလှယ်-အရည်အချင်း စစ်ကော်မတီ (Credentials Committee) နှင့် အဖွဲ့ဝင်နိုင်ငံများအနေဖြင့် စစ်ကောင်စီ၏ တရားမဝင်ကိုယ်စားပြုခွင့် ကြိုးပမ်းမှုများကို လုံးဝပယ်ချပြီး၊ ပြည်သူ့ဆန္ဒနှင့်အညီ သံအမတ်ကြီး ဦးကျော်မိုးထွန်းအား မြန်မာနိုင်ငံ၏ တရားဝင်သံအမတ်ကြီးအဖြစ် ဆက်လက်အသိအမှတ်ပြု လက်ခံသွားရန် ကျွန်ုပ် တို့ ဒေသအခြေပြု CDM နိုင်ငံ့ဝန်ထမ်းများကွန်ရက်မှ လေးနက်စွာ တောင်းဆိုလိုက်သည်။
၄။ ကျွန်ုပ်တို့ ဒေသအခြေပြု CDM နိုင်ငံ့ဝန်ထမ်းများကွန်ရက်မှ CDM နိုင်ငံ့ဝန်ထမ်းများအနေဖြင့် သံအမတ်ကြီး ဦးကျော်မိုးထွန်းနှင့်အတူ ခိုင်မာစွာ ဆက်လက်ရပ်တည်သွားမည်ဖြစ်ပြီး၊ စစ်အာဏာရှင် စနစ် အမြစ်ပြတ်ချေမှုန်းရေးနှင့် ဖက်ဒရယ်ဒီမိုကရေစီပြည်ထောင်စု တည်ဆောက်ရေးတို့အတွက် ပြည်သူလူထုတစ်ရပ်လုံးနှင့်အတူ အဆုံးထိတိုင် ဆက်လက်ကြိုးပမ်း တိုက်ပွဲဝင်သွားမည် ဖြစ်ကြောင်း ဤထုတ်ပြန်ချက်ဖြင့် အခိုင်အမာ ကတိပြုအပ်ပါသည်။
**********************************
ဒေသအခြေပြု CDM နိုင်ငံ့ဝန်ထမ်းများကွန်ရက် အဖွဲ့အစည်းများ
(၁) ကချင်ပြည်နယ် CDM နိုင်ငံ့ဝန်ထမ်းများကောင်စီ (KSCCSC)
(၂) ကရင်နီပြည် နိုင်ငံ့ဝန်ထမ်း အကြမ်းမဖက်အာဏာဖီဆန်ရေးလှုပ်ရှားမှုကောင်စီ(KSCSC-CDM)
(၃) စစ်ကိုင်းဖက်ဒရယ်ယူနစ် CDM နိုင်ငံ့ဝန်ထမ်းများကောင်စီ (CCSC-SFU)
(၄) ပဲခူးဒေသ CDM နိုင်ငံ့ဝန်ထမ်းကောင်စီ (BRCC)
(၅) မန္တလေးဒေသ အကြမ်းမဖက် အာဏာဖီဆန်ရေးအဖွဲ့ (MCDMO)
(၆) မွန်ပြည်နယ် CDM နိုင်ငံ့ဝန်ထမ်းများကောင်စီ (CCSC-MON)
(၇) ရန်ကုန်ဖက်ဒရယ်ယူနစ် CDM နိုင်ငံ့ဝန်ထမ်းများအဖွဲ့အစည်း(YFCCO)
(၈) ရှမ်းပြည်နယ် CDM ကောင်စီ (SSCC)

▪️ပဲခူးဒေသစီဒီအမ်နိုင်ငံ့ဝန်ထမ်းများကောင်စီ (BRCC) ၊ ဧရာဝတီဖက်ဒရယ်ယူနစ်စီဒီအမ် နိုင်ငံ့ဝန်ထမ်းအဖွဲ့အစည်း (CCSO-AFU) ဖြစ်...
08/22/2026

▪️ပဲခူးဒေသစီဒီအမ်နိုင်ငံ့ဝန်ထမ်းများကောင်စီ (BRCC) ၊ ဧရာဝတီဖက်ဒရယ်ယူနစ်စီဒီအမ် နိုင်ငံ့ဝန်ထမ်းအဖွဲ့အစည်း (CCSO-AFU) ဖြစ်မြောက်ရေးကော်မတီတို့နှင့် တနင်္သာရီတိုင်း CDM နိုင်ငံ့ ဝန်ထမ်းများ စည်းလုံးညီညွတ်မှုကွန်ရက်(TCSN) တို့ တွေ့ဆုံဆွေးနွေးမှုကို ၂၀၂၆ ခုနှစ် ၊ ဩဂုတ်လ (၂၀) ရက်နေ့ တွင် ပြုလုပ်ခဲ့ပါသည်။ ပဲခူးဒေသစီဒီအမ်နိုင်ငံ့ဝန်ထမ်းများကောင်စီ (BRCC) ၊ ဧရာဝတီ ဖက်ဒရယ်ယူနစ်စီဒီအမ် နိုင်ငံ့ဝန်ထမ်းအဖွဲ့အစည်း (CCSO-AFU) ဖြစ်မြောက်ရေးကော်မတီ တို့မှ အဖွဲ့ဝင်များ (၃၀)ဦး တက်ရောက်ခဲ့ပြီး တနင်္သာရီတိုင်း CDM နိုင်ငံ့ဝန်ထမ်းများစည်းလုံး ညီညွတ်မှု ကွန်ရက်(TCSN) မှ အဖွဲ့ဝင် (၁၄) ဦး၊ စုစုပေါင်း တက်ရောက်သူဦးရေ (၄၄) ဦးဖြင့် တွေ့ဆုံ ဆွေးနွေးမှုအား စတင်ခဲ့ကြသည်။ တွေ့ဆုံဆွေးနွေးမှုကို မြန်မာစံတော်ချိန် ည (၇) နာရီ (၁၀) မိနစ် တွင် စတင်ခဲ့ကြသည်။

▪️တွေ့ဆုံဆွေးနွေးမှု၏ ရည်ရွယ်ချက်ဖြစ်သည့် စီဒီအမ်နိုင်ငံ့ဝန်ထမ်းရေးရာကိစ္စရပ်များ ၊ ရင်ဆိုင်နေရသောအခက်အခဲများနှင့် အမြင်သဘောထားများကို ဒေသအချင်းချင်းအမြင်ချင်း ဖလှယ်ဆွေးနွေးခြင်း၊ ကြားကာလနိုင်ငံရေးအစီအမံရေးဆွဲရေးလုပ်ငန်းစဉ်များတွင် စီဒီအမ် နိုင်ငံ့ဝန်ထမ်းများ၏ ပါဝင်ဆောင်ရွက်မှု အခြေအနေများအပြင် တိုင်းရင်းသားနယ်မြေအတွင်းရှိ စီဒီအမ်နိုင်ငံ့ဝန်ထမ်းရေးရာကိစ္စရပ်များ နှင့်ပတ်သက်၍ အချင်းချင်းမျှဝေဖလှယ်ကာ ရင်းနှီး ပွင့်လင်းစွာဖြင့် မျှဝေခဲ့ကြသည်။ သက်ဆိုင်ရာဖက်ဒရယ်ယူနစ်အလိုက် အစီအမံပေါ်ပေါက်ရေး လုပ်ငန်းများတွင်ကြုံတွေ့နေရသော အကြပ်အတည်းများနှင့် နိုင်ငံရေးရပ်တည်ချက် သဘောထား များ၊ လက်ရှိဖြစ်ပေါ်နေသော နိုင်ငံရေးအကြပ်အတည်းနှင့် အခြေအနေများအပေါ် အမြင် သဘောထားများ အား ဆွေးနွေးခဲ့ကြသည်။

▪️ယူနစ်အလိုက်စီဒီအမ်နိုင်ငံ့ဝန်ထမ်းအစုအဖွဲ့များကြား အပြန်အလှန် မေးမြန်း ဆွေးနွေး ခဲ့ကြပြီး ပဲခူးဒေသစီဒီအမ်နိုင်ငံ့ဝန်ထမ်းများကောင်စီ (BRCC) ၊ ဧရာဝတီဖက်ဒရယ်ယူနစ် စီဒီအမ် နိုင်ငံ့ဝန်ထမ်းအဖွဲ့အစည်း (CCSO-AFU) ဖြစ်မြောက်ရေးကော်မတီတို့နှင့် တနင်္သာရီတိုင်း CDM နိုင်ငံ့ဝန်ထမ်းများစည်းလုံးညီညွတ်မှုကွန်ရက် (TCSN) တို့ ရှေ့ဆက် ဆက်လက်တွေ့ဆုံဆွေးနွေးရန် သဘောတူခဲ့ကြပြီး ရင်းနှီးပွင့်လင်းသောဆွေးနွေးမှုများဖြင့် ဒေသအချင်းချင်းတွေ့ဆုံမှုကို ည (၁၀ နာရီ ၁၅ မိနစ်) တွင်အောင်မြင်စွာ ရပ်နား ခဲ့ပါသည်။

ပဲခူးဒေသစီဒီအမ်နိုင်ငံ့ဝန်ထမ်းများကောင်စီ (BRCC)
ဧရာဝတီဖက်ဒရယ်ယူနစ်စီဒီအမ် နိုင်ငံ့ဝန်ထမ်းအဖွဲ့အစည်း (CCSO-AFU) ဖြစ်မြောက်ရေးကော်မတီ
တနင်္သာရီတိုင်း CDM နိုင်ငံ့ဝန်ထမ်းများစည်းလုံးညီညွတ်မှုကွန်ရက်(TCSN)

08/17/2026

🥵 ရာသီဥတုက တအားပူတယ်။ ချွေးထွက်များရင် ဓာတ်ဆားရည် ပြန်‌သောက်နော်...

🗣️ ၀မ်းလျှောနေလို့ လူလည်း မျော့နေပြီ။ မအန်ဘူးမလား.....မအန်ရင် ၀မ်းလျှောသလောက် နောက်က ဓာတ်ဆားပြန်လိုက်သောက်လေ...

ဓာတ်ဆား... ဓာတ်ဆား..ဓာတ်ဆား.

- ဓာတ်ဆားက ခုညဘက်ကြီး ၀ယ်လို့မလွယ်ဘူး... 🌚

- တစ်ယောက်တည်းနေတာ သွား၀ယ်ပေးမယ့်သူမရှိဘူး ...😬

- တောထဲ ဓာတ်ဆားရဖို့မလွယ်ဘူး...😔

- နယ်က ဆေး၀ယ်ဖို့ခက်နေတယ်...🥺

- ပိုက်ဆံမရှိဘူး...😖

ဒီလို အရေးကြီး ဓာတ်ဆားကို ကိုယ့်အိမ်မှာကိုယ် အလွယ်တကူဖျော်စပ်နိုင်ဖို့ နည်းလမ်းလေး မျှဝေပေးပါ့မယ်။ ခုချိန်ခါမှာလည်း နေပူလို့၊ ၀မ်းပျက်၀မ်းလျှောလို့ ဓာတ်ဆားလိုအပ်ချက်တွေလည်း များနေမှာပဲ။

📝ကဲ....ဒါကြောင့် အိမ်မှာ ဘယ်လိုလေးဖျော်ကြမလဲ
ကြည့်ရအောင်နော်.....

🍶 အိမ်တွင်း အလွယ်တကူ ဓာတ်ဆားဖျော်နည်းကတော့ ... ...

🥄သကြား - လက်ဖက်စားဇွန်း ၆ ဇွန်း
🥄ဆား - လက်ဖက်စားဇွန်း တစ်၀က်
🥛ရေကျက်အေး တစ်လီတာ (ရေသန့်တစ်လီတာဘူးစာ) နဲ့ ဖျော်စပ်ပြီး ပုံမှန် ဓာတ်ဆားတစ်ထုပ်ဖျော်စာအတိုင်း သောက်သုံးနိုင်ပါတယ်။

အရသာလေးပါချင်ရင် သံပုရာသီး (သို့) လိမ္မော်သီး အရည်ညှစ်ထည့်လို့ရပါတယ်။..

အထူးမှာကြားချက်...

👶ကလေးအတွက်ဆို ဝမ်းလျှောတာအတွက်ပဲ အသုံးပြုပေးပါ။
🥄ဆားပမာဏကိုလည်း လက်ဖက်စားဇွန်း တစ်ဝက်ထက် လုံးဝ မများပါစေနဲ့။ ဆားပမာဏ များသွားရင် ကလေးအတွက် အန္တရာယ်ရှိပါတယ်။

🏋️ အားကစားသမားအတွက်ဆို ချွေးထွက်များခြင်းအတွက်
🥄သကြား - လက်ဖက်စားဇွန်း ၁၀ ဇွန်း
🥄ဆား - လက်ဖက်စားဇွန်းတစ်ဝက် ..... ပြောင်းလဲ ဖော်စပ် သောက်သုံးနိုင်ပါတယ်။ ..

📝 သောက်ပုံသောက်နည်းကတော့...

🥛ချွေးထွက်များတဲ့သူတွေအဖို့ကတော့ ချွေးထွက်သလောက် နောက်ကလိုက်သောက်ပေါ့။

🥛 ၀မ်းလျှောတဲ့သူတွေအတွက်ကတော့...
👨‍🦱လူကြီးဆိုရင် ၀မ်းတစ်ခါလျှောတိုင်း တစ်ဖန်ခွက် (သို့) ဖန်ခွက်တစ်၀က် ပြန်သောက်ပါ။

👶 (၂) နှစ်အောက်ကလေးဆိုရင်တော့ ဖန်ခွက်ရဲ့ လေးပုံတစ်ပုံ (သို့) တစ်၀က်ကို ၀မ်းတစ်ခါသွားတိုင်းတိုက်ပါ။ တစ်မိနစ် တစ်ဇွန်းစနှစ်ဇွန်းစ ခွဲတိုက်ဖို့ လိုကောင်းလိုပါလိမ့်မယ်။

🚨အန်ရင် (၅-၁၀) မိနစ်လောက်နားပြီးမှ ပြန်တိုက်ပါ။

ဒီလောက်ဆိုရင်တော့ အိမ်မှာ ဓာတ်ဆားဖျော်နည်းနဲ့ အသုံးပြုနည်းကို အကြမ်းဖျဥ်း နားလည်သဘောပေါက်ကြပြီလို့ ယူဆပါတယ် 😍

Reference 📚 reThinkSurvival

❤️ NUG, MOH တယ်လီကျန်းမာ...လူတိုင်းအတွက်ပါ ❤️

👉 တယ်လီကျန်းမာတွင် ဆရာဝန်များနှင့် အွန်လိုင်းမှ အခမဲ့တိုင်ပင်ဆွေးနွေးနိုင်ပါသည်

*** ပိတ်ရက်မရှိပါ ***

(နေ့စဥ် မနက် ၈ နာရီမှ ည ၁၀ နာရီအထိ)

တယ်လီကျန်းမာ Page Messenger တွင် ကြိုတင်ဘိုကင်ယူနိုင်ပါသည်။


#တယ်လီကျန်းမာ
#ဓာတ်ဆား

08/17/2026

ကပ်ရောဂါအသွင် ဖြစ်စေနိုင်သော Cholera ကာလဝမ်းရောဂါ (ပြင်းထန်ဝမ်းပျက်ဝမ်းလျှောရောဂါ)

ဇူလိုင်လ၊ ၂၀၂၄ ခုနှစ်

🔴 အဓိကအချက်များ

👉 ကာလဝမ်းရောဂါ (ပြင်းထန်ဝမ်းပျက်ဝမ်းလျှောရောဂါ) သည် ရုတ်တရက်ဖြစ်ပွားသော ဝမ်းပျက်ရောဂါဖြစ်ပြီး ကုသမှုမရရှိပါက နာရီပိုင်းအတွင်း သေဆုံးနိုင်သည်။
👉 ကာလဝမ်းရောဂါသည် သန့်ရှင်းစိတ်ချရသော ရေနှင့် အခြေခံမိလ္လာနှင့် ရေဆိုးစနစ်၊ သန့်ရှင်းရေးစနစ်များ လက်လှမ်းမမီနိုင်သော လူထုကို ထိခိုက်သက်ရောက်စေသည့် ဆင်းရဲမှု၏ ရောဂါ ဖြစ်သည်။
👉 ပဋိပက္ခများ၊ စနစ်ကျသည့် မြို့ပြချဲ့ထွင် အစီအစဉ်မရှိဘဲ မြို့ပြတွင် လူအများ ပြောင်းရွှေ့နေထိုင်ခြင်းနှင့် ရာသီဥတုပြောင်းလဲမှုသည် ကာလဝမ်းရောဂါ ဖြစ်နိုင်ခြေ မြင့်မားစေသည်။
👉 ကမ္ဘာတစ်ဝန်း နှစ်စဥ် ကာလဝမ်းရောဂါ ဖြစ်ပွားသူ ၁.၃ သန်းမှ ၄ သန်းအထိရှိပြီး ၂၁,၀၀၀ မှ ၁၄၃,၀၀၀ အထိ သေဆုံးမှုရှိသည်ဟု သုတေသနပညာရှင်များက ခန့်မှန်းထားသည်။
👉 ရောဂါကူးစက်ခံရသူအများစုမှာ ရောဂါလက္ခဏာ လုံးဝမခံစားရခြင်း သို့မဟုတ် မပြင်းထန်သော လက္ခဏာများခံစားရခြင်းတို့ ဖြစ်နိုင်ပြီး ဓာတ်ဆားရည်သောက်သုံးခြင်းဖြင့် အောင်မြင်စွာကုသနိုင်သည်။
👉 ပြင်းထန်သောလူနာများမှာ သွေးပြန်ကြောမှတစ်ဆင့် အရည်များ လျင်မြန်စွာ သွင်းခြင်းနှင့် ပဋိဇီဝဆေးများ ပေးခြင်းဖြင့် ကုသရန်လိုအပ်သည်။
👉 သန့်ရှင်းစိတ်ချရသော ရေရရှိရန်၊ အခြေခံမိလ္လာရေဆိုးစနစ်နှင့် သန့်ရှင်းရေးစနစ်များ ရရှိရန်နှင့် တစ်ကိုယ်ရေသန့်ရှင်းရေးအလေ့အကျင့် ရရှိရန် ထောက်ပံ့ပေးခြင်းသည် ကာလဝမ်းရောဂါနှင့် ရေမှတစ်ဆင့်ကူးစက်သော အခြားရောဂါများကူးစက်မှုကို ကာကွယ်ရန်နှင့် ထိန်းချုပ်ရန် အရေးပါသည်။
👉 ကာလဝမ်းရောဂါ ကပ်အသွင်ဖြစ်ပွားမှုကို ထိန်းချုပ်ရန်နှင့် ဖြစ်နိုင်ခြေမြင့်သော ဒေသများတွင် ကာကွယ်ရန်အတွက် ကာလဝမ်းရောဂါ ကာကွယ်ဆေး တိုက်ကျွေးခြင်းကို ရေနှင့် မိလ္လာရေဆိုးစနစ် တိုးတက်ကောင်းမွန်အောင်လုပ်ခြင်းနှင့် အတူတွဲ၍ လုပ်သင့်သည်။

🔴 ခြုံငုံသုံးသပ်ချက်

ကာလဝမ်းရောဂါသည် ရုတ်တရက်ဖြစ်ပွားသော ဝမ်းပျက်ရောဂါဖြစ်ပြီး Vibrio cholerae ဘက်တီးရီးယားပိုး ပါဝင်သည့် အစားအစာ သို့မဟုတ် ရေကို စားသောက်မိခြင်းကြောင့် ဖြစ်ပွားသည်။ ကာလဝမ်းရောဂါသည် ပြည်သူ့ကျန်းမာရေးကဏ္ဍအတွက် ကမ္ဘာလုံးဆိုင်ရာ ခြိမ်းခြောက်မှုအဖြစ် ရှိနေဆဲဖြစ်ပြီး လူမှုကဏ္ဍဖွံ့ဖြိုးရေးကင်းမဲ့မှုနှင့် မညီမျှမှု ညွှန်းကိန်းအဖြစ်လည်း ရှိနေဆဲဖြစ်သည်။

🔴 ရောဂါလက္ခဏာများ

ကာလဝမ်းရောဂါသည် မသန့်ရှင်းသော အစားအစာ သို့မဟုတ် ရေကို စားသောက်ရာမှ ကူးစက်သည့် အလွန်ပြင်းထန်သော ရောဂါဖြစ်သည်။ ကာလဝမ်းရောဂါသည် ပြင်းထန်ပြီး ရေကဲ့သို ဝမ်းများ ရုတ်တရက်သွားသည့် ဝမ်းရောဂါဖြစ်သည်။ ရောဂါပြင်းထန်လျှင် ကုသမှုမရရှိပါက နာရီပိုင်းအတွင်း သေဆုံးနိုင်သည်။

V. cholera ပိုးရှိသည့် လူအများစုမှာ ၎င်းတို့၏ မစင်တွင် ရောဂါကူးစက်ခံရပြီးနောက် (၁) ရက်မှ (၁၀) ရက်အကြား ပိုးရှိနေသော်လည်း ရောဂါလက္ခဏာ ခံစားရခြင်းမရှိပါ။ ထိုပိုးများသည် ပတ်ဝန်းကျင်သို့ ရောက်ရှိပြီး အခြားသူများကို ရောဂါကူးစက်စေနိုင်သည်။

ရောဂါလက္ခဏာရှိသူအများစုမှာ အပျော့စား သို့မဟုတ် အတန်အသင့်ဖြစ်ပွားသော လက္ခဏာများ ခံစားရသည်။ ရောဂါလက္ခဏာပြရန် ၁၂ နာရီမှ ၅ ရက်အကြား ကြာတတ်သည်။ လူနာအနည်းစုသာ အပြင်းအထန် ရေဓာတ်ခမ်းခြောက်သည့် ရေကဲ့သို့ ဝမ်းများ ရုတ်တရက်သွားသည့် ဝမ်းရောဂါ ဖြစ်ပွားသည်။ ကုသမှုမရရှိပါက သေစေနိုင်သည်။

🔴 သမိုင်းကြောင်း

၁၉ရာစုတွင် ရောဂါ၏ မူလအစ အိန္ဒိယနိုင်ငံ၊ ဂင်္ဂါမြစ်ဝှမ်းဒေသမှ ကမ္ဘာတစ်ဝန်း ပျံ့နှံ့ခဲ့သည်။ ခြောက်ကြိမ်ဆက်တိုက်ဖြစ်သော ကမ္ဘာ့ကပ်ရောဂါသည် တိုက်ကြီးအားလုံးမှ လူသန်းပေါင်းများစွာကို သေဆုံးစေခဲ့သည်။ ၇ ကြိမ်မြောက် လက်ရှိကပ်ရောဂါသည် ၁၉၆၁ ခုနှစ်၌ တောင်အာရှတွင် စတင်ဖြစ်ပွားခဲ့သည်။ ၁၉၇၁ ခုနှစ်တွင် အာဖရိကသို့ ရောက်ရှိပြီး ၁၉၉၁ ခုနှစ်တွင် အမေရိကသို့ ရောက်ရှိဖြစ်ပွားသည်။ ကာလဝမ်းရောဂါသည် ယခုအခါ နိုင်ငံများစွာတွင် ဖြစ်ပွားလေ့ရှိသော ရောဂါဖြစ်သည်။

🔴 Vibrio cholerae မျိုးကွဲများ

မျိုးကွဲများစွာရှိသော်လည်း မျိုးကွဲ O1 နှင့် O139 နှစ်မျိုးသာ ကပ်ရောဂါများ ဖြစ်စေသည်။ V. cholerae O1 သည် များမကြာမီကဖြစ်သော ကပ်ရောဂါအားလုံးကို ဖြစ်စေခဲ့သည်။ V. cholerae O139 ကို ၁၉၉၂ ခုနှစ်၌ ဘင်္ဂလားဒေ့ရှ်နိုင်ငံတွင် ဦးစွာတွေ့ရှိခဲ့ပြီး ပြီးခဲ့သော ကပ်ရောဂါများကို ဖြစ်စေခဲ့သည်။ သို့သော် ကွက်ကျားလူနာများတွင်လည်း မကြာမီကတွေ့ရှိခဲ့သည်။ ၎င်းကို အာရှတိုက်အပြင်ဘက်တွင် မည်သည့်အခါမျှ မတွေ့ခဲ့ရပါ။ မျိုးကွဲ ၂ ခုလုံးကြောင့်ဖြစ်သော နာမကျန်းမှုသည် ကွာခြားမှုမရှိပါ။

🔴 ကူးစက်ရောဂါဗေဒ၊ ရောဂါကူးစက်နိုင်ခြေရှိသော အချက်များနှင့် ရောဂါ၏ ဝန်ထုပ်ဝန်ပိုး

ကာလဝမ်းရောဂါသည် ဖြစ်ပွားလေ့ရှိသော ရောဂါ သို့မဟုတ် ကပ်ရောဂါအသွင် ဖြစ်နိုင်သည်။ ကာလဝမ်းရောဂါ ဖြစ်ပွားလေ့ရှိသော ဒေသဆိုသည်မှာ ၃ နှစ်အတွင်း ကာလဝမ်းရောဂါဟု သေချာသတ်မှတ်နိုင်သော လူနာများ ရှာဖွေတွေ့ရှိရာ ဒေသဖြစ်သည်။ ထို့ပြင် အဆိုပါလူနာများသည် အခြားဒေသများမှ လက်ရှိဖြစ်ပွားရာ ဒေသသို့ ကူးစက်ပျံ့နှံ့လာခြင်းမဟုတ်ဘဲ အဆိုပါဒေသအတွင်းမှာပင် ကူးစက်ပြန့်ပွားသည့် အထောက်အထားများ တွေ့ရှိရခြင်းဖြစ်သည်။

ကာလဝမ်းရောဂါ ကပ်အသွင်ဖြစ်ပွားမှုသည် ဖြစ်ပွားလေ့ရှိသော နိုင်ငံနှင့် ပုံမှန်ဖြစ်ပွားလေ့မရှိသော နိုင်ငံ၊ နှစ်မျိုးလုံးတွင် ဖြစ်ပွားနိုင်သည်။ ကာလဝမ်းရောဂါ ပြန့်ပွားမှုသည် သန့်ရှင်းသော ရေနှင့် မိလ္လာရေဆိုး၊ သန့်ရှင်းရေး အထောက်အပံ့ပစ္စည်းများ လက်လှမ်းမီရန် နည်းပါးခြင်းနှင့် အထူးဆက်စပ်နေသည်။

ဖြစ်ပွားနိုင်ခြေရှိသည့် ဖြစ်နေကျ ဒေသများတွင် မြို့ပြဆင်းရဲသားရပ်ကွက်များနှင့် ရွှေ့ပြောင်းနေထိုင်သူများ သို့မဟုတ် ဒုက္ခသည်များအတွက် စခန်းများ ပါဝင်သည်။ လူသားချင်းစာနာထောက်ထားမှုဆိုင်ရာ အခက်အခဲကာလများ၏ အကျိုးဆက်များဖြစ်သည့် ရေနှင့် မိလ္လာစနစ်၊ သန့်ရှင်းရေးစနစ် ပျက်ယွင်းခြင်း၊ သို့မဟုတ် နေရာမလုံလောက်သော လူကျပ်သိပ်လွန်းသည့် စခန်းများသို့ ရွှေ့ပြောင်းနေထိုင်ခြင်းသည် ကာလဝမ်းရောဂါ ကူးစက်နိုင်ခြေ မြင့်မားစေသည်။

ရောဂါကူးစက်ခြင်းမရှိဘဲ သေဆုံးသူများကို ကပ်ရောဂါ ရင်းမြစ်အဖြစ် အစီရင်ခံတင်ပြခြင်း မရှိခဲ့ပါ။

ကမ္ဘာ့ကျန်းမာရေးအဖွဲ့ (WHO) သို့ အကြောင်းကြားခဲ့သော ရောဂါဖြစ်ပွားသူအရေအတွက်မှာ ပြီးခဲ့သောနှစ်များအတွင်း မြင့်တက်လာနေခဲ့သည်။ ၂၀၂၂ ခုနှစ်တွင် ၄၄ နိုင်ငံမှ ၄၇၂,၆၉၇ ဦး ရောဂါဖြစ်ပွားပြီး ၂,၃၄၉ ဦး သေဆုံးခဲ့သည်။ အစီရင်ခံစာပါ ကိန်းဂဏန်းများနှင့် ခန့်မှန်းထားသော ရောဂါဝန်ထုပ်ဝန်ပိုး မညီကွာခြားခြင်းမှာ ရောဂါဖြစ်သူအများအပြားကို မှတ်တမ်းမတင်ခြင်းကြောင့် ဖြစ်သည်။ ကူးစက်ရောဂါ စောင့်ကြပ်ကြည့်ရှုရေးစနစ်တွင် အကန့်အသတ်များ ရှိခြင်းနှင့် ကုန်သွယ်မှုနှင့် ခရီးသွားလုပ်ငန်းအပေါ် သက်ရောက်မှုများအတွက် စိုးရိမ်ခြင်းကြောင့် မှတ်တမ်းမတင်ကြခြင်း ဖြစ်သည်။

🔴 ကာကွယ်ခြင်းနှင့်ထိန်းချုပ်ခြင်း

ဘက်ပေါင်းစုံမှ ချဥ်းကပ်ခြင်းသည် ရောဂါထိန်းချုပ်ရန်နှင့် သေဆုံးမှုကို လျှော့ချရန် သော့ချက်ဖြစ်သည်။ ရောဂါ စောင့်ကြပ်ကြည့်ရှုခြင်း၊ ရေ၊ မိလ္လာရေဆိုးစနစ်၊ သန့်ရှင်းရေးနစ်နှင့် တစ်ကိုယ်ရေသန့်ရှင်းမှု၊ လူမှုရေးဆိုင်ရာ လှုပ်ရှားမှုများ၊ ကုသမှုနှင့် ကာလဝမ်းရောဂါ ကာကွယ်သောက်ဆေးတို့ကို ပေါင်းစပ်၍ အသုံးပြုရမည်ဖြစ်သည်။

🔴 ရောဂါစောင့်ကြပ်ကြည့်ရှုခြင်း

ကာလဝမ်းရောဂါ စောင့်ကြပ်ကြည့်ရှုခြင်းသည် ဘက်ပေါင်းစုံ စောင့်ကြပ်ကြည့်ရှုခြင်းစနစ်၏ အစိတ်အပိုင်းတစ်ခုဖြစ်သည်။ ဒေသအဆင့် အကြံပြုချက်များနှင့် ကမ္ဘာ့အဆင့် သတင်းအချက်အလက်မျှဝေခြင်းတို့ ပါဝင်သည်။

အသက် ၂ နှစ်နှင့်အထက် လူနာများတွင် ရေကဲ့သို့ ဝမ်းများ ရုတ်တရက် သွားခြင်းနှင့် ပြင်းထန်သော ရေဓာတ်ခမ်းခြောက်ခြင်း သို့မဟုတ် ရေကဲ့သို့ ဝမ်းများ ရုတ်တရက် သွားခြင်းကြောင့် သေဆုံးခြင်းတို့ ဖြစ်ပွားပါက ဆေးပညာရှုထောင့်အရ သံသယဝင်ခြင်းအပေါ်အခြေခံ၍ ကာလဝမ်းရောဂါ သံသယလူနာ စုံစမ်းတွေ့ရှိမှုဟု သတ်မှတ်သည်။

အမြန်ရောဂါ ရှာဖွေစစ်ဆေးခြင်း (RDTs) သည် ကပ်ရောဂါကို ရှာဖွေတွေ့ရှိရန် အသုံးဝင်သည်။ သို့သော် ရောဂါအတိအကျ သတ်မှတ်ရန်အတွက် ဝမ်းနမူနာကို ဓာတ်ခွဲခန်းပို့၍ V. cholerae O1 သို့မဟုတ် V. cholerae O139 အမျိုးအစား တိကျသေချာရန် ပိုးမွေးမြူခြင်း သို့မဟုတ် PCR နည်းဖြင့် စမ်းသပ်စစ်ဆေးရသည်။

ရေကဲ့သို့ ဝမ်းများ ရုတ်တရက်သွားသည့် လူနာများကို အစီရင်ခံတင်ပြခြင်းနှင့် အဆိုပါလူနာများနှင့် ဆက်စပ်သူများကို ပုံမှန်စစ်ဆေးခြင်းသည် ကာလဝမ်း ကပ်ရောဂါကို စောင့်ကြည့်စစ်ဆေးခြင်းဖြစ်သည်။

ရောဂါရှာဖွေရန်နှင့် စောင့်ကြည့်စစ်ဆေးသုံးသပ်ရန် ဒေသတွင်းလုပ်နိုင်စွမ်းရည်သည် ထိရောက်သော ရောဂါစောင့်ကြပ်ကြည့်ရှုခြင်းစနစ်နှင့် ထိန်းချုပ်ရန်နည်းလမ်းများ စီစဥ်ခြင်းတို့အတွက် အရေးပါသည်။ကပ်ရောဂါများကို အလျင်အမြန် ရှာဖွေတုံ့ပြန်ရန် ရောဂါစောင့်ကြပ်ကြည့်ရှုခြင်းနှင့် နိုင်ငံအဆင့် ပြင်ဆင်ခြင်းတို့ အားကောင်းစေရန် ရောဂါဖြစ်ပွားသော နိုင်ငံများအား တွန်းအားပေးလျက်ရှိသည်။

အပြည်ပြည်ဆိုင်ရာကျန်းမာရေး ပြဌာန်းချက်များ (IHR) အောက်တွင် ကာလဝမ်းရောဂါ လူနာအားလုံးသတင်းပေးပို့ခြင်းသည် မဖြစ်မနေပြုလုပ်ရန် မဟုတ်ပါ။ သို့သော် ကာလဝမ်းရောဂါအပါအဝင် ပြည်သူ့ကျန်းမာရေးအဖြစ်အပျက်များကို ထိုပြဌာန်းချက်ပါ သတ်မှတ်မှုများနှင့်ဆန့်ကျင်၍ မဖြစ်မနေ အမြဲစစ်ဆေးရမည်ဖြစ်ပြီး တရားဝင်သတိပေးချက် လို၊ မလို ဆုံးဖြတ်ရမည်ဖြစ်သည်။

🔴 ရေနှင့် မိလ္လာရေဆိုးစနစ်၊ သန့်ရှင်းရေးစနစ်များ ဆောင်ရွက်ခြင်း

ကာလဝမ်းရောဂါ ထိန်းချုပ်ရန်အတွက် ရေရှည်ဖြေရှင်းချက်မှာ စီးပွားရေးတိုးတက်မှုနှင့် စိတ်ချရသော သောက်သုံးရေနှင့် အခြေခံမိလ္လာရေဆိုးစနစ်၊ သန့်ရှင်းရေးစနစ်ကို လူတိုင်းရရှိရေးအပေါ်တွင် မူတည်သည်။

ပတ်ဝန်းကျင်အခြေအနေကို ဦးတည်သည့် လုပ်ဆောင်ချက်များတွင် စိတ်ချရသော သောက်သုံးရေနှင့် အခြေခံ မိလ္လာရေဆိုးစနစ်၊ သန့်ရှင်းရေးစနစ်နှင့် ကောင်းမွန်သည့် တစ်ကိုယ်ရေသန့်ရှင်းရေး အလေ့အကျင့်များ ရရှိရန် ရေရှည်ခိုင်မာသော Water, sanitation and hygiene (WASH) ဖြေရှင်းနည်းများ လုပ်ဆောင်ရမည်။

ထိုလုပ်ဆောင်ချက်များသည် ကာလဝမ်းရောဂါအပြင် ရေမှတစ်ဆင့် ကူးစက်သည့် အခြားရောဂါများစွာကို ကာကွယ်နိုင်သကဲ့သို့ ဆင်းရဲမှု၊ အာဟာရချို့တဲ့မှုနှင့် ပညာရေးဆိုင်ရာ ရည်မှန်းချက်များကို ရရှိနိုင်စေရန် အထောက်အကူပြုမည်ဖြစ်သည်။

ကာလဝမ်းရောဂါအတွက် WASH ဖြေရှင်းနည်းများသည် စဉ်ဆက်မပြတ် ဖွံ့ဖြိုးတိုးတက်ရေး ရည်မှန်းချက်ပန်းတိုင်များ (SDG 6) နှင့် ကိုက်ညီသည်။

🔴 ကုသခြင်း

ကာလဝမ်းရောဂါကို လွယ်ကူစွာ ကုသနိုင်သည်။ အများစုမှာ ဓာတ်ဆားရည် ချက်ချင်းသောက်ခြင်းဖြင့် အောင်မြင်စွာ ကုသနိုင်သည်။ WHO/UNICEF စံချိန်မီ ဓာတ်ဆားတစ်ထုပ်ကို ရေသန့် ၁ လီတာဖြင့်ဖျော်ပါ။

လူကြီးတစ်ယောက်အတွက် ကာလဝမ်းရောဂါ ဖြစ်သည့် ပထမဆုံးနေ့၌ အတန်အသင့် ရေဓာတ်ခန်းခြောက်ခြင်းကို ကုသရန် ဓာတ်ဆား ၆ လီတာ လိုအပ်သည်။

ပြင်းထန်သည့် ရေဓာတ်ခန်းခြောက်သည့် လူနာသည် သွေးလန့်ခြင်း/ ရှော့ရနိုင်ခြေ မြင့်မားသည်။ သွေးပြန်ကြောမှတစ်ဆင့် ဆေးရည်သွင်း၍ ကုသရန် လိုအပ်သည်။ ထိုလူနာများအနေဖြင့် ရောဂါခံစားရသည့် ကာလတိုစေရန်၊ အကြောဆေးရည်လိုအပ်မှု လျှော့ချရန်၊ ရောဂါပိုးကို မစင်မှ စွန့်ထုတ်သည့် ပမာဏနှင့် စွန့်ထုတ်သည့် ကာလတိုစေရန် သင့်လျော်သည့် ပဋိဇီဝဆေးများ ပေးပါသည်။

စားသောက်ရန် စိတ်ချရပါက သန့်ရှင်းစွာ ပြင်ဆင်ချက်ပြုတ်ထားသော ပုံမှန်ဒေသအစားအစာများကို လူနာအားလုံးအား စတင်ကျွေးနိုင်သည်။ နို့တိုက်မိခင်များအား မိခင်နို့တိုက်ကျွေးခြင်းကို အားပေးသင့်သည်။

ကာလဝမ်း ကပ်ရောဂါဖြစ်ပွားသည့် ကာလတွင် ကုသမှု အလျင်အမြန် လက်လှမ်းမီခြင်းသည် အရေးကြီးသည်။ ဓာတ်ဆားရည်များကို လူထုအတွင်း ရရှိနိုင်စေရန် စီမံထားသင့်ပြီး အကြောဆေးရည်သွင်းခြင်းနှင့် ၂၄ နာရီစောင့်ရှောက်မှုပေးနိုင်သည့် ကြီးမားသော ကုသမှုစင်တာများလည်း လူထုအတွက် ဆောင်ရွက်ပေးသင့်ပါသည်။ သင့်လျော်သည့် ကုသမှုကို ဆောလျင်စွာ ပေးခြင်းဖြင့် လူနာသေဆုံးနှုန်းကို ၁ ရာခိုင်နှုန်းအောက်သို့ လျှော့ချသင့်သည်။

ဇင့် ဆေးဝါးသည် ၅ နှစ်အောက်ကလေးများအတွက် ဖြည့်စွက်ကုသနည်းဖြစ်ပြီး ဝမ်းပျက်သည့်ကာလကို တိုစေသည်။ ရေကဲ့သို့ ဝမ်းများ ရုတ်တရက်သွားသည့် ဝမ်းလျှောရောဂါ၏ အခြားအကြောင်းရင်းများ ဖြစ်စေနိုင်မှုကို ကာကွယ်ပေးနိုင်သည်။

ပဋိဇီဝဆေးကို လူထုအား အလုံးအရင်းနှင့် တိုက်ကျွေးခြင်း မပြုလုပ်သင့်ပါ။ ကာလဝမ်းရောဂါ ပျံ့နှံ့ခြင်းအပေါ် သက်ရောက်သည့် သက်သေမရှိခြင်းနှင့် ပဋိဇီဝဆေးယဥ်ပါးမှုကို ဖြစ်စေနိုင်သောကြောင့် ဖြစ်သည်။

🔴 ရပ်ရွာလူထု ပါဝင်မှု

ရပ်ရွာလူထုပါဝင်မှုဆိုသည်မှာ လူထုနှင့် ရပ်ရွာသည် အစီအစဥ်များ အကောင်အထည်ဖော်ရန်နှင့် လုပ်ဆောင်သည့်လုပ်ငန်းစဥ်များ၏ တစ်စိတ်တစ်ပိုင်းဖြစ်မှုကို ဆိုလိုသည်။

ဆပ်ပြာဖြင့် လက်ဆေးခြင်း၊ အစားအစာ သန့်ရှင်းစွာ ချက်ပြုတ်ပြင်ဆင်သိမ်းဆည်းခြင်းနှင့် ကလေးများ၏ အညစ်အကြေးများကို စနစ်တကျစွန့်ပစ်ခြင်းစသည့် ကောင်းမွန်သည့် တစ်ကိုယ်ရေသန့်ရှင်းရေး အလေ့အထများကို အားပေးရာတွင် ဒေသတွင်းယဥ်ကျေးမှု၊ အလေ့အထနှင့် ယုံကြည်မှုတို့သည် အဓိကကျသည်။

ကာလဝမ်းရောဂါကြောင့် သေဆုံးသူများ၏ နာရေးကို ကျင်းပရာတွင် နာရေးလာသူများအကြား ရောဂါကူးစက်မှုကို ကာကွယ်ရန် လိုက်နာရမည့် နာရေးဆိုင်ရာ အလေ့အထများ လိုအပ်သည်။

ကပ်ရောဂါ တုံ့ပြန်မှုကာလ တစ်လျှောက်လုံး၌ ရပ်ရွာလူထုပါဝင်မှု လိုအပ်ပြီး အထူးသဖြင့် ရောဂါဖြစ်နိုင်ခြေအန္တရာယ်၊ ရောဂါလက္ခဏာများ၊ ရောဂါမကူးရန် သတိထားရမည့်အချက်များ၊ လူနာရှိပါက သတင်းပို့ရန် အချိန်နှင့် နေရာ၊ ရောဂါလက္ခဏာခံစားရပါက ချက်ချင်း ကုသမှုခံယူရန် စသည်အချက်အကြောင်း အသိပညာများ မြှင့်တင်ရမည်ဖြစ်သည်။

ရပ်ရွာလူထုသည် မည်သည့်အချိန်၊ မည်သည့်နေရာတွင် ကုသမှုခံယူရန် အပါအဝင် အစီအစဥ်များ အကောင်အထည်ဖော်ရာ၌ အစိတ်အပိုင်းတစ်ခု ဖြစ်သင့်သည်။

🔴 ကာလဝမ်းရောဂါကာကွယ်သောက်ဆေး (Oral cholera vaccines)

လတ်တလောတွင် WHO က အသိအမှတ်ပြုထားသည့် ကာလဝမ်း ကာကွယ်သောက်ဆေး ၃ မျိုး ရှိသည်။ Dukoral®၊ Shanchol™ နှင့် Euvichol-Plus® တို့ ဖြစ်ပြီး ၃ မျိုးစလုံးသည် အပြည့်အဝကာကွယ်မှု ရရှိနိုင်ရေးအတွက် ၂ ကြိမ်သောက်ရန် လိုအပ်သည်။ ကာလဝမ်းရောဂါ ကာကွယ်သောက်ဆေးကို ရောဂါဖြစ်ပွားလေ့ရှိသော နေရာများ၊ ရောဂါဖြစ်ပွားနိုင်ခြေ မြင့်မားသည့် လူသားချင်းစာနာထောက်ထားမှုဆိုင်ရာ အရေးအခင်းကာလများတွင် ရောဂါကာကွယ်ထိန်းချုပ်ရေး အခြားနည်းလမ်းများနှင့်အတူတွဲ၍ အသုံးပြုသင့်ပါသည်။ ကာကွယ်ဆေးသောက်ခြင်းသည် ကပ်ရောဂါ ကာကွယ်ထိန်းချုပ်ရန် ဦးစားပေးအရေးကြီးသည့် ကျန်းမာရေးလုပ်ဆောင်ချက်များ ဆောင်ရွက်ခြင်းကို အနှောင့်အယှက် မဖြစ်စေသင့်ပါ။

ကျန်းမာရေးဝန်ကြီးဌာန၊ အမျိုးသားညီညွတ်ရေးအစိုးရ

Reference: World Health Organization

#ကာလဝမ်း #ပြင်းထန်ဝမ်းပျက်ဝမ်းလျှော #ဝမ်းပျက် #ဝမ်းလျှော #ကပ်ရောဂါ

မိုးရာသီကာလတွင် ပြည်သူများအနေဖြင့် ရေဘေးနှင့်စပ်လျဉ်း၍ သတိပြုရမည့်အချက်များကို အသိပေးပန်ကြားခြင်း လိုအပ်သူများကို ပြန်လည...
08/01/2026

မိုးရာသီကာလတွင် ပြည်သူများအနေဖြင့် ရေဘေးနှင့်စပ်လျဉ်း၍ သတိပြုရမည့်အချက်များကို အသိပေးပန်ကြားခြင်း

လိုအပ်သူများကို ပြန်လည်မျှဝေခြင်းဖြင့် ကူညီနိုင်ပါသည်။

#မိုးလေဝသသတင်း
#ရေဘေး
#မုန်တိုင်းဘေး


https://www.facebook.com/share/v/19Vw29HKxH/

(၇၉) နှစ်ပြည့် အာဇာနည်နေ့ အမှတ်တရဒေသအခြေပြု CDM နိုင်ငံ့ဝန်ထမ်းများကောင်စီကွန်ရက်၏ ဂုဏ်ပြုသဝဏ်လွှာ ရက်စွဲ။ ၂၀၂၆ ခုနှစ်၊ ...
07/19/2026

(၇၉) နှစ်ပြည့် အာဇာနည်နေ့ အမှတ်တရ
ဒေသအခြေပြု CDM နိုင်ငံ့ဝန်ထမ်းများကောင်စီကွန်ရက်၏ ဂုဏ်ပြုသဝဏ်လွှာ

ရက်စွဲ။ ၂၀၂၆ ခုနှစ်၊ ဇူလိုင်လ (၁၉) ရက်

၁။ ယနေ့ ၂၀၂၆ ခုနှစ်၊ ဇူလိုင်လ (၁၉) ရက်နေ့တွင် ကျရောက်သည့် (၇၉) နှစ်ပြည့် အာဇာနည်နေ့အား မိမိတို့ဒေသအခြေပြု CDM နိုင်ငံ့ဝန်ထမ်းများကောင်စီကွန်ရက်က ဤဂုဏ်ပြုမှတ်တမ်းလွှာဖြင့် သမိုင်း မှတ်တမ်းလက်ဆင့်ကမ်းထိန်းသိမ်း၍ ကျဆုံးလေပြီးသော ဗိုလ်ချုပ်အောင်ဆန်းနှင့် အာဇာနည်ခေါင်း ဆောင်ကြီးများအား အောက်မေ့စွာ ဦးညွှတ်ဂုဏ်ပြုအပ်ပါသည်။

၂။။ ဗိုလ်ချုပ်အောင်ဆန်းနှင့်တကွ အာဇာနည်ခေါင်းဆောင်ကြီးများသည် ကိုလိုနီလက်အောက်ခံနိုင်ငံ အဖြစ်မှ လွတ်မြောက်ရန်လိုလားသည့် ပြည်သူ့ဆန္ဒကို အလေးအနက်ထား၍ လွတ်လပ်ရေးရရန် အသက်စွန့်ကြိုးပမ်းခဲ့ကြပါသည်။ အာဇာနည်ခေါင်းဆောင်ကြီးများ၏ ကြိုးပမ်းအားထုတ်မှုဖြင့် ၁၉၄၈ ခုနှစ်တွင် လွတ်လပ်ရေးရရှိခဲ့သော မြန်မာနိုင်ငံသည် ၁၉၆၂ ခုနှစ်မှစတင်၍ စစ်အာဏာရှင်လက် အောက်မှ လွတ်မြောက်ရန် ဖက်ဒရယ်ဒီမိုကရေစီတိုက်ပွဲကို ဆက်လက်ဆင်နွှဲနေရပါသည်။ ထို့ ကြောင့် ယနေ့ကျရောက်သည့် (၇၉) နှစ်ပြည့် အာဇာနည်နေ့တွင် လွတ်လပ်ရေးတိုက်ပွဲဝင်အာဇာနည် သူရဲကောင်းများနှင့်အတူ ဖက်ဒရယ်ဒီမိုကရေစီတိုက်ပွဲဝင် အာဇာနည်သူရဲကောင်းများ၊ CDM နိုင်ငံ့ဝန် ထမ်းသူရဲကောင်းများနှင့် ခေတ်ပြိုင်နွေဦးအာဇာနည်သူရဲကောင်းများအားလုံးကို အောက်မေ့စွာ ဦးညွှတ်ဂုဏ်ပြုအပ်ပါသည်။

၃။။ အာဇာနည်ခေါင်းဆောင်ကြီးများ၏ ပြည်သူ့ဆန္ဒကို အလေးထားသည့်၊ ပြည်သူအကျိုးစီးပွားအတွက် အသက်ပေးစွန့်လွှတ်ရဲသည့် အာဇာနည်စိတ်ဓာတ်ဖြင့် တည်ဆောက်ခဲ့သည့် မြန်မာနိုင်ငံအား အကြမ်း ဖက်စစ်အာဏာရှင်တို့က ၎င်းတို့အာဏာတည်မြဲရေးအတွက် အာဏာရှင်စိတ်ဓာတ်ဖြင့် ရည်ရွယ်ချက် ရှိရှိ ဖျက်ဆီးလျက်ရှိပါသည်။ ဖက်ဒရယ်ဒီမိုကရေစီကို လိုလားသည့် တိုင်းရင်းသားပြည်သူတစ်ရပ်လုံး ၏ဆန္ဒကို လစ်လျူရှု၍ ပြည်သူကိုဆင်းရဲဒုက္ဒ အကြပ်အတည်းကြားတွင် နစ်မွန်းနေစေရန် နည်းမျိုးစုံ သုံး၍ ဖိနှိပ်ရုံသာမက ပြည်သူကိုနှိပ်စက်ညှင်းပန်းသတ်ဖြတ်လျက်ရှိပါသည်။ ပြည်သူကိုအလေးမထား သည့် အာဏာရှင်စိတ်ဓာတ်ကို သတိမူ၍၊ မွန်မြတ်လှသည့် အာဇာနည်စိတ်ဓာတ်ကို ဖက်ဒရယ်ဒီမိုက ရေစီတိုက်ပွဲဝင်နေကြသူအပေါင်းက အလေးအနက်တန်ဖိုးထား၍အမွေဆက်ခံသွားရမည်ဖြစ်ပါသည်။

၄။ မိမိတို့ CDM နိုင်ငံ့ဝန်ထမ်းများအပါအဝင် ဖက်ဒရယ်ဒီမိုကရေစီတိုက်ပွဲဝင်နေကြသူအပေါင်းတို့သည် အာဇာနည်ခေါင်းဆာင်ကြီးများ တည်ဆောက်ရန်ကြိုးပမ်းခဲ့သည့် မြန်မာနိုင်ငံကို အာဇာနည်စိတ် ဓာတ်ဖြင့် ဆက်လက်တည်ဆောက်သွားကြရန်နှင့် အာဇာနည်တို့၏ စွန့်လွှတ်အနစ်နာခံမှုဖြင့် ပြည်သူ အကျိုးစီးပွားကို သယ်ပိုးထမ်းရွက်ကြရန် အားလုံးအတူတကွ ကြိုးစားသွားကြပါစို့ဟု လေးလေး နက်နက် တိုက်တွန်းအပ်ပါသည်။ မိမိတို့ဒေသအခြေပြု CDM နိုင်ငံ့ ဝန်ထမ်းများကွန်ရက်သည် ပြည်သူလူထု၊ မဟာမိတ်တော်လှန်ရေးအင်အားစုများနှင့်အတူ စစ်အာဏာရှင်စနစ်ချုပ်ငြိမ်းရေးနှင့် ဖက်ဒရယ် ဒီမိုကရေစီပြည်ထောင်စုသစ်ပေါ်ထွန်းရေးအတွက် တော်လှန်ရေးပန်းတိုင် မရောက်မချင်း တိုက်ပွဲဝင် သွားမည် ဖြစ်ကြောင်း ကတိသစ္စာပြုလျက် (၇၉) နှစ်ပြည့် အာဏာနည်နေ့အား ဤသဝဏ်လွှာဖြင့် မှတ်တမ်းတင်ဂုဏ်ပြုအပ်ပါသည်။



********************************************************

သဝဏ်လွှာပေးပို့သည့် အဖွဲ့အစည်းများ

(၁) ကချင်ပြည်နယ် CDM နိုင်ငံ့ဝန်ထမ်းများကောင်စီ (KSCCSC)
(၂) ကရင်နီပြည် နိုင်ငံ့ဝန်ထမ်း အကြမ်းမဖက်အာဏာဖီဆန်ရေးလှုပ်ရှားမှုကောင်စီ(KSCSC-CDM)
(၃) စစ်ကိုင်းဖက်ဒရယ်ယူနစ် CDM နိုင်ငံ့ဝန်ထမ်းများကောင်စီ (CCSC-SFU)
(၄) ပဲခူးဒေသ CDM နိုင်ငံ့ဝန်ထမ်းကောင်စီ (BRCC)
(၅) မန္တလေးဒေသ အကြမ်းမဖက်အာဏာဖီဆန်ရေးအဖွဲ့ (MCDMO)
(၆) မွန်ပြည်နယ် CDM နိုင်ငံ့ဝန်ထမ်းများကောင်စီ (CCSC-MON)
(၇) ရန်ကုန်ဖက်ဒရယ်ယူနစ် CDM နိုင်ငံ့ဝန်ထမ်းများအဖွဲ့အစည်း(YFCCO)
(၈) ရှမ်းပြည်နယ် CDM ကောင်စီ (ယာယီ) (SSCC)

ဖက်ဒရယ်ဒီမိုကရေစီပြည်ထောင်စုပေါ်ထွန်းရေး ဦးဆောင်ကောင်စီ (SCEF) နှင့် တွေ့ဆုံ ဆွေးနွေးပွဲတွင် ကျွန်ုပ်တို့ ဒေသဆိုင်ရာ CD...
07/13/2026

ဖက်ဒရယ်ဒီမိုကရေစီပြည်ထောင်စုပေါ်ထွန်းရေး ဦးဆောင်ကောင်စီ (SCEF) နှင့် တွေ့ဆုံ ဆွေးနွေးပွဲတွင် ကျွန်ုပ်တို့ ဒေသဆိုင်ရာ CDM အဖွဲ့အစည်း ၈ ခု ပူးပေါင်း၍ CDM ဝန်ထမ်းများ၏ ကဏ္ဍနှင့် လုံခြုံရေးဆိုင်ရာ အချက် ၉ ချက် တင်ပြဆွေးနွေးခဲ့။
၁၃ ဇူလိုင် ၂၀၂၆

ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ (SCEF) နှင့် CDM နိုင်ငံ့ဝန်ထမ်းများ တွေ့ဆုံဆွေးနွေးပွဲကို ယနေ့ ၂၀၂၆ ခုနှစ်၊ ဇူလိုင်လ (၁၂) ရက်နေ့ ညနေ (၄) နာရီတွင် အွန်လိုင်းမှတစ်ဆင့် ပြုလုပ်ခဲ့ရာ ကျွန်ုပ်တို့ ဒေသဆိုင်ရာ CDM အဖွဲ့အစည်း (၈) ခုမှ ကိုယ်စားလှယ်များ အပါအဝင် CDM နိုင်ငံ့ဝန်ထမ်းဆိုင်ရာ အဖွဲ့အစည်း အသီးသီးမှ တာဝန်ရှိသူများနှင့် CDM နိုင်ငံ့ဝန်ထမ်းများ တက်ရောက်ခဲ့ကြပါသည် တက်ရောက်ခဲ့ ကြပါသည်။

အဆိုပါ ဆွေးနွေးပွဲတွင် ကချင်ပြည်နယ် CDM နိုင်ငံ့ဝန်ထမ်းများကောင်စီ (KSCCSC)၊ ကရင်နီပြည် နိုင်ငံ့ဝန်ထမ်း အကြမ်းမဖက် အာဏာဖီဆန်ရေး လှုပ်ရှားမှုကောင်စီ (KSCSC-CDM)၊ စစ်ကိုင်းဖက်ဒရယ်ယူနစ် CDM နိုင်ငံ့ဝန်ထမ်းများကောင်စီ (CCSC-SFU)၊ ပဲခူးဒေသ စီဒီအမ် နိုင်ငံ့ဝန်ထမ်းကောင်စီ (BRCC)၊ မန္တလေးဒေသ အကြမ်းမဖက် အာဏာဖီဆန်ရေးအဖွဲ့ (MCDMO)၊ မွန်ပြည်နယ် CDM နိုင်ငံ့ဝန်ထမ်းများကောင်စီ (CCSC-MON)၊ ရန်ကုန်ဖက်ဒရယ်ယူနစ် စီဒီအမ် နိုင်ငံ့ဝန်ထမ်းများ အဖွဲ့အစည်း (YFCCO) နှင့် ရှမ်းပြည်နယ် CDM ကောင်စီ (Pre Founding) တို့ စုပေါင်းညှိနှိုင်း၍ ပြင်ဆင်ထားသော အဆိုပြုချက်များကို တင်သွင်းခဲ့ပါသည်။

တွေ့ဆုံပွဲအတွင်း ကျွန်ုပ်တို့ ဒေသကောင်စီများ၏ ကိုယ်စား YFCCO မှ ကိုယ်စားလှယ်တစ်ဦးက တော်လှန်ရေးကာလနှင့် ကြားကာလအတွင်း CDM နိုင်ငံ့ဝန်ထမ်းများ၏ အခန်းကဏ္ဍ၊ လုံခြုံရေးနှင့် ရှေ့ဆက် ပူးပေါင်းဆောင်ရွက်ရေးဆိုင်ရာ အဓိကအချက် (၉) ချက်ကို တရားဝင် အဆိုပြုတင်သွင်းခဲ့ပြီး၊ ဆွေးနွေးပွဲအပြီးတွင်လည်း SCEF ထံသို့ စာဖြင့် ထပ်မံပေးပို့ တင်ပြ ခဲ့ကြပါသည်။

ကျွန်ုပ်တို့ ဒေသဆိုင်ရာ CDM အဖွဲ့အစည်းများ ပူးပေါင်းတင်ပြခဲ့သည့် အချက် (၉) ချက်မှာ အောက်ပါအတိုင်း ဖြစ်ပါသည် -

➡️ (၁) သက်ဆိုင်ရာ ပြည်နယ်နှင့် ဖက်ဒရယ်ယူနစ် အစိုးရများ၊ တိုင်းရင်းသားအဖွဲ့အစည်းများက ဒေသဆိုင်ရာ CDM အဖွဲ့အစည်းများကို တရားဝင်အသိအမှတ်ပြုရန်။

➡️ (၂)နိုင်ငံ့ဝန်ထမ်းဆိုင်ရာ လူ့စွမ်းအားအရင်းအမြစ် ဖွံ့ဖြိုးတိုးတက်ရေးသင်တန်းများနှင့် ဆွေးနွေးပွဲများကို SCEF နှင့်အတူ ပူးပေါင်းကြိုးပမ်းဆောင်ရွက်ရန်။

➡️ (၃) CDM နိုင်ငံ့ဝန်ထမ်းများ၏ တာဝန်ထမ်းဆောင်နိုင်ရေးနှင့် လုံခြုံရေးအတွက် ခိုင်မာသော အာမခံချက်များ ရှိစေရန်။

➡️ (၄) ပြည်ထောင်စုနှင့် ပြည်နယ်/ယူနစ်များ၏ ဝန်ထမ်းယန္တရားတွင် ဝန်ထမ်းရေးရာနှင့် နည်းပညာပိုင်းဆိုင်ရာ ကျွမ်းကျင်သူ CDM ဝန်ထမ်းများက ဦးစီးဦးဆောင် ပြုနိုင်ရေး ဆောင်ရွက်ရန်။

➡️ (၅)CDM ဝန်ထမ်းများ၏ မရှိမဖြစ် လိုအပ်နေသော လူမှုအခက်အခဲများကို အထိုက်အလျောက် ဖြေရှင်းပေးနိုင်ရေး စီမံဆောင်ရွက်ရန်။

➡️ (၆) အကြမ်းမဖက် အာဏာဖီဆန်ရေး လှုပ်ရှားမှုဆိုင်ရာ နိုင်ငံ့ဝန်ထမ်းဥပဒေနှင့် သက်ဆိုင်ရာ ပြည်နယ်/ယူနစ်များ၏ ပြဋ္ဌာန်းချက်များကို အာဏာသက်ရောက်စေရေး SCEF နှင့်အတူ ကြိုးပမ်းရန်။

➡️ (၇) SCEF တွင် CDM နိုင်ငံ့ဝန်ထမ်းရေးရာနှင့် စပ်လျဉ်း၍ သီးသန့်ကဏ္ဍရပ်တစ်ရပ် ထည့်သွင်းပေးရန်နှင့်

➡️(၈) CDM ဝန်ထမ်းများနှင့် ပုံမှန်တွေ့ဆုံဆွေးနွေးနိုင်ရေး (Regular Meetings) စီမံပေးရန်။

➡️ (၉) NUCC ၏ အခန်းကဏ္ဍ၊ ဖက်ဒရယ်ဒီမိုကရေစီစနစ် ဖွဲ့စည်းပုံအခြေခံဥပဒေသစ် ရေးဆွဲခြင်းတို့နှင့် စပ်လျဉ်း၍ SCEF နှင့် NUCC တို့၏ လုပ်ငန်းများအပေါ် ကျွန်ုပ်တို့၏ သိရှိနားလည်မှုများ မရောထွေးစေရေး ရှင်းလင်းစွာ သိရှိလိုကြောင်း အစရှိသည်တို့ ဖြစ်ပါသည်။

ယနေ့ပြုလုပ်သည့် ဆွေးနွေးပွဲသို့ SCEF မဟာဗျူဟာနှင့် မူဝါဒရေးရာဦးဆောင်အဖွဲ့ဝင် ပဒိုစောကွယ်ထူးဝင်း၊ အတွင်းရေးမှူးအဖွဲ့ ညှိနှိုင်းရေးမှူး ဒေါက်တာဇော်ဝေစိုးနှင့် တွဲဘက် ညှိနှိုင်းရေးမှူး Salai Ram Kulh Cung တို့ တက်ရောက်ရှင်းလင်းခဲ့ကြပြီး၊ အမျိုးသားညီညွတ်ရေးအစိုးရ၊ ပြည်ထောင်စုဝန်ကြီးချုပ် မန်းဝင်းခိုင်သန်းက နိဂုံးချုပ်အမှာစကား ပြောကြားခဲ့သည်။

ကျွန်ုပ်တို့ ဒေသဆိုင်ရာ CDM ကောင်စီများ အနေဖြင့် ဖက်ဒရယ်ဒီမိုကရေစီ ပြည်ထောင်စုပေါ်ထွန်းရေး လုပ်ငန်းစဉ်များနှင့် ကြားကာလ ပြည်သူ့ဝန်ဆောင်မှု ကဏ္ဍများတွင် မိမိတို့၏ နည်းပညာ၊ အတွေ့အကြုံများဖြင့် အပြုသဘောဆောင် ကူညီပံ့ပိုးပေးရန် အဆင်သင့်ရှိနေပြီး၊ ယနေ့ဆွေးနွေးချက်များအပေါ် အခြေခံကာ SCEF နှင့်အတူ ရေရှည်လက်တွဲ ညှိနှိုင်းဆောင်ရွက်သွားမည်ဖြစ်ကြောင်း ကောင်စီဝင်များနှင့် ပြည်သူလူထုထံ သတင်းပါး အပ်ပါသည်။

#ပဲခူးဒေသစီဒီအမ်နိုင်ငံ့ဝန်ထမ်းကောင်စီBRCC

နိုင်ငံတော်၏ အတိုင်ပင်ခံပုဂ္ဂိုလ် လူထုခေါင်းဆောင်ဒေါ်အောင်ဆန်းစုကြည်၏ အသက်(၈၁)နှစ်ပြည့် မွေးနေ့ ဂုဏ်ပြု အခမ်းအနားကျင်းပခ...
06/19/2026

နိုင်ငံတော်၏ အတိုင်ပင်ခံပုဂ္ဂိုလ် လူထုခေါင်းဆောင်ဒေါ်အောင်ဆန်းစုကြည်၏ အသက်(၈၁)နှစ်ပြည့် မွေးနေ့ ဂုဏ်ပြု အခမ်းအနားကျင်းပခြင်း

ဒေသအဆင့် CDM အဖွဲ့အစည်းများက ဦးဆောင်၍ ဒေါ်အောင်ဆန်းစုကြည်၏ အသက်(၈၁)နှစ်ပြည့် မွေးနေ့ဂုဏ်ပြုအခမ်းအနားကို ၂၀၂၆ ခုနှစ် ဇွန်လ (၁၉) ရက်နေ့တွင် Zoom platform တွင် ကျင်းပခဲ့ပါသည်။

အခမ်းအနားသို့ အမျိုးသားညီညွတ်ရေးအစိုးရ၊ ပြည်ထောင်စု ဝန်ကြီးချုပ်ရုံး ၊ ဝန်ကြီး ဒေါက်တာဇော်ဝေစိုး၊ အမျိုးသားညီညွတ်ရေးအစိုးရ၊ ကျန်းမာရေးဝန်ကြီးဌာန၊ ဒုတိယဝန်ကြီး ဒေါက်တာခင်မောင်လွင်၊ ဒေသအဆင့် နှင့် အဖွဲ့အစည်းအသီးသီးမှ CDM အဖွဲ့ဝင်များ၊ ဖိတ်ကြားထားသူများ တက်ရောက်ကြပါသည်။

အခမ်းအနားအား အစီအစဉ်(၉) ရပ်ဖြင့်ကျင်းပပြီး ညနေ(၅) နာရီတွင်စတင်ပါသည်။
🔰အခမ်းအနားတွင် ဆရာကြီးဒေါက်တာဇော်ဝေစိုးက နှုတ်ခွန်းဆက်စကားပြောကြားခြင်း
🔰လူထုခေါင်းဆောင်ဒေါ်အောင်ဆန်းစုကြည်အတွက် (၈၁) စက္ကန့်ငြိမ်သက်၍ မွေးနေ့ဆုတောင်းခြင်း
🔰လူထုခေါင်းဆောင်ဒေါ်အောင်ဆန်းစုကြည်၏ အတ္ထုပ္ပတ္တိအား တင်ပြခြင်း
🔰 ဒေသCDM အဖွဲ့အစည်း(၈) ခု ၏ မွေးနေ့ ဂုဏ်ပြု သဝဏ်လွှာဖတ်ကြားခြင်း
🔰ဆရာမမသီတာ(စမ်းချောင်း)နှင့် CDM များက ဂုဏ်ပြုအမှတ်တရစကားပြောကြားခြင်း၊ ဂုဏ်ပြုကဗျာများရွတ်ဖတ်ခြင်း၊ မွေးနေ့အမှတ်တရ နှင်းဆီကမ့်ပိန်းများ တင်ပြခြင်း
🔰 ခွန်အားဖြည့်မိငယ် သီချင်းအား စုပေါင်းသီဆိုခြင်း
🔰တူညီ Zoom Profile ကမ့်ပိန်းဆောင်ရွက်ခြင်းများ ဖြင့် ကျင်းပပါသည်။

အခမ်းအနားကို မြန်မာစံတော်ချိန် ည (၇း၃၀)နာရီတွင် အောင်မြင်စွာ ရုပ်သိမ်းခဲ့ပါသည်။

ပဲခူးဒေသစီဒီအမ်နိုင်ငံ့ဝန်ထမ်းကောင်စီ (BRCC)

နိုင်ငံတော်အတိုင်ပင်ခံပုဂ္ဂိုလ် လူထုခေါင်းဆောင်ဒေါ်အောင်ဆန်းစုကြည်၏ အသက် (၈၁) ပြည့်မွေးနေ့အထိမ်းအမှတ်အတွက် BRCC သို့ ပေး...
06/19/2026

နိုင်ငံတော်အတိုင်ပင်ခံပုဂ္ဂိုလ် လူထုခေါင်းဆောင်ဒေါ်အောင်ဆန်းစုကြည်၏ အသက် (၈၁) ပြည့်မွေးနေ့အထိမ်းအမှတ်အတွက် BRCC သို့ ပေးပို့လာသော မွေးနေ့ဆုတောင်းနှင့် ပန်းသပိတ်ပုံရိပ်များပဲ ဖြစ်ပါတယ်...

ပြည်သူချစ်တဲ့ ခေါင်းဆောင် အမေစု
ယနေ့မှစပြီး ကျန်းမာပြီး မတရားဖမ်းဆီးချုပ်နှောင်ထားခြင်းမှ အမြန်ဆုံးလွတ်မြောက်ပါစေကြောင်း BRCC အလုပ်အမှုဆောင်အဖွဲ့မှ လေးလေးနက်နက် ဆုတောင်းမေတ္တာပို့သအပ်ပါသည်။




အမျိုးသားညီညွတ်ရေးအစိုးရ၊ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ (၈၁) နှစ်ပြည့် မွေးနေ့သို့ ဒေသအခြေပြု C...
06/19/2026

အမျိုးသားညီညွတ်ရေးအစိုးရ၊ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ (၈၁) နှစ်ပြည့် မွေးနေ့သို့ ဒေသအခြေပြု CDM နိုင်ငံ့ဝန်ထမ်း အဖွဲ့အစည်းများမှ ပေးပို့သည့် သဝဏ်လွှာ
၂၀၂၆ ခုနှစ်၊ ဇွန်လ ၁၉ ရက်
၁။ ယနေ့ ၂၀၂၆ ခုနှစ်၊ ဇွန်လ ၁၉ ရက်နေ့၌ ကျရောက်သော အမျိုးသားညီညွတ်ရေးအစိုးရ၊ နိုင်ငံတော်၏ အတိုင်ပင်ခံပုဂ္ဂိုလ် လူထုခေါင်းဆောင်၊ ဒေါ်အောင်ဆန်းစုကြည်၏ (၈၁) နှစ်ပြည့် မွေးနေ့တွင် တိုင်းရင်းသားမိဘပြည်သူများ အားလုံး မင်္ဂလာအပေါင်းနှင့် ပြည့်စုံပါစေကြောင်း ဆုတောင်းမေတ္တာ ပို့သအပ်ပါသည်။
၂။ လူထုခေါင်းဆောင် ဒေါ်အောင်ဆန်းစုကြည်သည် ၁၉၈၉ ခုနှစ်၊ စတင်ဖမ်းဆီးထိန်းသိမ်း ခံရချိန်မှစ၍ ယခုအချိန်အထိ (၁၈) နှစ်ကျော်ကာလလုံး အကြိမ်ကြိမ် အကျဉ်းချခံခဲ့ရပြီး ဒီမိုကရေစီအရေး၊ လူ့အခွင့်အရေး၊ ငြိမ်းချမ်းရေး၊ တိုင်းရင်းသား စည်းလုံးညီညွတ်ရေးတို့အတွက် စွန့်လွှတ်အနစ်နာခံခဲ့သည့် လူထုတစ်ရပ်လုံး၏ တုနှိုင်းမရသော ခေါင်းဆောင် ဖြစ်ပါသည်။ ၂၀၂၁ ခုနှစ် ဖေဖော်ဝါရီလ (၁) ရက်နေ့ စစ်အာဏာသိမ်းချိန်မှ ယနေ့အထိလည်း ၅ နှစ်ကျော် မတရား ဖမ်းဆီး အကျဉ်းချခံရပြီး လွတ်မြောက်မှု မရှိသေးပါ။ နိုင်ငံတကာ၏ လေးစားမှုခံရသည့် လူထုခေါင်းဆောင်၏ အလျှော့မပေးစတမ်း စွန့်လွှတ်အနစ်နာခံ ကြိုးစားအားထုတ်မှုများက CDM နိုင်ငံ့ဝန်ထမ်းများကိုသာမက ကမ္ဘာတစ်ဝန်းလုံးရှိ ဒီမိုကရေစီနှင့် လူ့အခွင့်အရေး လှုပ်ရှားသူများ အားလုံး အတွက် စံနမူနာကောင်း ဖြစ်ခဲ့ပါသည်။
၃။ ဒေသအခြေပြု CDM နိုင်ငံ့ဝန်ထမ်း အဖွဲ့အစည်းများအနေဖြင့် အမှန်တရားကို ယုံကြည် မြတ်နိုးပြီး ဉာဏ်အမြော်အမြင် ကြီးမားစွာဖြင့် လူထုအပေါ် မီးရှူးတန်ဆောင်သဖွယ် ဦးဆောင် လမ်းပြနေသော လူထုခေါင်းဆောင် ဒေါ်အောင်ဆန်းစုကြည်၏ လမ်းညွှန်မှုများကို လိုက်နာပြီး စစ်အာဏာရှင်စနစ်ချုပ်ငြိမ်းရေး၊ မည်သည့်အာဏာရှင်မျှ ထပ်မံ မပေါ်ပေါက်ရေး၊ စွမ်းဆောင်ရည် ပြည့်ဝသော ဖက်ဒရယ် ဒီမိုကရေစီ နိုင်ငံ့ဝန်ထမ်း ယန္တရား ပေါ်ထွန်းလာရေး၊ နိုင်ငံရေး အခင်းအကျင်းများတွင် CDM နိုင်ငံ့ဝန်ထမ်းများ၏ ပါဝင်ဆောင်ရွက်ခွင့်ရှိရေးနှင့် CDM နိုင်ငံ့ဝန်ထမ်းများအတွက် အစိုးရ၏ ကတိကဝတ် အာမခံချက်များ လက်တွေ့ အကောင်အထည် ဖော်ဆောင်ရွက်နိုင်ရေးတို့အတွက် ဆက်လက် ကြိုးပမ်းဆောင်ရွက်သွားမည် ဖြစ်ကြောင်း ကတိသစ္စာ ပြုအပ်ပါသည်။
၄။ “ဒီမိုကရေစီပန်းတိုင်ကို ရောက်ဖို့ရာ လူထုအားလုံးက စည်းစည်းလုံးလုံး ညီညီညွတ်ညွတ် စည်းကမ်းရှိရှိနဲ့ ချီတက်မှသာ ရောက်နိုင်မှာပါ” ဟူသည့် ၁၉၈၈ ခုနှစ်၊ ရွှေတိဂုံရင်ပြင် လူထု အစည်းအဝေးပွဲကြီး၌ လူထုခေါင်းဆောင် ပြောကြားခဲ့သည့် မိန့်ခွန်းကို အစဉ်အမြဲ အမှတ်ရပြီး ဒေသအခြေပြု CDM နိုင်ငံ့ဝန်ထမ်း အဖွဲ့အစည်းများအနေဖြင့် အမျိုးသားညီညွတ်ရေးအစိုးရ အပါအဝင် တော်လှန်ရေး အင်အားစုများ အားလုံးနှင့်အတူ တိုင်းရင်းသား အားလုံး၏ အခြေခံ လူ့အခွင့်အရေး၊ တန်းတူရေး၊ ကိုယ်ပိုင်ပြဋ္ဌာန်းခွင့်တို့နှင့်ပြည့်စုံပြီး ခွဲခြားဆက်ဆံမှုကင်းသည့် ဒီမိုကရေစီ နိုင်ငံတော်သစ်ကြီးကို ရရှိသည်အထိ စည်းလုံးညီညွတ်စွာ အတူတကွ လက်တွဲ တိုက်ပွဲဝင်သွားမည်ဖြစ်ကြောင်း ဤသဝဏ်လွှာဖြင့် ထပ်လောင်း ကတိသစ္စာပြုအပ်ပါသည်။
၅။ သူရဲကောင်းများ‌ မွေးထုတ်ပေးခဲ့သည့် လူထုခေါင်းဆောင်၊ ဒေါ်အောင်ဆန်းစုကြည်၏ (၈၁) နှစ်ပြည့် မွေးနေ့ အခါသမယ ရက်မြတ်မှသည် နောင်နှစ်ပေါင်းများစွာတိုင်အောင် စိတ်၏ ချမ်းသာခြင်း၊ ကိုယ်၏ ကျန်းမာခြင်းများနှင့် ပြည့်စုံပြီး တိုင်းရင်းသား လူထုနှင့်အတူ နိုင်ငံတော် အကျိုး ဆက်လက် သယ်ပိုးနိုင်ပါစေကြောင်း ဒေသအခြေပြု CDM နိုင်ငံ့ဝန်ထမ်း အဖွဲ့အစည်းများ မှ ဆုတောင်းမေတ္တာ ပို့သအပ်ပါသည်။
လူထုခေါင်းဆောင်
အသက်ရာကျော် ရှည်ပါစေ၊
ကျန်းမာပါစေ၊
မတရားဖမ်းဆီးချုပ်နှောင်မှုမှ အမြန်ဆုံး လွတ်မြောက်ပါစေ။

သဝဏ်လွှာ ပူးတွဲပေးပို့ကြသည့် အဖွဲ့အစည်းများ
(၁) ကချင်ပြည်နယ် CDM နိုင်ငံ့ဝန်ထမ်းများကောင်စီ (KSCCSC)
(၂) ကရင်နီပြည် နိုင်ငံ့ဝန်ထမ်း အကြမ်းမဖက်အာဏာဖီဆန်ရေးလှုပ်ရှားမှုကောင်စီ(KSCSC-CDM)
(၃) စစ်ကိုင်းဖက်ဒရယ်ယူနစ် CDM နိုင်ငံ့ဝန်ထမ်းများကောင်စီ (CCSC-SFU)
(၄) ပဲခူးဒေသ CDM နိုင်ငံ့ဝန်ထမ်းကောင်စီ (BRCC)
(၅) မန္တလေးဒေသ အကြမ်းမဖက် အာဏာဖီဆန်ရေးအဖွဲ့ (MCDMO)
(၆) မွန်ပြည်နယ် CDM နိုင်ငံ့ဝန်ထမ်းများကောင်စီ (CCSC-MON)
(၇) ရန်ကုန်ဖက်ဒရယ်ယူနစ် CDM နိုင်ငံ့ဝန်ထမ်းများအဖွဲ့အစည်း(YFCCO)
(၈) ရှမ်းပြည်နယ် CDM ကောင်စီ (ယာယီ)

Address

New York, NY

Website

Alerts

Be the first to know and let us send you an email when Bago Region CDM Civil Servants Council posts news and promotions. Your email address will not be used for any other purpose, and you can unsubscribe at any time.

Shortcuts

Share

Category