Komuna e Ferizajt

24/10/2026

“DIALOG ME KRIJUES” – MBRËMJE BASHKËBISEDIMI DHE POEZIE NË KUADËR TË “MUZAVE TË JEZERCIT”

Në kuadër të edicionit të tetë të Kolonisë Letrare “Muzat e Jezercit”, u mbajt mbrëmja letrare “Dialog me krijues”, e cila bashkoi shkrimtarë e poetë nga hapësira të ndryshme shqiptare, në një atmosferë të ngrohtë bashkëbisedimi dhe krijimtarie.
Mbrëmja u zhvillua në dy pjesë, duke ndërthurur bisedën me autorët dhe leximin e poezisë.
Në pjesën e parë, Xheladin Rexhepi, Lulzim Tafa, Klejda Plangarica dhe Aziz Mustafa ndanë me të pranishmit përvoja nga rrugëtimi i tyre krijues, folën për veprat e botuara, procesin e shkrimit dhe raportin e tyre me letërsinë.
Ndërsa pjesa e dytë iu kushtua vetëm poezisë, ku me krijimet e tyre u paraqitën Naime Beqiraj, Shkëndije Qeriqi, Nafije Zogaj, Tahire Berisha-Abazi dhe Bulëza Hysenaj-Ademi, duke i dhënë mbrëmjes një dimension të veçantë artistik.
Në përmbyllje të takimit, kryetari i Klubit Letrar “De Rada” iu drejtua të pranishmëve me një fjalë rasti, duke falënderuar krijuesit dhe mysafirët për pjesëmarrjen dhe kontributin e tyre në këtë aktivitet.
Mbrëmjen e udhëhoqi Zyrafete Shala, fotografitë i realizoi Fatmir Vata, ndërsa për zërimin u kujdes Kujtim Shabani.
Ky takim dëshmoi edhe një herë rëndësinë e krijimit të hapësirave ku autorët dhe lexuesit mund të bashkëbisedojnë, të shkëmbejnë përvoja dhe të ndërtojnë miqësi përmes letërsisë.

22/10/2026

22/10/2026

Komuna e Ferizajt dhe Rrjeti i Grave të Kosovës hartojnë Planin e Veprimit për Mbrojtje nga Dhuna në Familje dhe Dhuna me Bazë Gjinore

Komuna e Ferizajt, në bashkëpunim me Rrjetin e Grave të Kosovës, më 21 dhe 22 tetor po zhvillon një punëtori dyditore për hartimin e Planit të Veprimit të Mekanizmit Koordinues Komunal për Mbrojtje nga Dhuna në Familje, Dhuna ndaj Grave dhe Dhuna me Bazë Gjinore.

Në këtë punëtori po marrin pjesë shefi i kabinetit të Kryetarit të Komunës së Ferizajt, Albion Sherifi, zyrtarë komunalë, si dhe përfaqësues të institucioneve dhe organizatave anëtare të Mekanizmit Koordinues Komunal.

Duke u mbështetur në gjetjet e vlerësimit të nevojave dhe në përvojën e deritanishme të institucioneve dhe organizatave pjesëmarrëse, të pranishmit po punojnë së bashku për përcaktimin e prioriteteve, objektivave dhe veprimeve konkrete që synojnë forcimin e parandalimit, përmirësimin e mekanizmave të mbrojtjes dhe ofrimin e mbështetjes sa më efektive për viktimat e dhunës.

Plani i Veprimit do të përcaktojë përgjegjësitë institucionale, afatet kohore, burimet financiare dhe mekanizmat e monitorimit të zbatimit, duke shërbyer si udhërrëfyes për një bashkëpunim më të koordinuar ndërinstitucional dhe për një reagim të përqendruar në nevojat dhe të drejtat e viktimave.

Komuna e Ferizajt mbetet e përkushtuar në forcimin e bashkëpunimit ndërinstitucional dhe në avancimin e mekanizmave lokalë për parandalimin dhe adresimin e dhunës në familje, dhunës ndaj grave dhe dhunës me bazë gjinore.

Ky aktivitet mbështetet nga East-West Management Institute (EWMI), në kuadër të përpjekjeve për forcimin e kapaciteteve institucionale dhe avancimin e mekanizmave lokalë për adresimin e dhunës me bazë gjinore.

21/10/2026

Ftesë për mbledhjen e KK-së me datë 30.10.2026

21/10/2026

Ftesë për mbledhjen e KPF-së me datë 28.10.2026

20/10/2026

Ferizaj, mbështetje për bizneset dhe zhvillimin ekonomik lokal

Nën organizimin e Drejtorisë së Zhvillimit Ekonomik dhe Turizmit të Komunës së Ferizajt, u mbajt takimi informues me bizneset e Ferizajt për prezantimin e programeve “SME Go Green” dhe “Go Digital in the Western Balkans”.

Në këtë takim morën pjesë Drejtori i Zhvillimit Ekonomik dhe Turizmit, Balton Derguti, së bashku me stafin e Drejtorisë dhe Nënkryetarin e Komunës për Komunitete, Jeton Emini.

Në bashkëpunim me Bankën Evropiane për Rindërtim dhe Zhvillim (BERZH) dhe Bashkimin Evropian, këto programe synojnë të mbështesin ndërmarrjet e vogla dhe të mesme përmes mundësive të financimit, granteve dhe asistencës teknike, me fokus në investimet e gjelbra, rritjen e efikasitetit dhe digjitalizimin e bizneseve.

Gjatë takimit, bizneset patën mundësinë të informohen më nga afër për mundësitë që ofrojnë këto programe në rritjen e konkurrueshmërisë, modernizimin dhe zhvillimin e qëndrueshëm të ndërmarrjeve të tyre.

Komuna e Ferizajt mbetet e përkushtuar në mbështetjen e sektorit privat, krijimin e mundësive të reja për bizneset lokale dhe avancimin e zhvillimit ekonomik.

20/10/2026

TELEGRAM NGUSHËLLIMI

Me dhembje e pikëllim të thellë mora lajmin për ndarjen nga jeta infermieres së mirënjohur ferizajase, veprimtares e bashkëqytetares sonë të dalluar, znj. Halime Zymberi.

Me këtë rast, Kryetari i Komunës së Ferizajt, Agim Aliu përmes telegramit i shpreh ngushëllime të sinqerta familjes Zymberi, kolegëve, miqve dhe të njohurve të të ndjeres.

"Me dhembje e pikëllim mora lajmin për ndarjen nga jeta infermieres së mirënjohur ferizajase, veprimtares e bashkëqytetares sonë të dalluar, znj. Halime Zymberi. Vepra e kontributi i saj, mbeten të pashlyeshme në kujtesën tonë kolektive e trashëgimi e pasur ndër breza. Ngushëllime të sinqerta familjes Zymberi, kolegëve, miqve dhe të njohurve të të ndjeres" mbyllet telegrami i ngushëllimit.

16/10/2026

Ftesë për bizneset e Ferizajt - Prezantimi i programeve “SME Go Green” dhe “Go Digital in the Western Balkans”

15/10/2026