28/10/2026
ÇEZMJA E FURRIT
Në Ballagat ka vende që nuk janë thjesht pjesë e fshatit, por pjesë e kujtesës së njerëzve që kanë jetuar dhe janë rritur aty. Një prej tyre është “Çezmja e Furrit”, një çezmë e vjetër që vazhdon të rrjedhë edhe sot, ndryshe nga shumë çezma të tjera të fshatit që nuk janë më funksionale. Gjatë periudhës së komunizmit, zona përreth saj ishte një nga qendrat e jetës së përditshme në Ballagat. Aty ndodheshin zyrat e asaj kohe, menca, shkolla, qendra shëndetësore dhe institucione të tjera ku zhvillohej një pjesë e rëndësishme e jetës së banorëve. Për shumë ish-nxënës të shkollës së Ballagatit, kjo çezmë ruan kujtime të veçanta. Gjatë pushimit të gjatë, ata shkonin aty për të pirë ujë e për t'u freskuar, përpara se të ktheheshin sërish në klasë. Por çezma nuk ishte vetëm një vend për të shuar etjen. Aty mblidheshin edhe banorë të zonës për të mbushur ujë, për të shkëmbyer lajmet e ditës, për të bërë ndonjë bisedë e, pse jo, për të marrë vesh edhe ndonjë “thashethem” nga zona. Sepse, siç ndodh në çdo fshat, bashkë me ujin aty qarkullonin edhe fjalët, historitë dhe të rejat e ditës! Vitet kaluan, shumë gjëra ndryshuan, por “Çezmja e Furrit” mbeti. Edhe sot, disa banorë vazhdojnë të mbushin ujë aty, ndërsa për shumë të tjerë ajo mbetet një kujtim i gjallë i Ballagatit të dikurshëm. Përmes këtyre fotografive, sjellim në vëmendje një vend të njohur për shumë banorë, që ka qenë pjesë e jetës së përditshme të fshatit dhe që vazhdon të na kujtojë njerëzit, kohën dhe ngjarjet e dikurshme.
Po ju, çfarë kujtimesh ruani për “Çezmjen e Furrit” dhe çezmat e tjera të Ballagatit? Cilat prej tyre mbani mend? Ndoshta dikush kujton një ngjarje të veçantë, një bisedë apo ndonjë histori që ia vlen të tregohet përsëri. Ndajini me ne në komente!
Kujtojmë si ishte dikur jeta në fshatin tonë.
