الجبهة القومية المصرية - Egyptian Nationalist Front

تعالى أقولك ببساطة ووضوح، أفكار المصريين اللي بيدافعوا عن الهوية المصرية، وفي مقدمتهم “تيار كِمت”. علشان تعرف تشغّل عقلك وتقيّم وجهة نظرهم، بدل ما تمشي ورا كلام أي حد.

**************************

1️⃣ مش بيقولوا: إن المصريين ليهم عرق نقي، أو بيأسسوا لحركة عنصرية فاشية زي النازية، كما شبههم البعض.

بيقولوا: إن المصريين القدماء كان ليهم تركيبة جينية مميزة ومستقرة، والأهم مستمرّة حتى اليوم في أغلب المصريين الحاليين، وفقا لكل الدراسات الجينية اللي أتعملت على أصول المصريين.

( وده دفاعًا أمام اللي بيقولوا إن أصل المصريين القدماء “زنوج أفارقة” أو “يهود” أو “عرب” أو حتى ملهمش أصل ومخلّطين من طوب الأرض، أو أن المصريين الحاليين ملهمش علاقة بأجدادهم القدماء).

**************************

2️⃣ مش بينكروا الدراسات العلمية اللي بتقول إن أصل البشر من قارة أفريقيا.

بيقولوا: أن ده “أصل جيني” مرتبط بمكان جغرافي، مش “أصل حضاري”.

(مفيش أي علاقة ثقافية أو حضارية بين بشر عاشوا قبل 300 ألف سنة أو حتى 20 ألف سنة، وكانت حياتهم معتمدة على الصيد والترحال وجمع الثمار، وبين بشر استقروا مع بداية الزراعة وبدأوا يبنوا القرى والمدن ويؤسسوا الدولة والحضارة المصرية القديمة في الألفية الخامسة قبل الميلاد).

**************************

3️⃣ مش بيقولوا: نرجع لماضي الحضارة المصرية القديمة ونعيش فيه ونمحي كل اللي بعده، زي ما اتقال عليهم إنهم حركة رجعية.

بيقولوا: نحترم الماضي ونعتز بيه، ونستلهم منه القيم والعِبر والأخلاق والتراث والثقافة وكل ما هو إنساني جميل، مع الأخذ بأسباب التقدم في الحاضر والمستقبل.

(نفسهم بقية المصريين يعرفوا إن حضارتنا القديمة اللي كل العالم بيحسدنا عليها، مش شوية “تماثيل وصخور” زي ما بيصوّرها بعض المتطرفين ضيّقي الأفق، بل كانت حضارة عظيمة إنسانيًا وأخلاقيًا، عرّفت العالم يعني إيه دولة، وقدّمت للتراث البشري نصيبها من الأدب، الفنون، الموسيقى، العمارة… إلخ).

**************************

4️⃣ مش بيمجّدوا أصنام أو يقدسوا أحجار.

بيقولوا: نعلّم الناس إن الآثار دي مش مجرد تماثيل وخلاص، ده فن… فن بيعكس دقة ومهارة وعظمة حضارة… فن بيحكي تاريخ وقيم ومعاني… فن بيحرك مشاعر نبيلة… فن بيوريك من نظرة واحدة: احترام المرأة، ترابط الأسرة، حب العمل… وغيرها من القيم النبيلة.

**************************

5️⃣ مش بيقولوا: نرجع لعبادة الأصنام ونركع لآمون.

بيقولوا: الدين والمعتقد حرية شخصية، حقك تعتقد ما تشاء، لكن مصر دولة مدنية، مش دولة دينية، مصر ملهاش دين، مصر لكل المصريين، يعيشوا فيها سواسية بغض النظر عن جنس او عرق او دين.

**************************

6️⃣ مش بيقولوا: نرجع نتكلم هيروغليفي ونلغي لغتنا الحالية.

بيقولوا: لغتنا الحالية جزء من مصريّتنا، لكن من حق أي حد يتعلم لغتنا القديمة في معاهد توفرها الدولة، زي كل الأمم اللي بتحترم لغتها التاريخية.

**************************

7️⃣ مش بيقولوا: نرجع نلبس فرعوني في الشارع.

بيقولوا: نبرز جمال وأناقة الأزياء المصرية القديمة في المحافل الدولية والمناسبات الثقافية وحتى الخاصة، زي ما كل الشعوب بتعمل مع تراثها.

**************************

8️⃣ مش بيقولوا: ننفصل عن محيطنا الجغرافي وننعزل.

بيقولوا: نبني علاقات قائمة على المصالح المشتركة والاحترام، مش على التبعية.

**************************

9️⃣ مش بيقولوا: المصري هو اللي جيناته بس مصرية.

بيقولوا: المصري هو اللي عايش على أرض مصر بغض النظر عن أصوله، ومعتز بحضارتها وثقافتها وتراثها كله.

**************************

🔟 مش بيقولوا: نحصر الهوية المصرية في حقبة مصر القديمة ونلغي اللي بعدها.

بيقولوا: هوية مصر هوية موحدة، هوية بتجمّع مش بتفرّق، هوية مش مرتبطة بدين ولا عرق ولا لغة. مصر هي مصر وبس، زي ما سنغافورة سنغافورية… وزي ما اليابان يابانية… وزي أي دولة على الكوكب، مش بيطلبوا حاجة جديدة ولا غريبة، بيطلبوا الطبيعي، بيطلبوا هويتهم الممتدة من أول فجر حضارتهم لحد النهاردة…

هوية لسه قادرة تنهض بينا لو احترمناها ودافعنا عنها ضد أي حد يحاول يشوّهها أو يقلل منها أو حتى يلغيها.

#مصر 🇪🇬❤️
Abdelkader Elturkey

يعني ايه "الكمايتة" أو " أولاد كيمت" اللي بيتهاجموا من الأسلاميين واليساريين مؤخراً؟

الكلمة جاية من أسم مصر القديم قبل ما يتغير لمصر واللي كان "كيمت (𓆎𓅓𓏏𓊖)" يعني الأرض الخصبة السوداء بلغة الأجداد

يعني الكملة معناها "المصريين" او "أولاد مصر"

طيب ليه الناس زعلانيين منهم؟

"المصريين" أو "أولاد مصر" عايزين يربطوا هويتهم وثقافتهم المعاصرة بمصر القديمة، وبيشوفوا إن المصريين الحاليين امتداد حضاري مباشر للمصريين القدماء

وإن المصريين المعاصرين لازم يرجعوا لهوية مصر القديمة (Kemet) والاعتزاز بحضارتهم باعتبارها الهوية الأصلية

وشايفين ان المصريين الحاليين مش “عرب” وبيشوفوا الفتح العربي احتلال سياسي وثقافي وسبب في انقطاع اللغة المصرية القديمة

وإيه كمان؟

بيردوا على السرديات اليهودية اللي بتربط مصر بأحداث توراتية وشايفين الأساس هو الاعتماد على علم المصريات كمصدر أساسي لفهم الذات المصرية كدليل مادي موجود معانا النهاردة مش قصة وصلت عن قالت عن فلان عن فلان

وعايزين الناس تقرأ تاريخ بلدهم من المصادر الأكاديمية بدل الوعظ الديني لإن القصص الدينية مش مصدر تاريخي

طيب هل حد فيهم تتكلم عن نقاء عرقي؟

والنعمة أبداً

هما شايفين إن أي حد عاش على أرض مصر، وانتماؤه الأول والأخير ليها، فهو مصري خالص… بغضّ النظر لونه إيه

ومعترفين إن المصريين زمان زي دلوقتي ،ألوان، واشكال مختلفة… لكن هوية واحدة

هوية اتجمعت من آلاف السنين… ومش محتاجة “نقاء دم” ولا خرافات عرقية علشان تثبت نفسها لأنك بتشوفها في ملامح المصريين النهاردة

طيب الكلام عن لون البشرة ظهر أصلاً ليه؟

محدش كان بيحاول أصلا يثبت “إننا فاتحين ولا غامقين”، الكلام ده كله طلع كردّ فعل على السرقة اللي بيعملها الافتروسنترك لهوية مصر

لما الافتروسنترك بدأوا يقولوا ان المصريين القدماء سود بالكامل وأنهم هما اصحاب الحضارة ديه و المصريين الحاليين جايين من أوروبا وجزيرة العرب ومالهمش علاقة بالمصريين القدماء

فالناس بدأت تطلع صور ونقوش على جدران المعابد موثق فيها شكل أعداء أجدادنا من سكان الشرق والجنوب كدليل ان كلام الناس ده غلط

مش بهدف احتقار حد، ولا بهدف نقاء عرقي، ده ردّ على تزوير تاريخي بيحاول يختطف حضارة مصر

طيب هل الكلام ده يزعل حد؟

فكرة أننا مش عرب دي بس كافية إنها تجيب لك شتايم من الإسلاميين… وهجوم من اليساريين اللي شايفين العروبة مشروع “وحدة”

طيب عمل إيه تيار الإسلام السياسي واليساريين؟

عملوا نفس اللي بيعملوه كل مرة مع اي حد ضد فكرهم

مرة يقولوا إن “الكمايتة ممولين من إسرائيل” علشان يهدموا مشروع العروبة، ممولين ازاي من اسرائيل وهما أصلا ضد قصص اليهود عن مصر

ومرة تانية يتقال إنهم “عنصريين” و“فاشيين” وبيتكلموا عن نقاء عِرق

او إنهم “واخدين تمويل من الخليج” ودي حاجة في منتهي العبط بصراحة

وأخيراً… نوارة بنت أحمد فؤاد نجم شايفة ان "الكمايتة" مش عايزين حد يتعلم

بس واضح بصراحة مين اللي مش عايز الناس تتعلم

مين المصريين؟ وإزاي نِرِدّ على حكاية “انتو مش أحفاد (الفراعنة) المصريين القدماء”؟

يا جماعة، الجينات ما بتكدبش. آخر ٨ سنين اتعمل شُغل تقيل قوي على الجينوم المصري, حديث وقديم, وبيطلع لنا خريطة واضحة: فيه استمرارية سكانية (genetic continuity) أساسية من مصر القديمة لحد النهارده، مع شوية تغيّرات طبيعية بسبب احتكاك وهجرات عبر آلاف السنين (وده طبيعي لأي بلد على مفترق حضارات).

الخلاصة السريعة

المصريين النهارده (مسلمين ومسيحيين) جينيًّا من نفس السلالة الأساسية للمصريين القدماء، مع إضافات محدودة بسيطة عبر الزمن.

الدين اتغيّر، اللغة اتغيّرت، إنما الخطّ الجيني الأساسي مكمل.

أدلة مختصرة (مدعومة بأبحاث محكّمة):

أقدم جينوم كامل من الدولة القديمة (Nature 2025):
أول جينوم كامل من فرد من الدولة القديمة أظهر خليطًا يغلب عليه مكوّن شمال إفريقي قديم مع مساهمة من الهلال الخصيب الشرقي, والموديلات الجينية بتقول إن المصريين الحاليين بيستمدّوا جزءًا معتبر كبير واساسي من أصولهم من نفس المكوّنات دي. يعني في خط واضح وضوح الشمس ممتد من مصر القديمة لحد النهارده، مع بعض الإضافات الطفيفة اللاحقة. [1]

مومياوات أبو صير الملّق (Nature Communications 2017):
الدراسة لقت استمرارية داخلية عبر 1300 سنة من عصور متتالية، وأن المصريين القدماء هناك كانوا قريبين جينيًّا لشعوب الشرق الأدنى. مقارنةً بالمصريين الحاليين فيه زيادة ~8% في المكوّن الإفريقي جنوب الصحراء خلال آخر ألفين سنة—وده ما بينفيش الاستمرارية، بل بيوضح إضافة حديثة بسيطة فوق الخط الأساسي. المؤلفون نفسهم قالوا: “الاستمرارية بين المصريين القدماء والمصريين الحاليين لا يمكن استبعادها”. [2]

مرجع الجينوم المصري EgyptRef (Nature Communications 2020):
اتبنى مرجع جينومي مصري من 110 أفراد لالتقاط التنوع الجيني المحلي. الهدف طبي بالأساس (طب مُحكم/دواء مُوجّه)، لكنه بيثبّت هوية جينية مميزة ومتوقعة لسكان مصر الحاليين, وده بيخدم نقاش الاستمرارية بدل أسطورة “انقراض” المصريين القدماء. [3]

المشروع القومي للجينوم المصري (EGP) – حديث + قديم:
المشروع معلَن رسميًّا، وهدفه بناء مرجع قومي وتسلسل عينات حديثة وعينات من مومياوات لربط الحاضر بالماضي مباشرةً. الفكرة المعلَنة: “دراسة جينومات المصريين الحديثين والقدماء وتبيان الجسر الجيني بينهما”. يعني الدولة نفسها بتشتغل على الخط الواصل، مش “قطيعة”. [4][5][6]

يعني إيه الكلام ده عمليًّا؟

“احتلالات” وحِتَت تاريخية؟ آه حصلت، بس اللي بيدخل مجتمع كبير ومستقر زي مصر بيسيب طبقة رفيعة فوق الكتلة الأساسية؛ ما بيمسحش السكان.

الدين اتبدّل أكتر من مرة، واللغة اتبدّلت، بس الأنساب السكانية الكبيرة بتتحرك ببطء.

نتيجة ده: المصري المسلم والمصري المسيحي واللاديني والبهائي النهارده بيشتركوا في نفس البُنية الجينية الأساسية الممتدة من مصر القديمة، مع فروق فردية طبيعية زي أي شعب كبير.

الخلاصة الأخيرة:
لو حد بيقولك: “المصريين الحاليين مش امتداد للمصريين القدماء” قولّه: الأدلة الجينية الحديثة بتقول عكس كده. فيه إضافات عبر الزمن بسيطة، بس الخط الرئيسي مكمل… وده طبيعي جدا وعادي لأي شعب ساكن على ضفاف نهر واحد من آلاف السنين.

المصادر في أول تعليق

المتحف المصري الكبير .. معجزة معمارية تحتوى على آثار فرعونيه

سؤال ممكن تسأله

ايه أسرار المتحف المصري الكبير؟

المتحف هو معجزة معمارية بتحتوي على آثار تليق بعظمة التاريخ المصري 🇪🇬

١⃣ مجموعة الملك الذهبي توت عنخ آمون
لأول مرة هتتشاف المجموعة الكاملة، أكتر من ٥٠٠٠ قطعة أثرية من مقبرته، كأنك رجعت بالزمن تشوف كنوز الفرعون بنفسك ✨

٢⃣ واجهة أسطورية واتجاه هندسي فريد
واجهة المتحف الضخمة من الزجاج والحجر بتتجه مباشرة ناحية أهرامات الجيزة، بحيث من البهو الرئيسي تقدر تشوف الأهرامات في خط بصري واحد مع المتحف!

٣⃣ الممشى نحو الأهرامات
المتحف متصل بممشى سياحي بيقودك من قلب المتحف مباشرة ناحية منطقة الأهرامات.
كأنك بتسافر في رحلة زمنية من الحاضر لعصر الفراعنة

٤⃣ تعامد الشمس على وجه الملك رمسيس الثاني
في فتحة هندسية في سقف البهو الرئيسي، مصممة بحيث يدخل منها شعاع الشمس في توقيت معين، ويقع مباشرة على وجه تمثال رمسيس الثاني وهي ظاهرة بتتكرر في نفس توقيت تعامد الشمس في معبد أبو سمبل (٢٢ أكتوبر) كأن رمسيس نفسه بيضيء بنور الشمس

٥⃣ متحف الطفل
متحف تفاعلي مخصص للأطفال، بيخليهم يتعرفوا على الحضارة المصرية بطريقة ممتعة ومبتكرة، فيها تكنولوجيا وتجارب واقعية.

٦⃣ مركز ثقافي متكامل
المتحف مش مجرد مكان للعرض، ده كمان فيه قاعة احتفالات، ومناطق للفعاليات الدولية.
بيستضيف حفلات أوركسترا ومهرجانات فنية، وبيجمع بين الفن، التاريخ، والثقافة في قلب واحد نابض.



منقول من صفحة أخوية كمت - 𓌢𓌢𓈖𓏛 𓆎𓅓𓏏𓊖
تابعوهم .....

هما بيقولوا
مسلم و مسيحي و أحنا بنقول مصريين

هما بيقولوا
وجه قبلي و وجه بحري و أحنا بنقول مصريين

هما بيقولوا
فلاحين وصعايدة (مع ان الصعايدة فلاحين) وأحنا بنقول مصريين

هما بيقولوا
الأهلي والزمالك و أحنا بنقول مصريين

هما بيقولوا
الشعب والجيش و أحنا بنقول مصريين

هما بيقولوا
عرب و أحنا بنقول مصريين

هما بيقولوا
نسل الترك واليونانيين والعرب والاحتلالات و احنا بنقول مصريين ولاد و احفاد مصريين ومن جدور الأرض دي و طينها

هما بيقولوا
للغريب أولا ولو علي حساب المصريين و احنا بنقول مصر للمصريين

هما بيقولوا
أرض الله الواسعة (ملهاش صاحب) و أحنا بنقول مصر للمصريين

هما بيقولوا
رجالة وستات وصراع اجتماعي و احنا بنقول المصري للمصرية .

هما بكل قوة بيكسروا مصر داخليًا و يقسموها و يكسروا كل روابطها علشان تتحلل و تنتهي .

وعلشان بنقول أننا مصريين وعايزينها للمصريين خرجنا كلنا من الملة و الدين ... اه يا ولاد # #لب يا كدابين
------------------------------------------------------
القومية المصرية هي قوة مصر و الحفاظ عليها و وحدة ترابها و شعبها و كرامتهم في الداخل و الخارج ... وعدم تقسيمها و الحفاظ على هويتها و تكون حائط صد ضد الطائفية أو تحولها لدولة طوائف و عرقيات و تفضل لأصحابها و يورثها ولادنا من بعدنا مش هتكون للأغراب أو لمن حصلوا على جنسيتنا من الاغراب ..

• بعد سقوط الخلافة العثمانية راح زعماء وأعيان مصر يطالبوا بجلاء الإحتلال البريطاني
فضحك الإنجليز و قالولهم حررناكم من العُثمان
فأجاب زعماء مصر: كتر خيركم، نرجع مصر القديمة عادي بقا
إستغرب الإنجليز وسألوا ايه هي مصر؟ (حصل بالنص) إحنا منعرفش حاجة اسمها دولة مصرية ولو على السياسة فا هي دولة عربية دينها الإسلام لا أكتر ولا أقل و كانت تابعة للدولة للعثمانية، (حدث بالفعل) و سعد زغلول قام زعق و قال مين ديه إللي عربية يا ولاد ال$ #"&

جملة عبقرية من الأستاذ مهند فايد عن هدف تجار الدين وهو " خلق جيل يمتزج حب دينه بكراهية وطنه "

مهو بص .....
الفكر ده دايما تكف...يري
لو مش موافقه تبقا ك..افر و يبررلك ده قدر استطاعته
فا بديهي يا جماعة لما تواجه الناس دي تكفرك محدش يزعل او يتصدم اوي .....هو ده منهجهم
لا حجة لا تعايش لا مساواة .....بل طائفية و عنضرية صريحة يفخرون بها
عامة هم بقالهم سنين بيهرو و مع ذلك مجاش لم يجروء جرو منهم ينفذ العته ده علي ارص الواقع
و خد عندك (المصري عموما مهما كانت ديانته مسلم مسيحي لاديني ...مهما كان موقعه علي الخريطة صعيدي دلتاوي سيناوي ساحلي بدوي .....كلهم كدة هيقفو كتف في كتف وقت الشدة
فا المصري ايا كان اهم عندي من اي انسان برا حدود بلدي طبعا و اللي يقول غير كدة مت..طرف ساذج طائفي )

"إن مصريتنا تقتدي أن يكون وطننا هو قبلتنا، و أن نكرم أنفسنا و نكرم وطننا فلا ننتسب لوطن غيره. و الدعوة إلى فكرة مصر للمصريين، نريد الوطن المصري و الاحتفاظ به، و الغيرة عليه كغيرة التركي على وطنه، و الإنجليزي على قوميته، لا أن نجعل أنفسنا و بلادنا على المشاع".

-أحمد لطفي السيد🖤🇪🇬