ريديت المصري

منقول من
من حوالي شهر كنت قاعدة بتغدى مع اتنين صحاب ما شوفتهمش من سنين، واحدة متجوزة — شيماء، والتانية مش متجوزة — رنا. شيماء كانت عاملة عملية من فترة ومكنتش أعرف… قررنا نزورها في بيتها وصممت نتغدى معاها.
واحنا بنتغدى، شيماء قالت: «يا خبر، نسيت اطلب دوا الضغط لجوزي، هيبات في الشغل ودواه خلص…» مسكت الموبايل وقررت تبعتله دوا. الصيدلي سألها: «عايزة كو تارج تركيز كام؟» شيماء سكتت ثانية وقالتله: «ثواني هفتكر التركيز…» رنا ردت تلقائي: «قوليله 160 على 12.5» اللحظة نشفت. الهوا بقى تقيل.
شيماء قالت للصيدلي: «مع السلامة انت بقى…» وبصت لرنا وقالت بهدوء مخيف: «عرفتي منين التركيز؟» في اللحظة دي أنا ما استنيتش رد… مركزتش في الوشوش… أنا بس بدأت ألم السكاكين من على الترابيزة، مش هزار، حسيت إن في حاجة تقيلة قوي على وشك الوقوع.
رنا وشها احمر، والكلام خانها. شيماء كررت السؤال تاني بنفس النبرة: «عرفتي منين التركيز؟» بعد صمت أطول من قدرتنا على الاحتمال، قالت رنا: «إحنا متجوزين من شهرين… أنا وجوزك…» من غير ولا صريخ، ولا دموع، ولا مشهد محفوظ.
في حركة سريعة وخاطفة، شيماء خطفت تليفون رنا، ورمته في الحمام، وشدت عليه السيفون… مرة، واتنين، لحد ما بقى مش نافع.وقفلت باب الشقة بالمفتاح.. رجعت قعدت مكانها، نشفت إيديها في المنديل، وبكل هدوء، مسكت موبايلها وبعتت رسالة واحدة لجوزها: «تعالى البيت بسرعة… من غير اتصال.»
مش شرط تكتشفي الحقيقة في أوضة نوم زي مشاهد السينما، ولا في تفتيش موبايل جوزك زي أغلب الستات… دي بتنكشف في إجابة سريعة على سؤال ما اتسألش لها، بتيجي من تفصيلة دقيقة جدًا محدش بياخد باله منها… بتيجي ناعمة… عادية… وسط الأكل.
في ستات زي شيماء، لما الحقيقة بتنكشف… مبتنهارش، مبتتوسلش، مبتستناش تبرير… بتقفل كل الأبواب اللي دخل منها الوجع، وتنضف المكان كأن الغلطة متستاهلش حتى تسيب أثر.

انا اعرف ست اية في الجمال و تزوجت حد لاتحبه ابدا رغم انه جميل وميسور هروبا من قسوة والدها لا أكثر ...كان ممكن تحبه لكنه كان غيور جدا ولم يتركها تكمل دراستها ولا تركها تشتغل بالرغم من انه وعدها بهذا قبل الزواج بعد شجارات ملهاش نهاية تركها تكمل دراستها كانت تطمح انها بعد التخرج يخليها تشتغل لكنها حملت فتحملت عبا الحمالة والوضع والرضاعة وهي بتدرس لما انهت تعليمها رفض انها تشتغل...فقررت انها تنتبه لمستقبل أولادها مادامت فرصتها هي خلصت مع والديها فضلت تدرس مفيش مجال مدخلتوش وفي نفس الوقت تدرس لاولادها وتسافر معاهم وتلعب معاهم كورة سباحة اي شيء العاب إلكترونية يعني كأنها عايشة مع أولادها وبس والراجل بيصرف وراضي بعيشتو الزوجة قايمة بواجبتها الزوجية معاه كما يجب كل الناس حسدينها...كبروا أولادها وأصبح مهندسين كبار واحد أرسلته إلى أمريكا والثاني إلى فرنسا ولما استقروا في حياتهم ..فوجىء الكل بهاذه الزوجة بعد سبعة وثلاثين سنة طلبت الطلاق وبذلك سامحت في كل حقوقها ...الراجل كان حيتجنن مش مصدق الأسرة كذلك الا الاولاد لم يتفاجءو ولاشي رغم أنها لعمرها اشتكت لهم لأنهم كانو عايشين معاها لحضة بلحضة وحاسين بها وهي ماوخداش بالها كان دعمهم والوقوف بجانبها اكبر صعقة لوالده واكبر جزاء لوالدتهم حققو حلمها وساعدوها تشتغل وتحقق أمنياتنا لكي تكمل فرحتها وراحت عاشت في أمريكا والان هي جدة عاملة ...من هاد القصة تعلمت ان المرأة ممكن تعيش مع راجل من غير حب من غير مياخذ بالو حتى مادام بيأخذ لي هو عاوزو علشان أولادها ...ولكنها لاتنسى

جوزي اللي عمره (31 سنة) عمل "تحليل أبوة" لبنتنا اللي عمرها (5 سنين) والنتيجة طلعت إنه مش أبوها، بس أنا عمري ما خنته!

دلوقتي هو مقتنع إن علاقتنا كلها كانت كدبة، وعايز يطلقني.

أعمل إيه؟ مش عارفة إزاي ده حصل، ومش قادرة أبطل عياط طول اليوم.

أنا عمري ما خنت جوزي. أنا بحبه جدًا، إحنا مع بعض من أيام الكلية، وهو حب حياتي — طيب وحنين.

مفيش أي احتمال إن حد تاني يكون أبو بنتنا.
أنا عمري ما خنت، ومش ممكن أخون، ومش عارفة ليه عمل التحليل الغبي ده أصلًا، بس النتيجة طلعت إنه مش أبوها، ودلوقتي هو مقتنع بكده.

مش عارفة إزاي أقنعه إن التحليل غلط، أنا مرعوبة جدًا.

جوزي من شهور اتغير جدًا وكأنه بقى شخص تاني خالص غير الراجل اللي حبيته واتجوزته. بقى بارد وبيشك فيّا طول الوقت. فضل كل شوية يقولي عايز أشوف موبايلك. ومكنش بيقولي ايه السبب؟ وفي الأول كنت بسيبله الموبايل، بس في الآخر رفضت وقلتله عايزة أعرف بتعمل كده ليه؟ بقى بعيد حتى عن بنتنا، بيقعد بالساعات قافل على نفسه في المكتب، ومش عارفة بيعمل إيه.

أنا ما خنتوش، والله العظيم.

النهارده الصبح اتهمني بالخيانة وقال إنه عمل تحليل الأبوة بعد ما لاحظ إن عيون بنتنا "بني" ومش ممكن تكون بنته لإن إحنا الاتنين عنينا أزرق! وقالي أخرج من البيت.

أنا رفضت امشي، راح قافل علي نفسه باب الأوضة، ورفض يدخلني. ودلوقتي أنا قاعدة في أوضة بنتي.

الموضوع مرعب جدًا... أعمل إيه؟

🎀 تحديث:

أنا محتاجة نصيحة واضحة عن إزاي أثبت إني بريئة، وإزاي أقدر أحافظ على علاقتنا. أنا مش عايزة أخسر جوزي وبنتي وبيتي.

لسه متكلمة مع جوزي دلوقتي، خرج من أوضته واتكلمنا شوية. قلتله تاني إني عمري ما خنته، وقولتله خلينا نعمل تحليل تاني، بس هو قال لي إنه مش عايز يسمع الكلام ده دلوقتي.

اتفقنا إننا هنتكلم تاني بكرة بهدوء، وقال إنه لسه بيحب بنتنا، بس هو لسه محتاج وقت علشان يعرف يفكر ويستوعب اللي بيحصل ده

أنا خايفة ومرعوبة قوي. وكل اللي نفسي فيه إن حياتنا ترجع زي الأول.

إزاي أثبت له إنّي بريئة؟

🎀 تحديث:

أول حاجة حابة أشكر كل الناس اللي تواصلت معايا. البوست الأصلي أخد تفاعل ضخم جدًا، ومكنتش قادرة أرد على الكل.

أنا عملت قايمة فيها خطة بالخطوات والتحاليل اللي ناوية أعملها.

جوزي لسه مش واثق فيا، بس في الآخر قرر يديني فرصة اثبت برائتي، وقال إنه مش هيحاول يطردني من البيت تاني.

بس قالي بصراحة أن لو التحاليل الجديدة أثبتت إني فعلاً خنته. رد فعله هيكون عنيف فوق ما اتخيل.

🎀 تحديث:

عملنا شوية تحاليل:

تحاليل أبوة وأمومة بالدم ليا وله ولبنتنا،
والنتيجة طلعت زي ما بعضكم خمن.

للأسف بنتي طلعت مش بنتي أنا كمان! الظاهر اتبدلت في المستشفي!

مش عارفة إزاي ده حصل، بس جه ظابط عشان يحقق في الموضوع وأخد أقوالنا، وإحنا دلوقتي بنقاضي المستشفى اللي أنا ولدت فيها.

أنا مش عارفة إيه اللي حصل لبنتي الحقيقية، والموضوع ده مرعب جدًا.

دلوقتي بنام في أوضة بنتي، وخايفة جدًا إنهم ياخدوها مني، بس في نفس الوقت نفسي أعرف بنتي الحقيقية فين... وهل هي بخير ولا لأ.

بدعي ربنا تكون بخير.

بنتي مش هنقولها حاجة خالص دلوقتي...وأحنا مخبيين الموضوع عن العيلة..مش عايزة الناس اللي يعرفونا يبصّوا لها بنظرة مختلفة، هي ماتستاهلش كده خالص، دي بنت طيبة وجميلة قوي.

لو قدرنا نلاقي أهلها الحقيقيين، بصراحة مش عارفة هنعمل إيه ساعتها. يمكن أحسن سيناريو إننا نجيب بيت أكبر ونعيش كلنا مع بعض، بس مش عارفة هنقدر نتحمّل مصاريف كده، ولا حتى لو هم هيوافقوا، أو لو هنقدر نوصل لهم أصلًا. أنا شكلي بخرف..بس الموقف فوق طاقتي.

إزاي هنقول لبنتنا بعد كده؟ مش هنقدر نقول لها دلوقتي، لأنها لو عرفت هتحكي لصحابها في المدرسة، وساعتها الموضوع هيبقى في كل مكان،
بس في نفس الوقت لازم نقول لها في يوم من الأيام.

مش عارفة عملت إيه علشان أستحق ده كله.

🎀 تحديث:

الحمد لله لقينا بنتنا الحقيقية. كانت في دار رعاية.

للأسف المستشفى اللي ولدت فيها كانت في منطقة وحشة جدا، والعيلة اللي اخدتها البوليس عمل معاهم تحقيق (إهمال، أو عنف منزلي) ولما اتأكدوا إنها مش بنتهم البيولوجية، الدولة أخدتها وحطّوها في دار الرعاية.

أنا فرحانة جدًا إن بنتي طلعت عايشة وبصحة كويسة.

بدأنا فورًا إجراءات التبنّي، والحمد لله دلوقتي عندنا فلوس كويسه جدا هتساعدنا في تربية البنتين.

مش هقدر أقول إن التعويض المالي ممكن يعوض اللي حصل، بس المبلغ حوالي اتنين مليون دولار تقريبًا.

والمحامي قال إننا كنا ممكن ناخد مبلغ أكبر كمان لو كملنا القضية في المحكمة، بس المستشفى كانت عايزة تخلّص الموضوع بسرعة وبهدوء، وبصراحة إحنا كمان كنا عايزين كده.

قلنا لبنتنا إن أختها الحقيقية هتيجي تعيش معانا،
وإننا لسه بنحبها جدًا ومفيش حاجة هتتغير.
كانت طايرة من الفرح 💕
يارب الأمور تمشي كويس فعلاً.

إحنا بنخطط نسيب المدينة اللي عايشين فيها بعد كام شهر، لقينا بيت جميل في منطقة فيها مدارس ممتازة، وفيه مساحة كبيرة تكفي العيلة لما تكبر.

لسه مش عارفين هنعمل إيه بخصوص العيلة التانية. وأنا بصراحة مش حابة أخد خطوة في الموضوع ده، بس في نفس الوقت حاسة إن أخلاقيًا لازم يعرفوا اللي حصل.

بس دلوقتي، كل تركيزي على بناتي، وعايزة أخطط لهم لحياة جميلة وسعيدة ❤️

_______
منقول من حواديت أجانب

السلام عليكم ورحمة الله وبركاته
زوجي اتعصب عليا جامد وزعقلي وقالي لو مسمار في البيت فهو من حقي وملكي انا ومتتصرفيش فيه بسبب بحب اطلع من فاكهه البيت او لحمه بنسب بسيطه جدا جدا بتبقا زياده عندنا في التلاجه
وانا بحب اطلع مثلاا منابي ف الغدا للبنت ال بتنظف السلم بتاع العماره هل كده مش هيتقبل اطعام ولا مش هيتقبل عشان زوجي هو ال جايب الاكل حتى لو كان منابي
انا في كرب كبير اوي ومن قبل الكرب وانا بحب اطلع لله لبس او فلوس ال اقدر عليه
مع العلم انا مش بشتغل انا ربه منزل

يا جماعة اي حد عايز يحط قصته بدون ذكر أسماء يبعتلي رسالة وأنا هظبطها وانزلها كبوست
خلونا نستفيد من تجارب بعض وناخد رأي الناس يمكن نلاقي حل لمشكالنا
في انتظار رسايلكم 🥰

مش عارفة هو صح و لا غلط اللي انا هكتبه ده ..
اول مرة في حياتي ابقا مترددة كده ،،
بس في نفس الوقت حاسة بحمل تقيل على قلبي ،،
و محتاجة افضفض و اكتب ،،
بس ارجوكم محدش يخليني اندم اني حكيت ،،

انا ليا واحدة صاحبتي من و احنا اطفال ،،
تقريبا من و انا عمري 6 سنين ،،
كنا في مدرسة واحدة في الغربة من ابتدائي لثانوي ،،
و لما رجعنا مصر صادفت انها بقت جارتي ..
فاستمرت الصداقة و بقت زي اختي ..
و مامتها عرفت مامتي و أخواتها عرفوا اخواتي ..
و دخلنا بيوت بعض ،، و اكلنا عيش و ملح مع بعض ..

و شاركنا بعض في كل الظروف و المواقف الحلوة و الوحشة ..
حد مات ،، حد تعب .. حد اتجوز ، حد اتخرج ..
محدش كان بيقصر مع التاني ،،

فضلنا كده لحد من خمس سنين ،،

جالها عريس .. و محتاجة جهاز .. و أهلها ظروفهم على قدها اوي
لدرجة بعد سنين الغربة دي كلها معندهمش بيت ملك يسكنوا فيه وساكنين بالايجار .. فجت لي تعيط و مخنوقة ..
و انا عمري كبر و مبقاش عندي رفاهية الرفض عشان الظروف .. ومش عايزة ابقا اقل من اي حد ..

ياريت لو تشوفي لي جمعية كبيرة اقبضها الاول و انا مرتبي كويس هسد منه ، قلت لها حاضر ..

قعدت ادور و اسأل لدرجة قلت لماما و اخواتي كلنا ندخل فيها عشان تتلم بسرعه .. بس للاسف ملقيتش و معرفتش اتصرف لها في جمعية ..

لقيتها في يوم جاتلي و قالت لي خلاص فرجت ،، انا رحت البنك اقدم على قرض و الموضوع كله واقف على ضامن ،، و محدش من اللي حواليا راضي يقف جنبي ، حتى اخواتي اللي المفروض يقفوا جنبي ، ده انا اختهم الوحيدة و يتيمة ،، حتى ماما قالت لي المعاش مش هيقضي القسط ف مليش دعوة بالحوار ده ..

و انا مصدومة في اهلي ،، اخر حاجة كنت اتوقعها انهم ميبقوش عايزيني اتجوز ،، ! و عايزين افضل اخدم فيهم .. و دخلت في نوبة عياط و قالت لي انا مليش غيرك ارجوكي تعالي معايا اضمنيني ..
كل الحكاية توقيع على ورقة و بس و ملكيش دعوة بأي حاجة تاني .. انا مني ليهم و هسدد كل شهر من شغلي ..

مفكرتش مرتين .. قلت لها من غير كل الكلام ده انتي عارفة انا معاكي في اي حاجة ..

و رحت البنك اتفاجئت ان المبلغ كبير ،، اكبر من اللي قالتهولي في البيت .. بس عديت الموضوع و وقعت اني ضامن ..

عدى اربع خمس شهور زي الفل و نسيت الحوار و عايشة عادي ،،
لحد ما في يوم لقيت موظف من البنك بيكلمني و بيقولي اتاخرتوا في سداد القرض 3 شهور و بنتواصل مع فلانة مش بترد و مش عارفين نعمل ايه ؟ قلت له تمام انا هكلمها و نسدد ان شاء الله متقلقش ..

كلمتها ،، قالت لي الدنيا زي الزفت معايا و سبت الشغل و رحت شغل جديد بس المرتب اقل .. عشان كده الدنيا لخبطت معايا ،،
قلت لها طيب و الحل ؟ قالت لي انا معايا نص القسط بتاع شهر واحد بس .. ينفع بس تكمليهم عشان نسكتهم و اعتبريهم دين عليا ..

قلت لها حاضر .. و دفعنا ..

بقت كل شهر تقولي معلش القسط ناقص كذا ينفع تكملي من معاكي لحد ما ربنا يفرجها ،، و احسبي كل جنيه دفعتيه ان شاء الله ربنا يكرمني و اديهملك ..

قعدنا ع الحال ده 7 شهور .. و امي الله يسترها و يبارك فيها ويخليهالي بقت تساهم معايا كل شهر عشان نكمل القسط ..

بعد السبع شهور صاحبتي اختفت تماما هي و جوزها ،،
مش في بيتها و لا أهلها يعرفوا عنها حاجة ،،
و بقيت انا اللي في الوش و مطالبة بسداد القرض ..
و موظف من البنك جالي لحد البيت عشان الحوار ده ..

اخدت رقمه و بقيت اتواصل معاه عشان نحل المشكلة ،،

و كل شهر ادفع جزء من المتأخرات على قد ظروفي ما تسمح ..

لحد ما اتفاجئت في يوم ان الفيزا الائتمانية بتاعتي في بنك Cib وقفت .. رحت البنك اعرف السبب ،، قالوا لي عشان القرض ..
طيب القرض في بنك مصر ايه علاقتكم انتوا ؟
قالي كله بيسمع على بعض ..
و للأسف ال (I-Score) بتاعك بقا سيء ..

قلت له طيب و الحل ؟
قالي تسددي القرض و تجيبي لنا مخالصة من البنك وقتها نقدمها للإدارة و نشوف الدنيا هتمشي ازاي ..

طبعا دخلت في حالة اكتئاب و بقيت عايزة احل المشكلة دي بأي شكل .. و مش عارفة اوصل لصاحبتي .. و أهلها شايلين ايدهم من الموضوع تماما ..

في الاخر تواصلت مع موظف بنك مصر و سألته هو توتال الباقي من القرض مع الغرامات مع كله كام ..؟
قالي المبلغ ..

طبعا كان كبير عليا جدا و مقدرش عليه ..

بس ابو حتحوت باشا و ماما ربنا يبارك فيهم و يخليهم ليا حاولوا يتصرفوا و بعد ضغط مادي كبير عليهم و عليا قدروا يجمعوا لي المبلغ ..
و رحت البنك للموظف اللي بيتواصل معايا و سددته كله ..

و طلبت منه مخالصة .. قالي اديني فرصة يومين اشتغل عليها وهكلمك تيجي تستلميها ..

بعد يومين اتصلت عليه قالي المخالصة جاهزة اتفضلي عشان تستلميها .. رحت البنك و بعد انتظار ساعة، الموظف عمال يروح ويجي و يتكلم مع ناس و يرجع تاني ..

في الاخر قالي انا اسف مش هقدر اسلمك المخالصة لازم صاحب القرض هو اللي يجي يستلمها ..

طيب انا اللي بهدلتوني و طالبتوني بالسداد و انا اللي دفعت ازاي مستلمهاش؟ قالي للاسف ده سياسة البنك

طيب انا مش عارفة اوصل لصاحبة القرض ايه الحل ؟
قالي مش عارف والله مقدرش افيدك

مشيت و انا مخبوطة على دماغي و مش عارفة انا مالي بكل الدوشة دي و ايه ذنبي فيها ..

روحت البيت و رجعت اتواصل مع أهلها و اقولهم انا مش عايزة منها حاجة غير توقيعها بس ع المخالصة انا خلصت القرض خلاص ..
قالوا لي بشكل سخيف منعرفش عنها حاجة و ملناش دعوة بالموضوع ده 🙂

بعد شهور و الموضوع متعلق .. لقيت صديقة مشتركة بيننا قالت لي فلانة كلمتني من رقم غريب كانت طالبة مني حاجة و كده و مرضتش اعرفها اني عارفة اي حاجة عن الموضوع لحد ما اعرف هي فين ونعرف نوصلها ..

قلت لها طيب هاتي الرقم بتاعها و انا هكلمها ،
اتصلت بيها مردتش ،، بعتلها ع الواتس اب بالنص كده

(انا مش عارفة ظروفك و مش عايزة احكم عليكي و لا عايزة أصدق فيكي اي احتمال سيء يخليكي تعملي معايا كده ،،
كل اللي طالباه منك دلوقت تروحي البنك تجيبي لي مخالصة لاني سددت القرض بالكامل خلاص و مش عايزة منك و لا جنيه ف اتمنى تخلصيني من المشكلة دي في اسرع وقت )

قرأتها و عملت لي بلوك على الواتس اب و ع الفون نفسه 🙂

و اختفت كام شهر كمان لحد ما رجعت تتواصل مع صديقتنا المشتركة برقم جديد ..

لما قالت لي قولتلها مش عايزة الرقم ..
عايزاكي تكلميها انتي و تعرفي منها هي بتعمل كده ليه معايا ؟؟
و مستنية ايه عشان تخلصني من المشكلة دي ؟

صاحبتنا اتصلت بيها و سجلت المكالمة عشان تبعتهالي ..
و كان ردها ،،

(يعني عشان ضمنتني في قرض تروح تفضحني عند اهلي و تقولهم اني واخدة قرض و اهلي مكانوش يعرفوا عن الموضوع و بهدلوني بسببها ..
خليها تتربى بقى مش هعملها مخالصات 🙂 )

يعني اهلك كانوا عارفين انتي فين و متواصلين معاكي ؟

قالت طبعا و قالوا لي انها راحت لهم و اتصلت عليهم كام مرة و قلت لهم طلعوا نفسكم من الموضوع ..

صاحبتي حاولت تسايسها و تقولها معلش هي غلطانة و كان تصرف مش كويس منها انها راحت لأهلك بس عشان انتي اختفيتي ، مكانتش عارفة توصلك ، و خلاص الحمد لله هي خلصت القرض عنك .. كتر خيرها يعني ف اعمليلها المخالصة و اخلصي من وجع الدماغ ده ..

كان ردها
( تمام معنديش مشكلة .. هعملها المخالصة بس بشرط ..
انا ظروفي زي الزفت و ولادي مصاريفهم كتير و محتاجة قرض تاني تضمني فيه 🙂 )

قالت لها وضعها في البنك بقا سيء مستحيل يوافقولها على قرض و مستحيل هي توافق على كده بعد اللي حصل بينكم ..

قالت لها
( انتوا عايزين مني مخالصة و انا قلت لكم اللي عندي ، مش هتعرف تضمني في قرض جديد ، تشوف لي جمعية ب 200 الف اقبضها الاول او التاني بالكتير ،، لو عملت كده تاخد المخالصة من عنيا )

اقسم بالله لو ما سمعت المكالمة بودني عمري ما كنت هصدق و لا في أسوأ كوابيسي انه دي صاحبتي و ده اللي بتعمله معايا و تقوله عني ،،

قلت لصديقتنا المشتركة اقفلي كلام معاها تماما بخصوصي ..
انا مش عايزة منها حاجة و لا عايزة اسمع اسمها و لو صدفة ..

و وصلتها الرد ده و خلص الموضوع ..

مش عايزة ألوم نفسي عشان وقفت معاها ،،
دي واحدة مش من الشارع و لا معرفة يومين ،
دي ضحت ب 30 سنة صداقة و أخوة و ود و معروف ..
مشافتش فيهم مني و لا من اهلي الا كل خير والله ..

و بلاش اتكلم في اللي والدي الله يرحمه و امي كمان عملته معاهم طول السنين دي .. انا كل ترددي في الكتابة ان ناس هنا يعرفوها ويعرفوا أهلها و مكنتش عايزة احكي قدامهم اللي حصل ..

انا صدمتي في غيابها و توريطي في القرض كوم ، و صدمتي في مكالمتها اللي بتساومني فيها على المخالصة بتاعت القرض اللي ساعدتها عشان تتجوز بيه كوم تاني ..
حقيقي الصدمة افقدتني توازني و مخلياني بكلم نفسي و دخلتني في مود وحش جدا مش عارفة اخرج منه ..

ادعوا لي كتير و ارجوكم ارجوكم ارجوكم..
محدش يكتب لي اي كلمة ممكن تضايقني ..
مش عايزة لوم من حد .. مش عايزة اي حرقة دم
عندكم كلمة حلوة كتر خيركم .. معندكمش يبقا السكوت افضل ..

و لو حد بيفهم في حوار البنوك يقدر يساعدني اخلص الموضوع ده من غيرها ياريت يفيدني يبقا كتر خيركم ..

منقول من نورا محمود

عارفين مقولة "لعل الخير يكمن في الشر؟"
كنت بسمعها كتير لكن اتأكدت من صحتها لما مريت بالمعنى الحقيقي
للخير يكمن في الشر...
أنا عندي 28 سنة ومتجوزة من سنة ونص
حياتي الزوجية عادية مقدرش أقول إنها سيئة
ومقدرش أقول إنها حياة سعيدة وهادية
يعني هي حياة عادية فيها مشاكل زي أي مشاكل بتحصل بين أي اتنين متجوزين
واحنا في فترة الخطوبة اتفقنا نأجل موضوع الولاد شوية يعني بعد سنتين على الأقل
من الجواز وأعتقد دا كان أفضل قرار أخدناه
اتجوزنا ومر سنة ونص زي ما قولت في حياة عادية
اللي مش عادي بقى إني بقالي أسبوعين حاسة بتعب وإرهاق طول الوقت
نومي مش مظبوط وكل جسمي بيوجعني وكأن مفيش عضمة واحدة سليمة
تعب شديد ومش عارفة أسبابه
ولكني زي أي بنت في مصر قولت يمكن دور برد ولا أي حاجة
التعب زاد ومش بيروح وهنا قررت إني لازم أشوف دكتور
طبعا جوزي مرضيش يجي معايا واضطريت أروح لوحدي
بعد انتظار ساعة في الاستقبال أخيرًا دخلت للدكتور وشرحت له كل الأعراض اللي عندي
وكشف عليا ولقيته سكت لحظات وبعدها بدأ يتكلم...
الدكتور صارحني إنه شاكك في كون عندي مـرض خبيث
وقالي إنه مش هيقدر يقرر غير بعد تحاليل وفحوصات وحاجات كتير كدا
طبعًا أنا مسمعتش نصها من صدمتي
رجعت البيت وأنا زعل الدنيا كله واضح على وشي
ومجرد ما دخلت البيت فضلت أبكي وكل اللي على لساني الحمد لله على كل حال
طبعا جوزي رجع وشافني منهارة كدا سألني في ايه وحكيتله كل اللي حصل
كنت منتظراه يطبطب عليا أو يحاول يحتوي خوفي وهلعي لكن اللي حصل عكس كدا تمامًا...
جوزي بصلي بصة مفيش فيها أي مشاعر وقال.. "انتي طلعتي مـريـضة؟ طب ومعرفتيش دا ليه قبل الجواز وقبل ما أتدبس فيكي؟ أنا متجوز واحدة تراعيني وتاخد بالها من البيت مش واحدة أشتغلها ممرض احنا بالنظام دا مش هينفع نكمل مع بعض"
أنا سمعت كلامه من هنا وحسيت إن الزمن وقف والدنيا وقفت، كل حاجة حواليا اتعطلت حتى حواسي وإدراكي
وكل اللي دار في عقلي سؤال واحد هي دي المودة والرحمة؟!
جوزي سابني ومشي ورزع الباب وراه وهو خارج وكأن تعبي دا بإرادتي
بعد وقت معرفش أد ايه قمت دخلت أوضتي ونمت
تاني يوم سمعته بيكلم مامته تشوفله عروسة
كوميديا مش كدا؟ كان نفسي تكون كذبة إبريل لكن بكل أسف دي كانت حقيقة
الحقيقة أنا سكت تماما وفات أسبوع ومعملتش التحاليل اللي الدكتور طلبها
ولا حتى قولت لحد من أهلي ولا جوزي اتكلم معايا
أنا كنت عايشة في حالة من الصدمة أو مش عارفة لكن أنا كنت ساكتة بشكل غريب
لحد ما لقيت جوزي بيلبس لبس شيك ويحط برفيوم ويسرح شعره
وهنا بصلي وقالي..
أنا رايح أخطب يا ريت تشوفي حد من أهلك علشان نقرر هنعمل ايه
أنا مردتش عليه
كل اللي عملته إني قومت لميت هدومي وطلبت تاكسي ومشيت روحت بيت أهلي
وهناك حكيت ليهم على كل حاجة
طبعا الصدمة كانت واضحة عليهم لكن اللي كان واضح أكتر هو خوفهم عليا
في لحظتها بابا كلم معمل تحاليل وروحنا نعمل التحاليل اللي الدكتور طلبها
وروحنا مستشفى عملت فحوصات وأشعة
بابا كان واخدني من ايدي وبيلف بيا هنا وهنا والرعب مالي عينه
عارفين المفجأة فين؟
المفجأة إني طلعت مش تعبانة ولا عندي أي حاجة
كل اللي عندي شوية نقص فيتامينات والأنيميا كانت عالية شوية
تشخيص الدكتور كان غلط
الحقيقة أنا بكيت
بس بكيت من فرحتي إني مطلعش عندي حاجة خطيرة
وبكيت من اللي عمله جوزي
ولكن سبحان الله زي ما يكون الموقف دا كله حصل علشان يبان على حقيقته
ربنا بعتلي شوية التعب دول والتشخيص الغلط علشان ينبهني إن الراجل اللي متجوزاه غير أمين عليا
موضوع التعب كان شر ولكنه كان وراه خير كبير أوي أصل محدش عارف لو كنت كملت في الجوازة دي كان ممكن يحصلي ايه في المستقبل
عمره ما كان هيتحملني ويشيلني لو تعبت شوية أو حصلي أي حاجة
والحمد لله ربنا كشفلي حقيقته.



ملاحظة هامة للمتابعين الجدد
أي قصة بتنزل تحت الهاشتاج دا فهي مستوحاة من مشاكل وحكايات بتحصل حوالينا؛ وارد تكون حصلت ليك أو لحد تعرفه أو حتى شوفت حاجة مشابهة ليها هي في الآخر مش حكايات خيالية
بعض القصص بيكون فيها حكمة لازم تفهمها بين السطور وبعضها بيعرض المشكلة بشكل كوميدي.

هحكلكم مشكلتي عشان تقولولي اعمل ايه لاني حاسة اني ھموت من الغيظ و هيجرالي حاجة ..
انا انجوزت جوزي الاولانى من ٢٥ سنة و ماټ الله يرحمه بعد ٤ شهور جواز بس عربية خبطته و انا كنت اعتبر لسه عروسة و كنت حامل في ابني ..لما ماټ لاني كنت ساكنه في بيت عيلة اهله ناس مستقوية طردوني و بهدلوني و اخده كل حاجة و عشان اهلي طيبين معرفتش اعمل حاجة و لا اخد معاهم حق من باطل ولدت و ربيت ابني و محدش منهم فكر يشوفه حتي و لا يسأل عليه مرة واحدة و بعد كده اتجوزت ابن خالتي و كان طيب جدا الله يرحمه و كان حنين على ابني و خلفت منه بنتين و دارت الايام و ابني ما شاء الله كبر و اتخرج من كلية الهندسة و جوزي التاني ماټ الله يرحمه و ساب ورث كويس و طبعا بما انه كان حنين على ابني سابله مبلغ كويس و انا مش ببخل عليه باي حاجة طول عمري لانه يتيم فكنت بدلعه جامد على حساب اخواته البنات و اي حاجة بيعوزها بتكون عنده فوجئت بيه من كام شهر بيخرج كتير و بيتاخر كتير و مش بيرضي يقول هو كان فيه لحد ما في يوم لقيته جاي يقولي ... انا بحب بنت عمتي و عايز اتجوزها اتاري البنت وصلتله عن طريق الفيس و عزموه عندهم و هي و امها بلفوه لحد ما البنت قالتله لازم نتجوز كنت هتجنن و بقيت زي المچنونة اصړخ و اقوله اللي انت اتر مېت في حضنهم دول ضړبوني و كرشوني من بيتي و انت لسه في بطني و مفكروش يسالوا عليك مرة واحدة جايين دلوقتى بعد ما بقيت راجل طماعنين فيك اتفاجئت انه لاول مرة على صوته عليا و قالي انه بيحبها و مش هيتجوز غيرها سواء وافقت او لا و من ساعتها مش بيكلمني و كل يوم عندهم بيرجع على النوم بس و انا هتجنن مش عارفة اعمل ايه اوافق و اروح اطلبهاله و لا ارفض و يروح يتجوزها ڠصب عني و يقاطعني و انا روحي فيه اصلا قولولى انا غلط و لا صح

عملت الصفحة دي علشان تبقى شبيها لريديت الامريكية
لو حد حابب ينزل قصته باسمه او حتى مجهول الهوية بأسماء مستعارة علشان يسمع أراء الناس ونصايحهم اهلا وسهلا بيه هنا
ولو حد عايز يبعتلي مسج بقصته وانا هنسقها وانقحها واصححها وانزلها بدون هوية برضه أهلا وسهلا
باب المشاركة مفتوح للجميع
أنا متأكدة ان عندنا قصص هنا احلى وشيقة أكتر من قصص الأمريكان

أنا عن نفسي مش هخون الأمانة، يا رب يسرلنا اللي فيه الخير لينا