01/11/2022
كان عندي مشوار في مصر الجديدة و روحت عادي ب اوبر من العبور ل مصر الجديدة و دفعت ٨٠ جنيه...اه كتير..بس دا الطبيعي في القاهرة لو اخترت المواصلة تكون اوبر.
خلصت مشواري و فتحت اوبر عشان اروح العبور لقيته بيقولي ان الدنيا زحمة ف سعر الرحلة حيكون ١٠٨ 🙂!
ف جه في بالي وقتها اني اجرب المترو و انزل اخر محطة و من اخر محطة بقى حركب اوبر...دا كان اسرع و ارخص حل قدامي.
ركبت من محطة الاهرام خط ٣ المتجه ل عدلي منصور...بجد كنت مبسوطة طول الرحلة و كأني Tourist و اول مرة اجي القاهرة و كان على وشي ابتسامة زي الاطفال اللي بتتفسح و بتركب مواصلات لاول مرة 😅
وصلنا عادلي منصور و كنت مجهزة اوبر و حتصل بيه يوصلني من المحطة للبيت..و لقيت صوت بيقول "لقد وصلنا لمحطة عدلي منصور و هي اخر محطة، علما بأن هذه المحطة هي محطة انتقالية من المترو الي قطار الكهرباء" 🙄
قولت انزل اشوف الكلام دا ايه...نزلت لقيت شباب و بنات عسل و ولاد ناس و محترمين و بيبتسموا كدة و لقوني ماشية بتفرج ايه المكان دا..جم سألوني تحبي نسعدك ب ايه..قولتلهم انا ساكنة في العبور و بشوف لو قطر الكهربا دا حيبقى اقرب ليا من اني انزل هنا و اركب اوبر.
انسة جميلة شرحتلي انا حنزل فين و لقيت ان القطر حينزلني لمحطة اقرب من محطة عادلي المنصور اللي كنت واقفة فيها دي..وصفتلي ادخل منين عشان اركب القطر و اجيب تذكرة منين..روحت لشباك التذاكر برضه ناس بتضحك و اهلا بيكي و توصلي بالسلامة و كانوا جمال قوي 🥰 التذكرة سعرها كان ١٠ جنيه
ركبت القطر و كنت منبهرة 😍 نضيف قوووووي و مش مزعج و حاسيت اني مش في مصر و القطر دا مش زي القطر اسكندرية القاهرة اللي و هو ماشي يفضل يعمل "تك تك..تك تك..تك تك.." لا دا ماشي smoothly..
وصلت المحطة بتاعت العبور و كانت قرييييييبة قوي من بيتي و مجهزة نفس الrequest بتاع اوبر عشان يوصلني ل بيتي لان مينفعش امشيها خالص.. و لقيت شاب بيستقبلنا و احنا نازلين من محطة القطر بيبتسم و بيشاور على باب و بيقول " الباصات مستنياكم يا فندم..🤨" انا قولت دول تبع شركة سياحة...و فضولي قادني اني اسأل يا جماعة باصات ايه...راح الشاب دا رد عليا و قالي دا باص حيوصلك لاقرب نقطة لبيتك من على الطريق الرئيسي للعبور..🥰🥰🥰🥰 فرحت قوي... الباصات نضيفة قوي اسمها LRT و مستنية حد يجي ياخد مني فلوس عشان تذكرة...مفيش 🙂 و اكتشفت ان الباصات دي خدمة مجانية لركاب القطر 😍😍
بدل ما أروح ب ١٠٨ جنيه روحت ب ١٧ جنيه بس!!🥲🥰🥰🥰🥰
يا رب يخلوا كل القطارات و المواصلات نضيفة كدة 😍😍
=======
وازيد كمان على الكلام الجميل ده ان لو حضرتك من المسنين فوق سبعين عام هتركب كل المواصلات دى مجاناً ولو فوق الستين هيكون بنصف الأجرة فقط
عمار يا مصر يا أم الدنيا
منقولكوا للافادة
25/05/2022
19/05/2022
12/05/2022
12/04/2022
11/04/2022
07/04/2022