Kids and Family

في غلطة رجالة كتير بتقع فيها… وبتفتكر إنها برّ

ان لو حصلت أي خناقة بين أمك ومراتك
لازم تاخد صف أمك حتى لو متأكد إن هي اللي غلطانة،
هنا بقى إحنا دخلنا في شريحة جديدة من العقوق.

آه… عقوق.

لأنك لما تقف مع الغلط
وتظلم مراتك
وتساعد على ظلمها
إنت كده ما برّتش أمك…
إنت شاركت في الظلم.

البر مش إنك تدافع عن الغلط.
البر إنك تحافظ على الحق من غير ما تجرح.

البر هنا إنك تقف لوالدتك بكل لطف وود،
ومن غير ما تسيء ليها بلفظة أو إيماءة،
وتفهمها الحدود كويس.

لأن الأم لها مقام عظيم،
لكن الظلم ملوش مقام.

الراجل الحقيقي
لا يظلم زوجته إرضاءً لأمه،
ولا يجرح أمه دفاعًا عن زوجته.

الراجل الحقيقي
يعرف يقف في المكان اللي يمنع الظلم…
من غير ما يكسر حد.
احمد مندور العتر
راق لي 💙

‏

في أربع حاجات ما تعمليهمش مع أهل جوزك أبدًا… لو عايزة تعيشي مرتاحة وتحافظي على بيتك.

1️⃣ أول حاجة: ما تدخليش بعاطفة زيادة ولا بعشم أكبر من اللازم.
إنتي داخلة على عيلة ليها طبعها، وليها طريقة تعاملها، وليها نظامها اللي عاشت عليه سنين قبل ما تيجي.
من الذكاء إنك تفهميهم الأول… تفهمي طبيعتهم، تفهمي أسلوب كلامهم، تفهمي ديناميكية العلاقة بينهم.
في عائلات صوتها عالي وخناقاتهم كتير بس قلبهم أبيض وبيحبوا بعض بطريقتهم.
وفي عائلات تانية هادية وصامتة، ما يحبوش الأسئلة الكتير ولا الاحتكاك.
لو ما فهمتيش طبيعة العيلة، هتفسري كل حاجة غلط، وهتتحسسي من كل كلمة، وفي الآخر هتلاقي نفسك بتتخانقي مع جوزك بسببهم.

2️⃣ تاني حاجة: ما تدخليش بعقلية المتحفزة أو المتحسسة.
ما تدخليش من الأول شايلة كلام أمك وتحذيرات خالتك وصاحبتك في دماغك.
ما تدخليش بعقلية “أنا هبقى سطحية معاهم” أو “مش هديهم وش”.
العقلية السلبية دي بتبوظ العلاقة قبل ما تبدأ.
ادخلي بنية طيبة… لأن الحقيقة اللي ناس كتير مش فاهمينها إن العيلة دي هي أصل جوزك، وأولادك بكرة هيبقوا امتداد ليهم.
يعني صلة الرحم دي في الآخر هترجع لأولادك، مش لحد تاني.

3️⃣ تالت حاجة: ما تعامليش أهل جوزك بمنطق الند بالند.
ما ينفعش كل شوية تقولي لجوزك:
“أمك قالت كذا… أختك عملت كذا… وأنا مش عاجبني.”
لما تعملي كده إنتي بتحطي جوزك في موقف بايخ بين مراته وأهله.
وده مش ذكاء… ده توتر بيكبر كل يوم في الجواز.
الأذكى إنك تكسبِيهم بالأسلوب الحلو… بالكلمة الطيبة… بالاحترام… باللين.
عارفة المقولة اللي بتقول:
الأسلوب اللين يسبق الحق البين.
يعني ممكن تكسبي قلوب ناس كتير بأسلوبك، حتى لو كانوا مختلفين معاكي.

4️⃣ رابع حاجة: ما تسيبيش حدودك تضيع.
آه عامليهم كويس… بس مش على حساب نفسك.
لو في ناس صعبين فعلاً وبيحبوا يتدخلوا أو يتجاوزوا، لازم يبقى عندك حدود واضحة.
الحدود دي مش قلة أدب… الحدود حماية لنفسك ولمشاعرك ولبيتك.
لأن لو سكتِ على كل حاجة، هيبقوا فاكرين إن ده عادي، وهيفضلوا يتعدوا أكتر.

🛑 افهمي الحقيقة دي كويس:
أهل جوزك مش أعداءك… لكن كمان مش لازم يبقوا مركز حياتك.
التوازن هو الحل.
احترام من غير ذوبان…
وحدود من غير عداء.

وفي الآخر افتكري حاجة مهمة:
جوزك فرع من الشجرة دي… وأولادك بكرة هيبقوا امتداد لها.
فيا إما تزرعي العلاقة دي صح من البداية…
يا إما تفضلي طول عمرك بتعالجي مشاكل كان ممكن تتجنبّيها من الأول
أحمد مندو العتر
راق لي 💙

‏

النكد لمجرد النكد ، مواضيع اتكلمنا فيها ٦٠٠٠ مره واختلفنا ومنتهي الاصرار علي فتح نفس المواضيع هتستفادوا ايه ؟ مهي كده كده مفيش منها اي امل هو نكد وخلاص !!

ايام مباركه وشياطين متسلسله بس هي دي بقي النفس الاماره بالسوء بتحرب علي مشكله وتنكد وتعمل مشاكل بدون اي ٣٠ لازمه

يا اخونا قولتها وهقولها تاني وتالت ومليون في ادينا احنا كبنيادمين نطلع احسن ما فيهم وفي ادينا بردوا نطلع اسوء ما فيهم فاتقوا الله

ومش بس كده في ادينا نعيش بكرامه متصانه وفي ادينا ندي المساحه لاي مخلوق يهينا ويمسح بكرامتنا الارض

الموضوع لا هو كميا ولا هو مستحيل سهل اوي احافظ علي كرامتي ادام اي مخلوق مهما كان المخلوق ده متربي او حتي مشفش بربع جنيه تربيه وهقولكم ازاي 👇

اللتزامي بواجباتي اعمل اللي عليه كما ينبغي

مردش في اي خلاف وقت عصبيه نهائي منجرفش وري اي مشكله ولا حتي ابرر في وقتها لان ده هيترجم لمقاوحه وجدال

احترم الناس عشان تحترمني

صوتي ميعلاش لاي سبب

بلاش نظرات التحدي والنظرات المستفذه

اجبروا الناس بادبكم انهم يفوقوا لروحهم وييجوا يعتذروا

اختيار الوقت المناسب لفتح اي حوار او نقاش وندي المساحه لبعض نسمع بعض منقاطعش بعض واحنا بنتكلم

نبره الصوت مهمه جدا لو صوتنا هيعلي يبقي ممنوش اي فايده هتسفز الشخص التاني ويبقي ملوش اي لازمه الحوار اصلا

الجدال لمجرد الجدال ده بيطفش اي بني ادم مش الزوج بس صدقيني وللاسف مفيش بني ادم مجادل بيعترف لنفسه حتي انه مجادل بالرغم ان الطبع ده من الطباع المنفره جدا فلو حاولنا نكون صريحين مع نفسنا علي الاقل ٩٠٪؜ من مشاكلنا كلها هتتحل

دور ابله النظره ده هيخسرك كل حاجه مفيش راجل بيستحمل يقعد ادامك كتلميذ ياخد تعليماته منك في فرق كبير اوي بين انك تتكلمي مع جوزك او انك بتربي ابنك مش هيقبل منك حرف صدقيني

عاوزه تكسبي ثقه جوزك في دماغك ورايك لازم انتي الاول تتغيري عشان تشوفي تغيير

وربنا يهديكم جميعا ويهدي سركم 💙

‏

مشكله بتجيلي كتير وقولت اللفت نظركم لحاجه كبيره اوي بنعملها في تربيه اولادنا كتير مننا بيقول بنتي تدلع في بيت اهلها مستعجلين علي الهم ليه ما مسيرها هتتعلم ومسيرها هتعمل في بيت جوزها وكذلك بالنسبه للاولاد نحمله المسؤليه والهم ليه مالسه ياما هيشوف نقطه بقي ومن اول السطر معلش خليكوا معايا

البنت والولد اللي متحملوش مسؤليه في بيت اهاليهم دول لا يصلحوا انهم يكونوا ازواج وزوجات مهما حاولوا يعتمدوا علي نفسهم بعدين ويشيلوا ولو شالوا في اول الجواز من باب فرحتهم بالبيت الجديد والحياه الجديده بس بعد شويه وقت قليل اوي الحمل ده هيتحول لغضب وبوز ونكد وعصبيه لانهم متعودوش والموضوع بالنسبه لهم هيبقي هم عاوزين يخلصوا منه ويصبوا الغضب ده علي بعض وينكدوا علي بعض

متبصوش تحت رجليكم وتدلعوا وتقولوا يشوفولهم يومين ومسيرهم هيتعلموا

انتوا لازمتكوا ايه بجد ؟ ليه بتطلعوا شباب وبنات من تحت اديكوا عديمي الفايده وعديمي المسوليه وفخورين اوي بتربيتكوا الغلط !!

لو بتحبوا عيالكم بجد علموهم ازاي يعيشوا من غيركم في وجودكم انتوا مش باقين ليهم ومسيرهم الدنيا هتختبرهم ويايقدروا يحبوا الدنيا دي بمسؤلياتها وواجباتهم اللي لازم تتفرض عليهم اجلا ام عاجلا يا يكرهوها ويكرهوا شركاء حياتهم ويكرهوكوا ويكرهوا نفسهم ارجوكم لو بتحبوا عيالكم بجد علموهم يعني ايه مسوليه ☝️

‏

شويه ذكاء اجتماعي لوجه الله يا جماعه مينفعش نحس طول الوقت اننا عاملين اللي علينا وزياده واحنا بنعمل وخلاص ومش مهم الطرف التاني محتاج اللي بنعمله ده ولا مش محتاجه احيانا ابسط حقوق البني ادم انه ميكررش الكلام مرتين انه يتعمل لكلامه سعر ان يتحفظ بيحب ايه وبيكره ايه وايه بيعصبه هو ده صعب اوي كده ؟ احنا سوي عشان نحقق الرضي والراحه لبعض لو مش هنقدر نحترم ده ويكون عندنا من الذكاء اللي يخلينا نفهم طباع بعض ونبعد عن اي حاجه بتضايق بعض مكملين ازاي ؟ ليه حرقه الدم دي ؟ ماتسهلوا الدنيا علي بعض عشان ربنا يرزقكم ويباركلكم في حياتكم دي 😤
امثله بسيطه لو البيت ده حاجه خربت فيه ولو لمبه مسؤليه الزوج ماحنا مش هنسيب كل حاجه تخرب لحد ما البيت يبقي عباره عن خرابه والخرابه دي تخنقنا اما تجيب اجلنا .
ولو الست محافظتش علي نظافه البيت ده والزوج رجع لقي لقمه سخنه هيطفش بجد هو متجوز عشان يرتاح علي فكره مش عشان يتمرمط بره وجوه .
فوقوا لنفسكوا واللتزموا بادواركم ومحدش يحمل التاني فوق طاقته عشان الحياه بينكم تستقيم لا انت ينفع تبقي الست في البيت ولا هي ينفع تبقي راجل البيت انسوا دي طبيعه بشريه ربنا خلقنا عليها متعاندوش الطبيعه وترجعوا تقولوا ياريتنا 😤
احترموا رغبات بعض احترموا كلام بعض ومش لازم نقول ان الحاجه دي بتضايقنا ٦٠٠٠ مره عشان نستوعب انها بتضايق لان دي حاجه مستفزه جدااااااا😤

‏

السكوت عمره ما كان حل الخرس المنزلي والفتور بيوصل للكره لان مفيش بني ادم بينطفي وبيقدر يكمل انطقوا اتكلموا طلعوا كل اللي جواكم بس اختاروا الوقت المناسب والاسلوب المناسب وعاتبوا عتاب محبين مش عتاب ناس كارهه عتاب يصلح ويبني اسمعوا بعض ادوا نفسكم فرصه تحسنوا حياتكم وتعيشوا حياه افضل افهموا بعض وحاولوا تساعدوا بعض ازاي ترتاحوا سوي مينفعش نتجاهل مينفعش نظلم مينفعش نوجع افتحوا صفحه جديده في الايام المفترجه دي لعل ربنا يجعل الكلام ده شفاء لكل القلوب المليانه بالكلام وعايشه في صمت بس زي ما قولتلكم نختار الوقت المناسب جداا ونتكلم بهدوء وباسلوب حضاري ومنقاطعش بعض نهائي سيبوا الطرف التاني يطلع كل اللي جواه مش يمكن هو كمان معبي وساكت ! وبعدها طلعوا كل اللي جواكم وباذن الله هتلاقوا اكيد حل في الكلام استحاله هنقدر نكمل بالصمت ده بالعكس تماما متدوش نفسكوا فرصه للكره☝️

‏

- على فكرة انت مش مزعلك بعدهم ولا غيابهم ، ولا قرارتهم اللي بتجرح ولا تصرفاتهم اللي تهدم وتهد وتوجع ...
اللي مزعلك هو عمرك وأيامك اللي راحت على أشخاص ماخدوش محبتك على محمل الجد ،،
انت اللي مزعلك "طيبتك " و "جدعنتك " وتفانيك في العلاقة لآخر نفس ...
انت اللي مزعلك تربيتك النضيفة ومعدنك اللي بتعتبرهم سبب في أز،متك معاهم
اللي مزعلك " ثقتك " اللي ما طلعتش في محلها ، العشم اللي عيشته بحذافيره ، توقعك انك تتحب كما يحب وكما يرتضي قلبك وروحك...
-اللي مزعلك العمر اللي راح، الجَهد والسهر والتعب والصبر والمحايلات والمحاولات، والتنازلات اللي تنازلتها بكامل إرادتك عشان تحاول تسترضي مَن لا يرضى
اللي مزعلك الكرم الكبير والبذخ في عطاءك اللي اتقابل بالخسة والقسـ ـوة والنكران
انت اللي مزعلك مش حد معين ولا مجموعة بنى ادمين ....
انت زعلان إنك ما تقدّرتش
انت مش زعلان من حد ولا على حد
انت زعلان من نفسك وعلى نفسك ....
اللي مزعلك هو " نفسك " ...وبس
راق لي 💙

‏

كل سنه وحضراتكم طيبين بكره المتمم لشعبان والخميس اول ايام رمضان وكل عام وكلكم وكل حبايبكم بالف خير يارب 🌹🌹🌹

الحنيه هي المفتاح السحري لكل العلاقات سواء بتعرف تعبر بالكلام او بالافعال المهم انك تعبر لو قدرت تلين القلوب هتعرف تكسب العقول ☝️

والكلام ده مش في العلاقات الاسريه والاجتماعيه وبس ده في تربيتك لاطفالك كمان انتوا لو قدرتوا توصلوا لقلوب ولادكم هتعرفوا تربوا وهتكسبوا عقولهم وهيبقي اكبر عقاب ممكن تلجئ ليه وقت ما يغلطوا انك يادوب تغضب منهم ، يخافوا علي زعلك مش يخافوا منك ☝️

واهم حاجه تقدر تكسب بيها القلوب هي المشاركه في الاهتمامات حتي لو بيبي لو لعبت معاه وحسسته ان اهتماماته هي اولي اولوياتك فانت كده كسبت قلبه وعقله ☝️

ورضاك عليه هيبقي حجر الاساس هتبقي اهم من اهم مخلوق عنده وهيبقي سهل عليك اوي بعد كده توجه ☝️

‏

الاختبارات الزوجيه من عمل الشيطان علي فكره تبقي قاعده في امان الله وتلاقي جوزها بيخطط وبيعملها اختبار ويا تنجح يا تسقط ومتفهمش اساسا لازمتها ايه الاختبارات دي يدخل عليها يقولها مزنوق وحالتي الماديه وحشه جدا وبيعيلي ذهبك ولو رفضت تبقي واطيه ومتستاهلش العيشه ولو وافقت يطلع لا مزنوق ولا حاجه وكان بيختبرها بس الفكره ان الغباء دايما بيخلي الناس تختبر بعض بعد الجواز وبعد الخلفه كمان مش قبل

وكذلك الحال الست طول الوقت بتعمل لجوزها اختبارات وهي عارفه طبعه كويس اوي وفهماه كويس اوي بس لازم تختبره وهي واثقه انه ساقط ساقط بس لمجرد تثبت لروحها انها ضحيه لواحد مش عارف قيمتها

اتقوا الله وبطلوا هيافه الجواز مش لعبه بطلوا تتصيدوا الاخطاء لبعض بطلوا تنكشوا علي المشاكل بأبره وتعملوا زي الدبور اللي بيزن علي خراب عشه بلاش تخلقوا المأساويات دي وتقعدوا تندبوا واحمدوا ربنا ان معندكوش ابتلاءات تخليكوا مش قادرين تقيموا راسكوا ، احمدوا ربنا علي نعمه الستر والراحه والامان ومترفصوش النعمه برجلكم لا تزول من وشكم ☝️

‏

قوامتك ورجولتك انت المسؤل عنها متقللش من نفسك ولا تتنازل عن مسؤلياتك وبعد كده ترجع تقول قوامتي من حقك الطاعه شرعا بس من حق شريكه حياتك كمان تملي عينها وتصدق رجولتك متتصرفش اي تصرف ينزلك من نظرها ، متحملهاش مسؤلياتك ، متطالبهاش تكون هي الاساس في الصرف او في القرارات وبعدين ترجع تقول قوامتي عشان القوامه ليها شروط والطاعه شرعا شرطها القوامه ☝️

متبدلوش الادوار عشان هو ده اللي بيخرب العلاقات ، الفطره اللي ربنا خلقنا عليها ، متلعبوش في الثوابت الراجل راجل والست ست مفيش حاجه اسمها نتنازل عن ادوارنا او منعملش اللي علينا وزياده حتي الدلع في المسؤليات له حدود وحدوده ان الطرف التاني يكون مريض مثلا لا قدر الله لكن ندلع ونبوظ العلاقه باسم الدلع ده مرفوض ☝️

كل واحد من الطرفين له حقوق وعليه مسؤليات متبوظوش العلاقه بتبادل الادوار كل واحد يلتزم بدوره ويساعد شريك حياته علي الالتزام مش علي البلطجه والتواكل عشان الجواز محتاج ناس ناضجه وواعيه وملتزمه ، محتاج مجهود عشان نحافظ علي بيوتنا ونجيب ولاد يحترمونا ونقدر نربيهم كويس والناس تدعيلنا اما تتعامل مع ولادنا مش تدعي علينا ☝️

‏

اما الويدينج بلينر ياخد ٤ مليون جنيه بتجيبوا البيت وبتفرشوه بكام في السن الصغير ده تضمن منين انك تقدر توفر المبلغ ده تاني ؟ هتجيبه منين ؟ الاهالي اللي بتساعد علي السفه ده لو اشتريتوا انتوا الكراسي والورد والكوشه مش اجرتوهم والله ما هتتكلف التكلفه دي

هو ليه مبقاش في حد من الاهالي عنده شويه عقل يقول لعياله المبالغ دي حرام وانتوا وعيالكم اولي بيها ده لو متوفره

ليه مفيش حد بينطق ويقول حرام الملايين دي تدفع في كام ساعه ؟

دي لا فرحه ولا حتي ليله العمر تسوي المبالغ دي اتقوا الله بجد مهما كنتوا مقتدرين فكروا ان في ناس مش قادره تجيب العلاج مش قادره تصرف علي عيالها تتعلم مش قادره تصرف علي عيالها وتاكلهم وانتوا بكل بساطه بترموا ملايين للفشخره

وعلي فكره طول مانتوا وامثالكوا بتدفعوا المبالغ دي ومبتفكروش الناس بجد بتتسعر وهتفضل تزود في الاسعار لحد ما الجواز ينقرض ، حسبي الله ونعم الوكيل

‏