15/01/2026
على اد الايد
ممنوع تكوني حلوه وليكي شخصيه ورأي لازم تكوني على اد الايد عشان يقع عليكي الاختيار ما انتي عروسه فبرواز انسيلي بأه كل السنين اللي فاتت عشان اللي جاي كله هيكون تحت ايطار على اد الايد
أحلامك لازم تكون على اد الايد والا هتكون عندك تطلعات
افكارك لازم تكون على اد الايد والا هتكون افكار غريبه
حتى طموحك وشطارتك لازم يكونوا على اد الايد لازم تسيبي مسافه تحت مسميات الاولويه للبيت بس في الأصل هي هيمنه شخص على شخص آخر اصل انتي من الاول رضيتي تكوني على اد الايد.... بعلمك او بدون ...انتي خلاص ادبستي...واللي دبسوكي كانوا من البدايه عارفين انك اد الايد ولو اتملعنتي هيقولولك لاء فوقي انتي لازم تكوني اد الايد والا تبقي وحشه وعشان تفضلي نايله الرضا تمسحي أحلامك وتتعلمي تكوني حد تاني بس المهم عندهم تكوني على اد الايد وكأن دا خلاص القانون الجديد
وفي سوق البنات اللي البنات الحلوه بتتربى من البدايه تكون اد الايد الا اللي اهلها بيحبوها وعارفين انها اد الدنيا وتستاهل واحد اد الدنيا
اصلهم ميرضوش ابدا لبناتهم حد عايزهم اد الايد
ياما بنات حلوه كانوا اد الايد .....ياما مكنوش عارفين ولما عرفوا مبقوش قادرين يعيشوا عمرهم كله اد الايد
او هما اد الايد بجد بس بعد عمر وخلفه وولاد صحيوا لقوا نفسهم ناس تانيه أحلامها اد الايد أفكارها دا الايد خروجاتها اد الايد شكلها اد الايد لبسها اد الايد كلها اد الايد
دايما بحب اشوف زوجه اي راجل ناجح عشان اعرف مدى ثقته بنفسه ناجحه ولا اد الايد وبناء عليه
بقيمه في واحد بيحترم اللي على اد الايد وبيمن عليها بالوفاء.... وفي واحد بيخون اد الايد أصلها اصلا على اد الايد وفي واحد غرقان في حبه لنفسه ومش مهتم لوجود اد الايد كدا كدا .. هي محطوطه في مكانها الصح اللي هو قررهولها مهي اد الايد شغاله لوحدها وهي شايفه ان اقصى طموحها انها تعمله مقام وتلف حوليه وتكون اد الايد
ودا لا يعني ان كل اللي بيختار اد الايد وحش بس مكنش جريء كفايه
مجتمع ذكوري مزدوج المعايير ....يحب يشوف البنت الناجحه بس دي تكون بنته اخته لكن مراته ...لاء مراته وضع خاص لازم دايما متنساش مكانها انها اد الايد...تتكلم بحساب تحلم بحساب تفكر بحساب تجرب بحساب تختلف بحساب كله بحساب والحساب حساب ناس تانيه مش حسابها هي فتبدا تتحول حد تاني حد لو شافته وهي صغيره هتخاف وتفضل البنات الحلوه في براويز اد الايد والبنات اللي أهلهم بيحبوهم حقيقيين رافضين واقع اد الايد والمجتمع اللي معندوش ثقه بنفسه يختار اد الايد ويسيب ست الحسن الحقيقيه
وبعد سنين يقارنها باللي رفضت تكون اد الايد من البدايه وقررت تكون نفسها بصدق .. واعيه بطريقها واحلامنا حتى لو بسيطه حتى لو هتفشل وتغلط مليون مره بس هتغلط وتتعلم هتفشل وتقوم عادي الفشل والنجاح مش مقتصر على نوع بحد ذاته الفشل والنجاح حياه ...نسيوا يعلموكي جنب شطارتك اوعي تكوني اد الايد مينفعش بعد كل التعب دا تكوني اد الايد
