20/10/2026
Unha aula tamén pode ser un lugar para regueifar. Para xogar coas palabras, improvisar e coller confianza para expresarse en galego.
Con esa idea seguimos a traballar desde o Concello de Arzúa no Enreguéifate, que este curso chega á súa décima edición. Somos un dos oito concellos que impulsamos este proxecto para achegar a regueifa ás crianzas e á mocidade e facer da nosa tradición oral unha forma de crear e compartir.
Xa estamos dando os primeiros pasos desta nova edición, que comeza cun obradoiro para profesorado. Lupe Blanco, Josinho da Teixeira, Manolo Maseda e Séchu Sende compartirán recursos para levar a improvisación oral en verso ás aulas e traballar a expresión, a escoita e a cooperación entre o alumnado.
A cita será o venres 23 de outubro, de 16:30 a 20:30 h, no Pazo da Cultura de Pontevedra.
O prazo de inscrición remata hoxe, martes 20 de outubro. Hai 45 prazas e, se as solicitudes superan a oferta, terá preferencia o profesorado dos concellos participantes, entre eles Arzúa, e dos niveis aos que se dirixe o proxecto: 5º e 6º de primaria e ESO.
Información e inscricións en enregueifate.gal.
Súmate á regueifa expansiva!
