09/09/2026
Ola Bulideir@s!
Este curso continuamos cos nosos clubs de lectura para alumnado e familias: Bulideiras e Café e Papel.
Clubs Bulideiras
O club de lectura do alumnado de Primaria organizarase en tres niveis: fácil, intermedio e avanzado, para que cada neno ou nena poida escoller as lecturas que mellor se adapten aos seus intereses e nivel lector.
En breve publicaremos as datas das reunións. En cada trimestre abrirase un período de inscrición para cada lectura, cun máximo de 12 participantes por grupo.
A biblioteca facilitará os exemplares necesarios en función do número de persoas inscritas. Se algún participante xa ten o libro na casa, poderá igualmente anotarse e asistir á reunión.
Non é necesario participar en todas as lecturas do curso: cada alumno ou alumna poderá escoller aquelas que máis lle interesen. Ademais, quen participe en tres reunións ao longo do curso poderá asistir a unha actividade especial de fin de curso.
Café e Papel
O club de lectura para persoas adultas da comunidade educativa continuará reuníndose, con carácter xeral, o terceiro venres de cada mes.
A participación é totalmente flexible: non é necesario ler todos os libros do curso e cada persoa poderá asistir ás lecturas que lle interesen.
O club está aberto ás familias en sentido amplo: ademais de pais e nais, tamén poden participar avós, avoas, tíos, tías ou outros familiares que teñan ganas de compartir lecturas e conversa.
Cada mes enviaremos un recordatorio coa lectura correspondente e os datos da reunión.
Agora contádenos: da selección deste curso cal é o que máis vos apetece ler? Deixádenolo en comentarios!
Tamén podedes etiquetar a aquelas persoas que lles poida interesar ❤️.
Buliapertas!
