23/09/2026
🖤 𝗛𝗼𝘅𝗲 𝗲́ 𝘂𝗻 𝗱𝗶́𝗮 𝗺𝗼𝗶 𝘁𝗿𝗶𝘀𝘁𝗲 𝗽𝗮𝗿𝗮 𝘁𝗼𝗱𝗮𝘀 𝗮𝘀 𝘃𝗲𝗰𝗶𝗻̃𝗮𝘀 𝗲 𝘃𝗲𝗰𝗶𝗻̃𝗼𝘀 𝗱𝗲 𝗖𝗮𝗿𝗶𝗻̃𝗼.
O Concello de Cariño lamenta profundamente o falecemento de 𝗝𝗼𝘀𝗲́ 𝗟𝘂𝗶𝘀 𝗔𝗿𝗺𝗮𝗱𝗮 𝗖𝗮𝘀𝘁𝗿𝗼, quen foi o noso alcalde durante tantos anos e unha figura fundamental na historia do noso municipio.
Luis foi alcalde de Cariño desde 1988 ata 1995 e, posteriormente, desde 2003 ata 2011, dedicando moitos anos da súa vida ao servizo da nosa vila e da nosa xente.
A súa figura foi especialmente importante no proceso de segregación de Cariño de Ortigueira. Como presidente da Asociación de Veciños San Bartolo, liderou o movemento veciñal que impulsou a creación do noso Concello.
Aquel proceso culminou o 21 de xaneiro de 1988, coa aprobación da segregación de Cariño, sendo posteriormente o primeiro alcalde do novo Concello e acompañando os seus primeiros pasos como municipio independente.
Durante os seus anos á fronte do Concello, Luis contribuíu tamén á transformación e consolidación de Cariño como municipio, impulsando a posta en marcha de servizos e infraestruturas fundamentais para a nosa vila e para as súas parroquias.
O seu compromiso coa mellora da vida da nosa xente forma parte do legado que deixa no Cariño que hoxe coñecemos.
Máis alá do seu compromiso e do seu traballo por Cariño, queremos lembrar tamén a gran persoa que foi Luis, profundamente vinculada á nosa vila e á nosa xente.
A súa dedicación e o seu cariño por Cariño ao longo de tantos anos permanecerán na memoria da nosa veciñanza.
Hoxe deixounos Luis, e a súa marcha deixa unha fonda tristeza en toda a nosa veciñanza.
Cariño perde a un dos seus alcaldes, pero tamén a unha persoa que foi parte fundamental da súa historia e da súa vida colectiva.
En sinal de respecto, recoñecemento e pesar, o Concello de Cariño decreta tres días de loito oficial, durante os cales as bandeiras dos edificios municipais permanecerán a media asta.
Desde a Corporación Municipal queremos trasladar as nosas máis sinceras condolencias e todo o noso agarimo á súa familia, amizades e persoas achegadas, así como a toda a veciñanza de Cariño que hoxe comparte esta tristeza.
Queremos expresar tamén o noso profundo agradecemento por tantos anos de dedicación, compromiso e traballo por e para Cariño e pola nosa xente.
A súa memoria permanecerá para sempre ligada á historia da nosa vila.
🖤 𝗗𝗲𝘀𝗰𝗮𝗻𝘀𝗲 𝗲𝗻 𝗽𝗮𝘇, 𝗟𝘂𝗶𝘀. 𝗚𝗿𝗮𝘇𝗮𝘀 𝗽𝗼𝗿 𝘁𝗮𝗻𝘁𝗼🩵🤍
