13/10/2026
🏗️ A NOVA NAVE MUNICIPAL DO IRIXO, NA RECTA FINAL
As obras da nova nave municipal están xa preto de rematar. Unha infraestrutura moi necesaria, que non podía agardar máis, e que supón un paso importante para conservar mellor a maquinaria, facilitar o traballo dos servizos municipais e ofrecer unha mellor atención á veciñanza.
Durante anos, a maquinaria do Concello permaneceu á intemperie, exposta á choiva, ao frío e ao deterioro. Unha situación que cumpría resolver, especialmente nun momento no que seguimos ampliando os medios propios para atender as necesidades dos nosos núcleos.
🚜 Ao tractor novo adquirido sumáronse unha minipala cargadora, un rolo especial de limpeza e un remolque. Máis medios para traballar que precisan tamén dun espazo axeitado para a súa conservación e mantemento.
A nova nave permitirá:
✅ Gardar a maquinaria e os vehículos municipais a cuberto, prolongando a súa vida útil e reducindo o deterioro.
✅ Facilitar o mantemento e as pequenas reparacións, para ter os equipos nas mellores condicións.
✅ Dispoñer de espazo para o acopio de materiais e o almacenamento de ferramentas.
✅ Ofrecer unhas instalacións dignas e funcionais aos traballadores municipais.
O Irixo merece unha infraestrutura á altura das súas necesidades, executada para durar e preparada para o futuro. Resolver unha carencia de tantos anos esixía algo máis ca un galpón improvisado para saír do paso. Os recursos públicos deben investirse con responsabilidade, pensando na súa utilidade e evitando que as solucións precarias de hoxe se convertan nos problemas de mañá.
Porque a maquinaria municipal, antes de converterse en peza de museo, ten aínda moito traballo que facer polos nosos pobos. E para iso necesita coidados, mantemento e un lugar axeitado onde gardala.
🤝 Esta actuación conta cun investimento de 140.000 euros e coa colaboración económica da Deputación de Ourense, cunha achega de 77.549,06 euros a través do programa CooperOU. Agradecemos o seu apoio para facer realidade este proxecto.
Cómpre destacar tamén o empeño e a perseveranza da alcaldesa, Rosa María Dalama Lousado, para sacar adiante unha infraestrutura que responde a unha necesidade real do Concello e dos seus traballadores, e cuxos beneficios repercutirán no conxunto da veciñanza.
Coidar a maquinaria é protexer o patrimonio de todos e todas. Mellorar os medios municipais é mellorar os servizos que recibe a veciñanza.
