19/10/2026
📚 Isabel Allende, Gloria Fuertes, Xela Arias… Seguro que os seus nomes vos soan de abondo. Quizais algunha delas vos acompañe no pensamento e na memoria, escribise algunha das lecturas da vosa infancia ou ese libro que aínda hoxe recomendades con cariño.
Este 19 de outubro celebramos o Día das Escritoras para recuperar o legado das mulleres na literatura, dar visibilidade ás súas obras e combater a discriminación que, durante séculos, dificultou que moitas puidesen escribir, publicar e recibir o recoñecemento que merecían.
Detrás de cada unha delas hai unha voz propia, unha maneira de imaxinar e de contar o mundo. Achegarnos ás súas páxinas permítenos coñecer outras experiencias, recoñecernos nelas e ampliar a nosa mirada. E, de cando en vez, tamén nos convida a ter a cabeza nas nubes e descubrir todo o que se pode ver dende alí. ☁️
💜 Dende a Biblioteca Pública de Pontevedra queremos celebrar as que abriron camiño, as que seguen a escribir e as que aínda están por descubrir. Por iso, compartimos este abecedario de autoras: unha pequena selección para reencontrarvos con voces coñecidas e darlles unha oportunidade a outras que quizais aínda non lestes. Na biblioteca atoparedes obras delas!
📍 Aproveitade a visita para descubrir, no segundo andar, o centro de interese que preparamos arredor da amizade entre mulleres, en sintonía co lema desta edición: «As amigas como forma de liberdade».
Porque o recoñecemento tamén se constrúe con cada lectura, cada recomendación e cada historia que compartimos.
📖 Que escritora engadiriades a este abecedario?
