13/08/2026
O BNG reclama medidas urxentes ante as retencións provocadas polas obras da Ponte de Pedra 🚧
O BNG de Cabanas e Pontedeume reclamamos medidas urxentes para minimizar as graves afeccións ao tráfico que están provocando as obras das beirarrúas da Ponte de Pedra, especialmente nun momento do ano no que a afluencia de vehículos nas vilas e na comarca se incrementa considerabelmente.
As retencións que se están producindo na N-651 están a converter desprazamentos habituais de apenas dez minutos en traxectos de trinta ou corenta minutos, xerando importantes molestias para a veciñanza e para todas as persoas que se desprazan por esta vía.
Ademais, este colapso na estrada nacional afecta de xeito indirecto ao tráfico interno, provocando retencións noutras rúas dos dous Concellos.
Cómpre lembrar que, antes do inicio das obras, se trasladou que a planificación dos traballos tería en conta as horas de maior intensidade de tráfico para minimizar as afeccións á circulación.
Porén, o que está a acontecer este verán dista moito desa previsión, con importantes retencións precisamente nun período de elevada mobilidade e afluencia de vehículos.
Desde o BNG consideramos que unha actuación desta importancia debe executarse garantindo, na medida do posíbel, a mobilidade e a seguridade viaria. Máis aínda cando se trata dunha infraestrutura fundamental para as comunicacións entre Pontedeume, Cabanas e o conxunto da comarca do Eume.
Neste sentido, cómpre lembrar que o BNG xa presentou no Congreso distintas iniciativas sobre estas obras e sobre a regulación do tráfico, achegando medidas concretas para evitar este tipo de situacións. Así mesmo, xa reclamamos en anteriores ocasións accións para evitar o colapso da N-651 durante os traballos e garantir alternativas que permitan manter a fluidez. A situación actual demostra que estas medidas seguen sendo urxentes e necesarias.
Os concellos Pontedeume e Cabanas anunciaron que trasladaron ao Ministerio de Transportes e á Demarcación de Estradas a súa preocupación polas retencións. Porén, consideramos que non abonda con trasladar unha queixa: cómpre esixir solucións concretas e facer un seguimento real para que estas se apliquen.
Por iso, desde o BNG de Pontedeume e Cabanas reclamamos aos gobernos municipais que actúen con firmeza ante o Ministerio e esixan unha planificación dos traballos que reduza as afeccións ao tráfico, especialmente durante os períodos de maior intensidade.
A rehabilitación da Ponte de Pedra é unha actuación necesaria, pero a veciñanza non pode asumir as consecuencias dunha planificación insuficiente das obras. É responsabilidade das administracións implicadas traballar para que unha infraestrutura necesaria non se converta nun problema de mobilidade para toda a comarca.
