Turismo de Teo

14/10/2026

Grazasssss Colectivo A Rula, Asociación Cultural e Árbore Arqueoloxía e Restauración S. Coop. Galega. Experiencias didácticas e altamente sostibles!

09/10/2026

A carballeira de Francos converterase nun espazo de xogo e descubrimento para coñecer historias de Teo. A través de probas de exploración sensorial, as familias achegaranse ao Camiño de Santiago, á Feira do San Martiño e á lenda da raíña Lupa.

As persoas participantes buscarán sobres agochados na natureza coas pezas dun quebracabezas e gozarán de propostas de mindfulness e baños de bosque.

Ao rematar, cada crianza levará á casa unha carteira máxica pintada en familia e inspirada na historia de Teo.

Público: crianzas a partir de 6 anos, acompañadas por unha persoa adulta
Prezo: actividade gratuíta con reserva previa. Prazas limitadas. En caso de choiva, realizarase unha actividade alternativa no interior da Casa Común de Francos.

Organiza: GDR Terras de Compostela, no marco do programa Experiencias Terras de Santiago.
Colabora: Concello de Teo.
Executa: Látexos de Turismo.

Bos días! Volvemos a Teo... próxima actividade para familias!

Sábado 17 de outubro en Francos. Decubriremos a historia local de Francos (Camiño de Santiago, Feira do San Martiño, Raíña Lupa) con xogos sensoriais na natureza (e mindfulness).

Inscricións: https://teo.gal/gl/actividades/xogos-de-exploracion-na-natureza-coa-historia-de-teo-en-francos

Feliz venres 💚

30/09/2026

Quen deixou estas pegadas? 👀
Na III Ruta do Románico Teense percorremos, da man do Colectivo A Rula, as igrexas de San Miguel de Rarís, San Cristovo de Reis e Santa María de Lampai. Tres templos rurais sinxelos, transformados ao longo dos séculos, nos que aínda podemos ler a historia nas pedras.
En Rarís detivémonos nas marcas dos canteiros e nas pinturas que falan das distintas etapas da igrexa. En Reis descubrimos capiteis de decoración vexetal, pequenos gravados que a luz axuda a revelar e o carneiro que sostén a cruz sobre a cabeceira. En Lampai, a portada románica e os detalles tallados no interior conducíronnos tamén á memoria do antigo mosteiro.
A visita permitiunos comprender como as formas e os símbolos do románico compostelán chegaron ás igrexas da contorna. E tamén mirar a súa xeografía sagrada: San Miguel nos lugares altos; San Cristovo, asociado aos camiños e ao paso dos peregrinos.
Grazas ao Colectivo A Rula pola interpretación, a todas as persoas participantes polo seu interese e ao Cabido, a Antonio, Fina e María Isabel por facilitarnos o acceso aos templos.
Teo. Todo por descubrir.

29/09/2026

Grazassss Colectivo A Rula, Asociación Cultural. Excelente interpretación patrimonial. Orgullo de poder contar con expertos do noso!!!

12/09/2026

Coñecedes o Monte Piquiño de día? 🌿
Estamos máis afeitos a percorrelo de noite, seguindo a Ruta dos Petróglifos e descubrindo a súa riqueza arqueolóxica. Pero desta vez cambiamos a mirada: fomos descubrir todo o que nos conta o monte cando hai luz.
Con Antón e Belén aprendemos a distinguir breixos e toxos, a descubrir que as matogueiras e mesmo as silvas teñen moito que facer aí —rexeneran, protexen, dan acubillo— e a entender mellor a relación entre a vexetación, os cabalos do monte, os antigos usos gandeiros e unha paisaxe chea de pegadas do pasado.
E apareceu unha pequena xenciana azul 💙. Unha flor que podería ser a pista da presenza dunha rara bolboreta asociada a ela. Quen ía pensar que unha flor podía contarnos tanto?
Ao final, volvemos do Piquiño coa sensación de que levabamos anos mirándoo... pero aínda nos quedaba moito por descubrir