Fundación Fermín Penzol

Inicio
España
Vigo, Galicia
Fundación Fermín Penzol

Cómo llegar Página web

Información de contacto, mapa y direcciones, formulario de contacto, horario de apertura, servicios, puntuaciones, fotos, videos y anuncios de Fundación Fermín Penzol, Biblioteca, Praza da Princesa, 2, Vigo.

27/10/2026

VISITA Á FUNDACIÓN NEIRAS VILAS
O pasado 23 de outubro Xosé Manuel Soutullo e Xosé Manuel Dasilva, director e subdirector da Fundación Penzol, visitaron en Gres a Casa do Romano, sede da Fundación Neira Vilas, onde foron recibidos por Chus Neira, sobriña do escritor e bibliotecaria da Fundación, que forneceu moi interesantes informacións sobre Neira Vilas e Anisia Miranda. Pola súa parte, os visitantes comentaron algunhas das actividades que a Penzol está pensando organizar o ano que vén ao redor da figura de Xosé Neira Vilas, de quen se conserva importante documentación no noso Arquivo, así como unha numerosa colección de monografías de e sobre o autor a quen se lle dedicará o Día das Letras Galegas de 2027. No momento oportuno, informaremos delas.

25/10/2026

NO CENTENARIO DE ANTONIO PÉREZ PRADO (III)
Velaí unha reportaxe fotográfica da mesa redonda que, arredor da figura e obra de Antonio Pérez Prado, organizamos na Penzol, o pasado 22, para conmemorar o centenario do seu nacemento. Na mesma participaron a historiadora Emilia García, o xornalista Xan Carballa e mais o noso padroeiro Silvestre Gómez con tres interesantes e documentadas intervencións nas que verqueron moita luz sobre a súa vida e obra, así como sobre os materiais do seu arquivo persoal, custiodado na nosa institución. Ao remate, tamén interviu un primo de Pérez Prado, que se achegou dende a Terra Chá expresamente a Vigo para acudir ao acto.
Adxuntamos, ademais, unha reprodución cun extenso texto da autoría de Ana Baena, publicado a véspera do evento en ‘Atlántico Diario’, ao que tamén se pode acceder en: https://www.atlantico.net/vigo/galego-fixo-desculpar-presidente-do_1_20261021-4459471.html

16/10/2026

NO CENTENARIO DE ANTONIO PÉREZ PRADO (II)
O xoves 22 de outubro, ás 19 horas, na nosa sede da Casa Galega da Cultura terá lugar un acto conmemorativo do centenario do nacemento de Antonio Pérez Prado. O autor de ‘Los gallegos y Buenos Aires’ naceu nesa capital o 19 de novembro de 1926, cidade onde mantivo unha unha importante actividade en institucións das colectividade galega. En 2012, a súa filla Aixa, cumprindo a vontade do pai, doou á Fundación Penzol o seu importante arquivo.
A xornada, presentada por Malós Cabrera, vicepresidenta segunda da Fundación, contará coa participación de: Emilia García López, historiadora, especialista na recuperación do patrimonio documental da diáspora e do exilio galego (“A palabra acesa na distancia. Antonio Pérez Prado, o contexto histórico na Arxentina e o legado da diáspora galega”), Xan Carballa, xornalista, editor e fotógrafo (“Antonio Pérez Prado, galego de nación”) e Silvestre Gómez Xurxo, presidente da Editorial Sept e membro do noso Padroado (“Pérez Prado na Fundación Penzol”). Entrada libre en función da capacidade.

09/10/2026

NO ANO DE OTERO PEDRAYO (X)
O vindeiro martes, 13 de outubro, ás 19,30 horas, presentarase no salón de actos da nosa sede na Casa Galega da Cultura de Vigo, ‘Obra dramática inédita en castelán’, de Ramón Otero Pedrayo, publicada por Editorial Galaxia, en edición de Manuel F. Vieites. O acto enmárcase nas actividades relacionadas co ano dedicado ao escritor de Trasalba. Os tres textos dramáticos que se recollen no volume, precedidos dun moi completo estudo introdutorio do seu editor, corresponden aos inicios da súa traxectoria literaria, e forman parte do Fondo Otero Pedrayo que se custodia na Fundación Penzol.
Na presentación, Manuel F. Vieites estará acompañado polo director da Fundación, Xosé Manuel Soutullo.

06/10/2026

VISITA AO INSTITUTO DE ESTUDIOS VIGUESES
O pasado 1 de outubro, o noso presidente, Manuel Puga, o director, Xosé Manuel Soutullo, e subdirector, Xosé Manuel Dasilva visitaron a sede do Instituto de Estudios Vigueses (IEV), atendendo o seu convite, que se enmarca dentro do proxecto “Construíndo pontes” que procura establecer proyectos de colaboración entre distintas institucións. Foron recibidos pola presidenta do IEV, Mercedes Bangueses Vázquez, acompañada do vicepresidente, Antonio Giráldez Lomba, e do numerario Antonio Vaamonde Liste.

03/10/2026

PRÓRROGA DA EXPOSICIÓN “‘DE AQUÍ O XERME SAÍU’. PRESENZAS GALEGAS DE CAMÕES”
A Fundación Penzol amplía ata o 17 de xaneiro de 2027 as visitas á exposición “‘De aquí o xerme saíu’. Presenzas galegas de Camões”, instalada con motivo do V centenario do seu nacemento na Casa Galega da Cultura de Vigo. Na mostra exhíbense valiosos materiais bibliográficos e arquivísticos relacionados, en especial, coa recepción de Camões en Galicia. Precisamente, no número 250 da revista ‘Grial’ (xuño 2026) publicouse o traballo do noso subdirector, Xosé Manuel Dasilva, “‘Os Eoas’ e Galaxia. Testemuños inexplorados”, no que se difunden varios documentos conservados na nosa institución relativos aos vínculos de Eduardo Pondal co autor de ‘Os Lusíadas’. Entre eles figuran diversas estrofas manuscritas e impresas de ‘Os Eoas’, unha carta do bardo bergantiñán na que se data con exactitude a finalización do poema e cartas de Ramón Otero Pedrayo, Aquilino Iglesia Alvariño, Ramón Piñeiro, Domingo García-Sabell e Ricardo Carballo Calero, apoiando a mediados dos anos cincuenta a publicación da epopea pondaliana.

30/09/2026

NO CENTENARIO DE ANTONIO PÉREZ PRADO
‘NOVAS PENZOL 33’, OUTUBRO 2026
O 19 de novembro de 1926 nacía en Buenos Aires —onde tamén faleceu o 7 de setembro de 2009— Antonio Pérez Prado, relevante personalidade da colectividade galega en Buenos Aires. A finais da década dos cincuenta tomou contacto coa Asociación Gallega de Universitarios, Escritores y Artistas. Foi membro da Asociación Argentina de Hijos de Gallegos, da que chegou a ser presidente e director do seu voceiro, ‘Alén Mar’. En 1962 viaxou por vez primeira a Galicia, onde entrou en contacto con membros do galeguismo, como Francisco Fernández del Riego, Ramón Piñeiro, Ánxel Fole, Ramón Otero Pedrayo e Domingo García-Sabell. En 1973 publicou ‘Los gallegos y Buenos Aires’, obra do maior interese para coñecer a relevancia da emigración galega na capital porteña. En 2012, a súa filla Aixa, cumprindo a vontade do pai, doou á Fundación Penzol o seu importante arquivo, do que se informa polo miúdo no número 33 do noso boletín ‘Novas Penzol’, que xa que se pode consultar (e descargar) en:

https://hoxe.vigo.org/pdf/PENZOL/NovasPenzol33-AnoAntonioPerezPrado.pdf.

25/09/2026

VISITA DO INSTITUTO SANTIAGO APÓSTOL DE BUENOS AIRES

As visitas de grupos de alumnado do Instituto Arxentino Galego Santiago Apóstol de Buenos Aires coinciden adoito coa volta á plena actividade da nosa Fundación. Desde hai un considerable número de anos, viaxan a Galicia por estas datas cun intenso programa de visitas a lugares de interese histórico e patrimonial, e tamén as nosas principais institucións culturais. Nunca esquecen achegarse á Fundación Penzol, e a nós moito nos anima a súa chegada.
Desta volta, o grupo, composto de vinte e un mozos e mozas, acompañado por dous membros do profesorado do centro, Sebastián Safier e Liliana Durand, seguiron con atención unha charla do noso director, Xosé Manuel Soutullo, sobre a historia, os fondos bibliográficos e documentais que custodia e os obxectivos da Fundación. Tamén os acompañou por algúns espazos da nosa sede, como o gabinete de Ramón Piñeiro e a biblioteca e o museo de Francisco Fernández del Riego.
E recibimos con satisfacción, un agasallo: unha obra sobre papel, titulada 'Tintas e outras especies’, da artista arxentina Lara Palma, que nos entregou, en nome do grupo, o alumno Tobías Sotil.

17/09/2026

SUSPENSIÓN DO SERVIZO DE CONSULTA ON LINE DA NOSA BIBLIOTECA
Informamos que, por razóns de índole técnica, o servizo de consulta por Internet dos fondos da nosa biblioteca non está dispoñible para as persoas interesadas. Informaremos decontado en canto se restableza.
Quen precise información bibliográfica non presencial dos nosos fondos pode dirixir a súa consulta por correo electrónico ao enderezo: [email protected].
O servizo de atención en sala segue atendendo en horario de 9 a 14 horas, de luns a venres.
Por parte, o servizo de consulta do noso portal de arquivo segue estando dispoñible no enlace:
https://fondospenzol.vigo.org/portalArchivo/seleccionopac?action=inicio&OP=OP999&usr=consulta&PT=PT000001
Lamentamos as molestias que agardamos que se poidan resolver á maior brevidade posible.

05/09/2026

CENTENARIO DE ANTONIO PÉREZ PRADO
Logo da paréntese estival, retomamos a actividade en fb lembrando que o 7 de setembro de 2009 falecía en Buenos Aires o hematólogo e intelectual galeguista Antonio Pérez Prado, fillo de emigrantes lucenses.
Nado na capital porteña o 18 de novembro de 1926, este ano cúmprense o centenario do seu nacemento. Coincidindo coa data, a Fundación Penzol celebrará unha xornada sobre quen, entre outros méritos, é autor dunha obra moi singular, ‘Los gallegos y Buenos Aires’ (Ediciones La Bastilla, Buenos Aires, 1973), así como do guión do documental de Jorge Prelorán ‘Castelao. Biografía de un ilustre gallego’ (1980).
No noso arquivo conservamos, e está a disposición para a súa consulta, o seu valioso e variado fondo persoal, doado á institución por vontade do propio Pérez Prado. Sobre esta documentación e mais a súa obra impresa publicarase tamén, en breve, unha nova entrega monográfica do boletín dixital ‘Novas Penzol’, elaborado, como adoito, polo padroeiro Silvestre Gómez Xurxo coa colaboración do noso persoal técnico.

Dirección

Praza Da Princesa, 2
Vigo
36202

Página web

https://accesible-hoxe.vigo.org/movemonos/m_penzol.php?lang=gal#/

Notificaciones

Sea el primero en enterarse: le enviaremos un correo electrónico cuando Fundación Fermín Penzol publique novedades y promociones. Su dirección de correo electrónico no se utilizará para ningún otro fin y puede darse de baja en cualquier momento.