06/10/2026
የኢትዮጵያ ሕብረተሰብ ጤና ኢንስቲትዩት የአመራር አቅምን ለማጎልበት የክዋኔ ኦዲት፣ የስነምግባርና የግዥ እና ንብረት አስተዳደር ስልጠና ሰጠ
የኢትዮጵያ የሕብረተሰብ ጤና ኢንስቲትዩት የተቋሙን የሥራ አፈጻጸም፣ ተጠያቂነትና ታማኝነት ለማጠናከር ያለመ የክዋኔ ኦዲት (Performance Audit)፣ የስነምግባር እንዲሁም የግዥና ንብረት አስተዳደር ስልጠና ለማኔጅመንት አባላትና ለሚመለከታቸው ባለሙያዎች ሰጠ።
የኢንስቲትዩቱ ምክትል ዋና ዳይሬክተር ዶ/ር ሳሮ አብደላ በስልጠናው መክፈቻ ላይ እንደገለጹት፣ ኢንስቲትዩቱ በሕብረተሰብ ድንገተኛ የጤና አደጋ መከላከልና መቆጣጠር፣ በሕብረተሰብ ጤና ምርምር፣ በሀገራዊ የላብራቶሪ አቅም ግንባታ እና በጤና መረጃ አስተዳደር የተሰጡትን ተልዕኮዎች በብቃት ለመፈጸም ብቁና ተጠያቂ አመራር መገንባት ወሳኝ ነው።
የአመራርና የባለሙያ አቅም ግንባታ የተቋሙን የዕለት ተዕለት አፈጻጸም ከማሻሻሉ ባሻገር፣ የተቋሙን ታማኝነትና የሕዝብ እምነት ለማጠናከር ወሳኝ መሆኑን ዶ/ር ሳሮ ገልጸዋል።
በስልጠናው ወቅት የክዋኔ ኦዲት ተቋማዊ የሥራ አፈጻጸምን ለመለካት፣ ክፍተቶችን ለመለየትና ለማሻሻያ እርምጃዎችን ለመውሰድ ያለው ሚና ተነስቷል። በተመሳሳይም ግዥና ንብረትን በግልጽነት፣ በብቃትና በተጠያቂነት ማስተዳደር የተቋሙን ውጤታማነት ለማረጋገጥ ያለው ጠቀሜታ ተብራርቷል።
የስነምግባር መርሆችን በተግባር ማስፈን የተቋሙን ሀብት ከአላግባብ አጠቃቀም ከመጠበቅ ባሻገር የሠራተኞችን ተጠያቂነትና የተቋሙን የሕዝብ አመኔታ ለማጠናከር ያግዛል።
የኢንስቲትዩቱ ዋና ዳይሬክተር ጽ/ቤት ኃላፊ ዶ/ር አማር በርባ በበኩላቸው፣ ስልጠናው ከኢንስቲትዩቱ የሥራ አስፈጻሚዎች፣ ከፌዴራል ዋና ኦዲተር፣ ከፌዴራል ስነምግባርና ፀረ-ሙስና ኮሚሽን እንዲሁም ከግዥና ንብረት ባለሥልጣን መሥሪያ ቤቶች ጋር በመቀናጀት የተዘጋጀ መሆኑን ገልጸዋል።
እንደ ዶ/ር አማር ገለጻ፣ በእነዚህ ዘርፎች የግንዛቤ መፍጠር፣ የአቅም ግንባታና የተቋማዊ አሰራርን ማሻሻል ሥራዎች በቀጣይም ተጠናክረው ይቀጥላሉ።
በመጨረሻም፣ እነዚህ የአቅም ግንባታና የግንዛቤ ሥራዎች ኢንስቲትዩቱ የተሰጠውን ሀገራዊ የሕብረተሰብ ጤና ተልዕኮ በተሻለ ብቃት፣ በግልጽነት፣ በተጠያቂነትና በታማኝነት እንዲፈጽም የሚያግዙ መሆኑ ተገልጿል።
