13/11/2026
የሚኒስቴር መስሪያ ቤቱ አመራሮች እና ሰራተኞች በ2019 በጀት ዓመት እቅድ እና በመጀመሪያው ሩብ ዓመት ሪፖርት ላይ የጋራ ውይይት አደረጉ
አዲስ አበባ፣ ህዳር 4 ቀን 2019 ዓ.ም (ከመልሚ) የከተማና መሰረተ ልማት ሚኒስቴር አመራር እና አጠቃላይ ሰራተኛ በ2019 በጀት ዓመት እቅድ፣ በመጀመሪያው ሩብ ዓመት አፈጻጸም እና ትኩረት የሚሹ ጉዳዮች ላይ ውይይት አካሄደዋል፡፡
የበጀት ዓመቱ እቅድን በተመለከተ በግብ ደረጃ የታቀዱ ዋና ዋና ጉዳዮች ላይ ዝርዝር ማብራሪያ የቀረበ ሲሆን በመጀመሪያው ሩብ ዓመት በየ የስራ ክፍሎች የተሰሩ ዋና ዋና ስራዎች፣ የነበሩ ጥንካሬዎች እና ድክመቶች፣ ያጋጠሙ ችግሮች፣ የተወሰዱ መፍትሄዎች እንዲሁም ትኩረት የሚሹ ጉዳዮች ላይ ዝርዝር ማብራሪያ በሚኒስቴር መስሪያ ቤቱ የስትራቴጂክ ጉዳዮች ስራ አስፈጻሚ በአቶ አብርሃም ዘነበ ቀርቧል፡፡
እንዱሁም ለየት ባለ ሁኔታ የቤቶች እና ከተማ ልማት ዘርፍ፣ የመሰረተ ልማት ዘርፍ እና የከተማ አስተዳደርና አገልግሎት አሰጣጥ ዘርፍን በተመለከተ በዘርፉ መሪ ስራ አስፈጻሚዎች የፓናል ውይይት ተካሄዷል፡፡
የከተማና መሰረተ ልማት ሚኒስቴር ሚኒስትር ክቡር መሐመድ አብዱራህማን(ኢ/ር)የቀረበው ሰነድና የፓናል ውይይቱን በማስመልከት የተነሱ ጥያቄዎች የእቅዳችን አካል በማድረግ በመነጋገር እና በመመካከር የተሻለ አቅም በመፍጠር የምንመራው የከተማ ልማት ዘርፍ እድገትና ከተሜነት ወደሚፈለገው ስልጣኔ መምራት የምርጫ ጉዳይ ሳይሆን ግዴታም ጭምር እንደሆነ ተናግረዋል፡፡
ሚኒስትረሩ የቀጣይ አቅጣጫን አስመልክተው እንደ ከተማና መሰረተ ልማት ሚኒስቴር የሀገራችን የእድገት እጣፋንታ በተመለከተ የተሳሰረ ሃላፊነት የሚጠበቅብን ሲሆን ስራችን ሰው ተኮር በማድረግ የዜጎቻችን መሰረታዊ ችግሮችን የሚፈታ እና በተግባር የሚታይ ስራ ሁላችንም በባለቤትነት እንተገብራለን ብለዋል፡፡
የከተማና መሰረተ ልማት ሚኒስቴር የቤቶችና ከተማ ልማት ዘርፍ ሚኒስትር ዴኤታ ክቡር አቶ ብርሃኑ ዘውዴ በበኩላቸው የመጀመሪያው ሩብ ዓመት የዝግጁት ምዕራፍ እንደመሆኑ በቀጣይ ስራዎችን በትኩረት ከመስራት ባለፈ በሚኒስቴር መስሪያ ቤቱ አዋጆች፣ ፖሊሲዎች፣ የህግ ማዕቀሮች እንዲሁም ደንቦችን ወደ መሬት ለማውረድ እያንዳንዱ ዘርፍ በመቀናጀት እንሰራለን ብለዋል፡፡