19/10/2026
Nageenya waaraa ijaaruun imaammata misoomaarraa adda hin bahu! Shimallis Abdiisaa, Pirezidaantii MNO
Nageenyi Mootummaa Naannoo Oromiyaa biratti bu’uura jireenya hawaasaa qofa osoo hintaane, bu’uura misoomaa, invastimantii, hojii uumuu, oomishtummaafi badhaadhinaati. Ce’umsa hawaas-dinagdee naannichaa qabatamaan milkeessuuf nageenyi waaraan bu’uura murteessaa waan ta’eef, qabeenyaafi humni namaa naannoo nageenya qabu keessatti qofa sirnaan hojii dinagdee keessatti hirmaachuu danda’a. Kanaaf, nageenya waaraa ijaaruun imaammata misoomaa irraa adda hin bahu.
Mootummaan waldhiibinsaafi jibbiinsa siyaasaa hambisuun marii, marabbaa, araaraafi waliigaltee cimsuun nageenya waaraa ijaaruuf hojjechaa jira; marii nagaa kamiifuu karrisaa akkuma yeroo maraa banaadha. Rakkoolee nageenyaa naannoo keenyatti mul’atanis marii, araaraafi waliigaltee ummataatiin furuuf tattaaffiin taasifamu kan ittifufu ta'a. Garaagarummaan siyaasaa gara jeequmsaatti ce’uu hin qabu; falmiin siyaasaa kamiyyuu karaa nagaa, mariifi seeraan gaggeeffamuu qaba. Gochi lubbuu namaa galaafatu, qabeenya mancaasuufi tasgabbii hawaasaa booru kamirraa dhufullee fudhatama hin qabu; nageenya ummataa tiksuufi olaantummaa seeraa mirkaneessuun immoo dirqama mootummaati.
Haata’u malee, nageenyi mootummaa qofaan hin ijaaramu; qalbii, hirmaannaafi tumsa waloo hawaasaa irraa ijaarama. Abbootiin Gadaa, jaarsoliin biyyaa, abbootiin amantaa, dubartoonni, dargaggoonni, hayyoonni, dhaabbileen hawaasaafi qaamoleen siyaasaa hundi nageenya waaraa ijaaruu keessatti gahee qabu. Mootummaan gama isaatiin seera kabachiisuufi nageenya lammiilee mirkaneessuu irratti gahee isaa ni bahata.
Kanaaf, waggoota dhufan keessatti nageenya akka bu’uura misoomaafi badhaadhinaatti ilaaluun, nageenya waaraa, olaantummaa seeraafi waliigaltee hawaasaa walitti hidhuun cimsuun murteessaadha. Nageenyi bu’uura misoomaa ta’ee, misoomni immoo nageenya waaraa cimsa; akkasitti nageenyaafi badhaadhinni wal-deeggaranii ijaaramu.
