Amanuel mental specialized hospital

06/10/2026

የሪፎርሙ ስኬት በሠራተኛው ዝግጁነት ይጀምራል!
አዲስ አበባ፦ መስከረም 26/2019 ዓ.ም (አማ/አእ/ስፔ/ሆ/ል) — የአማኑኤል የአእምሮ ስፔሻላይዝድ ሆስፒታል በየደረጃው ለሚገኙ የአመራር አካላትና ሠራተኞች በሲቪል ሰርቪስ ሪፎርም እና በጤናው ዘርፍ የሪፎርም ትግበራ ዙሪያ የግንዛቤ ማስጨበጫ ውይይት እያካሄደ ይገኛል።
ውይይቱ ከመስከረም 25/2019 ዓ.ም ጀምሮ በተከታታይ እየተካሄደ ሲሆን ዓላማውም የጤናው ዘርፍ ሪፎርም የሚያመጣውን የአሠራር፣ የአመራርና የአገልግሎት ለውጥ በጋራ በመረዳት ሠራተኞች ለሪፎርሙ ትግበራ በእውቀት፣ በክህሎትና በባህሪ እንዲዘጋጁ ማስቻል ነው።
በውይይቱ የሪፎርሙ ዋና ትኩረት ብቁና ንቁ ሠራተኞችን በማፍራት ተገልጋይ ተኮር፣ ቀልጣፋና ውጤታማ የጤና አገልግሎት ማስፋፋት መሆኑ ተገልጿል። ይህንንም ለማሳካት አሠራሮችን ማቀላጠፍ፣ ፈጠራን ማበረታታት፣ አደረጃጀትን ማዘመንና የቴክኖሎጂ አጠቃቀምን ማሳደግ ወሳኝ መሆኑ ተጠቁሟል።
በተጨማሪም በሪፎርሙ ትግበራ የመልካም አስተዳደር ችግሮችን በመለየትና በመፍታት፣ ሕግና ደንብን መሠረት ባደረገ አሠራር የሕዝብን ፍላጎት የሚያሟላ እና ለሀገር ዕድገትና ልማት የሚያበረክት የጤና ሥርዓት መገንባት እንደሚጠበቅም ተገልጿል።
ውይይቱን በንግግር የከፈቱት የሆስፒታሉ ዋና ዳይሬክተር አቶ ኢዳኦ ፈጆ እንደገለጹት የሪፎርሙ ትግበራ ዋና ዓላማ ሠራተኞች በተሰማሩበት የሙያ መስክ ብቁ፣ ንቁና ዘመናዊ ቴክኖሎጂዎችን በብቃት መጠቀም የሚችሉ ሆነው አገልግሎታቸውን ቀልጣፋ፣ ውጤታማና ተገልጋይ ተኮር ማድረግ ነው ብለዋል።
ዋና ዳይሬክተሩ አክለውም ሠራተኞች ከሪፎርሙ ዓላማና ይዘት ውጭ ከሚነዙ አሉባልታዎች ራሳቸውን በማራቅ ሪፎርሙን በትክክል በመረዳትና በተመደቡበት የሥራ መስክ ራሳቸውን በማብቃት ለተቋሙ ስኬት የራሳቸውን ድርሻ እንዲወጡ አሳስበዋል።
“የሪፎርሙ ስኬት በሠራተኛው ዝግጁነት ይጀምራል” ያሉት አቶ ኢዳኦ ሠራተኞች በእውቀት፣ በክህሎትና በባህሪ ራሳቸውን በማብቃት፣ ለለውጥ በመዘጋጀትና የሪፎርሙን መርሆዎች በዕለት ከዕለት ሥራቸው በመተግበር የተገልጋይ እርካታንና የአገልግሎት ጥራትን ማሻሻል እንደሚገባ በአፅንኦት ገልጸዋል።
በመሆኑም የጤናው ዘርፍ ሪፎርም የአንድ ክፍል ወይም የአንድ አመራር ሥራ ብቻ ሳይሆን ከአመራር እስከ ሠራተኛ ድረስ የሁሉንም ተሳትፎ፣ ቁርጠኝነትና የለውጥ ዝግጁነት የሚጠይቅ የጋራ ኃላፊነት መሆኑ ተጠቁሟል።

02/10/2026

02/10/2026

የአማኑኤል አእምሮ ስፔሻላይዝድ ሆስፒታል አመራሮች በግንባታ ላይ ያሉ ፕሮጀክቶችን ጎበኙ
አዲስ አበባ፦ ጥቅምት 22/2019 ዓ.ም (አማ/አእ/ስፔ/ሆ/ል) የአማኑኤል የአእምሮ ስፔሻላይዝድ ሆስፒታል አመራሮች በሆስፒታሉና በጤና ሚ/ር እየተገነቡ የሚገኙ የሠራተኞች መኖሪያ ቤት እና የድንገተኛና የሳይካትሪ ሆስፒታል ፕሮጀክቶችን ጎበኙ።
በጉብኝቱም ፕሮጀክቶቹ የደረሱበት የግንባታ ሂደት፣ የተከናወኑ ሥራዎችን እና ቀጣይ የሥራ እቅዶችን በዝርዝር ተመልክተዋል።
በኤፍ ኢ የግንባታ ሥራ ተቋራጭ ድርጅት እየተገነባ የሚገኘው የሠራተኞች መኖሪያ ቤት ፕሮጀክት 104 አባወራዎችን ማስተናገድ የሚችል ሲሆን ሁለት የመሬት ቤቶችና 12 ፎቆች ያሉት ነው።
የፕሮጀክቱ ግንባታ አሁን ላይ 88 በመቶ መድረሱን የሥራ ተቋራጩ ገልጿል። ቀሪ ሥራዎችም በፍጥነት እየተከናወኑ ሲሆን በቀጣይ አንድ ወር ውስጥ ሙሉ በሙሉ ተጠናቆ ወደ አገልግሎት እንደሚገባም ተገልጿል።
በሌላ በኩል አመራሮቹ በጤና ሚኒስቴር የበላይ ክትትል እየተከናወነ የሚገኘውን የድንገተኛና የሳይካትሪ ሆስፒታል ግንባታ ተዘዋውሮ ተመልክቷል።
ግንባታውን እያከናወነ የሚገኘው ራማ ኮንስትራክሽን እንደገለጸው ፕሮጀክቱ እስካሁን 20 በመቶ የግንባታ ሂደት ላይ ይገኛል ሲሉ ገልፀዋል።
በ6,000 ካሬ ሜትር መሬት ላይ እየተገነባ የሚገኘው ይህ ሕንፃ ስድስት ፎቆች የሚኖሩት ሲሆን በውስጡም የድንገተኛ ሕክምናና የሳይካትሪ ሕክምና አገልግሎቶች የሚሰጡባቸው ክፍሎችና አገልግሎት መስጫ ቦታዎች እንደሚኖሩት ተገልጿል።
የአማኑኤል የአእምሮ ስፔሻላይዝድ ሆስፒታል ዋና ዳይሬክተር አቶ ኢዳኦ ፈጆ በጉብኝቱ ወቅት የፕሮጀክቶቹን የግንባታ ሂደት በጎበኙበት ወቅት እየተከናወኑ ያሉ ሥራዎች አበረታች ደረጃ ላይ መድረሳቸውን ገልጸዋል።
ዋና ዳይሬክተሩ ፕሮጀክቶቹ በተያዘላቸው የጊዜ ገደብ፣ በተገቢው ጥራትና በተወሰነላቸው መስፈርት መሠረት እንዲጠናቀቁ የሆስፒታሉ አመራር በቅርበት ክትትል እንደሚያደርግም ገልፀዋል።
አያይዘውም ሥራ ተቋራጮችንና በፕሮጀክቶቹ የተሳተፉ አካላትን ሥራዎቹ በተያዘላቸው የጊዜ ሰሌዳ እና በጥራት እንዲጠናቀቁና በትጋት እንዲሠሩ አደራ በማለት አበረታተዋል።
የእነዚህ ፕሮጀክቶች መጠናቀቅ የሆስፒታሉን ሠራተኞች መኖሪያ ችግር ለማቃለል እንዲሁም የድንገተኛና የሳይካትሪ ሕክምና አገልግሎቶችን በተሻለ አቅምና ምቹ የሕክምና አካባቢ ለማቅረብ ጉልህ ሚና እንደሚኖራቸውም ተገልጿል።

01/10/2026

ኢሬቻ—የምስጋና፣ የሰላምና የአብሮነት በዓል
አዲስ አበባ፦ መስከረም 21/2019 ዓ.ም (አማ/አእ/ስፔ/ሆ/ል) — የአማኑኤል የአእምሮ ስፔሻላይዝድ ሆስፒታል የኦሮሞ ብሔር ተወላጅ ሠራተኞች ከሆስፒታሉ ማህበረሰብ ጋር በመሆን የኢሬቻ በዓልን በደማቅ የአብሮነት ድባብ አከበሩ።
የኢሬቻ በዓል የምስጋና፣ የሰላም፣ የአንድነት፣ የይቅርታና የመቻቻል እሴቶችን የሚያጎላ በመሆኑ በተለያዩ ዝግጅቶችና የደስታ መግለጫ መርሃ ግብሮች ተከብሯል።
በዝግጅቱ ላይ የኦሮሞ ባህልና ወግ የሚያንጸባርቁ ባህላዊ አልባሳት፣ የባህል ሙዚቃና የጋራ የደስታ ሥነ-ሥርዓቶች ቀርበዋል። ተሳታፊዎችም የኢሬቻ በዓል የሚያስተምራቸውን የሰላም፣ የመቻቻልና የአብሮነት መልዕክቶች በማጉላት በዓሉን በጋራ አክብረዋል።
የሆስፒታሉ ማህበረሰብ የተለያዩ ባህሎችንና በዓላትን በጋራ ማክበሩ በተቋም ደረጃ የሥራ ቦታ አንድነትን፣ መቻቻልንና መከባበር እንዲፈጠርና እንዲጎለብት አስችሏል።

26/09/2026

የዛሬ መሪዎች የነገን ጤና ሥርዓት ይገነባሉ
የወደፊቱን ተቋማዊ ሥራ ፈጠራና ኢኖቬሽን ትግበራ ላይ ዝግጁ የሆኑ የተቋማዊ ችግር ፈቺዎችንና የለውጥ መሪዎችን የመፍጠር ጉዞ
ቢሾፍቱ፣ መስከረም 16/2019 ዓ.ም. — የጤና ሚኒስቴር ከኢንተርኘሪነርሽኘ ልማት ኢንስቲትዩት (Entrepreneurship Development Institute) ጋር በመተባበር ለሆስፒታል መሪዎች ያዘጋጀው “የወደፊቱን ተቋማዊ ሥራ ፈጠራና በኢኖቬሽን ትግበራ ላይ ዝግጁ የሆኑ ተቋማዊ ችግር ፈቺዎችንና የለውጥ መሪዎችን ማፍራት” በሚል ርዕሰ ጉዳይ የተካሄደው የሥልጠና መርሃ-ግብር በስኬት ተጠናቀቀ።
ለተከታታይ 5 ቀናት የተካሄደው ይህ ሥልጠና የሆስፒታል መሪዎች የዛሬን የጤና ሥርዓት ብቻ ከመምራት ባለፈ የነገን ፈተና ቀድመው በመረዳት፣ አዳዲስ ዕድሎችን በመለየትና በፈጠራ መፍትሔዎች ላይ በመመሥረት የጤና ተቋማትን ወደ ተሻለ የአገልግሎት አቅም እንዲመሩ ያለመ ሲሆን በዋናነት የሥልጠናው ዋና ዓላማ የጤና ኢኖቬሽን ሥርዓተ-ምህዳር (Health Innovation Ecosystem) እንዲጎለብት፣ ተቋማት ፈጠራን እንዲያበረታቱ፣ የተለያዩ ባለድርሻ አካላትን እንዲያስተባብሩና የተፈጠሩ መፍትሔዎችን ወደ ተግባር እንዲያሸጋግሩ የሚያስችሉ ስትራቴጂዎችን መሪዎች እንዲያጎለብቱ ማስቻል ነው።
እንዲሁም በጤናው ዘርፍ የፈጠራ ባህልን ለማጠናከር፣ የህዝብ ጤና ችግሮችን በአዲስ አስተሳሰብ ለመፍታትና ለወደፊት ለሚመጡ ለውጦች ዝግጁ የሆኑ መሪዎችን ለማፍራት የሚያግዝ የአቅም ግንባታን ማጠናከር ነው።
ሥልጠናው የዲዛይን አስተሳሰብ (Design Thinking) እና የሥርዓት አስተሳሰብ (Systems Thinking) አቀራረቦችን በመጠቀም ውስብስብ የጤና ችግሮችን ከሥረ-መሠረታቸው በመረዳት ለችግሮቹ ዘላቂና ተግባራዊ መፍትሔ የመንደፍ አቅም ላይ ትኩረት አድርጎ ተሰጥቷል።

በተጨማሪም በዓለም፣ በክልልና በአገር አቀፍ ደረጃ እየተከሰቱ ያሉ ዋና ዋና የለውጥ አቅጣጫዎችን (Megatrends) እና የለውጥ ቀያሾችን በመለየት ሊከሰቱ የሚችሉ የወደፊት ሁኔታዎችን ቀድሞ መመርመር ላይ ተግባራዊ ግንዛቤ እንዲያዝ ተደርጓል።
ይህም የጤና ተቋማት ከችግር በኋላ ምላሽ ከመስጠት ባሻገር ሊመጡ የሚችሉ ለውጦችን ቀድመው በመለየት ዝግጁ እንዲሆኑ የሚያግዝ አቅም ለመገንባት የሚያስችል ነው።
በሥልጠናው የሆስፒታል መሪዎች በፈታኝ ሁኔታዎች፣ በፈጣን ለውጦችና ባልተጠበቁ ሁኔታዎች ውስጥ ተቋማቸውን በብቃት ለመምራት፣ ለለውጥ ፈጣን ምላሽ ለመስጠትና የሰራተኞችን የለውጥ አቅም ለማጎልበት የሚያግዙ ክህሎቶች እንዲጨብጡ ተደርጓል።

26/09/2026

እንኳን ለብርሃነ መስቀሉ በሠላም አደረሳችሁ!
በዓሉ የሠላም፣ የአንድነት፣ የመተሳሰብና የደስታ ኢንዲሆንላችሁ እንመኛለን!

አማኑኤል የአእምሮ ስፔሻላይዝድ ሆስፒታል
ለአእምሮ ጤናዎ እንተጋለን!

21/09/2026

በትብብርና በአስተዋጽኦ የተገኘ እውቅና፤ አማኑኤል ሆስፒታል የምስጋና ወረቀት ተቀበለ
አማኑኤል የአእምሮ ስፔሻላይዝድ ሆስፒታል በጤና ዘርፍ ለሚደረጉ የልማትና የማሻሻያ ሥራዎች በሰጠው አስተዋጽኦና ባደረገው ትብብር ከአዲስ አበባ ከተማ ጤና ቢሮ የምስጋና ወረቀት ተቀበለ።
ይህ የምስጋና ወረቀት ሆስፒታሉ ለጤና ሥርዓቱ ማሻሻያ፣ ለተቋማዊ ትብብር እና ለህብረተሰቡ የተሻለ የጤና አገልግሎት ለማቅረብ ለሚያደርገው ጥረት የተሰጠ እውቅና ነው።

21/09/2026

"ከፈጠራ ወደ ልህቀት፦ አማኑኤል የአእምሮ ስፔሻላይዝድ ሆስፒታል በሥርዓተ-ሥራ ፈጠራ ያስመዘገበው አስደናቂ ውጤት»
አማኑኤል የአእምሮ ስፔሻላይዝድ ሆስፒታል በሥርዓተ-ሥራ ፈጠራ (System Innovation – SBFR) እንዲሁም በራዕይ የተመራ አመራርና ከፍተኛ ተጽዕኖ ያላቸው መፍትሔዎችን በመተግበር ሆስፒታሉ በአንደኛ ምዕራፍ የነበሩትን ወሳኝ የሥራ እንቅፋቶች በማለፍ፣ የአሠራር ሥርዓቶቹን በማሻሻልና በማቀላጠፍ፣ ለሁለተኛ ምዕራፍ ጠንካራ መሠረት በመጣል ለአስመዘገበው አስደናቂ የሥራ አፈጻጸም ከጤና ሚ/ር የእውቅና የምስክር ወረቀት ተበርክቶለታል።

ይህም ወደ ተቋማዊ ዕውቅና (Accreditation) የሚወስደውን መንገድ በማፋጠንና በጤና አገልግሎት አሰጣጥ ዘርፍ አዲስ የላቀ የልህቀት ደረጃ ለማስመዝገብ መሠረት የጣለ መሆኑን ያመላክታል።

18/09/2026

አማኑኤል የአእምሮ ስፔሻላይዝድ ሆስፒታል የሰራተኞች የሸማች ማህበር በይፋ ተመሠረተ
አዲስ አበባ፡ መስከረም 8/2018 ዓ.ም (አማ/አእ/ስፔ/ሆ/ል)
የሰራተኞችን ማህበራዊና ኢኮኖሚያዊ ተጠቃሚነት ለማሳደግ፣ የኑሮ ውድነት የሚያስከትለውን ጫና ለማቃለል እና ሰራተኞች የዕለት ከዕለት ፍጆታ እቃዎችን በተመጣጣኝ ዋጋ እንዲያገኙ ለማስቻል ግቡ በማድረግ የተነሳው “አማኑኤል የአእምሮ ስፔሻላይዝድ ሆስፒታል የሰራተኞች የሸማች ማህበር'' "ህብረት" በሚል ስያሜ በይፋ ተመሠረተ።
ማህበሩ ምስረታውን ያከናወነው መስከረም 8/2018 ዓ.ም ሁሉም አባላት በተገኙበት በተካሄደ የምስረታ ጉባኤ ነው።
ማህበሩ የተመሠረተው የማህበራት ማደራጃና ማቋቋሚያ የሚፈቅደውን ደንብና መመሪያ ተከትሎ ሲሆን ከአዲስ ከተማ ክፍለ ከተማ የማህበራት ማደራጃና ማቋቋሚያ የስራ ዘርፍ ሃላፊዎችም በምስረታው ሂደት አስፈላጊውን ድጋፍና ትብብር አድርገዋል።
የሰራተኞችን የኑሮ ጫና ለማቃለል የተቋቋመው ይህ ማህበር ዋነኛ ዓላማ የሆስፒታሉ ሰራተኞች ለዕለት ከዕለት ኑሮ የሚያስፈልጓቸውን የፍጆታ እቃዎችና መሰረታዊ አገልግሎቶች በተመጣጣኝና ተደራሽ ዋጋ እንዲያገኙ ማስቻል ነው።
ይህም ሰራተኞች በጋራ በመደራጀት የግዢ አቅማቸውን እንዲያሳድጉ፣ አስፈላጊ የኑሮ ውጤቶችን በተሻለ የግዢ ሁኔታ እንዲያገኙ እና ከኑሮ ውድነት ጋር ተያይዞ የሚፈጠረውን ጫና ለማቃለል የራሳቸውን የጋራ አቅም እንዲጠቀሙ ዕድል ይፈጥራል።
በተጨማሪም የሸማች ማህበሩ ምስረታ የሰራተኞችን የባለቤትነት ስሜት፣ የትብብር መንፈስና የጋራ የመልማት አቅም ለማጠናከር የሚያግዝ መሆኑ ተገልጿል።
በምስረታ መርሃ ግብሩ ላይ የተገኙት የሆስፒታሉ የሥራ አመራር አካላትና ሰራተኞች የሸማች ማህበሩ መመስረት ሰራተኞች የኑሮ ጫናን ለማቃለል የሚያበረክተውን ሚና አንስተዋል።
ማህበሩ በጠንካራና በተጠያቂነት ላይ የተመሠረተ የአሰራር ስርዓት እንዲመራ የሚያስችል የኮሚቴ አባላት በምስረታ ጉባኤው በአባላቱ ሙሉ ድምፅ ተመርጠው ፀድቀዋል።
የአማኑኤል የአእምሮ ስፔሻላይዝድ ሆስፒታል የሰራተኞች የሸማች ማህበር በቀጣይ ለአባላቱ የሚሰጣቸውን የፍጆታ እቃዎችና መሰረታዊ አገልግሎቶች በየደረጃው ለማስፋፋት እንደሚሰራ ተመላክቷል።
የሸማች ማህበሩ መመስረት በአንድ በኩል ሰራተኞች በጋራ የኑሮ ውድነትን ለመቋቋም ያላቸውን አቅም የሚያጠናክር ሲሆን፣ በሌላ በኩል የትብብር፣ የባለቤትነትና የጋራ ኃላፊነት ባህልን ለማጠናከር የሚያግዝ ተግባር መሆኑ ተገልጿል።
በመጨረሻም “በጋራ መደራጀት፣ በጋራ መጠቀም፣ በጋራ መልማት” በሚል መንፈስ የተመሠረተው ይህ የሰራተኞች የሸማች ማህበር በቀጣይ ስራዎቹን በይፋ በማስጀመር የሰራተኞችን ማህበራዊና ኢኮኖሚያዊ ጥቅም ለማስጠበቅ የበኩሉን ሚና እንደሚወጣ ተመላክቷል።