Construction Management Institute

21/09/2026

ኢንስቲትዩቱ ከኦሮሞ ብሔረሰብ አስዳደር ዞን ጋር በመተባበር ስልጠና መስጠት ጀመረ

መስከረም 11 ቀን 2019 ዓ.ም./ኬሚሴ

የኮንስትራክሽን ማኔጅመንት ኢንስቲትዩት ከኦሮሞ ብሔረሰብ ልዩ ዞን አስተዳደር የኮንስትራክሽን ጽ/ቤት ጋር በመተባበር በኮንስትራክሽን ሕግ፣ ጤና አጠባበቅና ደህንነት ላይ ያተኮረ የአቅም ግንባታ ስልጠና መስጠት ጀመረ።

በስልጠናው መክፈቻ ሥነ-ሥርዓት ላይ የኢንስቲትዩቱ የዋና ዳይሬክተር ጽ/ቤት ኃላፊ አቶ ታርኩ እንዳለ ተገኝተዋል።

አቶ ታርኩ በንግግራቸው፣ የኮንስትራክሽን ዘርፍ የሀገሪቱን የልማት ጉዞ ከሚደግፉ ዘርፎች መካከል ቀዳሚ መሆኑን ገልጸዋል። ዘርፉ በርካታ ተዋናዮች የሚሳተፉበት፣ ውስብስብ ሂደቶችን የሚከተልና የጥቅም ግጭት ሊስተዋልበት የሚችል መሆኑንም አንስተዋል።

በመሆኑም ሁሉም የዘርፉ ተዋናዮች፣ በተለይም አመራሮችና ባለሙያዎች፣ የተሰጣቸውን ሚና በብቃትና በኃላፊነት መወጣት እንደሚገባቸው ጠቁመዋል።

ለዚህም በሥራ ላይ የሚሰጥ የአቅም ግንባታ ስልጠና ወሳኝ ሚና እንዳለው የገለጹት አቶ ታርኩ፣ የሚሰጠው ስልጠናም የዘርፉን አመራሮችና ባለሙያዎች አቅም ለማጎልበት እንደሚያግዝ ተናግረዋል።

የዞኑ የኮንስትራክሽን ጽ/ቤት ኃላፊ ኢ/ር ሰይድ ሁሴን በበኩላቸው፣ በሥራ ላይ ላሉ አመራሮችና ባለሙያዎች የአቅም ግንባታ ስልጠና ለመስጠት በርካታ ጥረቶች ሲደረጉ መቆየታቸውን ገልጸዋል።

ኢንስቲትዩቱ የዞኑን የስልጠና ጥያቄ በመረዳት ፈጣን ምላሽ በመስጠቱ ምስጋና ያቀረቡት ኢ/ር ሰሂድ፣ ስልጠናው በዘርፉ ያሉ የእውቀትና የክህሎት ክፍተቶችን ከመሙላት አንጻር ከፍተኛ ሚና እንደሚኖረው እምነታቸውን ገልጸዋል።

በመሆኑም ሰልጣኙ ስልጠናውን በጥብቅ ዲስፒሊን በመከታታል እና ከስልጠናው ባገኘው ዕውቀት መሠረት በተግባር ላይ በማዋል ውጤት ማስመዝገብ እንዳለበትም አሳስበዋል።

ስልጠናው ለአራት ተከታታይ ቀናት የሚሰጥ ሲሆን፣ ከኬሚሴ ከተማ፣ ከጨፋ ደዋ፣ ከዞኑ የኮንስትራክሽን ጽ/ቤትና ከተለያዩ የዞኑ ወረዳዎች የተውጣጡ አመራሮችና ባለሙያዎች በስልጠናው እየተሳተፉ ይገኛሉ።

16/09/2026

ከኢትዮጵያ ፕሬስ ድርጅት ጋር በመተባበበር የተዘጋጀ

15/09/2026

ኢንስቲትዩቱ ከሁቤይ ዩኒቨርሲቲ ጋር በትብብር ሊሠራባቸው በሚችሉ ጉዳዮች ላይ ውይይት አደረገ

መስከረም 5 ቀን 2019 ዓ.ም. / አዲስ አበባ

የኮንስትራክሽን ማኔጅመንት ኢንስቲትዩት የኮንስትራክሽን ኢንዱስትሪውን ተወዳዳሪና ውጤታማ ለማድረግ ከተለያዩ ሀገር አቀፍና ዓለም አቀፍ ተቋማት ጋር በትብብርና በቅንጅት እየሠራ ይገኛል።
ይህንን ትብብር ይበልጥ ለማጠናከርም በቻይና ሀገር በሚገኘው ሁቤይ ዩኒቨርሲቲ ቴክኖሎጂ ኢንስቲትዩት (Hubei University of Technology) እና በአዲስ አበባ ሳይንስና ቴክኖሎጂ ዩኒቨርሲቲ መካከል በኢትዮጵያ ለመገንባት በታሰበው የጋራ የኮንስትራክሽን ላብራቶሪ ማዕከል(Belt and Road Joint Laboratory) እና ተያያዥ የአቅም ግንባታ ፕሮጀክት ስራዎች ላይ ተሳታፊ ሊሆን በሚችልበት ጉዳዮች ላይ ውይይት አድርጓል።

በውይይት መድረኩ ላይ የተገኙት የኢንስቲትዩቱ ዋና ዳይሬክተር ኢንጅነር ታምራት ሙሉ፣ ኢንስቲትዩቱ የኮንስትራክሽን ዘርፉ ተዋናዮች የአቅም መገንቢያ ማዕከል በመሆን፣ የኢንዱስትሪውን ችግሮች ሊፈቱ የሚችሉ ቴክኖሎጂዎችን በመለየትና በተግባር ላይ እንዲውሉ ለመደገፍ፣ የገበያ ክፍተት ባለባቸው የዘርፉ የሥራ መስኮች ላይ የማማከር እንዲሁም የምህንድስናና የኢንጅነሪንግ ልዕቀት ማዕከል ለመገንባት እየሠራ መሆኑን ገልጸዋል።

የልዕቀት ማዕከሉ የመጀመሪያ ምዕራፍ ግንባታ እየተጠናቀቀ መሆኑን የጠቀሱት ዋና ዳይሬክተሩ፣ ማዕከሉ ከሚኖረው ግዝፈትና ውስብስብነት አንጻር የቴክኒክና የፋይናንስ ድጋፍ እንደሚያስፈልገው ጠቁመዋል።

በተጨማሪም ብቃት ያላቸውን የኮንስትራክሽን ዘርፍ ባለሙያዎች ለማፍራት የተለያዩ ስታንዳርዶችን በመቅረጽ ለተጠቃሚዎች ተደራሽ ለማድረግ እየተሠራ መሆኑንና አንዳንድ ሥልጠናዎችን በአካል በመገኘት ከሚሰጥበት አሠራር ወደ ዲጂታል ሥርዓት ለማሸጋገር የአሠራር ሥርዓት መዘርጋቱን አስረድተዋል። እነዚህ ተግባራት በታለመላቸው ልክ ውጤታማ እንዲሆኑ ቻይና የተከተለችውን ልምድና ስልት መማር እንዲሁም በተለያዩ መስኮች በትብብር መሥራት እንደሚያስፈልግም ገልጸዋል።

በመድረኩ የተሳተፉት የኢንስቲትዩቱ አመራሮችም ኢንስቲትዩቱ ከተሰጠው ኃላፊነትና ተልዕኮ አንጻር ከሁቤይ ዩኒቨርሲቲ ጋር በጋራ ሊሠራባቸው የሚችሉ የትብብር መስኮችን በማንሳት ለኢንዱስትሪው ውጤታማነት ሊያበረክቱ የሚችሉ ሃሳቦችን አቅርበዋል።

የሁቤይ ዩኒቨርሲቲ ቴክኖሎጂ ኢንስቲትዩት የBelt and Road Joint Laboratory ተወካይና የአፍሪካ አስተባባሪ ረዳት ፕሮፌሰር ዌንዳ ሉ በበኩላቸው፣ ዩኒቨርሲቲው በኮንስትራክሽን ዘርፍ ሰፊ ልምድ እንዳለውና ከኢንዱስትሪው ጋር በተያያዙ ቴክኖሎጂዎች ላይ ብቃትና ልምድ ያላቸው ባለሙያዎችን ያቀፈ በመሆኑ ለጋራ ተጠቃሚነት ከኢንስቲትዩቱ ጋር በትብብር ለመሥራት ዝግጁ መሆኑን ገልጸዋል።

በውይይቱ የተነሱትን የትብብር ጉዳዮች በማጠናቀርና በሰነድ መልክ በማዘጋጀት ከዩኒቨርሲቲው ከፍተኛ አመራሮች ጋር በመጋራት፣ በቀጣይ ለሚደረገው የትብብር ስምምነት መነሻ እንዲሆኑ እንደሚደረግም ገልጸዋል።

የአዲስ አበባ ሳይንስና ቴክኖሎጂ ዩኒቨርሲቲ የBelt and Road Joint Laboratory ፕሮጀክት ተጠሪ ፕሮፌሰር ተስፋዮ አለሙ በበኩላቸው፣ ከቻይናው ዩኒቨርሲቲ ጋር በተለያዩ መስኮች በጋራ ሲሠሩ መቆየታቸውን በመግለጽ፣ በቀጣይም ኢንስቲትዩቱ በኮንስትራክሽን ኢንዱስትሪው ሊያሳካ ያቀዳቸውን ዓላማዎች እውን ለማድረግ በቅንጅት እንደሚሠሩ ተናግረዋል።

በመጨረሻም የኢንስቲትዩቱ ዋና ዳይሬክተር ለእንግዶቹ ስጦታ አበርክተው፣ በኦሮሚያ ብሔራዊ ክልል ሰንዳፋ በኬ እየተገነባ ያለውን የልዕቀት ማዕከል ፕሮጀክት እንዲጎበኙ በመጋበዝ የዕለቱ መርሐ ግብር ተጠናቋል።

11/09/2026

10/09/2026

የእንኳን አደረሳችሁ መልዕክት ከዋና ዳይሬክተር

ውድ የኢንስቲትዩታችን ሠራተኞች፣ የኮንስትራክሽን ዘርፍ ባለድርሻ አካላት እና የተከበራችሁ የሀገራችን ሕዝቦች፤

እንኳን ለአዲሱ 2019 ዓ.ም. በሰላም፣ በጤናና በደስታ አደረሳችሁ!

አዲሱ ዓመት የተሻለ አፈጻጸምን፣ የበለጠ ትብብርን እና የላቀ ውጤትን የምናስመዘግብበት ዓመት እንዲሆን ከልብ እመኛለሁ፡፡

ያለፈው ዓመት ኢንስቲትዩታችን በርካታ ስኬቶች ያስመዘገበበት ዓመት ነበር፡፡

ይህም በሠራተኞቻችን ትጋት፣ ቁርጠኝነት፣ ተባብሮ መሥራት እና በባለድርሻ አካላት ትብብር የመጣ ውጤት ነው፡፡

በመሆኑም ለመላው የኢንስቲትዩቱ ሠራተኞችና ባለድርሻ አካላት ከልብ የመነጨ ምስጋናዬን አቀርባለሁ።

በአዲሱ ዓመትም የታቀዱትን ከግብ የሚናደስበት፣ የተጀመሩ ሥራዎችን የምናጠናቅቅበት፣ አዳዲስ ሀሳቦችን ወደ ተጨባጭ ውጤት የምንቀይርበት እና በጥራት፣ በቅልጥፍናና በተጠያቂነት የላቀ አፈጻጸም የምናስመዘግብበት ዓመት እንድሆንልን እያልኩ፣ ዓመቱ የሰላም፣ የአንድነት፣ የብልጽግናና የስኬት ዓመት እንዲሆንልን እመኛለሁ።

መልካም አዲስ ዓመት!

ኢ/ር ታምራት ሙሉ
የኢንስቲትዩቱ ዋና ዳይሬክተር

10/09/2026

ኢንስቲትዩቱ ከኢት- ኦንላይን ኮሌጅ ጋር የመግባቢያ ስምምነት ተፈራረመ

አዲስ አበባ፣ ጳጉሜ 5 ቀን 2018 ዓ.ም.

የኮንስትራክሽን ማኔጅመንት ኢንስቲትዩት የዘርፉን ተዋናዮች ተወዳዳሪና ውጤታማ ለማድረግ እየሰጠ ያለውን የአቅም ግንባታ ስልጠና የበለጠ ተደራሽ ለማድረግ እንድያስችለው ከኢት- ኦንላይን (ET-Online) ኮሌጅ ጋር የመግባቢያ ስምምነት ተፈራረመ።

በስምምነት ፊርማ ሥነ-ሥርዓቱ ላይ የተገኙት የኢንስቲትዩቱ ዋና ዳይሬክተር ኢ/ር ታምራት ሙሉ፣ ስምምነቱ ለኢንስቲትዩቱ ከተሰጡት ኃላፊነቶች መካከል አንዱ የሆነውን ሀገራዊ የኮንስትራክሽን ማኔጅመንት አቅም የመገንባት ሥራ ለማጠናከር የሚያግዝ መሆኑን ገልጸዋል።

ይህም ለዘርፉ ተዋናዮች ተግባርን መሠረት ያደረጉ ስልጠናዎችን በመስጠት የተሻለ የመፈጸም አቅም እንዲኖራቸው ማስቻል መሆኑን ጠቁመዋል።

ኢንስቲትዩቱ ከዚህ ቀደም በሰጣቸው ስልጠናዎች የኮንስትራክሽን ዘርፉ ተወዳዳሪና ውጤታማ እንዲሆን አስተዋጽኦ ቢያደርግም፣ በተደራሽነት ረገድ ግን ውስንነቶች እንደነበሩ ዋና ዳይሬክተሩ ገልጸዋል።
በመሆኑም ይህንን ችግር ለመቅረፍ “ስልጠና በማንኛውም ሰዓት፣ በሁሉም ቦታ” በሚል መሪ ቃል በዲጂታል ይዘት (Online) ስልጠና መስጠት የሚያስችል አሠራር ሥርዓት መዘርጋቱን ጠቅሰዋል።
“በዲጅታል የሚሰጡስልጠናዎቹንም የበለጠ ተደራሽ ለማድረግ ከኢት- ኦንላይን ኮሌጅ ጋር የመግባቢያ ስምምነት በመፈራረም በጋራ መሥራት አስፈላጊ ሆኗል” ብለዋል።

በሌላ በኩል፣ ኢት- ኦንላይን ኮሌጅን በመወከል በስምምነቱ ፊርማ ሥነ-ሥርዓት ላይ የተገኙት የኮሌጁ ፕሬዚዳንት ዶ/ር ሀብታሙ መለስ፣ ኮሌጁ ሀገሪቱ ዲጂታል ኢትዮጵያን እውን ለማድረግ እያደረገች ያለውን ጥረት በመደገፍ የበኩሉን ሚና እየተጫወተ መሆኑን ገልጸዋል።

ኮሌጁ ከኢንስቲትዩቱ ጋር በተለያዩ የሥራ መስኮች በጋራ ሲሠራ መቆየቱን የጠቆሙት ዶ/ር ሀብታሙ፣ በዚህ ስምምነትም የተጀመረውን ትብብር የበለጠ በማጠናከር ሥራውን ወደ ስኬት እንደሚያደርሱ ተናግረዋል።

ከዚህም ባሻገር ኮሌጁ ከተለያዩ ዓለም አቀፍ ዩኒቨርሲቲዎች ጋር ቅርበትና ግንኙነት ያለው በመሆኑ፣ የኢንስቲትዩቱን የውስጥ አቅም ከማጎልበት አንጻርም የበኩሉን ሚና እንደሚጫወት ገልጸዋል።
በስምምነቱ መሠረት ከስልጠናዎቹ የሚገኘው ገቢ 40 በመቶ ለኢንስቲትዩቱ፣ 60 በመቶ ደግሞ ለኮሌጁ እንደሚከፈል ተገልጿል።

በአጠቃላይ፣ የስምምነቱ ዋነኛ ዓላማ የአቅም ግንባታ ስልጠናዎችን ከአካባቢ ርቀት፣ ከጊዜ አለመመቸትና በአካል በመገኘት ስልጠና ከመውሰድ ጋር ተያይዘው ይከሰቱ የነበሩ ተግዳሮቶችን በመቅረፍ ስልጠናዎቹን በዲጂታል መንገድ ተደራሽ ማድረግ ነው።

ይህም የኮንስትራክሽን ዘርፉ ተዋናዮች በአቅማቸው የደረጁ፣ የመፈጸም ብቃታቸው የጠነከረና በዘርፉ ተወዳዳሪ እንዲሆኑ ለማስቻል የሚያግዝ መሆኑ ተገልጿል።

09/09/2026

ኢንስቲትዩቱ ዝቅተኛ ገቢ ላላቸው ሠራተኞችና ወላጅ አልባ ሕፃናት የማዕድ ማጋራት ሥነ-ሥርዓት አካሄደ

ጳጉሜ 4 ቀን 2018 ዓ.ም. | አዲስ አበባ

የኮንስትራክሽን ማኔጅመንት ኢንስቲትዩት ዝቅተኛ ገቢ ላላቸው ሠራተኞቹና ከሠራተኞች ደመወዝ ተቆራጭ በማድረግ እየተንከባከባቸው ላሉ ወላጅ አልባ ሕፃናት በዓሉን በደስታ እንዲያሳልፉ የማዕድ ማጋራት ሥነ-ሥርዓት አካሂዷል።

በሥነ-ሥርዓቱ ላይ የተገኙት የኢንስቲትዩቱ ዋና ዳይሬክተር ኢ/ር ታምራት ሙሉ፣ መንግሥት ሰው ተኮር ፖሊሲን በመከተል ዝቅተኛ ገቢ ያላቸው ዜጎች በዓላትን በደስታ እንዲያሳልፉ በጠቅላይ ሚኒስትር ዐቢይ አህመድ (ዶ/ር) አነሳሽነት የማዕድ ማጋራት ተግባር መጀመሩን ገልጸዋል።

በዚህም መሠረት ኢንስቲትዩቱ እንደ ተቋም አቅሙ በፈቀደ መጠን ዝቅተኛ ገቢ ላላቸው ሠራተኞች እንዲሁም ተቋሙ እየተንከባከባቸው ላሉ ወላጅ አልባ ሕፃናት የማዕድ ማጋራት ተግባር ማከናወኑን አስረድተዋል።

ዋና ዳይሬክተሩ አክለውም፣ መንግሥት በአሁኑ ወቅት ዘላቂ ልማትን በማምጣት የበለጸገችና የተሻለ ሀገር እንድትኖረን ሰፊ ርብርብ እያደረገ መሆኑን ገልጸዋል።

በተካሄደው የማዕድ ማጋራት መርሐ ግብር 25 የኢንስቲትዩቱ ሠራተኞችና 6 ወላጅ አልባ ሕፃናት፣ በድምሩ 31 ተጠቃሚዎች ተካተዋል።

የማዕድ ማጋራቱ ዓላማም የበዓሉን ደስታ በመጋራት፣ በተቋሙ ውስጥ የመተሳሰብ፣ የመተባበርና የማኅበራዊ ኃላፊነት ባህልን ማጠናከር መሆኑ ተገልጿል።

07/09/2026

የኢንስቲትዩቱ አመራሮችና ሠራተኞች የአፈጻጸም ስምምነት ቻርተር ተፈራረሙ

ጳጉሜ 2 ቀን 2018 ዓ.ም. | አዲስ አበባ

የኮንስትራክሽን ማኔጅመንት ኢንስቲትዩት የ2019 በጀት ዓመት የፊዚካልና የማስፈጸሚያ በጀት ዕቅድ በማዘጋጀት በየደረጃው ተግባራዊ ለማድረግ እየሠራ ይገኛል።

ዕቅዱን በተሻለ ሁኔታ ተግባራዊና ውጤታማ ለማድረግም በተቋም ደረጃ የተዘጋጀውን ዕቅድ ከመሪ ሥራ አስፈጻሚ እስከ ፈጻሚ ሠራተኛ ድረስ በካስኬድ (Cascade) በማውረድ፣ እያንዳንዱ አመራርና ሠራተኛ የሚጠበቅበትን ውጤት በግልጽ እንዲያውቅና በአፈጻጸሙ እንዲመዘን የአፈጻጸም ስምምነት ቻርተር የመፈራረም ሥነ-ሥርዓት ተከናውኗል።

በሥነ-ሥርዓቱ ላይ የኢንስቲትዩቱ ዋና ዳይሬክተር ኢ/ር ታምራት ሙሉ እንደገለጹት፣ 2019 በጀት ዓመት ኢንስቲትዩቱ በመደበኛነት ከተያዙ ተግባራት በተጨማሪ ማህበረሰብ ተኮር ተግባራትንም የሚያከናውንበት ዓመት ነው።

በመሆኑም በየደረጃው የሚገኙ አመራሮችና ሠራተኞች የያዙትን ኃላፊነት ተገንዝበው በቁርጠኝነትና በተጠያቂነት ሊያከናውኑ እንደሚገባ ገልጸዋል።

የአፈጻጸም ስምምነቱ ዋና ዓላማም የተቋሙን ግቦች በየደረጃው ለፈጻሚዎች በማውረድ ውጤታማ አፈጻጸምን ማረጋገጥ፣ የእያንዳንዱን ፈጻሚ አፈጻጸም በውጤት ላይ በመመስረት መለካትና የተሻለ ውጤት ያስመዘገቡ አመራሮችና ሠራተኞችን በእውቅናና በማበረታቻ ማሳደግ መሆኑን ዋና ዳይሬክተሩ ጠቁመዋል።

በሥነ-ሥርዓቱ ላይ ዋና ዳይሬክተሩ ከጥናትና ምርምር ዘርፍ እና ከአቅም ግንባታ ዘርፍ ም/ዋና ዳይሬክተሮች፣ እንዲሁም ከሥራ አመራር ዋና ሥራ አስፈጻሚና ከዋና ዳይሬክተር ጽ/ቤት ኃላፊዎች ጋር የአፈጻጸም ስምምነቱን ተፈራርመዋል። ም/ዋና ዳይሬክተሮቹም በሥራቸው ከሚገኙ መሪ ሥራ አስፈጻሚዎች ጋር ስምምነቱን ፈርመዋል።

የአፈጻጸም ስምምነቱ የመፈራረም ሂደት እስከ ታችኛው የፈጻሚ ደረጃ ድረስ የሚወርድ ሲሆን፣ እስከ መጪው ጳጉሜ 4 ቀን 2018 ዓ.ም. ሙሉ በሙሉ የሚጠናቀቅ መሆኑ ተገልጿል።

04/09/2026

በኮንስትራክሽን ደህንነት፣ ጤና አጠባበቅና ሥነ-ምግባር ላይ ያተኮረ ስልጠና ተጠናቀቀ

ነሐሴ 29 ቀን 2018 ዓ.ም. / አዲስ አበባ

የኮንስትራክሽን ማኔጅመንት ኢንስቲትዩት ከኢትዮጵያ ኮንስትራክሽን ሥራ ተቋራጮች ማኅበር ጋር በመተባበር ለሦስት ተከታታይ ቀናት ሲሰጥ የነበረውን በኮንስትራክሽን ደህንነት፣ ጤና አጠባበቅና ሥነ-ምግባር ላይ ያተኮረ ስልጠና አጠናቀቀ።

ስልጠናው የተሰጠው በኮንስትራክሽን ዘርፍ ለተሰማሩ ባለሙያዎችና ተዋናዮች ሲሆን፣ ዓላማውም በዘርፉ የሚስተዋሉ የደህንነት፣ የጤና አጠባበቅና የሥነ-ምግባር ችግሮችን ለመቅረፍ የተሳታፊዎችን ግንዛቤና አቅም ለማሳደግ እንደሆነ ለማወቅ ተችሏል።

በስልጠናው ማጠናቀቂያ መርሐ-ግብር ላይ የተገኙት የኢንስቲትዩቱ የስልጠናና ብቃት ምዘና መሪ ሥራ አስፈጻሚ ኢ/ር ቤዛዊት ጌታቸው፣ የኮንስትራክሽን ደህንነት፣ ጤና አጠባበቅና ሥነ-ምግባር ለኢንዱስትሪው ተወዳዳሪነትና ውጤታማነት ወሳኝ ጉዳዮች መሆናቸውን ገልጸዋል።

በመሆኑም ሁሉም ባለድርሻ አካላት በዘርፉ እየታዩ ያሉ የደህንነትና የሥነ-ምግባር ችግሮችን በመቅረፍ ረገድ በቁርጠኝነት መሥራት እንዳለባቸው አሳስበዋል።

ስልጠናው በአመራር ደረጃ ላሉት ቢሰጥ የበለጠ ጠቃሚ እንደሚሆን ከሰልጣኞች ለቀረበው ሀሳብ ኢ/ር ቤዛዊት በሰጡት ምላሽ፣ የኮንስትራክሽን ደህንነትና ሥነ-ምግባር ጉዳይ በአንድ ወገን ብቻ ሊሳካ የሚችል እንዳልሆነ ጠቁመዋል። በመሆኑም በተቻለ መጠን ተደራሽ ለማድረግ ጥረቶች እየተደረጉ መሆኑን ጠቁሞ በቀጣይም ኢንስቲትዩቱ ከማኅበሩ ጋር በመተባበር ስልጠናውን ተደራሽ ላልሆኑት አመራሮችና ለሌሎች ተዋናዮች ተደራሽ ለማድረግ ጥረት እንደሚያደርግ ገልጸዋል።

በቀጣይም በስልጠናው የተገኘው እውቀት በፕሮጀክቶች ላይ በተግባር መዋሉን ከሚመለከታቸው አካላት ጋር በመተባበር ክትትል እንደሚደረግም አስገንዝበዋል።

በሌላ በኩል፣ የኢትዮጵያ ኮንስትራክሽን ሥራ ተቋራጮች ማኅበር የቦርድ ሂሳብ ሹም ዶ/ር ዘለቀ ረዲ፣ ስልጠናው በዘርፉ ተጨባጭ ለውጥ ለማምጣት ታስቦ የተሰጠ መሆኑን ጠቅሰዋል። ሌሎችንና ራሳችንን ከአደጋ መጠበቅ ብቻ ሳይሆን፣ ሀገርንም ከአደጋ የመጠበቅ ጉዳይ መሆኑን መገንዘብ ኖርባቸዋል በማለት ተናግሯል፡፡

ሰልጣኞችም በስልጠናው ያገኙትን እውቀት በተግባር በማዋል ለተሻለ የኮንስትራክሽን ዘርፍ ውጤታማነት የበኩላቸውን እንዲወጡ አሳስበዋል።

02/09/2026

ግዥና ውል አስተዳደር ከመሠረቱ ካልተስተካከለ ፕሮጀክቶችን ከውድቀት ማዳን አዳጋች ነው ተባለ

ነሐሴ 27 ቀን 2018 ዓ.ም. / አዳማ

የግዥና የውል አስተዳደር ከመሠረቱ ካልተስተካከለና የተደነገገውን ሂደት በአግባቡ ካልተከተለ ፕሮጀክቶችን ከውድቀት ማዳን አዳጋች መሆኑ ተገለጸ።

ይህን የገለጹት የኢንስቲትዩቱ ምክትል ዋና ዳይሬክተር ኢ/ር ሁሉንአየሁ ወጂ ናቸው። ኢ/ር ሁሉንአየሁ ይህንን ያሉት ኢንስቲትዩቱ ከከተማና መሠረተ ልማት ሚኒስቴር ጋር በመተባበር በ«የመንገድ ትስስር ለምግብ ዋስትና» ፕሮጀክት ላይ ለሚሳተፉ አመራሮችና ፈጻሚዎች በግዥና ውል አስተዳደር ዙሪያ ለሦስት ተከታታይ ቀናት ሲሰጥ የቆየው ስልጠና በተጠናቀቀበት ወቅት ነው።

በንግግራቸውም፣ ግዥ ከመሠረቱ በአግባቡ ካልተከናወነና የግዥ ሂደቱ በትክክል ካልተከተለ ፕሮጀክትን ከውድቀት ማዳን እንደማይቻል ከአስፓልት መንገድ ግንባታ ጋር በማመሳሰል አስረድተዋል። የአስፓልት መንገድ ውስጣዊ መሠረት (Subbase) በትክክል ካልተሠራ የላይኛው ንጣፍ በጥራት ቢሠራም ዘላቂ ውጤት ሊያመጣ እንደማይችል ገልጸዋል።

በዚህም ረገድ እያንዳንዱ አመራር በግዥና ውል አስተዳደር ዙሪያ የሚወስናቸው ውሳኔዎች በገጠሩ ማህበረሰብ ላይ ከፍተኛ ተጽዕኖ ሊያሳርፉ እንደሚችሉ በመገንዘብ፣ ውሳኔዎቹ ለፕሮጀክቱ እሴት የሚጨምሩና የፕሮጀክቱን ዓላማ የሚያሳኩ መሆናቸውን በማጠን መሆን እንደሚገባ አስገንዝበዋል።

በስልጠናው ላይ የተሳተፉ ሰልጣኞች በበኩላቸው፣ ስልጠናው ወቅታዊ ከመሆኑም በላይ ልምድና ተግባራዊ ዕውቀት ባላቸው አሰልጣኞች መሰጠቱ እንዳስደሰታቸው ገልጸዋል። አዘጋጆቹንም በማመስገን ተመሳሳይ ስልጠናዎች በቀጣይም ተጠናክረው እንዲቀጥሉ ጠይቀዋል።

ሰልጣኞቹ ከዚህ በፊት የሚሰጡ ስልጠናዎች በፕሮጀክት ሥራዎች በተጨናነቀ ወቅት የሚዘጋጁ በመሆናቸው በተረጋጋ መንፈስ ስልጠናውን ለመከታተል እንደሚያስቸግርና በአንዳንድ ጊዜም ስልጠናው በቀጥታ የማይመለከታቸው ሰዎች እንዲሳተፉ ዕድል የሚፈጥር መሆኑን አንስተዋል።

ለሰልጣኞቹ አስተያየት ምላሽ የሰጡት በኢንስቲትዩቱ የምክርና አሠራር ሥርዓት መሪ ሥራ አስፈጻሚ ኢ/ር ጎረምስ እንደገለጹት፣ የስልጠናው ፋይናንስ ከዓለም ባንክ የሚመጣ በመሆኑ ገንዘቡ በተፈለገው ጊዜና መጠን ሊለቀቅ አለመቻሉ በአንዳንድ ጊዜ ስልጠናዎች በአመራሮችና ባለሙያዎች የፕሮጀክት ሥራ ጫና ወቅት እንዲሰጡ ምክንያት ሆኗል።

በአሁኑ ወቅት ይህንን ችግር ለመቅረፍም ቅንጅታዊ አሠራሮችን በመፍጠር ሁኔታውን በተወሰነ መልኩ ማሻሻል መቻሉን ገልጸዋል። ከዚህ በፊት የተሰጡ ስልጠናዎችም ውጤት አላመጡም ማለት እንደማይቻል ጠቁመው፣ ባገኙት ስልጠና ምክንያት በተለያዩ ፕሮጀክቶች ላይ መሻሻሎች መታየታቸውን ገልጸዋል።

በመጨረሻም ስልጠናውን በተገቢው ሁኔታ ላጠናቀቁ ሰልጣኞች የምስክር ወረቀት በመስጠት መርሐ-ግብሩ ፍጻሜውን አግኝቷል።