28/06/2026
መናእሰይን ምሁራትን ናብ ቅድሚት ይምፅኡ ምባል ንመን እዩ ዘፍርስ? እዚኦም ይሳተፉን ትርጉም ዘለዎ ኣስተዋፅኦ ክህልዎም ይገበር ምባልን ከ ንምንታይ እዩ ከም መፍረሲ ዝቑፀር?
ናተይ ቅዋም ሕዚ እውን ኣብ ሕድሕድ ውዳበታት ግደ መናእሰይን ምሁራትን ትርጉም ዘለዎ ይኹን ዝብል እዩ። ብመሰረቱ ከዓ መናእሰይን ምሁራትን ዘሳትፍ ሓይሊ ብቐፃልነት እናተዀልዐን ዓቕምታቱ እናወሰኸን ናብ ዝሓሰቦ ንምብፃሕ ዝሓሸ ዕድል ይህልዎ እምበር ክፈርስ ኣይክእልን። ኣነ መናእሰይን ምሁራትን ይሳተፉ ክብል ከለኹ ከም ህዝቢ ዝሓሸ መዋፅኦ ክህልወና፣ ደጋጊምና ጌጋታት እናፈፀምና ዝመፃእና ሰባት ሕዚ እውን እቲ ዕድል ንሕና በይንትና እንተሕዝናዮ ዝተፈለየ ነገር ክነምፅእ ኣይንኽእልን ዝብል እምነት ስለዘለኒ እዩ። ዝተፈለየ ነገር ነምፅእ ኣካላት ተንኾን ድኣ ኣብኡ ዶ ኣይነበርናን!
መናእሰይን ምሁራትን ናብ ቅድሚት ይምፅኡ ክብል ከለኹ ግን እቲ ካልእ ኣየድልን ማለት ኣይኮነን። እቲ ብዕድመ ዝደፍአ ሰብ ካብ ተሞኩሮኡ ዝረኸቦ ዝሓሸ ልምዲ ኣለዎ። ብፍላይ ብዛዕባ ሕሉፍ ጉዕዞታት ብኣካል ዝርኣዮም ብዙሓት ተጓንፎታት ኣለዉ። ገለገሊኦም ንሕዚ እውን ጠቐምቲ ክኾኑ ይኽእሉ እዮም። እዚ ልምዲ እዚ ግን ራእይ ክኾን ኣይኽእልን። ራይእ ዘሎ ኣብቲ ብሕሉፍ ልምዲ ዘይተኣስረ መንእሰይን ምሁርን እዩ ዘሎ። እቲ መንእሰይ ልምዲ ይጎድሎ፣ እቲ ብዕድመ ዝደፍአ ድማ ማዕረ እቲ መንእሰይ ንቕድሚት ከመዓዱ ኣይክእልን። ኣብ ክልቲኦም ዘሎ ሓጓፍ ክምላእ እንተድኣኮይኑ እቲ መንእሰይን ምሁርን ኣብ ቅድሚት ኮይኑ መሪሕነት ክርከብ፣ እቲ ብዕድመ ዝደፍአ ከዓ ኣብ ድሕሪት ኮይኑ ካብኡ ዘድሊ ሓገዝ ክበርክት ብምግባር እዩ። ኣብዚ ከይዲ ዝባኽን ወይ ኣብ ዘይመዓላኡ ዝውዕል ሓይሊ ከይህሉ ዘግብር ስርዓት ዘርግሕካ ምትግባር ከድሊ እዩ።
ኣብዚ ናይ ለውጢ ምንቅስቓስ መልክዕ ምትሓዝ ዘድሊ ካልኣይ ነጥቢ ምትሕውዋስ ዝምልከት እዩ። ኩሉ ነናይ ባዕሉ ስራሕ ከድሚ ይግባእ። ናይ ባዕልካ ስራሕ ብዝለዓለ ውፅኢት ንምፍፃም ኣመና ፈታኒ ኣብ ዝኾነ እዋን ኣብ ናይ ካልእ ዓውዲ እናኣተኻ እተምፅኦ ለውጢ ብጣዕሚ ድሩት ምዃኑ ኣይተርፍን። “ምትሕውዋስ ይትረፍ” ክበሃል ከሎ “ዝኾነ ኣካል ንምፍራስ እዩ” ዝብል መከራኸሪ ዛዕባ ኣቐዲሙ ክመፅእ ዘለዎ ኣይመለንን። ስርሑ ዘድሚ ሰብ ከዓ ምትሕውዋስ ይስከፍ እምበር ኣየተባብዕን። ብናተይ እምነት ግን ምትሕውዋስ ምውጋድን ሰስራሕካ ምስራሕን ኣካላት የጠናኽር እምበር ዘፍርስ ኣይኮነን!
