30/10/2026
Yng nghyfarfod y Cyngor Economaidd Cenedlaethol heddiw, fe wnaeth y Prif Weinidog bwysleisio'r angen am fwy o hyblygrwydd cyllidol, pwerau benthyca a’r cyllid rheilffyrdd sydd eisoes wedi’i addo gan Lywodraeth y DU.
Yn dilyn hynny, fe wnaeth y Prif Weinidog gyfarfod gyda Phrif Weinidog y DU i drafod blaenoriaethau Cymru a phwysleisio’r angen am agenda o barch sy’n gweithio’r ddwy ffordd.
"Roeddwn yn falch o gyfarfod â’r Prif Weinidog yn Glasgow heddiw, lle pwysleisiais unwaith eto’r angen i Gymru a Llywodraeth Cymru gael yr offer angenrheidiol i wasanaethu ein cymunedau’n well.
"Fe wnes i ailadrodd hefyd mai mater i’r Senedd, a’r Senedd yn unig, yw unrhyw ddatganoli pellach o fewn Cymru.
"Roedd consensws calonogol bod angen diwygio, ar frys, y pwerau cyllidol a benthyca sydd ers cyhyd wedi rhoi Cymru dan anfantais o’i chymharu â chenhedloedd eraill y DU. Rwy’n croesawu sylwadau’r Prif Weinidog fod hyn bellach yn fater o sut a phryd, yn hytrach nag a ddylid gwneud hynny.
"O ran cyllid rheilffyrdd, roeddwn yn falch o glywed ymrwymiad personol y Prif Weinidog i edrych ar yr addewid o £14 biliwn. Codais hefyd yr angen i’r Trysorlys weithredu ar frys er mwyn galluogi Llywodraeth Cymru i fwrw ymlaen â’n cynllun peilot taliad plant wythnosol Cynnal i gefnogi’r teuluoedd tlotaf.
"O ran Ewrop, cynigiais fy nghefnogaeth lawn i’r Prif Weinidog wrth geisio meithrin perthynas gryfach â’r Undeb Ewropeaidd, gan ei annog i fynd ymhellach a blaenoriaethu ailymuno â’r farchnad sengl a’r undeb tollau." - Prif Weinidog, Rhun ap Iorwerth
