კასპის საქალაქო ბიბლიოთეკა

კასპის საქალაქო ბიბლიოთეკა (მენეჯერი მ.აბუაშვილი, სპეციალისტები: ნ.ქვათელაძე, რ.აბუაშვილი,ნ.ჯარმელიშვილი) ერთი ლამაზი დღის თანამონაწილენი გავხდით კასპის მესამე ბაგა - ბაღში. საბავშვო ბაღის პედ.კოლექტივი აცილებდა და სკოლისაკენ მიმავალ გზას ულოცავდა ჯგუფ „ნერგებს“.
„აქ დასრულდა ერთი ზღაპარი და იწყება ახალი თავგადასავალი“.
მადლობა კასპის მესამე საბავშვო ბაღის მთლიან კოლექტივს ლამაზი ღონისძიებისათვის.

🕰 1918 წლის 26 მაისს, კვირას, ზუსტად 17:10-ზე, საქართველოს ეროვნულმა საბჭომ სახელმწიფოებრივი დამოუკიდებლობის აქტი მიიღო.

მოზარდი თაობის აღზრდა ძირითადად სამ რგოლს ევალება: სკოლა, ოჯახი, საზოგადოება. ყველაზე კომპეტენტური სკოლაა,რადგან აქ მოზარდები პროფესიული ნიშნით შერჩეულ აღმზრდელებთან ურთიერთობენ და რადგანაც სკოლის მთავარი მიზანი პიროვნების აღზრდაა,ამიტომ სკოლამ უნდა იზრუნოს მოზარდის პიროვნული თვისებების ჩამოყალიბებაზე. მნიშვნელოვანია მოზარდის წიგნით დაინტერესების პროცესიც/
სწორედ ამ მიზანს ემსახურებოდა საქალაქო ბიბლიოთეკაში თვალადის საჯარო სკოლის IV – V კლასის მოსწავლეების სტუმრობა. დამრიგებელი გულნაზ შაყულაშვილი, იამზე ქსოვრელი; ხელოვნების მასწავლებელი მანანა თხინვალელი.მოსწავლეებს საქალაქო ბიბლიოთეკის მენეჯერმა მაია აბუაშვილმა და სპეციალისტმა მერი გზირიშვილმა გააცნეს ბიბლიოთეკის მუშაობის სტრუქტურა და დაათვალიერებინეს ბიბლიოთეკის წიგნადი ფონდი.

თამარი გამორჩეული მეფეა ბაგრატოვანთა დინასტიაში. პირველ ყოვლისა, ქალის მეფედ მოხსენიება და მით უფრო მეფედ ყოფნა XII საუკუნეში განსაკუთრებული შემთხვევა იყო არა მხოლოდ საქართველოსთვის, არამედ დანარჩენი სამყაროსთვისაც. მისი მმართველობის პერიოდს „საქართველოს ოქროს ხანას“ უწოდებენ.
თამარი დაიბადა 1160 წელს. მისი მშობლები იყვნენ მეფეთ-მეფე გიორგი III, დავით აღმაშენებლის შვილიშვილი და ოსთა მეფის ასული ბურდუხანი. მათ ორი ქალიშვილი შეეძინათ — თამარი და რუსუდანი. რადგან ვაჟიშვილი არ ჰყავდათ, 1179 წელს მამამ თამარი თანამოსაყდრედ გამოაცხადა და ერთად მართავდნენ სახელმწიფოს. 1184 წელს თამარ მეფე საქართველოს მონარქი გახდა. „მეფეთ მეფე და დედოფალთ დედოფალი აფხაზთა, ქართველთა, რანთა, კახთა და სომეხთა, შირვანთა და შაჰანშათა და ყოვლისა აღმოსავლეთისა და დასავლეთისა თვითმფლობელობითა მპყრობელი“. *
თამარი, ცნობილი როგორც თამარ მეფე (დაბადებული დაახლოებით 1160 წელს, გარდაიცვალა 1213 წელს, თუმცა ზოგიერთი წყაროს მიხედვით 1210 ან 1207 წელს), იყო საქართველოს მონარქი 1184 წლიდან. იგი გახლდათ მეფე გიორგი III-ის ასული და წარმოადგენდა ბაგრატიონთა სამეფო დინასტიას. თამარს წილად ხვდა ემართა საქართველო მისი ისტორიის ოქროს ხანაში და ის გამორჩეულად წარმატებული მმართველი აღმოჩნდა.
თამარ მეფე ატარებდა შთამბეჭდავ ტიტულს: “მეფეთ მეფე და დედოფალთ დედოფალი აფხაზთა, ქართველთა, რანთა, კახთა და სომეხთა, შირვანთა და შაჰანშათა და ყოვლისა აღმოსავლეთისა და დასავლეთისა თვითმფლობელობითა მპყრობელი”.
პოლიტიკური კარიერის დასაწყისი
1179 წელს მამამისმა, მეფე გიორგი III-მ, თამარი თანამოსაყდრედ გამოაცხადა, რითაც შეამზადა იგი სამეფო ტახტის მემკვიდრეობისთვის. 1184 წელს, გიორგი III-ის გარდაცვალების შემდეგ, ქვეყანაში რთული პოლიტიკური ვითარება შეიქმნა. ფეოდალურმა არისტოკრატიამ დაიწყო აქტიური ბრძოლა დაკარგული პოლიტიკური პრივილეგიების აღსადგენად.
თამარის მმართველობის პერიოდში საქართველო კავკასიის რეგიონის უძლიერეს სახელმწიფოდ ჩამოყალიბდა. ისტორიკოსები განსხვავებულად აფასებენ ამ ძლიერების საფუძვლებს:
თამარის მეფობის პერიოდში საქართველომ რამდენიმე მნიშვნელოვანი სამხედრო გამარჯვება მოიპოვა. განსაკუთრებით აღსანიშნავია:
• 1195 წლის შამქორის ბრძოლა
• 1203 წლის ბასიანის ბრძოლა
ეს სამხედრო წარმატებები კიდევ უფრო განამტკიცებდა საქართველოს პოზიციებს რეგიონში და ხელს უწყობდა ქვეყნის პოლიტიკურ და კულტურულ აღმავლობას.
თამარ მეფე გულმოდგინედ ცდილობდა დიდი პაპის, დავით IV აღმაშენებლის პოლიტიკური კურსის გაგრძელებას როგორც საშინაო, ისე საგარეო ურთიერთობებში. პოლიტიკური წარმატების პარალელურად, ქვეყანაში შეინიშნებოდა ეკონომიკური განვითარების მაღალი დონე. სოფლის მეურნეობა განსაკუთრებით დაწინაურდა — გაყვანილი იყო სარწყავი არხები მუხრანში, სამგორში და კახეთში, რამაც ხელი შეუწყო მარცვლეული კულტურების, მევენახეობისა და მეხილეობის განვითარებას. წყლის წისქვილები აქტიურად გამოიყენებოდა, შენდებოდა საქალაქო წყალსადენებიც.
ხელოსნობა და ვაჭრობა ასევე აღმავლობას განიცდიდა. თბილისი და ქუთაისი წარმოადგენდა მნიშვნელოვან სავაჭრო ცენტრებს. განვითარებული იყო კერამიკის წარმოება, გავრცელებული იყო მოჭიქული ჭურჭლის, სპილენძისა და ძვირფასი ლითონებისგან დამზადებული ნივთების წარმოება. საქართველო ვაჭრობდა არაბეთთან, ბიზანტიასთან და სხვა მეზობელ სახელმწიფოებთან.
კულტურული და საგანმანათლებლო სფეროებიც აღმავლობას განიცდიდა. ფუნქციონირებდა სკოლები ეკლესია-მონასტრებთან, განვითარებული იყო რიტორიკული სკოლები. აკადემიებში ისწავლებოდა შვიდი ძირითადი დარგი: გრამატიკა, ფილოსოფია, რიტორიკა, არითმეტიკა, გეომეტრია, მუსიკა და ასტრონომია, ასევე, სავარაუდოდ, მედიცინაც.
ამ პერიოდში არქიტექტურა განსაკუთრებულ განვითარებას განიცდიდა. აშენდა მნიშვნელოვანი ტაძრები ახალი სტილისტური ნიშნებით — იკორთა, ბეთანია, ქვათახევი, ფიტარეთი, წუღრუღაშენი და სხვები. მნიშვნელოვანი იყო კლდეში გამოკვეთილი სამონასტრო კომპლექსი ვარძია, რომლის მშენებლობაც გიორგი III-მ დაიწყო და თამარმა დაასრულა.
ლიტერატურულ სფეროში თამარის პერიოდს უკავშირდება ქართული მწერლობის უდიდესი ძეგლი — შოთა რუსთაველის “ვეფხისტყაოსნის‘’ეპოქა მართლაც იმსახურებს “ოქროს ხანის” წოდებას საქართველოს ისტორიაში, რადგან ის წარმოადგენდა მრავალმხრივი განვითარების, სტაბილურობისა და კულტურული აღმავლობის პერიოდს.

დღეს, 23 აპრილს, უდიდესი ქართველი ისტორიკოსისა და საზოგადო მოღვაწის, ივანე ჯავახიშვილის, დაბადებიდან 150 წელი შესრულდა! 🇬🇪

ეს არის დღე, როდესაც კიდევ ერთხელ უნდა გავიხსენოთ და ვიამაყოთ მისი უმნიშვნელოვანესი მემკვიდრეობით:

ივანე ჯავახიშვილი იყო კავკასიაში პირველი უმაღლესი სასწავლებლის - თბილისის სახელმწიფო უნივერსიტეტის - ერთ-ერთი მთავარი დამაარსებელი და სულისჩამდგმელი.

არის 170-ზე მეტი სამეცნიერო შრომის, მათ შორის 20-ზე მეტი მონოგრაფიის, ავტორი. ივანე ჯავახიშვილმა ღრმა კვალი დატოვა მეცნიერულ ქართველოლოგიაში. მან ფაქტობრივად თავიდან შექმნა საქართველოს ისტორიის მეცნიერული შესწავლის ფუნდამენტი. მისი შრომები კი, დღესაც მთავარი ქვაკუთხედია ჩვენი წარსულის შესაცნობად.
ივანე ჯავახიშვილის ცხოვრება და მოღვაწეობა არის საუკეთესო მაგალითი იმისა, თუ როგორ უნდა ემსახურო საკუთარ სამშობლოს და იზრუნო მომავალი თაობების განათლებაზე.

გილოცავთ ამ დიდებულ თარიღს!
პატივი მივაგოთ მის ხსოვნას!
მოვუფრთხილდეთ და გავაგრძელოთ ის დიდი საქმე, რასაც ივანე ჯავახიშვილმა ჩაუყარა საფუძველი. ივანე ჯავახიშვილი რომ არ ყოფილიყო საქართველოს ისტორია გაჟღენთილი იქნებოდა მითებითა და ლეგენდებით. როცა ვსაუბრობთ ივანე ჯავახიშვილზე - ვსაუბრობთ ქართველი ხალხის ავტობიოგრაფიაზე.

23 აპრილს საბიბლიოთეკო კვირეულთან, „წიგნის საერთაშორისო“ და „წიგნის ჩუქების დღესთან“ დაკავშირებით საქალაქო ბიბლიოთეკას (მენეჯერი მაია აბუაშვილი) სტუმრობდნენ კასპის N 3 საბავშვი ბაღის სასკოლო მზაობის ჯგუფი ( ბაღის გამგე - ირმა ბიგანაშვილი; აღმზრდელი - ელზა ტყემალაძე; აღმზრდელის თანაშემწე - ხათუნა ყაბანაშვილი; ძიძა - მარიამ სპარსელაშვილი; მეთოდისტი - ლალი დონდუაშვილი; მუსიკის მასწავლებელი - ლაურა ხასიევა). ბავშვებმა წაიკითხეს ლექსები და შეასრულეს სიმღერები წიგნებზე, ღონისძიების ორგანიზატორმა ( ნინო ქვათელაძე) ბავშვების ჩართულობით წაიკითხა ქართული ხალხური ზღაპრები. ღონისძიების ბოლოს ამ დღის აღსანიშნავად ბავშვებს დაურიგდათ სამახსოვრო საჩუქარი.
საქალაქო ბიბლიოთეკა მადლობას უხდის კასპის N 3 საბავშვო ბაღის მთლიან კოლექტივს ღონისძიებაში მონაწილეობისათვის.

14 აპრილი დედაენის დღე. 1978 წლის 14 აპრილი საქართველოს ისტორიაში ერთ-ერთი ყველაზე მნიშვნელოვანი და სიმბოლური თარიღია. ამ დღეს თბილისში ათიათასობით მოქალაქე, ძირითადად სტუდენტები, გამოვიდნენ ქუჩებში, რათა დაეცვათ ქართული ენა და შეწინააღმდეგებოდნენ საბჭოთა ხელისუფლების მცდელობას, ენის სახელმწიფო სტატუსი შეეცვალათ.​ ამ დღეს ქართული ენა იქცა სივრცედ ეროვნული საკითხის გარშემო მობილიზებისათვის.

მიმდინარე საბჭოთა კონსტიტუციაში საქართველოს სსრ-ის უზენაესი საბჭო განიხილავდა ახალ კონსტიტუციურ გეგმას, რომლის მიხედვითაც ქართული აღარ იქნებოდა სახელმწიფო ენა საქართველოს ტერიტორიაზე და რუსულ ენასა და სხვა ენებს, რომლებითაც მოსახლეობა სარგებლობდა, თანაბარი სტატუსი მიენიჭებოდა. ამან გამოიწვია ფართო საპროტესტო ტალღა, რომელმაც კულმინაციას 14 აპრილს მიაღწია. თბილისთან ერთად პროტესტში ჩართული იყო ბათუმიც.

დემონსტრანტების უმრავლესობა სტუდენტები იყვნენ, თუმცა საპროტესტო გამოსვლებს მხარს უჭერდნენ ინტელიგენციის წარმომადგენლებიც. ამავე დღეს შეტაკება მოხდა საბჭოთა ძალოვნებსა და მომიტინგეებს შორის, მთავრობის სახლთან კი მობილიზებული იყო საბჭოთა ჯარი. სიტუაცია იმდენად დაიძაბა, რომ ედუარდ შევარდნაძემ, რომელიც იმ დროს საქართველოს კომუნისტური პარტიის პირველი მდივანი იყო, მიმართა დემონსტრანტებს. მის მიმართვას ნეგატიური შეძახილები მოჰყვა მომიტინგეების მხრიდან.​ მალევე ცნობილი გახდა, რომ ქართული ენა კონსტიტუციურ სტატუსს ინარჩუნებდა, რის შემდეგაც თბილისში სიტუაცია ჩაწყნარდა. საბჭოთა საქართველოში, საზოგადოების ერთიანობამ მთავრობა აიძულა დათმობაზე წასულიყო.

14 აპრილის მოვლენებმა მნიშვნელოვანი გავლენა იქონია საქართველოს ეროვნულ-განმათავისუფლებელ მოძრაობაზე. ეს იყო ერთ-ერთი პირველი შემთხვევა, როდესაც საზოგადოებამ მასობრივად გამოხატა პროტესტი საბჭოთა რეჟიმის წინააღმდეგ და სხვა წინააღმდეგობებისაგან განსხვავებით, გამარჯვებას მიაღწია (განსაკუთრებით 1956 წლის 9 მარტის სისხლიანი მოვლენების შემდეგ). ამ მოვლენებმა გააძლიერა პროტესტის და თავისუფლების რწმენა, რაც მნიშვნელოვანი მეხსიერება და ძალა გახდა 10 წლის შემდეგ მასობრივი პროტესტებისთვის და უკვე 1991 წელს დამოუკიდებლობის გამოცხადების პროცესში.

14 აპრილი ქართულ კულტურულ და კოლექტიურ მეხსიერებას შემორჩა როგორც გამარჯვების დღე, ამ დღის გარშემო შეიქმნა მეხსიერების ადგილები - როგორიცაა დედაენის ბაღი, დედაენის მონუმენტი.

14 აპრილი არა მხოლოდ ენის, არამედ ეროვნული ღირსების, ერთიანობისა და თავისუფლების სიმბოლო გახდა.

საბავშვო წიგნის საერთაშორისო დღე.

2 აპრილი საბავშვო წიგნის საერთაშორისო დღეა, რომელიც 1967 წლიდან აღინიშნება და ამ დღის დაარსებიდან, მისი მუდმივი სპონსორი საერთაშორისო საბჭოა, რომელიც აქტიურად ეწევა წიგნების პოპულარიზაციას მოზარდებში.
მოგეხსენებათ თუ რაოდენ მნიშვნელოვანია ბავშვისთვის თვალსაწიერის გაფართოება და მათთვის წიგნების შეყვარება. სწორედ ამ მიზანს ემსახურება საბავშვო წიგნის საერთაშორისო დღე.
ალბათ, საბავშვო ლიტერატურაა ის სიკეთის ძალა, რომელიც სულ ოდნავ მაინც უნარჩუნებს წონასწორობას ადამიანებს ამ რთულ რეალობასა და ყოველდღიურად სულ უფრო არეულ დედამიწას.

საბავშვო წიგნის საერთაშორისო დღეს ემთხვევა ცნობილი პოეტის და მეზღაპრის, ჰანს კრისტიან ანდერსენის დაბადების დღეს. ,,მსოფლიოს უპირველესი მეზღაპრე’’,- ასე უწოდა თავის დროზე მსოფლიო ლიტერატურის დიდმა კლასიკოსმა ჩარლზ დიკენსმა ჰანს ქრისტიან ანდერსენს (1805-1875წწ) . მიუხედავად იმისა, რომ მისი გარდაცვალებიდან 130 წელი გავიდა დიდი მეზღაპრის შემოქმედებისადმი ინტერესი არა თუ კლებულობს, არამედ სულ უფრო მეტად იზრდება: მისი ზღაპრები ყოველწლიურად მილიონიანი ტირაჟით იბეჭდება მთელს მსოფლიოში და მას დიდი ინტერესით კითხულობს ყველა:ბავშვიც, მოზარდიც და ზრდასრული ადამიანიც.
ამ დღის დაარსებიდან, მისი მუდმივი სპონსორი საერთაშორისო საბჭოა, რომელიც აქტიურად ეწევა წიგნების პოპულარიზაციას მოზარდებში.
2 აპრილს საქალაქო ბიბლიოთეკა საბავშვო კინოთეატრად იქცა კასპის N 2 საჯარო სკოლის I ა კლასის (კლასის დამრიგებელი მარიამ ხოცუაშვილი) მოსწავლეებისთვის.საქალაქო ბიბლიოთეკის სპეციალისტებმა ნ. ქვათელაძემ და რ. აბუაშვილმა ბავშვებს საინტერესოდ ესაუბრეს ამ დღის მნიშვნელობაზე.გააცნეს ჰანს კრისტიან ანდერსენის ზღაპარი „მახინჯი იხვის ჭუკი“ და შემდეგ გაიმართა ამ ზღაპრის მიხედვით შექმნილი ანიმაციური ფილმის ჩვენება. ბავშვებმა გააფერადეს თავისი წარმოსახვით ამ ნაწარმოების მთავარი გმირი.

საქალაქო ბიბლიოთეკა მადლობას უხდის კასპის N 2 საჯარო სკოლის დირექტორს ქალბატონ მ.ქონიაშვილს, I ა კლასის დამრიგებელს ქალბატონ მარიამ ხოცუაშვილს,მოსწავლეებსა და მათ მშობლებს ღონიაძიებაში აქტიური მონაწილეობისათვის.