აფხაზეთის ა/რ ფინანსთა და ეკონომიკის სამინისტრო

დღევანდელი დღე განსაკუთრებული მნიშვნელობისაა საქართველოსთვის, ქართული ეკლესიისა და თითოეული ქართველისთვის. სრულიად საქართველოს კათოლიკოს-პატრიარქად მეუფე შიოს არჩევა არის ისტორიული პასუხისმგებლობა და იმ დიდი სულიერი გზის გაგრძელება, რომელიც ათწლეულების განმავლობაში უწმინდესმა და უნეტარესმა ილია II-მ შექმნა.

უწმინდესო და უნეტარესო შიო III, უდიდესი პატივისცემით გილოცავთ სრულიად საქართველოს კათოლიკოს-პატრიარქად გამორჩევას და გვწამს, რომ თქვენი პატრიარქობის პერიოდში, თქვენი ლოცვით და შეწევნით, შევძლებთ დაახლოებას აფხაზეთთან და კვლავ გაერთიანებას.

დარწმუნებული ვართ, ღირსეულად განაგრძობთ ილია მეორის დიდ სულიერ მემკვიდრეობას, რომლის ეპოქა იქცა ეროვნული ერთობის, მშვიდობის, შემწყნარებლობისა და ქართული იდენტობის დაცვის სიმბოლოდ.

ვულოცავ სრულიად საქართველოს, ქართულ ეკლესიას და თითოეულ ქართველს ამ ისტორიულ დღეს. ღმერთმა დალოცოს საქართველოს ეკლესია, მისი ახალი სულიერი წინამძღოლი და გაამთლიანოს ჩვენი ქვეყანა!

აფხაზეთის ავტონომიური რესპუბლიკის მთავრობის თავმჯდომარე
გიორგი ჯინჭარაძე

ფაშიზმზე გამარჯვების დღესთან დაკავშირებით, აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, ქუთაისში მცხოვრებ აფხაზეთიდან დევნილ მეორე მსოფლიო ომის ვეტერანს სახლში ესტუმრა.

მთავრობის თავმჯდომარემ, 99 წლის დევნილ ვეტერან ორესტი ბერულავას 9 მაისის დღესასწაული მიულოცა, გმირული თავდადებისთვის მადლობა გადაუხადა და საჩუქრები გადასცა.

„ეს გამარჯვება კაცობრიობის ისტორიის უმნიშვნელოვანესი თარიღია, რომელიც ჩვენი გმირი ვეტერანების თავდადებამ და შეუპოვრობამ მოიტანა. ჩვენი უპირველესი ვალია, არა მხოლოდ გავუფრთხილდეთ ამ ადამიანებს, არამედ მომავალ თაობებს უცვლელად შევუნარჩუნოთ იმ გმირობის მეხსიერება, რომელმაც მსოფლიოს მშვიდობა დაუბრუნა“, - განაცხადა გიორგი ჯინჭარაძემ.

აღსანიშნავია, რომ აფხაზეთის მთავრობის თავმჯდომარის ინიციატივით, აფხაზეთიდან დევნილი, ერთადერთი ვეტერანი 2000 ლარიან ერთჯერად დახმარებას მიიღებს.

დღეს საქართველოში ფაშიზმზე გამარჯვების დღე აღინიშნება. 1945 წლის 8 მაისს გერმანიამ კაპიტულაცია გამოაცხადა და მეორე მსოფლიო ომი დასრულდა, ხოლო 9 მაისი ფაშიზმზე გამარჯვების დღედ გამოცხადდა.

#აფხაზეთისმთავრობა

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძემ, ადგილობრივი ხელისუფლების წარმომადგენლებთან ერთად, სენაკის მოსწავლე-ახალგაზრდობის სასახლეში აფხაზეთიდან დევნილ მოსახლეობასთან შეხვედრა გამართა.

შეხვედრის მიზანი იყო მოქალაქეებისთვის იმ მიმდინარე პროგრამებისა და სამომავლო გეგმების გაცნობა, რომლებსაც აფხაზეთის მთავრობა დევნილი საზოგადოების მხარდასაჭერად ახორციელებს.

შეხვედრის ფარგლებში განსაკუთრებული ყურადღება დაეთმო ჯანდაცვის, სოციალურ, საგანმანათლებლო და ეკონომიკურ მიმართულებებს. მთავრობის თავმჯდომარემ დეტალურად ისაუბრა ახალ ინიციატივებზე, რომლებიც მიზნად ისახავს ჯანდაცვის სისტემის გაძლიერებას, დევნილი მოსახლეობის საცხოვრებელი პირობების გაუმჯობესებასა და ახალგაზრდების მხარდაჭერას, მათ შორის სტიპენდიებისა და პროფესიული განვითარების პროგრამების გაფართოებას.

შეხვედრა კითხვა-პასუხის რეჟიმში წარიმართა, სადაც მოქალაქეებმა მათთვის მნიშვნელოვან საკითხებზე ამომწურავი ინფორმაცია მიიღეს.

#აფხაზეთისმთავრობა

აფხაზეთის ავტონომიური რესპუბლიკის ფინანსთა და ეკონომიკის მინისტრი თენგიზ ნასარიძე, მინისტრის მოადგილე მიხეილ ანჩაბაძესთან ერთად, ზუგდიდში, აფხაზეთიდან დევნილ მეწარმეებს შეხვდა.

მინისტრი მეწარმეების საქმიანობასა და პროექტების მიმდინარეობას პირადად გაეცნო. თენგიზ ნასარიძემ, ასევე, ყურადღება გაამახვილა იმ პროგრამების მნიშვნელობაზე, რომლებიც დევნილი მოსახლეობის ეკონომიკურ გაძლიერებასა და მათი ბიზნესის განვითარებას უწყობს ხელს.

„მეწარმეობის ხელშეწყობა აფხაზეთის მთავრობის ერთ-ერთი მთავარი პრიორიტეტია, შესაბამისად არაერთი პროექტი ხორციელდება ფინანსთა და ეკონომიკის სამინისტროს მხრიდან, რითაც ვცდილობთ წავახალისოთ ამ ბიზნესწამოწყებების განვითარება. არაერთი ბენეფიციარი გვყავს უკვე და საინტერესოა, რომ მათი ეს საქმიანობა გაშლილი არის რეგიონებში” - განაცხადა თენგიზ ნასარიძემ.

შეხვედრაში ის დევნილი მეწარმეები მონაწილეობდნენ, რომლებიც ჩართული არიან „აწარმოე საქართველოში” პროგრამებში და მოპოვებული აქვთ აფხაზეთის ფინანსთა და ეკონომიკის სამინისტროს თანადაფინანსება.

აფხაზეთის ავტონომიური რესპუბლიკის მთავრობის თავმჯდომარე გიორგი ჯინჭარაძე, ვაზიანში, საქართველოს თავდაცვის ძალების დღისადმი მიძღვნილ ღონისძიებას დაესწრო.

35 წლის იუბილეს აღსანიშნავ ღონისძიებაზე სიტყვით საქართველოს პრეზიდენტი, პრემიერ-მინისტრი, პარლამენტის თავმჯდომარე და თავდაცვის მინისტრი წარდგნენ.

ღონისძიებას საქართველოს საკანონმდებლო და აღმასრულებელი ხელისუფლების წარმომადგენლები ესწრებოდნენ.

30 აპრილი საქართველოს თავდაცვის ძალების დღედ 1991 წელს დაწესდა და ყოველწლიურად აღინიშნება.

#აფხაზეთისმთავრობა