東岸板道社區聯絡中心 East Coast Boardwalk Community Liaison Centre

【板道FUN享日 圓滿結束｜一齊回顧精彩時刻！🎉🚴】

小編「工程獅」 多謝大家熱情參與 3月14日「 」！今次活動喺東岸板道（東段）舉行，適逢板道連成 2.2公里後，為大家帶嚟首個單車工作坊，亦令更多市民有機會親身感受維港海風之下，「共享徑」有序共融嘅樂趣。🌊

當日現場氣氛非常熱鬧，唔少市民一邊漫步板道，一邊參與各個 FUN享攤位遊戲，透過「玻璃觀景知識台📖」、「共享徑守則神射手⚽」、「圈出共享徑好行為⭕」及「板道飛行棋✈️」，輕鬆認識板道及共享徑資訊，同時將使用共享徑，玻璃觀景台，各樣藝術裝置嘅安全意識帶入日常。完成遊戲後換領「工程獅🦁」限定紀念品，大家都玩得投入又開心！

而作為今次焦點活動嘅 FUN享單車站，由前港隊運動員、資深單車教練仇多明親自指導，向參加者講解喺共享徑踩單車嘅正確方法、安全守則，以及裝備選擇小貼士。見到大人同小朋友都踴躍參與，邊學邊體驗，真係特別有意思💝

隨着東岸板道（東段）落成啟用，活力環島長廊又多一段開通喇！再次感謝大家支持，一齊為東岸板道增添更多活力，同時實踐共享、互讓、共融嘅板道文化。喺共享徑，單車使用者應減慢車速、避讓行人，並保持安全距離，而行人亦要避免突然橫過單車道，雙方共享海濱空間。另外，玻璃觀景台使用者，就要記得跟隨指示穿著保護鞋套。最後，離開板道前當然要同各個藝術裝置打個卡、留個記念，不過大家要小心唔好企上去或者攀爬，好好愛護公物！期待下次再同大家喺板道見！🥳

#土木工程拓展署 #東岸板道 #共享徑 #活力環島長廊 #維港海濱 #親子好去處 #免費活動 #香港好去處 #一板貫通暢踏西東

【3月14日 ｜🚴連成後首個單車工作坊登場！】

東岸板道（東段）年初開幕後，整段板道總長 2.2公里，令活力環島長廊又多一段開通！一步一景，沿住維港吹住海風，行得舒服之餘，亦更方便大家喺同一條「 #共享徑」入面，行人🚶🏻‍♀️、跑友同單車🚲一齊有序共融，而且仲可以參觀玻璃觀景台同欣賞唔同藝術裝置！想玩得開心😄又踩得安心💝？咁就唔好錯過下個星期六嘅「 」！

當日喺東岸板道唔同位置會有共享徑資訊同小遊戲：

🎯 FUN享 攤位遊戲：完成「玻璃觀景知識台📖」、「共享徑守則神射手⚽」、「圈出共享徑好行為⭕」及「板道飛行棋✈️」，即可換領「工程獅🦁」限定紀念品（數量有限，換完即止）！

🚴 FUN享 單車站：作為板道連成 2.2KM後首個單車工作坊，由前港隊運動員、資深單車教練仇多明指導大家點樣正確、安全喺共享徑踩單車，兼分享裝備選擇貼士。

🕰️ 時段：15:00 / 16:00 / 17:00（每節約45分鐘）
📍 集合地點：東岸板道（東段）海裕街
✅ 全免｜6歲或以上｜必須懂踩兩輪單車｜11歲以下需家長同行並一同報名
🔗 報名連結：https://forms.gle/gwAnx5dgLCJC9dyZ9

名額有限，先到先得

填妥上表，將有專人透過Whatsapp/Email通知成功報名。

記得mark低日子，一齊暢遊板道啦🥳（活動如因天氣原因出現改動，會透過Facebook專頁公佈）

#東岸板道 #一板貫通暢踏西東 #板道 #活力環島長廊 #社區聯絡中心 #親子活動 #免費活動 #香港好去處

【加入東段新元素🌟一齊睇睇大家「享」道體驗日🌊精彩瞬間📸】

【大家「享」道 體驗日】喺1月25日返咗嚟北角東岸板道喇！今次活動範圍仲延伸至新開放嘅東段，現場熱氛更加熱鬧💖！大人細路都玩得好開心，喺一片笑聲中學習「S.H.A.R.E. 海濱使用攻略」💡！

一齊睇吓當日精彩時刻👇：

【🎯S.H.A.R.E 攤位遊戲】
今次我哋總共有7️⃣個互動攤位遊戲，分佈喺西段同新開放嘅東段～只要完成小遊戲任務，了解板道同使用海濱嘅要點🌊，就可以換領人氣爆燈嘅禮物🎁！漁夫帽、便攜小袋同水樽仲被全數換領，大受歡迎！而東段兩個新遊戲嘅禮物：隨身小鏡同透明海浪明信片亦極具收藏價值，備受喜愛💖！

【🏒玻璃觀景知識台】
去玻璃觀景台踏浪之前，先要學識點樣愛護呢個咁靚嘅打卡點📷！「玻璃觀景知識台」用咗簡單有趣嘅冰壺遊戲，教大家快速掌握玻璃觀景台嘅使用守則，再馬上學以致用👏！

【🏀共享徑守則神射手】
乘住海風喺板道踩單車係一大樂事🚲，但開心之餘都要尊重其他使用者，共享板道！另一個新遊戲「共享徑守則神射手」就提醒咗各位「車手」使用共享徑嘅重點！每位參加者都可以「命中要點」，十分厲害💯！

【🐟釣魚「享」道工作坊】
再次登場嘅釣魚「享」道工作坊🎣，繼續由「漁家嚮導」導師帶領大家體驗垂釣樂趣！當日仲有小朋友參加者成功釣到大魚🐠，非常驚喜！各位喺體驗過程中，邊玩邊實踐釣魚安全同衛生守則✅，度過咗愉快又有意義嘅時光！

多謝各位參與【大家「享」道 體驗日】！希望大家繼續「享」道，齊齊守護呢個咁靚嘅海濱空間～記得留意本頁嘅最新消息🔔，下次活動再見👋！

— — —
【SHARE海濱使用攻略】

一個海濱，你我有份🌊！跟住下面「S.H.A.R.E.」五大原則去共享海濱空間、互相尊重，就可以各適其適地享受海濱環境！

S – Safety 安全篇：單車禮讓行人、狗狗牽繩、釣魚揮竿環顧四周，使用海濱安全又放心。
H – Hygiene 衞生篇：垃圾入桶、清理寵物大小便，齊齊保持海濱清新又舒服。
A – Access 設施篇：輪流使用設施，保持通道暢通。
R – Respect 尊重篇：人人互相尊重，共享海濱空間。
E – Ease 寧靜篇：減低音量，晚上11時後保持安靜，靜靜享受海風。

#土木工程拓展署 #東岸板道 #一板貫通暢踏西東 #活力環島長廊 #大家享道體驗日 #安全篇 #衞生篇 #設施篇 #尊重篇 #寧靜篇

【1月25日 全新東段新元素🌟！大家「享」道體驗日 DAY 3 🌊】

嚟緊1月25號（星期日），北角東岸板道會加推【大家「享」道 體驗日】 DAY 3👏🏻！除咗之前喺西段出現過嘅5️⃣個互動攤位遊戲之外🎁，今次仲會喺新開放嘅東段增設2️⃣個攤位遊戲！大家過開嚟不妨都了解多啲板道同「S.H.A.R.E. 海濱使用攻略」，透過小遊戲任務，學識正確使用同好好愛惜我哋嘅海濱場地🫶🏻! 完成任務後，仲可以換超人氣禮物（漁夫帽、便攜小袋或水樽，同埋東段限定驚喜禮物🎁）！

當日仲會再次舉行大受歡迎嘅「釣魚『享』道工作坊」🐟，上次miss咗啲朋友，快啲撳入去報名啦👉https://forms.gle/efPY9X3Mb9my7rMZ7

🐟釣魚『享』道工作坊🎣
「漁家嚮導」作為全港首個以休閒漁業為核心嘅社區平台。💁🏻‍♂️導師將同大家分享漁民文化同釣魚知識，仲會帶領參加者喺東岸板道體驗釣魚樂🎣，教授閒釣技巧、以及安全同衛生小貼士！（歡迎六歲以上參加，須由家長陪同）大會將提供釣魚用具，零基礎都冇問題👌🏻！報名🔗 https://forms.gle/efPY9X3Mb9my7rMZ7

👉🏻場次A｜2:00pm - 3:30pm
👉🏻場次B｜4:00pm - 5:30pm

🎯S.H.A.R.E 攤位遊戲
邊玩邊學「SHARE海濱使用攻略」五大重點，寓學習於玩樂！

當日都會喺板道東段設有Go Green Cart，誠邀大家一齊嚟邊玩邊學 #低碳生活小貼士♻️

📆有興趣參加記得mark實日子（1月25日）去北角東岸板道喇！

— — —
【SHARE海濱使用攻略】

一個海濱，你我有份🌊！跟住下面「S.H.A.R.E.」五大原則去共享海濱空間、互相尊重，就可以各適其適地享受海濱環境！

S – Safety 安全篇：單車禮讓行人、狗狗牽繩、釣魚揮竿環顧四周，使用海濱安全又放心。
H – Hygiene 衞生篇：垃圾入桶、清理寵物大小便，齊齊保持海濱清新又舒服。
A – Access 設施篇：輪流使用設施，保持通道暢通。
R – Respect 尊重篇：人人互相尊重，共享海濱空間。
E – Ease 寧靜篇：減低音量，晚上11時後保持安靜，靜靜享受海風。

#大家享道體驗日 #安全篇 #衞生篇 #設施篇 #尊重篇 #寧靜篇

想知更多關於 #海濱好去處 資訊，記得留意本頁更新！🌟
- - - - - - - - - - - - - - - - - - - - - - - - - - - - - - - -
🥰 追蹤埋「海濱限定」Instagram：.PopUp.HK
🔎海濱事務委員會網頁：https://www.hfc.org.hk/tc/
#維多利亞港 #維港 #海濱共享空間 #大家享道體驗日 #安全篇 #衛生篇 #設施篇 #尊重篇 #寧靜篇

【香港東岸板道｜十個文青打卡熱點】

東岸板道東段開放左喇！沿途設有多件特色藝術裝置，大家可以乘住海風，沉浸於呢趟同「自然」與「聲音」連結嘅探索旅程。
由東到西，成條東岸板道連同附近街區，串連成一條充滿驚喜嘅文藝散步路線。記低以下10個寶藏打卡點，無論係影相出片、散步放鬆，定係感受地道香港風情，一次過滿足你！

1️⃣葛量洪號滅火輪展覽館
🚶 由海裕街出口步行約12分鐘
位於鰂魚涌公園，將昔日滅火輪變身消防海務博物館，紅白色船身充滿復古氣息。打卡之餘仲可以了解滅火輪歷史！

2️⃣ COAST BOARDWALK 打卡字樣
🚶由海裕街入口步行約1分鐘
從海裕街進入板道，迎面就係東岸板道東段全新地標！巨型字樣醒目吸睛，尤其日出時間，係不可錯過嘅打卡點。

3️⃣健康東街面向維港— 「港版富士山」
🚶由健康東街出口步行約4分鐘
只需企喺健康東街與七姊妹道交界處，向板道位置舉機。經典海景街道，包括山、海、叮叮車、紅色的士，一鏡盡攝，猶如「港版富士山」。

4️⃣鯨鯊壁畫
🚶由健康東街入口步行約2分鐘
從健康東街進入板道後，向西沿板道漫遊，即可觀賞一片海洋藝廊。調啱角度，仲可以影低由三條橋墩拼接而成嘅巨型鯨鯊，一同感受板道獨有嘅藝術氣息。

5️⃣水空之鏡
🚶由健康東街入口步行約4分鐘
從海洋藝廊沿板道繼續向西前行，即可踏上體驗式玻璃觀景台，如踏浪而行。除咗向下影玻璃下嘅海浪，放相機於低位向上拍攝，仲可拍出天空倒影！順帶一提，場地提供嘅鞋套喺使用後均會以酒精內外消毒，之後重用，大家可以安心前往觀景台打卡。建議避開假日前往，以免人潮擁擠影響體驗。

6️⃣春秧街
🚶由和富花園出口步行約4分鐘
經和富花園轉盤橋離開板道後，沿北角道散步至春秧街，就可踏入舊區風情與叮叮車交織嘅街景，洋溢住老香港嘅生活氣息。

7️⃣維港兩岸日落觀景點
🚶由和富花園入口步行約3分鐘
日落時分，維港天際線喺一片金黃中鋪展，可以一覽港島同九龍兩岸嘅美景。停下腳步，享受一場溫柔嘅黃昏。

8️⃣板道夜景
🚶由板道所有入口進入
無論喺板道上嘅邊個位置，入黑後嘅板道別有一番浪漫。霓虹燈光倒映海面，以慢快門捕捉呢片流動嘅璀璨光影，定格迷人夜色。

9️⃣Oi! building 油街實現
🚶由油街出口步行約3分鐘
沿板道向西步行至油街出口，再沿油街前行，就會見到歷史建築化身嘅藝術空間「Oi! building 油街實現」！乍看猶如鬧市中寧靜嘅靈動綠洲，更加係愜意睇展覽嘅好去處。

🔟炮台山樓梯牆
🚶由油街出口步行約4分鐘
沿油街繼續向炮台山港鐵站方向前行，即可見到鋸齒形半山樓梯，配上柔和藍綠黃色嘅格子，係不可錯過嘅街頭景色。

10個打卡點你又最中意邊一個呢？一齊踏上東岸版道，體驗呢條充滿驚喜嘅文藝散步路線！

#土木工程拓展署 #東岸板道 #一板貫通暢踏西東 #活力環島長廊

【北角東岸板道（東段）12月29日開放！🎉｜三大打卡亮點率先睇！🌟】

📍北角海濱花園接駁至鰂魚涌海裕街

萬衆期待❗北角東岸板道（東段）聽日（12月29日）朝早6點正式開放喇～到時連接埋西段，代表全長約2.2公里嘅板道會全面貫通👏！北角海濱花園、渣華道北角汽車渡輪碼頭、民康街、健康東街及海裕街都分別設置咗出入口位，非常方便！ ➡️大家可根據附上嘅地圖揀最方便嘅出入口去板道～另外，唔識點行都唔緊要！北角同鰂魚涌港鐵站出入口地下都有指示貼紙Guide住大家，出閘後跟住行就得啦～🚶🏻

即睇東段3️⃣大必去打卡點👇🏻

1️⃣漮．水空之鏡☁️Sky Wave
東段其中一大亮點，就係體驗式玻璃觀景台🪞，用嶄新角度俯瞰腳下嘅維港海面，等你「踏上海浪」盡情打卡📸！提提大家，玻璃觀景台嘅開放時間係每日朝10晚6，如天氣欠佳，就會暫停開放，而開放初期會有大使駐場，進入玻璃觀景台前，記住遵從大使指示，入場者均要穿著場地提供嘅鞋套👟，主要是為了安全起見及保護玻璃以保持良好狀態供市民欣賞。訪客然後就可以喺上面自由體驗，完成體驗後記得將鞋套交還出口處✅以上措施，我們會在開放後不時檢討，有需要時可能會作出調整。

2️⃣渡．寵物花園🐾Pet Wave
北角電照街遊樂場旁邊嘅寵物友善區，可以去完隔離寵物公園放完電，再來哩度休息吓🐕，打造人與寵物共享嘅至Chill空間！無論由北角海濱花園嘅出入口，或者遲啲可以經升降機直達汽車渡輪碼頭上層，嗰度其中一段板道仲展示咗本地插畫師以寵物主題嘅畫作🖍️，記得去埋打卡！

3️⃣演．藝創長廊🎨Art Wave
呢個多功能開放式空間沿途亮點處處，步步皆有發現！除咗有多件連結「聲音🔈」同「自然🌳」嘅藝術裝置，包括「心靜漣椅」、「小島流聲」，畀大家喺繁忙生活中放鬆身心靈🧘🏻！～沿途橋墩仲展示咗本地藝術家設計嘅海洋生物壁畫🪼，同埋東區吉祥物「東東」遊覽東區人氣景點嘅圖案🥰；行到差不多近海裕街出口嘅開揚位置，仲設有「維港之門」一系列色彩繽紛附設枱凳嘅拱形裝置🌈，去到近海裕街仲有海濱小廣場，同埋巨型「East Coast Boardwalk」字樣畀大家打卡𠻹！

活力環島長廊又多一段開通啦！期待喺北角東岸板道（東段）見到大家，一齊感受海浪嘅多重魅力🌊！

📌由12月29日起
東岸板道（東段） 24小時開放
（體驗式玻璃觀景台除外）

#土木工程拓展署 #東岸板道 #一板貫通暢踏西東 #板道 #活力環島長廊