18/09/2026
અમદાવાદ: ખેતી બેંક પરિવાર દ્વારા આયોજિત “ખેતી બેંકના રાજા – સાર્વજનિક ગણેશોત્સવ ૨૦૨૬”ના ચોથા દિવસે શ્રી B.K. જોશી (RCS, ગુજરાત), શ્રી P.S. ઉપાધ્યાય (જોઈન્ટ રજિસ્ટ્રાર) તથા શ્રી R.D. ત્રિવેદી (જોઈન્ટ રજિસ્ટ્રાર) વિશેષ અતિથિ તરીકે પધાર્યા હતા. મહાનુભાવોએ શ્રી ગણેશજીની ભાવપૂર્વક આરતી કરી આશીર્વાદ મેળવ્યા હતા.
આ વર્ષના ગણેશોત્સવના પંડાલની વિશેષ થીમ માનનીય વડાપ્રધાન શ્રી નરેન્દ્રભાઈ મોદીજીની ૨૫ વર્ષની અવિરત જનસેવા યાત્રા, તેમના જન્મદિવસ નિમિત્તે “આશીર્વાદનો દીવો” તથા વિકસિત ભારતના સંકલ્પ સાથે જોડવામાં આવી છે. સાથે જ કેન્દ્રીય ગૃહ અને સહકાર મંત્રી શ્રી અમિતભાઈ શાહના નેતૃત્વ હેઠળ સહકાર ક્ષેત્રમાં થઈ રહેલી કામગીરીને પણ પંડાલની થીમમાં સ્થાન આપવામાં આવ્યું છે.
વડાપ્રધાનશ્રીના જન્મદિવસના પાવન અવસરે ખેતી બેંકની હેડ ઓફિસ ખાતે ૧,૨૦૦ “આશીર્વાદના દીવડા” પ્રગટાવવામાં આવ્યા હતા. બેંકની વિવિધ શાખાઓમાં પણ દીપ પ્રાગટ્ય કરી વડાપ્રધાનશ્રીના ઉત્તમ સ્વાસ્થ્ય, દીર્ઘાયુષ્ય અને રાષ્ટ્રસેવાની અવિરત શક્તિ માટે શ્રી ગણેશજીના ચરણોમાં મંગલ પ્રાર્થના કરવામાં આવી હતી.
આ પ્રસંગને વધુ ભાવસભર બનાવતાં કલાકારો દ્વારા વિશેષ “નાગરાજ આરતી” કરવામાં આવી હતી. દીવડાઓના પ્રકાશ વચ્ચે સૌએ શ્રી ગણેશજી સમક્ષ વડાપ્રધાનશ્રીના દીર્ઘાયુષ્ય અને દેશની સુખ-સમૃદ્ધિ માટે પ્રાર્થના કરી હતી.
પંડાલમાં વિશેષ QR કોડની વ્યવસ્થા પણ કરવામાં આવી છે, જેના દ્વારા મુલાકાતીઓ QR સ્કેન કરીને વડાપ્રધાન શ્રી નરેન્દ્રભાઈ મોદીજીને જન્મદિવસની શુભેચ્છા અને આશીર્વાદનો સંદેશ આપી શકે છે. આમ, “એક દીવો આશીર્વાદનો — એક સંદેશ શુભકામનાનો”ના ભાવ સાથે નાગરિકોને આ ઉજવણીમાં સહભાગી થવાની તક આપવામાં આવી છે.
આ પ્રસંગે મહાનુભાવોને ખેતી બેંકની ૭૫ વર્ષની ગૌરવપૂર્ણ સહકારયાત્રા દર્શાવતી ડોક્યુમેન્ટરી રજૂ કરવામાં આવી હતી. બેંકના નાણાકીય પરિમાણો, પ્રગતિ, ખેડૂતો માટેની કામગીરી તથા ભાવિ આયોજન અંગે વિસ્તૃત ચર્ચા કરવામાં આવી હતી. મહાનુભાવોએ પણ QR કોડ સ્કેન કરીને વડાપ્રધાનશ્રીને જન્મદિવસની શુભેચ્છા પાઠવી હતી.
ખેતી બેંકના ચેરમેન શ્રી ડોલર કોટેચા તથા સમગ્ર ખેતી બેંક પરિવારે મહાનુભાવોનું હાર્દિક સ્વાગત કરી તેમની ઉપસ્થિતિ બદલ આભાર વ્યક્ત કર્યો હતો.
“૧,૨૦૦ આશીર્વાદના દીવડા, હજારો શુભકામનાઓ અને શ્રી ગણેશજીના ચરણોમાં એક જ પ્રાર્થના — રાષ્ટ્રસેવાની આ યાત્રા અવિરત પ્રકાશિત રહે.”
#ખેતીબેંકનારાજા
