District Information Office, Raigad

09/10/2026

महाराष्ट्राचे वैभव असलेली पंढरपूर आषाढी वारी ही देशातली भक्तीमार्गातील सर्वात प्राचीन परंपरा आहे. या परंपरेने सर्वांना एक मोठी ऊर्जा दिलेली आहे. वारीचा आध्यात्मिक आणि सांस्कृतिक वारसा जागतिक प्रेक्षकांपर्यंत पोहोचविण्यासाठी माहिती व जनसंपर्क विभागामार्फत निर्मिती करण्यात आलेल्या ‘पंढरपूर वारी - इन द फूटस्टेप्स ऑफ द सेंट्स’ या माहितीपटाची प्रतिष्ठित ‘एशियन अकॅडमी क्रिएटिव्ह अवॉर्डस २०२६’मध्ये ‘सर्वोत्कृष्ट ब्रँडेड कार्यक्रम’ श्रेणीत भारताचा राष्ट्रीय विजेता म्हणून निवड झाली आहे. महाराष्ट्राच्या संस्कृतीचे हे जागतिक पटलावर उमटलेले प्रतिबिंबच आहे. - मुख्यमंत्री देवेंद्र फडणवीस

#पंढरीचीवारी #पंढरपूरवारी #आषाढी #वारी

09/10/2026

राज्यातील जून ते सप्टेंबर २०२६ या कालावधीत पर्जन्यमानातील तूट आणि अन्य घटकांमुळे प्रभावित झालेल्या दुष्काळग्रस्त २६५ तालुक्यांतील पात्र लाभार्थ्यांना अन्नधान्याचा पुरवठा सुरळीतपणे आणि विनाविलंब उपलब्ध करून देण्याचे निर्देश राज्य शासनाने दिले आहेत.

राष्ट्रीय अन्नसुरक्षा योजनेंतर्गत पात्र लाभार्थ्यांना मोफत अन्नधान्य उपलब्ध करून देण्यासह, पात्रतेनुसार नवीन लाभार्थ्यांचा योजनेत समावेश, आधार संलग्नीकरण, स्थलांतरित लाभार्थ्यांना पोर्टेबिलिटी सुविधेचा लाभ आणि अन्नधान्य वितरणावर प्रभावी देखरेख ठेवण्याबाबत अन्न, नागरी पुरवठा व ग्राहक संरक्षण विभागाने ९ ऑक्टोबर २०२६ रोजी शासन निर्णय निर्गमित केला आहे.

दुष्काळग्रस्त भागातील शेतीवर अवलंबून असलेले शेतकरी, शेतमजूर आणि अन्य प्रभावित घटकांना अन्नधान्याची टंचाई भासू नये, यासाठी प्रभावी व्यवस्था निर्माण करण्याच्या उद्देशाने शासनाने या मार्गदर्शक सूचना जारी केल्या आहेत.

शासन निर्णय : gr.maharashtra.gov.in/Site/Upload/Go…

#दुष्काळ

09/10/2026

टीबीमुक्त रायगडसाठी ‘जोश’ उपक्रमाला उत्स्फूर्त प्रतिसाद

रायगड-अलिबाग,दि.9 (जिमाका): टीबीमुक्त भारताच्या दिशेने केंद्र शासनाच्या आरोग्य मंत्रालयाच्या पुढाकाराने सुरू करण्यात आलेल्या ‘Josh’ उपक्रमाला जिल्ह्यात उत्स्फूर्त प्रतिसाद मिळाला. जिल्ह्यात विविध ठिकाणी क्षयरोगाबाबत जनजागृती करण्यात आली तसेच राष्ट्रीय सेवा योजना (NSS) आणि राष्ट्रीय छात्र सेना (NCC) विद्यार्थ्यांना टीबी निर्मूलनासाठी योगदान देण्याची शपथ देण्यात आली. यावेळी मोठ्या संख्येने ‘Josh’ स्वयंसेवकांची नोंदणी करण्यात आली.

केंद्रीय आरोग्य मंत्रालयाच्या वतीने ‘Josh’ उपक्रमाचे राष्ट्रीय स्तरावर उद्घाटन करण्यात आले. यावेळी केंद्रीय आरोग्य व कुटुंब कल्याण मंत्री जे. पी. नड्डा, केंद्रीय मंत्री मनसुख मांडवीय तसेच केंद्रीय आरोग्य सचिव यांच्या उपस्थितीत टीबीमुक्त भारताच्या अभियानात NSS व NCC विद्यार्थ्यांना सहभागी करून घेण्याच्या उपक्रमाला सुरुवात करण्यात आली.

जिल्हाधिकारी तथा जिल्हा आपत्ती व्यवस्थापन प्राधिकरण अध्यक्ष किशन जावळे यांच्या सूचनेनुसार रायगड जिल्ह्यात या उपक्रमाची प्रभावी अंमलबजावणी करण्यासाठी सर्व विभाग तसेच पंचायतराज संस्थांच्या प्रतिनिधींना सहभागी होण्याचे आवाहन करण्यात आले होते. त्यानुसार जिल्हा क्षयरोग अधिकारी डॉ. मनिषा चव्हाण, जिल्हा परिषदेच्या मुख्य कार्यकारी अधिकारी श्रीमती नेहा भोसले, जिल्हा आरोग्य अधिकारी डॉ. दयानंद सूर्यवंशी, जिल्हा शल्यचिकित्सक डॉ. निशिकांत पाटील आणि शिक्षणाधिकारी श्रीमती रेश्मा साळुंके यांच्या समन्वयातून जिल्ह्यातील विविध शैक्षणिक संस्था व संबंधित विभागांना उपक्रमाची माहिती देण्यात आली.



या उपक्रमांतर्गत आजच्या दिवशीच 20 वर्ग-1 अधिकारी आणि 80 स्वयंसेवकांची ‘Josh Team’मध्ये नोंदणी करण्यात आली. टीबीमुक्त रायगड हे उद्दिष्ट साध्य करण्यासाठी हा उपक्रम केवळ शासकीय कार्यक्रम न राहता जनसहभागाचे प्रभावी माध्यम बनावे, यासाठी सर्वांनी सहभागी व्हावे, असे आवाहन करण्यात आले.

‘टीबीमुक्त भारत’ ॲपद्वारे सहभागी होण्याचे आवाहन

‘Josh Team’मध्ये सहभागी होण्यासाठी ‘टीबीमुक्त भारत’ ॲप मोबाईलच्या Play Store वरून डाउनलोड करून त्यातील ‘Josh Team’ या पर्यायावर क्लिक करावे. त्यानंतर आवश्यक माहिती भरून OTP द्वारे पडताळणी करावी व पासवर्ड सेट करून लॉगिन करावे. जिल्हास्तरावर मंजुरी मिळाल्यानंतर पुढील प्रक्रियेद्वारे स्वयंसेवक म्हणून सहभागी होता येणार आहे. अधिकाधिक नागरिकांनी या उपक्रमात सहभागी होऊन टीबीमुक्त रायगडच्या उद्दिष्टासाठी योगदान द्यावे.

‘निक्षय मित्र’ बनून टीबी रुग्णांना मदत करण्याचे आवाहन

जिल्ह्यातील ग्रामपंचायती, पंचायत समित्या व जिल्हा परिषदेचे अध्यक्ष, सभापती, सदस्य तसेच सरपंच यांनी आपल्या गावातील टीबी रुग्णांच्या उपचाराकडे विशेष लक्ष द्यावे. रुग्णांना उपचार पूर्ण करण्यासाठी प्रोत्साहन देतानाच त्यांच्या आरोग्यात सुधारणा होण्यासाठी ‘निक्षय मित्र’ म्हणून पुढाकार घ्यावा, त्यांना फूड बास्केटचे वाटप करावे तसेच ग्रामपंचायतीच्या माध्यमातून आवश्यक आर्थिक तरतूद करावी,.

या अभियानाच्या यशस्वीतेसाठी जिल्हा पीपीएम समन्वयक दंतराव सतीश, डॉ. सुरेश ठोकळ आणि डॉ. अक्षयराज राठोड यांनी विशेष प्रयत्न केले. जिल्ह्यातील विविध विभाग, अधिकारी, कर्मचारी, शैक्षणिक संस्था, NSS व NCC विद्यार्थी तसेच स्वयंसेवकांनी उत्स्फूर्त सहभाग नोंदविल्याबद्दल जिल्हा क्षयरोग अधिकारी डॉ. मनिषा चव्हाण यांनी सर्वांचे आभार मानले.

0000

09/10/2026

आरटीओ पनवेलमध्ये नागरिकांसाठी मदत केंद्र; 65 हून अधिक फेसलेस सेवांचा लाभ घ्या

रायगड-अलिबाग,दि.9 (जिमाका): नागरिकांना परिवहन विभागाच्या सेवा अधिक पारदर्शक, सुलभ आणि गतिमान पद्धतीने उपलब्ध करून देण्यासाठी खारघर येथील प्रादेशिक परिवहन कार्यालय, पनवेल (आरटीओ) येथे नागरिक मदत व मार्गदर्शन केंद्र सुरू करण्यात आले आहे. तसेच वाहन आणि वाहनचालक अनुज्ञप्तीशी संबंधित विविध ऑनलाइन व फेसलेस सेवा उपलब्ध करून देण्यात आल्या आहेत. नागरिकांनी या सुविधांचा लाभ घेऊन आपला वेळ वाचवावा आणि मध्यस्थांच्या आमिषाला बळी पडू नये, असे आवाहन प्रादेशिक परिवहन कार्यालयामार्फत करण्यात आले आहे.

आरटीओ कार्यालयाच्या प्रवेशद्वाराजवळ सुरू करण्यात आलेल्या मदत व मार्गदर्शन केंद्रामध्ये नागरिकांच्या कामाचे स्वरूप समजून घेणे, आवश्यक कागदपत्रांची प्राथमिक तपासणी करणे आणि संबंधित विभागाकडे योग्य मार्गदर्शन करणे आदी सुविधा उपलब्ध आहेत. यामुळे नागरिकांची गैरसोय टाळण्यासह एजंटांकडून होणारी दिशाभूल रोखण्यास मदत होणार आहे.

वाहनांच्या 42 सेवा फेसलेस

परिवहन विभागाच्या अधिकृत "parivahan.gov.in" (https://parivahan.gov.in) या संकेतस्थळावर वाहनधारकांसाठी विविध ऑनलाइन सेवा उपलब्ध आहेत. ‘वाहन’ (VAHAN) संगणकीय प्रणालीअंतर्गत एकूण 88 सुविधांपैकी 42 सेवा फेसलेस स्वरूपात दिल्या जात आहेत. वाहन हस्तांतरण, कर्जबोजा नोंद कमी करणे, ना हरकत दाखला आदी कामांसाठी उपलब्ध असलेल्या ऑनलाइन सुविधांचा लाभ नागरिकांना घेता येतो.

‘सारथी’ प्रणालीद्वारे 23 सेवा ऑनलाइन

वाहनचालक अनुज्ञप्तीशी संबंधित ‘सारथी’ (SARATHI) प्रणालीअंतर्गत एकूण २७ सुविधांपैकी २३ सेवा फेसलेस स्वरूपात उपलब्ध आहेत. यामध्ये शिकाऊ अनुज्ञप्ती (लर्निंग लायसन्स) घरबसल्या मिळविण्याची सुविधाही समाविष्ट आहे. तसेच अनुज्ञप्तीचे नूतनीकरण आणि अनुज्ञप्तीवरील पत्ता बदल यांसारख्या कामांसाठी उपलब्ध ऑनलाइन सेवांचा लाभ घेता येतो.

या सुविधांमुळे अनेक कामांसाठी आरटीओ कार्यालयात प्रत्यक्ष उपस्थित राहण्याची आवश्यकता कमी झाली आहे. नागरिकांनी अधिकृत संकेतस्थळावरून अर्ज करून आवश्यक प्रक्रिया पूर्ण करावी, असे आवाहन करण्यात आले आहे.

मोबाईल क्रमांक अद्ययावत करण्यासाठी ई-मेल सुविधा

वाहनाच्या नोंदणी प्रमाणपत्रावरील मोबाईल क्रमांक अद्ययावत करण्यासाठी नागरिकांनी आधार कार्ड आणि वाहनाशी संबंधित आवश्यक कागदपत्रे स्वतःच्या ई-मेलवरून [email protected] या ई-मेल पत्त्यावर पाठवावीत. या सुविधेमुळे संबंधित कामासाठी कार्यालयात प्रत्यक्ष उपस्थित राहण्याची गरज टाळता येऊ शकते.

एचएसआरपी नंबर प्लेटसाठी ऑनलाइन नोंदणी

वाहनांवर उच्च सुरक्षा नोंदणी क्रमांकपाटी (HSRP) बसविण्यासाठी वाहनधारकांनी महाराष्ट्र परिवहन विभागाच्या अधिकृत संकेतस्थळावरून ऑनलाइन अर्ज करून प्रलंबित प्रक्रिया पूर्ण करावी. एचएसआरपीसंदर्भातील तक्रारींसाठी संबंधित कंपनीच्या ग्राहक निवारण कक्षाशी ७४२८९६५२५२ या क्रमांकावर किंवा [email protected] या ई-मेलवर संपर्क साधता येईल.

तक्रारींसाठी आरटीओशी संपर्क साधण्याचे आवाहन

वाहन आणि सारथी प्रणालीवरील प्रलंबित अर्ज, वाहन हस्तांतरण, कर्जबोजा नोंद कमी करणे, ना हरकत दाखला, शिकाऊ अनुज्ञप्ती, अनुज्ञप्तीचे नूतनीकरण तसेच अनुज्ञप्तीवरील पत्ता बदल यांसंदर्भात काही अडचण किंवा तक्रार असल्यास नागरिकांनी [email protected] या ई-मेलवर संपर्क साधावा.

नागरिकांनी केवळ प्रत्यक्ष उपस्थिती आवश्यक असलेल्या कामांसाठीच आरटीओ कार्यालयात यावे आणि इतर कामांसाठी अधिकृत ऑनलाइन सेवांचा वापर करावा. तसेच वाहनांची कागदपत्रे अद्ययावत ठेवावीत, एचएसआरपी नंबर प्लेट बसवून घ्यावी आणि वाहतूक नियमांचे पालन करावे. नागरिकांचा वेळ वाचविणे आणि रस्त्यावरील सुरक्षितता वाढविणे हा परिवहन विभागाच्या या प्रयत्नांचा उद्देश आहे.

000000

09/10/2026

अलिबाग तालुक्यातील संचालक मंडळ नागाव हायस्कूल येथे “अमृत वर्ग” प्रशिक्षणाचा शुभारंभ


रायगड-अलिबाग,दि.9(जिमाका): “महाराष्ट्र संशोधन, उन्नती प्रशिक्षण प्रबोधिनी (अमृत) या संस्थेचा “अमृत वर्ग” उपक्रम रायगड जिल्ह्यातील नागाव गावातील संचालक मंडळ नगाव हायस्कूलच्या विद्यार्थ्यांसाठी “अमृत वर्गाचे” आयोजन करण्यात आले होते . विद्यार्थ्यांना मोबाईल फोनपासून दूर ठेवून त्यांच्या सर्वांगीण विकासाला चालना देणे, तसेच त्यांच्यात अभ्यास, शिस्त आणि सकारात्मक विचारांची गोडी निर्माण करणे, हा या उपक्रमामागील प्रमुख उद्देश आहे. या विशेष उपक्रमासाठी पालघर येथून श्री.कैलास कुरकुटे यांची प्रमुख उपस्थिती लाभली. त्यांनी विद्यार्थ्यांना मार्गदर्शन करताना अमृत वर्गाचे महत्त्व, त्याचे उद्दिष्ट आणि विद्यार्थ्यांच्या भविष्यासाठी त्याचा होणारा उपयोग याबाबत सविस्तर माहिती दिली. त्यांच्या मार्गदर्शनामुळे विद्यार्थ्यांना प्रेरणा मिळाली असून, मोबाईलच्या अतिवापरापासून दूर राहून ज्ञान, कौशल्ये आणि व्यक्तिमत्त्व विकासाकडे लक्ष देण्याचा संदेश देण्यात आला.

अमृत संस्थेच्या माध्यमातून आयोजित करण्यात आलेल्या या उपक्रमामुळे विद्यार्थ्यांना शैक्षणिक मार्गदर्शनासोबतच संस्कार, शिस्त आणि जीवनमूल्यांची शिकवण मिळाली. विद्यार्थ्यांच्या उज्ज्वल भविष्यासाठी “अमृत वर्गाची” संकल्पना अत्यंत उपयुक्त ठरत असल्याचे यावेळी अधोरेखित करण्यात आले. या उपक्रमाला विद्यार्थ्यांचा उत्स्फूर्त प्रतिसाद मिळाला. शाळेतल्या शिक्षकानी या उपक्रमाचे कौतुक करून समाधान व्यक्त केले. शालेय मुलांना थोड्यावेळासाठी का होईन मोबाईल फोनपासून दूर ठेवण्यासाठी त्यांची एकाग्रता वढवण्यासाठी, त्यांना योग्य संस्कार होण्यासाठी उत्तम नेतृत्व घडवण्यासाठी अमृत वर्ग प्रभावी माध्यम ठरत असल्याचे शाळेतल्या शिक्षकांनी सांगितले.

अमृतवर्ग घेताना कैलासजी मुरकुटे सरानबरोबर रायगड जिल्हा व्यवस्थापक श्री.शैलेश मराठे व उपव्यवस्थापक मंगेश ढेबे शाळेत उपस्थित होते. संचालक मंडळातील सौ स्नेह जोशी बाईं, कार्याध्यक्षा श्रीमती मंदाताई आठवले बाई, अध्यक्ष श्री मंगेश आठवले सर, सदस्य श्री संदीप ढापरे सर मुख्याध्यापक श्री अजित पाटील सर आदि मंडळींच मोलाचे सहकार्य लाभले.

आधिक माहिती साठी संपर्क :- www.mahaamrut.org.in, रायगड जिल्हा व्यवस्थापक ९११२२२८७५९,श्री शैलेश मराठे ९४२३८९२१८२,कु मंगेश ढेबे ८१४९५५२१४३

000000

Centralized role-based CMS platform for AMRUT government websites.

09/10/2026

‘चला शाळेत जाऊ या’

शिक्षणमंत्री दादाजी भुसे यांच्याकडून अलिबागमधील जिल्हा परिषद शाळांच्या प्रगतीचे कौतुक;

प्रत्यक्ष वर्गात जाऊन विद्यार्थ्यांशी साधला संवाद

09/10/2026

‘चला शाळेत जाऊ या’ अभियानातून रायगडच्या शिक्षण क्षेत्रात नवे पर्व!

शिक्षणमंत्री दादाजी भुसे यांच्या हस्ते अभियानाचा शुभारंभ.

09/10/2026

सेवा संकल्प अभियान’ अंतर्गत आद्य क्रांतिवीर वासुदेव बळवंत फडके यांच्या निवासस्थानी भेट!

रायगड जिल्हा परिषदेच्या ‘सेवा संकल्प अभियान’ अंतर्गत पनवेल तालुक्यातील शिरढोण येथे आद्य क्रांतिवीर वासुदेव बळवंत फडके यांच्या निवासस्थानी भेट देण्यात आली.

यावेळी रायगड जिल्हा परिषद अध्यक्ष मंगेश वाकडीकर, मुख्य कार्यकारी अधिकारी नेहा भोसले, अतिरिक्त मुख्य कार्यकारी अधिकारी रुपाली सातपुते यांच्यासह जिल्हा परिषद व पंचायत समितीचे पदाधिकारी आणि सदस्य उपस्थित होते.

क्रांतिवीरांच्या स्मृतींना अभिवादन करत इतिहासाचा वारसा जपण्याचा संकल्प!

#सेवासंकल्पअभियान #वासुदेवबळवंतफडके #शिरढोण #पनवेल #रायगड #क्रांतिकारक