07/10/2026
బైకు చోరీ కేసును ఛేదించిన అనకాపల్లి టౌన్ పోలీసులు – ఇద్దరు నిందితుల అరెస్ట్, రాయల్ ఎన్‌ఫీల్డ్ బైక్ స్వాధీనం
పోలీస్ సిబ్బందిని ప్రత్యేకంగా అభినందించిన జిల్లా ఎస్పీ శ్రీ తుహిన్ సిన్హా, IPS గారు
అనకాపల్లి పట్టణం, అక్టోబర్ 7: అనకాపల్లి పట్టణ పరిధిలో జరిగిన ద్విచక్ర వాహన చోరీ కేసును అనకాపల్లి టౌన్ పోలీసులు చాకచక్యంగా ఛేదించారు. ఈ కేసుకు సంబంధించి ఇద్దరు నిందితులను అరెస్ట్ చేసి, వారి వద్ద నుంచి చోరీకి గురైన రాయల్ ఎన్‌ఫీల్డ్ మోటార్ సైకిల్‌ను స్వాధీనం చేసుకున్నారు.
జిల్లా ఎస్పీ శ్రీ తుహిన్ సిన్హా, IPS గారి ఆదేశాల మేరకు, అనకాపల్లి టౌన్ సీఐ జి.ప్రేమ కుమార్ గారి పర్యవేక్షణలో, ఎస్ఐ ఎ.వెంకటేశ్వరరావు మరియు వారి సిబ్బంది ప్రత్యేక బృందాలుగా ఏర్పడి గాలింపు చర్యలు చేపట్టారు.
నిందితుల వివరాలు:
సిద్ధాంతపు హరీష్ @ హనోక్ (24 సం.), వృత్తి: కూలీ, నివాసం: పుష్ప లీలా నగర్, తెంగళ్లమూడి, ఏలూరు.
పెద్దసింగ్ రేవంత్ @ సాయి (22 సం.), వృత్తి: వంట మాస్టర్, నివాసం: నామవరం గ్రామం, శాటిలైట్ సిటీ, రాజమండ్రి రూరల్.
నేర నేపథ్యం & వివరాలు:
పోలీసుల దర్యాప్తులో వెల్లడైన వివరాల ప్రకారం... నిందితుడైన సిద్ధాంతపు హరీష్ తల్లిదండ్రులు చిన్నతనంలోనే మరణించడంతో తణుకులోని బంధువుల వద్ద పెరిగాడు. అనంతరం రాజమండ్రి పరిధిలోని నామవరం గ్రామానికి చేరుకుని టైల్స్ కంపెనీలో పనిచేసేవాడు. ఆ సమయంలో జల్సాలు, మద్యం, ధూమపానం వంటి దురలవాట్లకు బానిసయ్యాడు. అదే ప్రాంతానికి చెందిన రెండవ నిందితుడు పెద్దసింగ్ రేవంత్ @ సాయితో పరిచయం ఏర్పడటంతో, తమ జల్సాల కోసం డబ్బు సంపాదించేందుకు ఇద్దరూ కలిసి బైకు దొంగతనాలు చేయాలని పథకం వేశారు. వీరు గతంలో రాజమండ్రి, ఏలూరు-1 టౌన్, తొండంగి (అన్నవరం సమీపంలో) పరిధిలో దొంగతనాలకు పాల్పడ్డారు.
ఇదే క్రమంలో, గత సెప్టెంబర్ 21వ తేదీన అనకాపల్లి పట్టణం, శ్రీ వేంకటేశ్వర స్వామి దేవాలయం వెనుక పార్క్ చేసి ఉన్న AP39 QY 5309 నంబర్ గల క్రోమ్ రెడ్ రాయల్ ఎన్‌ఫీల్డ్ బుల్లెట్ వాహనాన్ని దొంగిలించి పరారయ్యారు. దీనిపై బాధితుడు వేగి అజయ్ కుమార్ ఇచ్చిన ఫిర్యాదు మేరకు అనకాపల్లి టౌన్ పోలీసులు కేసు నమోదు చేసి దర్యాప్తు చేపట్టారు.
అరెస్ట్ & రికవరీ:
దర్యాప్తులో భాగంగా రాజమండ్రి, ఏలూరులలో ప్రత్యేక బృందాలతో గాలింపు చేపట్టిన పోలీసులకు, ఈరోజు (07.10.2026) అందిన విశ్వసనీయ సమాచారం మేరకు అనకాపల్లి పట్టణంలోని కొత్తూరు జంక్షన్ వద్ద నిందితులు పట్టుబడ్డారు. మధ్యవర్తుల సమక్షంలో వారిని అదుపులోకి తీసుకుని, దొంగిలించిన రాయల్ ఎన్‌ఫీల్డ్ బైక్‌ను స్వాధీనం చేసుకుని, రిమాండ్ నిమిత్తం అనకాపల్లి సబ్ జైలుకు తరలించారు.
పోలీస్ సిబ్బందికి ప్రశంసలు:
కేసు నమోదు అయిన వెంటనే సమర్థవంతంగా దర్యాప్తు చేపట్టి, నిందితులను పట్టుకుని చోరీ సొత్తును రికవరీ చేయడంలో చురుగ్గా వ్యవహరించిన అనకాపల్లి టౌన్ ఎస్ఐ ఎ.వెంకటేశ్వరరావు, కానిస్టేబుళ్లు ఎం.సముద్రం, ఆర్.పి.నాయుడు లను జిల్లా ఎస్పీ శ్రీ తుహిన్ సిన్హా, IPS గారు ప్రత్యేకంగా అభినందించి ప్రశంసించారు.
Andhra Pradesh Police
